Aktualitet

“E gjithë infrastruktura e transformuar nuk i thotë të gjitha dhe është e paplotë në impaktin e madh ekonomik dhe social mbi Vlorën nëse nuk llogarisim edhe aeroportin e Vlorës”.

Kryeministri Edi Rama e konsideroi sot ndërtimin e aeroportit “një investim masiv në funksion të zhvillimit të ekonomisë përmes turizmit dhe jo vetëm”.

“Studimet dhe shifrat e lëvizjeve të njerëzve e tregojnë këtë impakt, dhe këtu kam parasysh shqiptarët që udhëtojnë për në Greqi dhe Itali”, tha Rama.

Ai do të jetë aeroporti i jugut të vendit, tha Kryeministri. Sipas Ramës, ai do të garantojë një fluks të madh qytetarësh dhe lëvizje nga Vlora me çmime të arsyeshme dhe në kohë më të shpejtë.

“Aeroporti do të jetë vlerë e shtuar nga pikëpamja sociale por edhe e fluksit të turistëve që do të sjellë. Po ashtu do të sjellë një fluks të ri investimesh sa i përket hoteleve, biznesit dhe gjithë zhvillimeve që hap perspektiva e një aeroporti të ri”, shtoi Rama./atsh

Kryebashkiaku Dritan Leli dhe ambasadorja Romana Vlahuitin kanë përuruar veprën e artistit Gentjan Tabaku në Lungomare, e cila është shpallur fituese në konkursin e BE, për shëtitoren bregdetare.

“Jam e lumtur që jam sot këtu në këtë shëtitore, për të cilën u desh shumë punë, ndërsa një vit më parë, këtu nuk ishte kështu.” Ambasadorja Romana Vlahutin

Vepra e artit quhet “Porta”, të cilën amabsadorja Vlahutin e ka konsideruar si “Porta” për në BE. Kryebashkiaku i Vlorës vlerësoi angazhimin e ambasadores Vlahutin në realizimin e investimit në Lungomare. Ndërsa artisti Gentjan Tabaku, e ka quajtur vetën pjesë të Lungomares, duke u ndalur në dy simbolikat që vepra e tij përcjell: Portën drejt një realiteti tjetër dhe shpendët si simbol i lirisë dhe lëvizjes së lirë.

Shëtitorja e Lungomares i ka dhënë një frymëmarrje të re qytetit të Vlorës, duke u shndërruar në një atraksion turistik, për pushues vendas e të huaj që kanë zgjedhur Vlorën për të pushuar./shqiptarja

Paketa e lehtësive fiskale për agroturizmin prek 90% të territorit të vendit dhe mbi 50% të popullsisë që jeton në fshat.

Ministri i Bujqësisë Niko Peleshi, u shpreh sot në seancën plenare të Kuvendit se, politikat në mbështetje të agroturizmit synojnë të ngrenë një treg të ri, hapësirë të re biznesi për sipërmarrësit e rinj apo të vjetër, duke e kthyer agroturizmin në koncept të ekonomisë shqiptare dhe nënsektor me standarde dhe zhvillim bashkëkohor.

“Kjo paketë vjen pas konsultimeve me vende që kanë bërë sukses në agroturizëm dhe padyshin Italia është një shembull konkret i këtij zhvillimi”, tha Pelelshi, ndësa nënvizoi faktin se, Italia miratoi një pakete të tillë vite më parë dhe sot shënon mbi 7 milionë prenotime në strukturat e agroturizmit.

Gjatë diskutimit në Kuvend të projektligjit për taksat, ministri Peleshi tha se, incentiva fiskale që po ndërmerr qeveria për nxitjen e agroturizmit, është tejet agresive. “Ajo konsiton në uljen e Tatimit të Vlerës së Shtuar (TVSH) në 6% nga 20%, Tatim fitimi nga 15% ulet në 5% dhe zero taksë për infrastrukturën”, tha ai.

Agroturizmi është veprimtari që zhvillohet në një fermë, por që është e ndërlidhur me zhvillimin e komponentëve të tjerë historik, tradicional e kulturor e veprimtarive të tjera ndihmëse që zhvillohen në atë mjedis bujqësor, që diversifikojnë zhvillimin rural në tërësi, tha Peleshi./atsh

Pamje shokuese! Qytetarët kanë denoncuar sërish në Report Tv një situatë kaotike me fluturimet për shkak të vonesave të fluturimeve nga kompania ‘Blue Panorama’. Avioni i linjës Milano-Tiranë ishte planifikuar për të mbërritur në orën 11:10 minuta, ndërsa ka vonesa.

E në fotot e dërgua nga qytetarët në Report Tv duken radhët e gjata në aeroportin e Malpensës. Qytetarët, mes tyre të moshuar, por edhe fëmijë janë në pritje të fluturimit prej orësh, ndërsa nuk kanë marrë asnjë shpjegim për vonesën duke sjellë irritim.

Kjo nuk është hera e parë që kompania ‘Blue Panorama’ shfaq vonesa në fluturime duke shkaktuar situata të pakëndshme te shumë qytetarë.

Vonesa ka pasur edhe linja Bergamo-Tiranë. Edhe nga aeroporti i Bergamos qytetarët kanë dërguar foto nga pritja në nisje të avionit për në Shqipëri.

Forcat e Armatosura, në kuadër të shërbimit ndaj qytetarëve, kanë vijuar sot aksionin e pastrimit të plazhit të Divjakës dhe kryesisht pastrimin e mbetjeve të harruara për 28 vjet në Parkun e Karavastasë.

Ministrja e Mbrojtjes, Olta Xhaçka deklaroi sot se janë larguar disa ton mbetje nga Kanali i Vaut, pjesë e parkut kombëtar Divjakë–Karavasta.

Në një postim në “Facebook”, Xhaçka shprehet se “veç plazhit, disa ton mbetje u larguan edhe nga Kanali i Vaut, pjesë e parkut kombëtar Divjakë–Karavasta. Ishin aty prej gati 28 vjetësh, në mes të shtegut që përshkohet me varkë si pjesë e guidës në park”, tha ajo./atsh