Aktualitet

Autoritetet e policisë në kuadër të një procedimi penal të vitit 2018, Prokuroria e Përgjithshme ka ndaluar ish-drejtorin e Spitalit të Beratit, Idlir Frashëri së bashku me juristin e po të njëjtit spital, Alfred Lulajn. Ata dyshohen për veprat penale “Shpërdorimi i detyrës në bashkëpunim” dhe “Falsifikimi i dokumenteve i kryer në bashkëpunim”.

Sipas njoftimit zyrtar të Prokurorisë Frashëri dhe Lulaj “kanë bërë blerje të mallrave mjekësore (antibiotikë) në kundërshtim me ligjin. Më pas për të justifikuar veprimtarinë e paligjshme të tyre kanë futur në dosjet e blerjeve një kërkesë gjoja sikur mjekët e spitalit kërkonin ilaçe”.

Organi i akuzës thotë më tej se hetimet vazhdojnë, pasi do të verifikohen të gjitha procedurat në lidhje me mënyrën se si kanë dale medikamentet mjekësore nga Farmacia e Spitalit të Beratit.

Prokuroria e Tiranës ankimon vendimin për Alban Alikon, të njohur si menaxher i kompanisë “Gulf”. Më 13 shtator Gjykata e Tiranës liroi menaxherin e kompanisë Gulf, Albano Aliko, i cili po hetohet për mashtrim me pasoja të rënda. Ndaj tij u dha masa e sigurise “arrest shtepie”

Aliko u arrestua nga policia me 10 shtator por më pas u lirua nga gjykata e Tiranës.

Sipas hetimeve, dëmi i shkaktuar qytetarëve dhe shtetit nga mashtrimi me tollonat e naftës kap vlerën e 5 milion eurove.

Albpetrol ka mohuar të jetë shkaktari i helmimit të banorëve të Zharrzës, të cilët përfunduan në spital. Shoqëria Albpetrol sqaron se ka kryer matjet në vendin ku banorët kanë thënë se dilte uji i helmuar dhe ajri ka rezultuar i pastër, nën nivelin minimal të ndotjes. “Mesnatën e datës 18 Shtator 2018 shoqëria Albpetrol sh.a është njoftuar për pretendimin e disa banorëve të zonës së Zharrëzës se kishin hasur probleme shëndetësore nga gazrat dhe se këta banorë janë shtruar në Spitalin Rajonal të Fierit. Albpetrol sh.a ka ngritur menjëherë një grup specialistësh teknikë, të cilët në orën 00:50 të datës 19 Shtator 2018 kanë shkuar në vendin e pretenduar se kishte ndodhur problemi.

Ekspertët e Albpetrol sh.a kanë kryer matjet e ajrit dhe ka rezultuar se situata ishte normale dhe nuk kishte probleme me gazrat. Matjet janë bërë në pikën ku po kryhej derdhja e ujit, e cila presupozohet që të jetë burimi i ndotjes. Matjet e ajrit të kryera në këtë pikë nuk arrinin as vlerën 5 ppm, e cila është vlera më minimale që shkakton edhe rënien e alarmit. Matje në terren ka kryer edhe Drejtoria Rajonale Mjedisore dhe rezulton se nuk ka ndotje nga gazrat apo produkte të tjera hidrokarbure. Pra, nga të gjitha matjet dhe analizat e kryera nuk rezulton prezencë gazi në ajër”, deklaron Albpetrol.

Më tej shoqëria thotë se personat e helmuar kishin qenë në një lokal në zonë ku kishin konsumuar ushqime dhe pije, duke larguar kështu përgjegjësinë. “Nga verifikimi në terren ka rezultuar se personat që pretendojnë që janë helmuar nga gazi ndodheshin në një prej lokaleve të zonës prej disa orësh ku kanë konsumuar pije dhe ushqime të ndryshme”, thotë Albpetror. Më tej shoqëria deklaron se në të gjithë zonën e Zharrzës, zonë mjaft e populluar, këta janë personat e vetëm që pretendojnë që kanë probleme shëndetësore si pasojë e gazit apo produkteve të tjera hidrokarbure.

Kjo sipas Albpetrol ngre pikëpyetje dyshimi në lidhje me arsyen e vërtetë të pretendimeve. “Përfaqësuesit e Albpetrol sh.a dhe mjeku i shoqërisë kanë shkuar në Spitalin Rajonal Fier për të ndjekur nga afër situatën. Personat që kanë shkuar gjatë natës në spital janë trajtuar nga mjekët dhe kanë lënë ambientet pas disa orësh. Sipas informacionit zyrtar të Spitalit Rajonal Fier, me nr. Prot 2524/1, datë 19.09.2018, ‘Personat e paraqitur në urgjencën e Spitalit Rajonal Fier pretendonin për helmim nga gazi, por referuar të gjitha ekzaminimeve të kryera nga mjekët e urgjencës dhe mjeku specialist toksikolog, diagnoza nuk shkon për Suspekt Toksikim Akut Gazi.

Një nga personat e paraqitur ka rezultuar se kishte konsumuar alkool në masën 0.73 mg/l’. Mjekët e spitalit kanë sqaruar se pas marrjes së ndihmës së parë mjekësore, personat janë larguar nga spitali. Një prej tyre ka refuzuar të marrë ndihmë shëndetësore ndërsa një person tjetër nuk ka pranuar të vazhdojë kurën. Në spital nuk është paraqitur asnjë person tjetër që të pretendojë për probleme shëndetësore përveç shtatë personave që ndodheshin në lokal duke konsumuar pije dhe ushqime”, thotë me tej shoqëria. Sipas saj, ndotjet në zonën e Zharrzës janë krijuar paralelisht me industrinë e naftës në këtë zonë dhe konsiderohen si ndotje të vjetra historike dhjetëra vjeçare. Albpetrol sh.a ka marrë masa konkrete për përmirësimin e mjedisit në këtë zonë.

Pas fluturimit të parë ditën e shtunë me studentët e ekselencës, udhëtimi i radhës i “Air Albania”, ka ndodhur ditën e sotme dhe të përgjedhurit këtë herë janë 100 pensionistë.Në një video të shkurtër të publikuar në Instagramin e kryeministrit Edi Rama, dëgjohet teksa një stjuard iu uron udhëtim të mbarë, ndërsa mes tyre shihet edhe Ministrja e Shëndetësisë, Ogerta Manastirliu.

Prokuroria e Përgjithshme nuk po gjen dot një prokuror të lexojë pretencën për Emiljano Shullazin dhe të akuzuarit e tjerë të të njëjtit proces. Pas komandimit të Elisabeta Ymerajt si drejtuese e Prokurorisë së Tiranës dhe pas “sëmundjes” që i ka rënë prokurorit Ened Nakuçi, prokuroria ka dështuar të zgjedhë një prokuror tjetër.

Shorti për caktimin e një prokurori i organizuar nga Prokuroria e Krimeve të Rënda ka dështuar. 19 prokurorët e thirrur nga Donika Prela sot paradite nuk kanë pranuar të zgjidhen me short dhe kanë braktisur mbledhjen.

Në seancën e kaluar përballë të akuzuarve doli prokurori Besim Hajdarmataj, ndërsa prokurori Ened Nakuçi nuk u paraqit pasi dërgoi një raport që tregonte se ishte i sëmurë.

Por në intervistën e fundit që dha në media, ambasadori amerikan Donald Lu tha se Emiljano Shullazi ka kërcënuar gjykatës dhe prokurorë.

“Dhe jam i skandalizuar që këtë javë që keni gjyqin e Shullazit, ku Shullazi vetë ka kërcënuar gjykatës dhe prokurorë, aq sa prokurorët as nuk shkojnë në gjyq. Si ka mundësi që ky vend të ecë përpara kur ndodhin këto gjëra? ” u shpreh Donald Lu.