Aktualitet

Ministrja e Financave dhe Ekonomisë, Anila Denaj tha se, prej datës 18 maj pothuajse të gjitha bizneset në të gjithë vendin janë në punë, pas kufizimit të diktuar nga situata e COVID-19.

Gjatë një interviste televizive ajo theksoi se, aktualisht ka shumë biznese që po aplikojnë për likujditet financiar me qëllim që të mos reduktojnë numrin e punonjësve dhe kësaj nevoje të tyre i ka shërbyer garancia sovrane e qeverisë.

“Në total për të gjithë periudhën janë rreth 80 mijë persona të larguar nga puna, një pjesë e konsiderueshme e të cilëve janë adresuar në paketat e ndihmës të qeverisë. Ndërkohë që numri i pezullimit të bizneseve është shumë i reduktuar, pasi ata po e shohin këtë si një situate të përkohshme”- tha Denaj .

“Nga paketa e parë numri i përfituesve të pagës së luftës ishte 62 mijë e 421 persona, ndërkohë pagesën e parë dhe të dytë e kanë marrë 64 mijë 964 persons. Ndërkohë që deri më sot pagesën 40 mijë lekë e kanë marrë 110 mijë persona nga 176 mijë të anaoncuar”, u shpreh Denaj .

Denaj tha se, “për këtë pagë kemi pasur probleme proceduriale pasi me afatin 10 prill që u morë si bazë për aplikim, ne pamë që shumë biznese kishin ankesa për pjesën e deklarimit për punonjësit e larguar dhe ndaj me një VKM kemi shtyrë afatin edhe për të lehtësuar pjesën proceduriale por edhe për të adresuar një grup tjetër punonjësish të cilët vijnë nga grupi i personave të larguar nga puna”.

Kjo do të thotë shpjegoi Denaj që ne do zgjerojmë bazën e përfituesve të pagës së luftës, përtej 176 mijë individëve në më shumë persona.

“Obligimi ynë është që pagesa prej 40 mijë lekë të shkojë te individët që janë anoncuar si përfitues dhe kjo do të ndodhi në afatin e parashikuar që është data 5 qershor”, – tha ministrja.

Pavarësisht pengesave nga biznesi, punonjësit do të marrin pagën, deklaroi ajo.

Denaj tha se, në garancinë e parë sovrane e vënë në dispozicion të biznesit për pagat e punonjësve, bankat nuk kërkojnë kolateral dhe interesi është i subvencionuar nga qeveria për të gjithë bizneset.

“Janë 342 kredi të miratuara me një fond prej 4.2 miliardë lekë nga 674 aplikime që i adresohen një shume prej 6.8 miliardë lekë. Ndërkohë që fondi total i garancisë është 11 miliardë lekë. Ndërsa garancia e dytë sovrane është në një shumë prej 15 miliardë lekë dhe kjo përfaqëson 60% të kolateralit për biznesit. Për 40 % banka mund të kërkojë kolateral. Norma e interesit këtu është 5% dhe nuk është e subvencionuar”, – tha Denaj.

Për këtë garanci sovrane shpjegoj ministrja, kemi nënshkruan marrëveshjen me 8 banka dhe nesër nënshkruajmë me 4 të tjera për t’i bërë të gjitha bankat aktive./atsh

“Shpendët e Shqipërisë” së bashku me Administratën e Zonave të Mbrojtura Fier realizuan monitorimin e plotë të ishujve lagunorë të Karvastasë për folezimin e shpendëve të ujit.

“Qëllimi i këtij aktiviteti kërkimor është për të realizuar hartëzimin e plotë të folezimit në zonat ishullore të lagunës me qëllim përshtatjen dhe përmirësimin e veprimeve menaxhuese në funksion të ruajtes afatshkurtër dhe afatgjatë të popullatave të shpendëve folezues”, thekson “Shpendët e Shqipërisë”.

Më tej, ky studim ka për qëllim vlerësimin dhe krahasimin e parametrave fizikë të zonave ishullore apo sopeve sikurse njihen në gjuhën vendase, për të evidentuar faktorët që favorizojnë folezimin e këtyre llojeve, pjesa dërrmuese e të cilëve mbart një status kërcënimi sipas listës së kuqe të faunës së Shqipërisë, si dhe janë lloje me interes të lartë ruajtje në nivel Europian dhe më gjerë.

Po ashtu ky studim ka për qëllim krijimin e një momenti apo baze të dhënash reference për monitorimin afatgjatë të shpendëve folezues si dhe ndryshimit të parametrave fizikë të vendfolezimeve të tyre.

“Rezultatet e fazës së parë të monitorimit janë tejet interesante. Të gjitha zonat ishullore u vrojtuan dhe aktivitet folezues u has në vetëm 7 prej tyre. Në 4 zona ishullore aktiviteti folezues ishte në fazat fillestare: kolonitë ishin pothuajse të stabilizuara plotësisht dhe procesi i inkubimit kishte filluar në shumicën e foleve. Në një prej ishujve aktiviteti folezues tashmë ishte në fazën përfundimtare ku të gjithë zogjtë kishin lënë foletë e tyre. Ndërsa në 2 ishuj të tjerë u vrojtuan përpjekje të qarta folezimi”, bëri të ditur “Shpendët e Shqipërisë”.

Për sa i përket llojeve, tha më tej kjo shoqatë, një numër total prej 196 çiftesh folezuese të dallëndyshes së detit të zakonshme (Sterna hirundo) u numërua në të gjithë zonën e studimit, më tej rreth 50 çifte të pulëbardhës këmbëverdhë (Larus michahellis) pothuajse kishin përfunduar tërësisht folezimin.

“Në anën tjetër, për lloje të tjera si dallëndyshja e detit ballëbardhë (Sternula albifrons), kalorësi (Himantopus himantopus), sqepbiza (Recurvirostra avosetta), vrapuesi gushëbardhë (Charadrius alexandrinus) etj, në këtë fazë të parë të monitorimit u vrojtuan vetem sjellje folezuese dhe shpresojmë që në fazën e dytë të monitorimit edhe këta lloje t’i gjejmë në proces të stabilizuar folezimi”, shtoi shoqata.

“Shpendët e Shqipërisë” bën të ditur se është tepër e rëndësishme që në këtë periudhë të shmanget plotësisht shqetësimi (hyrja në ishujt) në zonat e folezimit, si një ndër faktorët thelbësorë që ndikon suksesin e riprodhimit./atsh

Ministri i Bujqësisë dhe Zhvillimit Rural, Bledi Çuçi pak orë përpara hapjes së aplikimeve në Skemën Kombëtare të Mbështetjes për Bujqësinë 2020, u bën thirrje fermerëve se “kush aplikon i pari, përfiton i pari”.
Ministri ka sjellë në vëmendje se aplikimi është shumë i thjeshtë në portalin e-Albania, nga data 29 maj, deri më 16 qershor.
“4 hapa të thjeshtë për të aplikuar online për fondet e skemës kombëtare:
1. Regjistrohu në e-Albania, si qytetar, me të dhënat e kartës tuaj të identitetit.
2. Zgjidh shërbimin “Aplikim për Skemën Kombëtare të mbështetjes për fermerët’’.
3. Zgjidh llojin e fermerit, vendndodhjen e fermës, masën, si dhe sasinë për të cilën do të aplikoni.
4. Kliko dërgo”, informon ministri Çuçi./atsh

Moti sot parashikohet me kthjellime dhe zhvillime vranësirash në mesditë deri në orët e pasdites vonë. Në mbrëmje do të ketë më tepër kthjellime.

Shërbimi Meteorologjik Ushtarak bën me dije se reshjet e shiut do të bëhen të pranishme përgjatë relieveve malore-kodrinore si dhe zonat e ulta pranë tyre prej orëve të mesditës deri ato të pasdites vonë. Përkohësisht reshjet do të marrin formë shtrëngate shoqëruar me shkarkesa elektrike të izoluara si dhe breshër.

Era do të fryjë nga kuadrati i veriut mesatare. Në momentet me reshje dhe përgjatë bregdetit era do të fitojë shpejtësi e vrullshme deri në 20-25 m/s, duke u shoqëruar me valëzim të forcës 2 deri 4 ballë.

Temperaturat parashikohen:

QYTETET Temperaturat në °C Sigla
Shkodër 9/26 Diell re
Kukës 10/21 Diell shi/stuhi
Lezhë 12/26 Diell re
Dibër 7/19 Diell shi/stuhi
Durrës 12/26 Diell re
Tiranë 11/28 Diell re
Elbasan 10/28 Diell pak shi
Berat 6/28 Diell pak shi
Vlorë 12/25 Diell pak shi
Korçë 7/18 Diell shi/stuhi
Gjirokastër 9/25 Diell shi/stuhi
Sarandë 10/25 Diell pak shi/atsh