Aktualitet

Kosova hap kufirin me Shqipërinë, nuk ka më vetizolim për 7 ditë dhe as test anti- COVID

Aktualitet, Lajmi i fundit / /

Qeveria e Kosovës ka marrë vendim që duke nisur që nga dita e nesërme qytetarët që hyjnë në Republikën e Kosovës nga cili do shtet të mos i nënshtrohen masës së vetizolimit për 7 ditë.

Kurse, në vend të testimit të obliguar për CODID-19, për ata që hyjnë, do të jetë masa e kontrollit nga ekipet mjekësore të QKMF-ve, të vendosura në pikat kufitare apo edhe në vet QKMF-të brenda komunave.

Ministri i Shëndetësisë, Armend Zemaj, tha se situata epidemiologjike është e qëndrueshme, por me rritje të lehtë të rasteve gjatë javëve të fundit në disa komuna si rezultat i moszbatimit të rekomandimeve nga një numër i qytetarëve.

“Kontrollin e detajuar mjekësor për të gjithë udhëtarët që hyjnë në Republikën e Kosovës, duke marrë shënime të sakta të vendqëndrimit në Kosovë, adresa dhe numri i telefonit për përcjelljen e gjendjes së tyre klinike nga QKMF-të e komunave përkatëse. Kontrolli i detajuar kryhet sipas udhëzuesve të OBSH-së, që konsiston në matjen e temperaturës, shenjat dhe simptomat klinike, si dhe kontaktet eventuale të dy javëve të fundit me persona pozitiv ose të dyshimtë me COVID-19. Bazuar në këto rekomandime që nga dita e hënë 8 qershor 2020 propozoj që qytetarët të cilët hyjnë në Republikën e Kosovës nuk do t’i nënshtrohen masës së vetizolimit shtëpiak 7 ditor. Ndërsa, në vend të testimit të obliguar për COVID-19 për ata që hyjnë do të jetë masa e kontrollit nga ekipet mjekësore të vendosura në pikat kufitare apo edhe në QKMF-të nëpër komuna”, tha ai.

Zemaj tha se bazuar në situatën epidemiologjike, MSH do të mundësojë liri të plotë të lëvizjes e qarkullimit të qytetarëve dhe mallrave nga të gjitha pikat kufitare.

Po ashtu, ai bëri të ditur se qysh nga nesër do të hiqet edhe kufizimi i lëvizjes nga ora 21 deri në orën 5 të mëngjesit.

I pari i Shëndetësisë kërkoi që të zbatohen me përpikëri rekomandimet duke qenë se ende nuk ka kaluar rreziku dhe shfaqja e rasteve të reja si pasojë e moskujdesit, sipas tij mund ta mbingarkojë sistemin shëndetësor me pasoja të paparashikuara që do të çonin në rritje të numrit të rasteve dhe rrezik për jetën e qytetarëve.

Ai tha se kërkojnë nga qytetarët, bizneset, gastronomia dhe sektorët e tjerë që në mënyrë strikte të respektojnë masat me qëllim që të shkohet para me lehtësime të tjera.

Ndërkaq, ministri i Punës Skender Reçiça, ka kritikuar bashkëpunimin mes Kosovës dhe Shqipërisë, ku tha se bashkëpunimi mes dy vendeve gjatë kësaj periudhe është për çdo kritikë.

Bashkëpunimi i këtyre muajve të fundit është për çdo kritikë, është diçka që nuk guxon të përsëritet edhe një herë të vetme, e as edhe një rrethanë të vetme. Tirana për Prishtinën është si Prizreni për Gjilanin, sikur që Prishtina për Tiranën duhet të jetë si Vlora dhe Shkodra. E kuptoj faktin që pandemia kërkon disiplinë, kërkon respektim të masave mbrojtëse dhe e kuptoj faktin që mund të karantinohet Ferizaj, Prishtina, Vlora, Korça, por assesi të mbyllen dhe të izolohen mes vete mes Prishtinës dhe Tiranës. Kujdes po, disiplinë po, por jo izolim dhe mos komunikim pa nevojë. Më e pakta që mund të bëjmë është që sot të miratojmë këtë vendim”, tha ai.

Ministri Zemaj tha se Inspektorati Sanitar i AUVK-së dhe Inspektoratet komunale duhet patjetër të zbatojnë Ligjin për Inspektoratin dhe Ligjin për parandalimin e sëmundjeve ngjitëse dhe të merren masa përgjegjësie në rast të mos zbatimit eventual të rekomandimeve të Institutit Kombëtar.

Kryeministri Avdullah Hoti, ka kërkuar që deri më 12 qershor MSH të miratojë manualin për mbrojtje nga përhapja e COVID-19 dhe të rekrutohen 200 specialistë shëndetësor që do të mbikëqyrin zbatimin e manualit.

“Deri më 12 qershor 2020 MSH të miratojë manualin për mbrojtjen nga përhapja e COVID-19, ku specifikohen të gjitha detajet për mënyrën e organizimit të punës në të gjitha bizneset private dhe ndërmarrjet publike, në institucionet publike dhe në çdo veprimtari tjetër publike. Pastaj pika katër të jetë, në përputhje me ligjet përkatëse MSH autorizohet që të nis procedurat për rekrutimin e 200 specialistëve shëndetësor që do të mbikëqyrin zbatimin e manualit sipas pikës paraprake gjatë gjithë periudhës sa jemi në këtë epidemi”, tha ai.

Kurse, zëvendëskryeministri Besnik Tahiri, ka kërkuar që të ketë lehtësira për sektorin e gastronomisë.

“Me e pas një raport se si kishim mundur të veprojmë tutje edhe për kërkesat që i kemi nga sektori i gastronomisë për ngjarjet më të mëdha në këtë fushë, për shkak që mendoj që jeta praktike ka filluar të ndodh, unë sot isha në një prej qendrave tregtare dhe aty ishte plotë, jeta veç ka filluar të ec gjithmonë duke e pasur ndjeshmërinë për situatën, për shëndetin publik, por në të njëjtën kohë duke e pasur përgjegjësinë mbi detyrat që i kemi në raport me funksionimin në veçanti të sektorit privat dhe të sektorit të gastronomisë. Është mirë që në mbledhjen e ardhshme me pas një raport dhe nëse ka hapësirë me e marr një vendim për lehtësim të plotë”, ka deklaruar Tahiri.

Në anën tjetër, ministri i Infrastrukturës Arban Abrashi, ka kërkuar që të fillojë konsultimet për rifillim të transportit ajror.

“Me lejen e juaj unë kisha filluar konsultimet me Autoritetin Civil Ajror, me ministrinë e Shëndetësisë, gjithashtu kompanitë ajrore të shikojmë mundësitë e rifillimit të transportit ajror sa më shpejt në Kosovë, gjithsesi edhe gjithmonë duke i respektuar masat COVID-19. Kjo do të bëhet gjithashtu duke marrë parasysh edhe standardet e BE-së. Ajo çka kërkoj sot është të fillojmë këto negociata që t’i shohim edhe praktikat e aeroporteve tjera”, tha ai./KosovaPress/

Kosova hap kufirin me Shqipërinë, nuk ka më vetizolim për 7 ditë dhe as test anti- COVID Read More »

“Pranë familjeve në nevojë në çdo cep të Shqipërisë”/ Balla: Rimëkëmbja ekonomike, baza e çdo diskutimi për tejkalimin e situatës

Aktualitet / /

Edhe pse në kushtet e hapjes totale, lufta ndaj virusit COVID-19 nuk ka përfunduar dhe për rrjedhojë as operacioni humanitar në ndihmë të familjeve në nevojë në të gjithë vendin”.

Kështu deklaroi kryetar i Grupit Parlamentar të PS-së, Taulant Balla ndërsa theksoi se procesi i ndihmës për familjet në nevojë do të vijojë.

“Edhe pse në kushtet e hapjes totale, duhet të kuptojmë që kujdesi për familjet në nevojë duhet të vazhdojë. Jemi sot në Gramsh për të filluar, unë shpresoj të jetë faza e fundit, etapa e fundit e një procesi që ka shkuar dyer më dyer ku nevoja është shumë e madhe. Dua të falenderoj të gjithë, stafin e bashkisë, kryetarin, deputetin, të gjithë ata që kanë ndjekur nga afër këtë proces. Ka qenë një operacion humanitar që në kushtet e vështira të pandemisë ishte i domosdoshëm sepse familjet në nevojë e kanë pasur të domosdoshëm furnizimin e përditshëm me këto ushqime bazë, për t’iu dhënë ndihmën që të mos zbrisnin në qytet, në kushtet që edhe transporti ka qenë i pezulluar”, tha Balla.

Më tej, Balla theksoi se “edhe pse jemi në kushtet e hapjes, e kemi thënë që prej ditës së parë të kësaj lufte që ne do t’i gjendemi pranë çdo familje në nevojë, në çdo cep të Shqipërisë, padyshim edhe këtu në Gramsh ku me këto 1500 të fundit, unë mendoj që ne kemi arritur qëllimin bazë. Prandaj edhe mesazhi im sot nga Gramshi është që Shqipëria reale është kjo e njerëzve të thjeshtë dhe të zakonshëm që kanë nevojë për përkujdesjen e përditshme dhe kanë më pak nevojë për debatet e kota politike, që nuk duhet t’ia zënë vendin debatit mbi sfidat kryesore të përballjes me ketë pandemic dhe efektet negative që ajo krijoi”.

Sipas tij, “procesi i rimëkëmbjes ekonomike duhet të jetë baza e çdo diskutimi dhe debate lidhur me tejkalimin e situatës së vështirë, që ndoshta është një nga situatat më të vështira të disa dekadave jo vetëm për Shqipërinë, por edhe për të gjithë europën dhe mbarë globin.

Deputeti i PS-së, Anastas Angjeli u shpreh se “kujdesi për familjet në nevojë ka qenë dhe mbetet një synim themelor i qeverisë Rama dhe këtë e dëshmoi edhe një herë tjetër, gjatë kësaj periudhe të vështirë që vendi, qytetarët kaluan dhe po kalojnë në kushtet e pandemisë. Të gjithë këto familje kanë nevojë për dorën e ngrohtë të shtetit që nuk ju ka munguar”.

Nga ana e tij, kryetari i bashkisë së Gramshit, Klodian Tace u shpreh se “nga këto pako ushqimore do të përfitojnë 1073 familje të cilët janë zgjedhur nga Shërbimi Social Kombëtar ndërsa familjet me shumë anëtarë do të kenë mundësinë e pakos së dytë, prandaj është edhe diferenca tjetër. Përveç këtyre pakove dhe familjeve, ne po mundohemi qoftë me organizatat e tjera humanitare, emergjencat civile, ministrinë e Mbrojtjes e cila sot na asistoi me disa pako të tjera, kështu që ne u jemi pranë të gjithë familjeve në nevojë./atsh

“Pranë familjeve në nevojë në çdo cep të Shqipërisë”/ Balla: Rimëkëmbja ekonomike, baza e çdo diskutimi për tejkalimin e situatës Read More »

Parashikimi i motit, 7 qershor 2020

Aktualitet / /

Sipas Shërbimit Meteorologjik Ushtarak, moti për ditën e diel do të jetë me alternime vranësirash deri në mesditë dhe më pas kthjellime.

Parashikohen reshje shiu të izoluara në veri dhe verilindje të vendit.

Ndërsa era do të fryjë me drejtim juglindje-jugperëndim me shpejtësi 1-8m/s. Valëzimi i forcës 2 ballë.

Temperaturat parashikohen:

QYTETET Temperaturat në °C Sigla
Shkodër 12/25 shi diell
Kukës 12/25 shi diell
Lezhë 11/28 Re diell
Dibër 11/26 shi diell
Durrës 15/28 Re diell
Tiranë 16/31 Re diell
Elbasan 15/30 Re diell
Berat 14/29 Re diell
Vlorë 16/28 Re diell
Korçë 13/23 Re diell
Gjirokastër 16/26 Re diell
Sarandë 15/26 Re diell/atsh

Parashikimi i motit, 7 qershor 2020 Read More »

Vlorë: Qendra Historike, dëshmi e vlerave të traditës në arkitekturë

Aktualitet, Art-Kulture, Turizem / /

Qendra Historike, ose Vlora e Vjetër, e rikonstruktuar përmes një projekti të përbashkët të Fondit Shqiptaro-Amerikan të Zhvillimit(AADF) dhe Qeverisë Shqiptare, është shndërruar tashmë në një mjedis atraktiv dhe me interes për vizitorët.

Kjo hapësirë me vlera të shumëfishta, përmbledh në vetvete historinë e qytetit, ngjarje e momente me rëndësi kombëtare e mbarëkombëtare, ndërkohë që evokon segmente të të shkuarës shumëshekullore në aspekte të ndryshme, një prej të cilave është tradita në arkitekturë.

Ndërtimet në këtë zonë, të evokuara në kohë përmes procesit të restaurimit selektiv dhe në tërësi, përfaqësojnë vlera të vërteta në arkitekturë, të materializuara në shekujt XIX dhe XX, vazhdë e traditave shumë më të hershme.

Në këndvështrimin e historisë së arkitekturës, nuk mund të flitet për një banesë tipike vlonjate, si element urban, ashtu siç përkufizohet dhe veçohen banesat tiranase, shkodrane, elebasanase, beratase, gjirokastrite e korçare. Kjo, sepse, banesa qytetare e realizuar në Vlorë në dy shekujt e fundit, është një përzierje stilesh dhe ndikimesh, e kushtëzuar nga një sërë faktorësh ku përfshihen edhe mentaliteti edhe niveli ekonomik i individëve, ashtu si edhe zhvillimi shumëdimensional i vetë qytetit. E trajtuar në këtë këndvështrim, banesa në Vlorë përfaqëson një tërësi, një simbol ndikimesh e gjykimesh për përditshmërinë.

Në Vlorën e Vjetër, në çdo godinë apo banesë të saj, ne zbulojmë të gjitha fazat e zhvillimit të arkitekturës shqiptare, të materializuara në nivelin lokal. Ndeshim traditën qytetare në ndërtim, stilet arkitekturore otomane dhe më tej, ndikimin e arkitekturës italiane, në variantet e saj neoklasike dhe moderne në katër dekadat e para të shekullit XX, ndikime të stilit austriak etj, të selektuara në raste të veçanta etj.

Këtu, ne hasim dhe shijojmë mrekullinë e artit arkitektonik të të njohurve Gherardo Bosio e Morpurgo, Paolo Palleri etj, të cilët me talentin dhe fantazinë e tyre, kanë lënë gjurmë të pashlyeshme në Vlorën e Vjetër dhe njëkohësisht të re, ashtu sikundër edhe në qytete të tjera të Shqipërisë.

Banesat e shekujve XIX dhe XX në Vlorën e Vjetër, janë produkt i këndvështrimeve të ndryshme, janë përzierje e banesës qytetare beratase, gjirokastrite, korçare, por edhe më gjerë, ashtu si edhe e përvojës së mjeshtrave popullorë që kanë ndërtuar dhe që vinin kryesisht nga Korça, Panariti e Dibra(Golloborda), mes të cilëve Usta Nuredini e Usta Hasani.

Prandaj dhe çdo banesë e ndërtuar në Vlorë në periudhën e dy shekujve të fundit, duhet lexuar në atë që shfaq dhe në atë që mban të fshehur.

Vlora, për shkak të pozicionit gjeografik, vlerësohet të ketë qenë historikisht një qytet i hapur, një destinacion për migrimin e brendshëm dhe rajonal.

Familje me origjinë nga zona dhe krahina të ndryshme të Shqipërisë, nga Berati, Korça, Gjirokastra, Tirana, kanë mbërritur në këtë qytet, duke sjellë me vete edhe mentalitetin, traditën në stilin e jetesës, në përditshmëri, në ndërtim. Përmes aktivitetit ekonomik tregtar, apo prodhues, kanë rritur standardin ekonomik dhe kanë ndërtuar për të jetuar më mirë, por edhe për të treguar. Sepse, banesa, si njësia bazë e jetesës, është vlerësuar edhe si tregues i pozicionit të individit në shoqëri, si shfaqje e nivelit ekonomik të një familjeje.

Ky tipar i shoqërisë shqiptare në tërësi dhe asaj vlonjate në rastin konkret, reflektohet në çdo godinë të Qendrës Historike të Vlorës, në çdo banesë të kësaj lagjeje të njohur me emrin e saj historik “Muradie”, ku ishin vendosur dhe ndërtuan shtëpitë, pjesa më e madhe e familjeve të pasura, apo të njohura në Vlorë.

Banesa të tilla, si ato të familjeve Bezhani, Strati, Papa, Skrami, Karbunara, Dëma, Kuçi, Seit Qemali, Kume, Sorra, Koleka, Papa, Aristidh Ruçi, Shehu, Shyti, Hoxha, Levi e Jakoel, Matathia, Shamo, Beqa, Dhimitriadhi etj, përfaqësojnë jo vetëm shkëlqimin e pronarëve të tyre, por edhe arritje të spikatura në aspektin arkitekturor.

Sot, të restauruara, ato kanë fituar një dimension tjetër, në një hapësirë të ndryshuar, e cila pritet të shndërrohet në një pol të ri të zhvillimit të qytetit të Vlorës.

Prandaj dhe, në këtë zonë gjen dhe zbulon të gjithë Shqipërinë, personazhe që kanë lënë gjurmë në historinë e saj, Ismail Qemalin, Isa Boletinin, Marigo Posion e Babë Dudë Karbunarën, Avni Rustemin e Fan Nolin, ashtu sikurse edhe ngjarje të përmasave kombëtare si Shpallja e Pavarësisë, Lufta e Vlorës, Revolucioni Demokratik i Qershorit etj.

Kështu, Qendra Historike e Vlorës, përmes këtij projekti të financuar nga Fondi Shqiptaro Amerikan i Zhvillimit(AADF) dhe Qeveria Shqiptare, përjeton tri dimensionet kohore, duke evokuar të shkuarën në funksion të të tashmes dhe të perspektivës./atsh

Vlorë: Qendra Historike, dëshmi e vlerave të traditës në arkitekturë Read More »

“Anti-mafia italiane zbuloi skemën e turpshme”/ Basha t’i kërkojë falje shqiptarëve që u bë tyta e një “Fake News”-i

Aktualitet, Politike / /

Kryetari i grupit parlamentar të Partisë Socialiste, Taulant Balla i kërkoi sot kryetarit të Partisë Demokratike, Lulzim Basha t’i kërkojë falje shqiptarëve për lajmin e rremë për konteinerët me mbetje nga Italia në Shqipëri, i cili u zbulua nga Antimafia italiane.

Balla publikoi një video, ku shfaqet Lulzim Basha në ‘Çadrën e Lirisë’ në bulevard, duke akuzuar Kryeministrin Edi Rama se ka lejuar të futen në Shqipëri në mënyrë të fshehtë 1300 konteinerë me mbetje të rrezikshme.

Balla tha se “Lulzim Bashës duhet t’i vijë turp që u bë bë tyta e një “Fake News”-i të zbuluar nga Antimafia italiane.

“Luli Basha duhet t’i vijë turp dhe t’u kërkojë falje shqiptarëve që u bë tyta e “Fake News”-i për konteinerët nga Italia në Shqipëri. Antimafia italiane zbuloi skemën e turpshme”, tha Balla.

Një ditë më parë mediet publikuan vendimin e prokurorisë italiane e cila arrestoi 8 persona lidhur me ‘Fake News’-in e publikuar 3 vjet më parë nga faqja italiane “Pianeta Italia News” lidhur me lajmin se 1400 kontejnerë me mbetje toksike ishin nisur drejt vendit tonë për t’u groposur.

Drejtësia italiane konfirmoi duke çuar 8 persona në pranga dhe zbuluar se pas kësaj tentative për të rrëzuar qeverinë qëndron këshilltari i Ilir Metës, Ilir Kulla

Gazeta italiane “Il Fatto Quotidiano” botoi një shkrim ku thekson se ish-senatori Sergio De Gregorio, i arrestuar si pjesë e një hetimi të DDA në Romë, në vitin 2017 kishte financuar aktivitetet e Ilir Kullës, i cili i kishte ngarkuar ish-senatorit detyrën e “organizimit të një fushate denigrimi kundër qeverisë shqiptare”, në përpjekje për të rrëzuar qeverinë e drejtuar nga kryeministri Edi Rama.

Antimafia italiane deklaron se “njeriu i Ilir Metës porositi fushatën kundër qeverisë shqiptare në mediet e vendit fqinj. Fushata denigruese nisi në 2017-ën dhe asokohe u mbështet edhe nga opozita shqiptare”./atsh

“Anti-mafia italiane zbuloi skemën e turpshme”/ Basha t’i kërkojë falje shqiptarëve që u bë tyta e një “Fake News”-i Read More »

Basha: PD në qendër të vëmendjes ka rimëkëmbjen e ekonomisë

Aktualitet, Politike / /

“PD ka në qendër të vëmendjes rimëkëmbjen e ekonomisë”, tha sot kryetari i PD-së, Lulzim Basha gjatë takimit me bizneset dhe qytetarët në Njësinë Administrative Nr.9 Tiranë.

Në bashkëbisedim me qytetarët, Basha shprehet se xhiro e biznesit ka rënë në 1/3.

Ai shton se “PD kur të të vijë në pushte do zbatojë ligjin, nuk do ua japë paratë 5 oligarkëve, por qytetarëve dhe biznesit.

“Ky dyqan është një nga pikat më të frekuentuar të qytetit dhe xhiro ka rënë me 1/3. Ndërkohë nuk arrin të paguajë as qiranë dhe qiradhënësi nuk merr qiranë. Dhe lajmi i keq që kam marrë sot është se numri i dyqaneve që mbyllet është 60 biznese në ditë. Kjo është drama e madhe që Rama i ka shkaktuar vendit. Ky është fronti i vërtetë i shqiptarëve, gjithçka tjetër është për t’u tërhequr vëmendje”, tha ai.

Basha thekson se “ne si opozitë dhe PD në qendër të vëmendjes kemi ekonominë e saj, punësimin dhe luftën kundër varfërisë. Zgjidhjet nuk janë të lehta, por të mundura. Hapi i parë është që lekët që sot u shkon oligarkëve sot apo përdor për carter do ua japim familjeve dhe bizneseve”.

“Ka vetëm një rrugë dalje, të bashkohemi të gjithë dhe të ia kthejmë qeverisjen e marrë peng shqiptarëve dhe të ndërtojmë së bashku një ekonomi të fortë”, tha ai./atsh

Basha: PD në qendër të vëmendjes ka rimëkëmbjen e ekonomisë Read More »

Historia e Fatjonit që la fermat e Italisë për tokën e shtëpisë, me mbështetjen e AZHBR-së ka ngritur rreth 4.6 ha vreshta me varietete të ndryshme rrushi

Aktualitet / /

Fatjoni, një djalë nga Qinami, fshati i njësisë administrative Zall Herr në kryeqytet, ka lënë Italinë për t’ju përkushtuar fermës së tij për prodhimin e rrushit. Fatjoni ka përfituar nga Skema e Mbështetjes për vaditje dhe mbjellje, duke marrë një grand prej 1.7 milionë lekësh të rinj.

Kryeministri Edi Rama ka publikuar pamje nga vreshta e Fatjonit, ndërsa shprehet se, “në fshatin Qinam të Zall Herrit, me Fatjonin, që pasi punoi e mësoi në emigracion, la fermat e Italisë për tokën e shtëpisë”.

“Falë vullnetit për punë dhe projekteve të mençura, ai ka përfituar financime mbështetëse dhe ka ngritur rreth 4.6 ha vreshta me varietete të ndryshme rrushi, prej të cilave prodhon verërat e zonës”, tha Rama.

Rama shton se, “si përfitues i Skemës Kombëtare të Financimit nga AZHBR, Fatjoni ndërtoi një sistem të ri modern të vaditjes me pika të vreshtave”.

Duke treguar historinë e tij për ERTV Fatjoni shprehet se, “sipërfaqja e fermës është tek 4.6 ha me disa varietete rrushi për tregti dhe kantinat në vend. Rrushi është i llojit Merlot, Kabërnet, janë dhe dy lloje të tjera, Syrah, Muskat. Babai im është agronom, ai gjithë jetën ka punuar dhe është marrë me vreshta dhe ma ka lënë si pasion këtë pjesë. Unë lashë Italinë për të ndjekur pasionin tim. Kthimi nga Italia ishte i vështirë, pasi mamaja thoshte që do lodhesha shumë. Në Itali punoja tek një fermë 150 hektarë, punonim 5 persona, kishim katër traktorë. Ne këtu tek ferma jonë përdorim sistemin “Gujot”, që është një sistem që mundëson të kesh bimë të reja dhe të fuqishme”.

“Ka qenë e thjeshtë, dikur më përpara, kur kam pas aplikuar, humbnin dokumentet e nuk merrej vesh kush fitonte e kush jo. Por tani çdo gjë është me sistem është elektronik dhe e merr vesh menjëherë nëse fiton apo jo”, tha Fatjoni. /atsh

Historia e Fatjonit që la fermat e Italisë për tokën e shtëpisë, me mbështetjen e AZHBR-së ka ngritur rreth 4.6 ha vreshta me varietete të ndryshme rrushi Read More »

“Pas 3 vjetësh marshim e 3 netësh ngujim”/ Rëndësi ka që Basha do hyjë në zgjedhje me Kodin Zgjedhor siç e deshën

Aktualitet, Opinione, Politike / /

Kryeministri Edi Rama përshëndeti arritjen e marrëveshjes për Reformën Zgjedhore në takimin e mbrëmjes së sotme të Këshillit Politik, me praninë e ambasadorëve të SHBA, BE, OSBE dhe Britanisë së Madhe.

“Pas 3 vjetësh marshim e 3 netësh ngujim na sollën fjalën e fundit: “Mirë e kishim ashtu siç e kishim”. Po mirë, unë kam menduar e mendoj që ka edhe më mirë, po meqë LBPD janë të kënaqur me kaq për zgjedhjet e ardhshme, bujrum, si ta duan ata”, u shpreh Rama.

“Rëndësi ka që: LBPD do hyjë në zgjedhje me Kodin Zgjedhor siç e deshën vetë. ODIHR është dakord që kjo nuk e cenon lirinë e zgjedhjeve. BE është e kënaqur, Shqipëria s’ka më pikëpyetje në prag të vendimit për datën e nisjes zyrtare të negociatave. Ah po, mbaroi edhe revolucioni”, u shpreh Kryeministri Rama.

Pas takimit të mbrëmjes së sotme, bashkëkryetari për Reformën Zgjedhore, përfaqësuesi i mazhorancës në Këshillin Politik, Damian Gjiknuri tha se Partia Socialiste ka hequr dorë nga depolitizimi i administratës zgjedhore, që PD të mos mbetet sërish jashtë zgjedhjeve.

Në një prononcim për mediat pas përfundimit të takimit ku palët arritën marrëveshjen për Reformën Zgjedhore, Gjiknuri tha se “ne nuk mund të linim sërish opozitën jashtë zgjedhjeve dhe t’i jepnim alibi asaj që të thotë se nuk e njoh ligjin zgjedhor”.

“Për ne është i rëndësishëm integrimi, aprovimi dhe pranimi i rregullave të lojës. Në fund të fundit mazhoranca është komode që me çfarëdolloj rregullash loje mjafton që palët politike të jenë komode, të shkojë në zgjedhje”, tha Gjiknuri.

“U dakordësuan për pikat që përgjithsësisht i ndanin palët, dhe një gjë dua të them pavarësisht se rekomandimi është që administrata të ishte e depolitizuar, dhe qëllimi i PS e qeverisë ishte që këtë rekomandim bazë ta çonte përpara, fatkeqësisht PD nuk ishte gati dhe e kundërshtoi”, tha më tej Gjiknuri.

Ajo çka fituam, nënvizoi ai, është se tashmë kemi rregulla të pranuara nga gjithsecili edhe me këtë adminsitratë që e kemi në fuqi.

“Sot që flasim, ajo çka u pranua nga palët është që administrata aktuale zgjedhore e balancuar politikisht do të funksionojë edhe në zgjedhjet e 2021. E rëndësishme është që PD hoqi dorë nga kërkesat absurde, nga qeveria teknike apo tranzitore për të administruar zgjedhjet. U pranua që administrimi zgjedhor nuk ka çaluar në Shqipëri. Përtej pretendimeve të ngritura dhe gjithë asaj lufte politike, më në fund u kthyen aty ku duhet të ishin te institucionet. E rëndësishme është që ne ta pranojmë dhe ta zbatojmë këtë sistem dhe në zgjedhjet e tjera, pasi në Kod do të parashikohen dispozita të fillojë depolitizimi”, u shpreh Gjiknuri.

“Ne do të përpiqemi që identifikimi biometrik të shtrihet në çdo qendër votimi, e rëndësishme është që nuk mund të mbahen zgjdhjet peng për shkak të teknologjisë dhe u pranua që administrata zgjedhore edhe kështu siç ka qene ka funksionuar”, u shpreh Gjiknuri.

Këshilli Politik, tha ai do të vijojë për çështjet e tjera ku përfshihet edhe sistemin zgjedhor.

“Këshilli Politik do të vazhdojë të miratojë draftet dhe të trajtojë edhe çështjet e tjera, si sistemi zgjedhor, ligji për referendumet, dhe për financimin e partive politike. Opozita dhe qeveria po dialogojnë, hoqën dorë nga alibitë dhe mbetet që të gjitha palët të përgatiten për zgjedhjet. Kodi do të mbyllet brenda këtij sesioni parlamentar. Nga buxheti i shtetit do të mundësohet identifikimi biometrik. Do të merrte një ekspert i huaj, nga BE për t’u konsultuar me KQZ”, deklaroi Gjiknuri./atsh

“Pas 3 vjetësh marshim e 3 netësh ngujim”/ Rëndësi ka që Basha do hyjë në zgjedhje me Kodin Zgjedhor siç e deshën Read More »