Aktualitet

Presidenti Ilir Meta deklaroi sot se “kur çdo formë dhune tolerohet, justifikohet dhe nuk ndëshkohet nga shteti, atëherë dhuna kthehet në sistem”.

Meta vlerësoi dhe përshëndeti reagimin e djeshëm qytetar në protestën-marshim të organizuar në Tiranë. “Do t’i mbështes e inkurajoj gjithmonë të gjitha nismat kundër çdo forme dhune dhe abuzivizmi”, tha Presidenti.

Sipas tij, “një shoqëri demokratike dhe sociale, nuk mund të ketë evolucion pa inkurajuar përpjekjet për fuqizimin e rolit të grave dhe vajzave, veçanërisht pa përmbushur detyrimet për mbrojtjen e të drejtave të tyre”.

Meta i bëri thirrje drejtësisë të mos vonojë në nxjerrjen e përgjegjësive për rastin e abuzimit të 15-vjeçares në Babrru, dhe nxiti institucionet arsimore të jenë më të vëmendshme në parandalimin dhe denoncimin e këtyre rasteve tronditëse”.

“Një shoqëri si e jona, që familjen dhe vlerat e saj i vlerëson të shenjta, duhet të ngrihet e gjitha në këmbë për mbrojtjen e tyre”, tha ai./atsh

Një protokoll sigurie dhe përgjegjësie pritet të ngrihet së shpejti nga Ministria e Brendshme, Ministria e Arsimit, si dhe Ministria e Shëndetësisë dhe Mbrojtjes Sociale për të ndarë rolet dhe përgjegjësit nëpër shkolla për të mënjanuar rastet si ajo e 15-vjeçares të ndodhur në Babrru.

Zv/ministrja e Brendshme, Romina Kuko, gjatë një interviste televizive ka bërë me dije se do ketë dhe një lloj vetingu, screening, për të gjithë personat që janë në kontakt me gjimnazistët.

“Në radhë të parë nuk mjafton asnjëherë të përsëritim se sa na ka tronditur të gjithëve rasti i vajzës 15-vjeçare. Unë e kam ndjekur protestën dhe me keqardhje nuk isha e pranishme për shkak të një angazhimi pune jashtë Tirane. Kam qenë në kontakt të vazhdueshëm me organizatorët e saj. Mendoj se është momenti të mos kemi asnjë lloj ndasie për të çështje të tilla si mbrojtja e të miturve, shtresave vulnerabël, dhe me refuzimin në mënyrë sistematike të këtij fenomeni. Pasi morëm dijeni për ngjarjen, që në momentin e parë, kërkova informacion të detajuar dhe hollësishëm nga të gjitha strukturat që operojnë në komisariatin numër 5 të Kamzës, se përse nuk jemi sinjalizuar për këtë fenomen”, – tha Kuko.

“Gjithashtu ditën e hënë zhvilluam mbledhje urgjente online me 150 oficerët e sigurisë në shkolla. Ishim aty së bashku me Ministrinë e Shëndetësisë, Kuvendin, Shoqërinë Civile dhe Ministrinë e Arsimit, për t’i rikujtuar për të zbatuar me rigorozitet protokollin e tyre. Presim që numri oficerëve të shtohet me po aq për të mbuluar të gjithë gjimnazet”, – shtoi ajo.

“Oficeri i sigurisë në shkollë ka rolin e personit që bën paralajmërimi e hershëm të fenomeneve që cenojnë sigurinë e të miturve në shkollë, konfliktet mes adoleshentëve, për të marrë sinjalizime nëse ata rrezikohen nga faktorë të jashtëm siç është lënda narkotike. Ne kemi pasur dhe goditje të këtij fenomeni për shkak të këtij oficerit. Është një fazë sigurie mes psikologut të shkollës dhe policisë. Ai është pjesë e stafit të shkollës, qëndron brenda saj dhe raporton për çështje të brendshme në dy drejtime; në Ministrinë e Arsimit dhe Ministrinë e Brendshme”, tha Kuko.

“Ngjarja ka ndodhur në shkollën 9-vjeçare dhe ne në këto shkolla nuk kemi ende oficerë sigurie. Ngjarja ka ndodhur para një viti e gjysmë. Është në sajë të oficerit të policisë që ky person është denoncuar dhe është arrestuar menjëherë”, – tha Kuko.

Zv/ministrja theksoi faktin se ka ardhur momenti që të kemi një sistem referimi nëpër shkolla, pasi është e pafalshme që abuzimi i 15-vjeçare në Babrru ndodhte prej më shumë se 1 viti e gjysmë dhe nuk raportohej.

“Jam në komunikim të vazhdueshëm me Ministrinë e Arsimit dhe Ministrinë e Shëndetësisë dhe Mbrojtje Sociale për të realizuar një protokoll të posaçëm për mbrojtjen e të miturve në Shkolla. Protokolli përmban rolet e mirëpërcaktuara dhe përgjegjësitë, kush është përgjegjës dhe ne do përpiqemi të përcaktojmë personin përgjegjës për rastin në fjalë, dhe jo ta lëmë topin në mes, por do ketë një person përgjegjës që jep llogari në fund të ditës për sigurinë e këtyre të miturve. Kur çështja ka shkuar në polici është shumë vonë, ne duam të parandalojmë”, – tha Kuko.

“Policia pasi ka marrë dijeni ka vepruar shumë shpejt. Po ju jap dhe disa nga pikat për këtë protokoll. Analizë risku në gjimnazet tona, për të kuptuar se cilët janë të mitur që mund të hasin në vështirësi në familje apo shkollë. Në të njëjtën kohë sistem screening apo vetingu që janë në kontakt të drejtpërdrejtë me të miturit, siç janë rojat, që kanë zhvilluar një trajnim katër javor, ku janë certifikuar për sigurinë. Të njëjtën gjë duam të bëjmë dhe me personat e tjerë që kanë në dorë adoleshentët dhe të miturit. Po ashtu do ketë ndërhyrje në legjislacion për diskriminimin për të parë se si i mbrojmë këto raste. Kultura e heshtjes vjen nga fakti se viktimat janë të trembur për të denoncuar, pasi privatësia e tyre nuk respektohet për fat të keq. Ne duhet të tregohemi të përmbajtur për të mbrojtur identitetin e këtyre personave. Sinjalet e hershme dhe paralajmërimi hershëm janë shumë të rëndësishëm, por kultura e heshtjes është një tjetër element i rëndësishëm për të nxitur denoncimin e këtyre rasteve”, – bëri thirrje Kuko./atsh

Kryetari i Komisionit të Ligjeve Ulsi Manja, duke iu referuar rastit të përdhunimit të një vajze 15-vjeçare në zonën e Babrrusë, tha se do të propozojë heqjen e alternativës për gjykim të shkurtuar për autorët e veprave penale me të mitur dhe dhunën në familje, ndërsa ministrja e Drejtësisë, Etilda Gjonaj ka theksuar se duhet një politikë penale më e ashpër.

Diskutimet u zhvilluan sot, gjatë seancës dëgjimore të ministres së Drejtësisë, Etilda Gjonaj, në komisionin e Sigurisë, ku raportoi për zbatimin e rekomandimeve të qeverisë nga ana e Prokurorisë së Përgjithshme gjatë vitit 2019.

Kryetari i Komisionit të Sigurisë, Ulsi Manja, duke përfituar nga prania e ministres së Drejtësisë Etilda Gjonaj, duke iu referuar rastit të 15-vjeçare në Babrru, u shpreh se “autorët kanë përfituar nga dispozita ligjore e dënimit alternativ apo të shkurtuar”.

Ulsi Manja u kërkoi organeve të drejtësisë të mos mbyllin sytë, por të rrisin profesionalizimin, cilësinë dhe shpejtësinë e hetimeve. “Është koha të bashkojmë forcat zonja ministre, të nxisim drejtësinë e re, t’i japim suportin e duhur dhe të bëhemi barrikadëe për zbatimin e ligjit penal në Shqipëri pa asnjë ekuivok dhe asnjë tolerancë. Parandalimi është ilaçi më i mirë, por në funksion të tij shkojnë edhe vendimet e drejtpërdrejtë ta gjykatave. Do t’i propozoja Kuvendit ndryshime në Kodin e Procedurës Penale neni 406. Përsa kohë organi prokurorisë dhe gjykata i japin mundësi kësaj kategorie personash të përfitojnë nga dispozita për dënime alternative me gjykimin e shkurtuar, duhet t’ia heqim këtë mundësi dhe ta kufizojmë me ligj”, – theksoi Manja.

“Koha që prokuroria dhe gjykatat të marrin në konsideratë rrezikshmërinë dhe përhapjen e këtyre veprave penale dhe të dënojnë autorët sipas dispozitave të ligjit”, – tha Manja.

Ministrja Etilda Gjonaj theksoi se duhet një politikë penale më e ashpër lidhur me krimet ndaj të miturve. “Gjykata në nivel krahasimor ka aplikuar në shumë pak raste, dënimin maksimal, në të shumtën e rasteve dënimet janë 5-10 vite. Prandaj duhet një ashpërsim i dënimeve penale për vepra si abuzim seksual apo abuzimet dhe dhuna ndaj fëmijëve”, – tha Gjonaj. /atsh

Dita Botërore e Mjedisit është data 5 qershor e çdo viti.

Ministrja e Shëndetësisë dhe Mbrojtjes Sociale, Ogerta Manastirliu thotë se fëmijëve u duhet mësuar të kujdesen për natyrën, për të pasur mjedis të shëndetshëm dhe shëndet më të sigurt.

“T’i mësojmë fëmijëve tanë të kujdesen për natyrën dhe të gjithë bashkë të kujdesemi për një mjedis më të shëndetshëm, për shëndet më të sigurt. Dita botërore e Mjedisit”, tha ministrja.

Kjo ditë është e veçantë ku Kombet e Bashkuara (OKB) krijojnë një ndërgjegjësim mbarëbotëror për ruajtjen e mjedisit.

48 vjet më parë u caktuar 5 qershori si Dita Ndërkombëtare e Mjedisit e kjo u caktua nga Asambleja e përgjithshme e OKB-së. Qëllimi i krejt kësaj ishte për të shtuar vetëdijen rreth çështjeve të mjedisit dhe për të tërhequr vëmendjen politike ndaj këtyre çështjeve si dhe për të nxitur veprimin individual në këtë drejtim.

U zgjodh 5 qershori, sepse përkon me ditën e hapjes e Konferencës së Kombeve të Bashkuara mbi Mjedisin, që u mbajt në vitin 1972 në Stokholm, nën udhëheqjen e Programit Mjedisor të Kombeve të Bashkuara. /atsh