Aktualitet

Kush e ka vizituar Përmetin dhe nuk ka ndaluar në baxhon e Altinit, përmetarit të njohur për djathërat dhe gjalpin me shije, i cili ka shndërruar një bunker buzë rruge, në një pikë tërheqëse shitjeje, ku turistët ndalin e shijojnë prodhimet e baxhos së tij, duhet të rikthehet me se s’bën në Përmet.
Kryeministri Edi Rama ndau pamje nga ky investim, ku me mbështetjen e Agjencisë së Zhvillimit Bujqësor dhe Rural (AZHBR) Altini ka instaluar në baxho një linjë të re të prodhimit të qumështit dhe pajisje të teknologjisë bashkëkohore për prodhimin e djathit, që i kanë lehtësuar procesin e prodhimit dhe që rrisin standardin e sigurisë së cilësisë ushqimore.
Gjatë një vizite në baxhon e Altinit, drejtoresha e AZHBR-së, Frida Krifca u shpreh se, kjo është një tjetër sipërmarrje e mbështetur nga qeveria në Përmet, në “Baxho Meshini”.
“Ky investim që kemi mbështetur baxhon e Altinit, është përmes një nga programeve të AZHBR-së për prodhimin dhe përpunimin e qumështit, por që tashmë është bërë edhe një pikë ndalese për turistët, që ofron shërbime kundrejt një pagese simbolike”, – tha Krifca.
Ndërsa Altini tregon se është pjesë e rrjetit të shoqatës së artizanëve dhe prodhuesve tradicionalë të zonës, nisur kjo nga fakti Përmeti ka marrë goxha zhvillim me fokus turizmin, ku vetëm gjatë 3-4 viteve të fundit, numri i vizitorëve është rritur ndjeshëm dhe sezoni turistik është zgjatur në kohë.

Duke u ndalur në investimin që ka transformuar baxhon e tij në minifabrikë moderne, Altini thotë se, prodhimi i sivjetëm arriti deri në 3 tonë qumësht të përpunuar. Janë rreth 60 blegtorë të zonës që sjellin qumështin në baxhon e Altinit, duke siguruar kështu shitje të sigurt të qumështit nga fermat e tyre.

Mbështetja e AZHBR-së e ka ndihmuar Altinin në teknologjitë e përparuar për përpunim e qumështit, por fokus ka marrë edhe sektori i turizmit, që siç thotë Altini janë dy zëra të bashkuar bashkë në zhvillimin e agroturizmit në zonës e Përmetit dhe kjo ka rritur të ardhurat në baxhon e tij.

Në krah të baxhos ai ka ngritur edhe dyqanin për tregtimin e prodhimeve tradicionale dhe sendeve me vlerë autoktone. “Kjo është një ndërtesë që daton në vitin 1939 që në kohën e luftës italo-greke e ngritur në kohën e Turqisë, të cilën e kam kthyer në dyqan që është atraksion dhe vlerë e shtuar në biznesin tim”, – thotë ai.

Altini prodhon djathë kaçkavall, djathë dhie që është shumë i kërkuar dhe në baxhon e tij janë të angazhuar me punë të gjithë pjesëtarët e familjes së tij.

Përmes fotove ai tregon ndryshim drastik që ka pësuar baxho e tij në kohë para financimit dhe sot me investimin e realizuar me mbështetjen e AZHBR-së në një baxho bashkëkohore për të cilën Altini ka projekte të tjera zhvillimi dhe shpreh dëshirën të aplikojë sërish tek AZHBR. /atsh

Duke parë situatën dhe zhvillimet e fundit në lidhje me pandeminë e COVID-19, por edhe pritjen e një fluksi të madh pelegrinazhi në Kishën e Shën Ndout me rastin e festës së 13 Qershorit, bashkia e Kurbinit në bashkëpunim edhe me institucione të tjera vendore ka përgatitur një plan të detajuar masash.

Policia e Shtetit, Policia Bashkiake, Shërbimi Shëndetësor Vendor, Zjarrfikësja etj., do të funksionojnë me shërbime të përforcuara përgjatë periudhës 12-13 qershor me qëllim përballimin e numrit të madh të pelegrinëve që priten në këto dy ditë.

Bashkia njoftoi se “është i ndaluar kategorikisht transporti publik me mjete si autobusë apo furgonë drejt Kishës së Shën Ndout dhe lëvizja do të bëhet vetëm me automjete private ose në këmbë”.

Kryetarja e bashkisë Kurbin, Majlinda Cara u bëri thirrje të gjithë banorëve të Kurbinit dhe pelegrinëve të shumtë që vijnë nga vende të tjera, për respektim rigoroz të distancimit fizik dhe përdorimin e maskave/dorezave apo dezinfektantëve pasi një ditë pelegrinazhi dhe lutjesh mund të kthehet në një vatër infektimi.

Gjithashtu, ajo tha se “është shumë e rëndësishme ruajtja e higjienës personale, por edhe mosndotja e mjediseve publike me ambalazhe e mbetje të ndryshme”.

“13 Qershori është një ditë feste dhe paqeje dhe jam e bindur se, me bashkëpunimin tuaj, si e tillë do të kalojë”, tha Cara. /atsh

Presidenti i Kosovës, Hashim Thaçi deklaroi sot se “Kosova nuk e ka luksin që të ketë Kryeministër që armiqësohet me Amerikën dhe me Shqipërinë”.

I ftuar në një studio televizive, Thaçi tha se “unë nuk jam kundër askujt, jam për të gjithë dhe në favor të të gjithëve”.

“Kam qenë entuziast që Kurti pas rezultatit zgjedhor të 6 shkurtit të niste sa më shpejt themelimin e qeverisë së re dhe unë ta dekretoja, sepse gjithë ato muaj pa qeveri ishin të dëmshme për Kosovën. E kam dekretuar menjëherë edhe tani do të përpiqem maksimalisht që të mos ketë vakum institucional sepse nuk mund të presim që inatet e spektrit politik t’i kushtojnë shtetit të Kosovës. Aq sa kam punuar që Kurti të merrte detyrat, aq kam dekretuar edhe Hotin menjëherë. Sot kemi një situatë krejt normale, me një kryeministër në zyrë që ka marrë disa vendime të rëndësishme, si largimi i barrierave që kanë penguar Kosovën dhe gjithë proceset e tjera të rëndësishme”, tha Thaçi.

Ai theksoi se “këshilla ime ndaj Kurtit ishte që të jetë më i kujdesshëm në raport me opozitën në Kosovë dhe të mos sillej aq keq sa është sjellë me Shqipërinë, pothuajse në mënyrë armiqësore, pa nevojë”. “I kam kërkuar t’i heqë të gjitha ato pengesa me Shqipërinë. Ne jemi këta që jemi dhe pavarësisht kësaj, interesi i Kosovës dhe i Shqipërisë gjithmonë është vendosur para egove personale. Afrimi aq i madh me Serbinë në periudhën e pandemisë ka qenë shumë i pajustifikueshëm, i paargumentuar nga askush dhe nuk është mirëpritur në Kosovë”, tha Thaçi.

Thaçi tha se “edhe raportet shumë të ndera, ballafaquese për herë të parë me SHBA-në të zyrës së qeverisë Kurti, kanë qenë sinjale negative”./atsh

Në 100-vjetorin e Luftës Kombëtare të Vlorës, busti i një prej figurave më të shquara të saj, “Heroit të Popullit” Selam Musai (Salaria), u vendos pranë rrethrrotullimit te Komuna e Parisit. Zbulimi i bustit të heroit u bë në një ceremoni të posaçme, ku morën pjesë Kryetari i Kuvendit, Gramoz Ruçi, Kryetari i bashkisë së Tiranës, Erion Veliaj, Ministri i Diasporës, Pandeli Majko, e mjaft personalitete të tjera.

Në fjalën e tij përshëndetëse, kryebashkiaku Veliaj tha se kjo është mënyra më e mirë për të kujtuar edhe 100-vjetorin e Tiranës kryeqytet. “Të presim Selam Musanë në Tiranë pas 100 vitesh është mënyra më e mirë për të kujtuar edhe 100-vjetorin e Tiranës kryeqytet. Kemi shumë nevojë të flasim për modernizimin, për integrimin, sesi do të ecim përpara, por një popull që nuk e di nga ka ardhur, nuk di as ku do tëshkojë. Teksa sot përballemi me situata si pandemia apo rindërtimi i shtëpive pas tërmetit, lipset tëkujtojmë se kemi mbërritur këtu falë betejave të vazhdueshme”, deklaroi ai.

Veliaj shtoi se vepra e Selam Musait, ndonëse në moshë të madhe, tregoi se asnjëherë nuk është vonë për t’i shërbyer kombit. “Asnjëherë nuk është vonë për t’i shërbyer vendit tënd. Selam Musai, në moshën 63-vjeçare, tregoi se kurrë nuk është vonë për të kontribuuar, edhe në qofsh burrë në moshë. Kemi mjaftueshëm shembuj se pavarësisht moshës, askush nuk është shumë i ri apo shumë i vjetër për t’i shërbyer Tiranës, Shqipërisë dhe Atdheut tonë, kurdo kur jemi thirrur të shërbejmë”, u shpreh ai.

Veliaj nënvizoi se Tirana do të vijojë nderimin e figurave historike, që kanë lënë gjurmë në ndërtimin e shtetit shqiptar. Pas bustit të Selam Musait, Bashkia e Tiranës do të vazhdojë me një tjetër projekt, atë të bustit dhe të përmendores së Ismail Qemalit.

Deputeti i PS, Pandeli Majko falenderoi kryebashkiakun Veliaj dhe kryeparlamentarin Ruçi për angazhimin dhe nderin që i bëjnë Njësisë 5, ku jeton një komunitet i rëndësishëm nga Vlora.“Jemi shumë të nderuar që kjo figurë e Labërisë, simbol i rezistencës sëpopullit shqiptar, do të jetë nëNjësinë 5. Ai i tregoi botës dhe opinionit ndërkombëtar se shqiptarët dinë të luftojnë”, tha Majko.

Kryetari i Kuvendit, Gramoz Ruçi, dhe personalitetet shtetërore të pranishëm në këtë ceremoni vendosën kurora e buqeta me lule pranë monumentit të Heroit të Popullit Selam Musai Salaria.

Ceremonia e zhvillua nga Shoqata Kulturore Atdhetare “Labëria”, bashkia e Tiranës dhe Muzeu Historik Kombëtar, me rastin e 100 vjetorit të Luftës së Vlorës dhe rënies së Heroit. Selam Musai vjen nga një familje me tradita patriotike dhe ishte udhëheqës i kryengritjeve në Vlorë dhe ra heroikisht për çlirimin e saj. /atsh