Aktualitet

Dje në sheshin “Nëna Terezë”, në Prishtinë janë arrestuar tre persona, shtetas të Shqipërisë, pse gjatë kontrollit u është gjetur një kartëmonedhë prej 500 eurosh.

Sipas policisë, dy prej tyre janë dërguar në mbajtje, ndërsa njëri është liruar.

Sheshi “Nëna Terezë”, Prishtinë 18.10.2018-10:00. Janë arrestuar tre të dyshuar meshkuj shtetas të Shqipërisë, pasi gjatë kontrollit tek njëri prej tyre është gjetur dhe konfiskuar një kartëmonedhë prej 500 (pesëqind) €. Të njëjtit janë intervistuar dhe me vendim të prokurorit dy prej tyre janë dërguar në mbajtje, ndërsa i dyshuari tjetër është liruar.

Kujtojmë, se më 17 tetor, policia kishte njoftuar se kishte arrestuar një të dyshuar pasi ka lëshuar në qarkullim një kartëmonedhë të falsifikuar prej 500 euro.

“Pas një pune hetimore me 16.10.2018 është identifikuar dhe arrestuar i dyshuari mashkull shqiptar shtetas i Serbisë. Gjatë intervistimit i dyshuari ka pranuar se në bashkëpunim me të dyshuarit tjerë kanë lëshuar në qarkullim një kartëmonedhë të falsifikuar prej 500 euro. Me vendim të prokurorit i dyshuari dërgohet në mbajtje”.

Emisioni investigativ “Fiks Fare” solli mbrëmjen e kësaj të enjteje një skandal lidhur me inspektorët tatimorë, të cilët gjatë muajve të verës kanë ushtruar kontrolle kundër informalitetit, në bizneset që ushtrojnë aktivitetin e tyre në qytetet bregdetare.

“Fiks Fare” paraqiti një rast, ku inspektorët tatimorë, edhe pse konstatojnë shkelje për një subjekt të paregjistruar në organet tatimore, nuk marrin asnjë masë, por kundrejt ryshfetit që kërkojnë, largohen nga subjekti.

Skandali u denoncua në “Fiks Fare” nga qytetari, i cili ka rënë prè e kërkesave abuzive të inspektorëve të tatimeve, e në këto kushte ka regjistruar bisedën me ta. Inspektorët tatimorë i kërkojnë 700 euro qytetarit, që të mos e gjobisin për biznesin e tipit këmbim valutor, të cilin e kishte pa licencë.

Pas sinjalizimit, gazetarët e “Fiksit” u nisën drejt Sarandës, por biznesmeni, i cili ishte detyruar të paguante 700 euro, nuk pranoi të jepte intervistë. Ai vuri në dispozicion të gazetarëve të “Fiksit” të gjitha pamjet e kamerave të sigurisë së biznesit, aty ku kishte ndodhur edhe dhënia e ryshfetit karshi inspektorëve të tatimeve.

Inspektorët kanë shkuar ditën e parë në biznesin e zotërisë dhe kanë konstatuar se, biznesi i tipit “Agjenci Turistike” ishte në rregull, por këmbimi valutor që zotëronte i njëjti pronar operonte pa licencë.

Ditën që inspektorët vajtën në biznes kontrolluan gjithçka, por në mungesë të pronarit të biznesit i lanë një porosi punëtorit: Që pronari të shpëtonte nga gjoba, duhej t’u jepte inspektorëve të tatimeve 700 euro.

“Fiksi Fare” transmetoi me zë dhe me figurë ditën kur inspektorët kthehen në biznes dhe bëjnë bisedë me pronarin, të cilin nuk e gjetën në biznes ditën e parë. Inspektori i thotë se “nuk kishte kohë të ulej në kafe”. Ndërkohë, qytetari i thotë se “kishte marrë edhe një tjetër gjobë në një hotel, e kërkonte ndihmën e tyre për t’ia hequr”.

Inspektori i thotë se do të fliste me kolegët edhe për këtë rast. Kur pronari e pyeti se ku mund t’ia jepte lekët, ai e tërhoqi në një anë të biznesit, që nuk monitorohej nga kamerat, dhe i tha “lekët eja dhe m’i jep aty”. Pasi merr 700 euroshin, inspektori ikën dukë i thënë biznesmenit që të mund ta kontaktojë në telefon, kur të ketë dëshirë, për çdo gjë.

Takimi i inspektorit me pronarin e biznesit për të marrë 700 euro ryshfet

Inspektori: Ishe dje ti?
Qytetari: E kam ngritur me gjak këtë punë. Jo mo nuk isha unë, kam qënë në Tiranë unë kur folëm bashkë, kam ardh në orën 2 e gjysmë të natës.
Inspektori: Exchange-in e ke pa licencë.
Qytetari: E di unë, e kam bërë licencimin tek Anila Thomai, dhe më tha shprehimisht kështu, Ali.
Inspektori: Nuk je fare për licencim.
Qytetari: Bravo, jo , je për licencim se unë i plotësoji të gjitha kushtet, por problemi është se mund të bëhet vetëm në shtator. Ke mundësi më tha mua me u rregullu me çunat tha, troç. Me një fjalë ajo tek Banka e Shqipërisë, rregullohu me çunat tha puno. Është punë kulakçe, varet si e shohin ato.
Inspektori: Do punosh, Vazhdo puno ti.
Qytetari: Kur do pimë kafe?
Inspektori: Kur të duash pimë kafe , vetëm jo sot se jemi në monitorim.
Qytetari: Ku të t’i jap këto “lekët”?
Inspektori: Hajde more atje, aty…
Qytetari: Do t’i bije telefonit për ndonjë gjë.
Inspektori: Do vij, por nuk vij dot që sot tek hoteli.
Qytetari: Të vish edhe je i mirëpritur atje.
Inspektori: Do të vij por do të marr këtu që të ashtu…
Qytetari: Sqaroje, po nuk e pate problem atë Visin “inspektori tjetër’, thuaji me atë çunin , se është çun dora jonë thuaji.
Inspektori: Me Visin tani, te Visi kalojmë vetë ne. Hajt mirupafshim.
Qytetari: Mirupafshim.
Inspektori: Bjeri telefonit ë…
Qytetari: Patjetër.

Aluizni njofton se në Vlorë deri në vitin 2013 ishin kryer gjithsej 1861 legalizime të objekteve pa leje, ndërsa në 5 vitet e fundit ALUIZNI ka realizuar leje legalizimi për 7122 objekte.

Aluizni publikoi të dhënat për legalizimet e kryera përgjatë 5 viteve të fundit në Qarkun e Vlorës, në zonën e bregdetit deri në Sarandë.

Aluizni bën me dije se në Qarkun Vlorë ku përfshihen, zonat e Vlorës, Sarandës dhe Bregdetit  ka një rëndësi të veçantë në trajtimin e problemeve të ndërtimeve informale. Për këtë arsye ka marrë vëmendjen e Aluiznit për ruajtjen e resurseve natyrore që ka bregdeti i Vlorës, Sarandës, Ksamili, Finiqi, kurora e gjelbër në këto zona dhe hapësirat arkeologjike.

Statistikat zyrtare tregojnë, se në vitin 2010 janë dhënë më pak leje në historikun e të gjithë këtij procesi, vetëm 108. Viti me numrin më të lartë të legalizimeve është viti 2017, kur u legalizuan 2382 objekte informale.
Në periudhën 2006 deri në vitin 2009 ishin kryer vetëm 20% e lejeve krahasuar me totalin prej 8983 lejesh. Ndërkohë që për vitet 2014 deri në shtator 2018 janë dhënë 80 % e lejeve.

Ndërsa në Sarandë shënohen 3688 legalizime të kryera që në nisje të procesit. Nga viti 2006 deri në 2013 janë bërë 881 leje, ndërsa prej vitit 2014 deri në shtator 2018 janë bërë 2807 legalizime objektesh informale.

Në vitin 2009 nuk u krye asnjë legalizim, ndërsa numri më i lartë i legalizimeve është bërë në vitin 2017 kur ALUIZNI ka legalizuar 1149 objekte.

Deri në vitin 2013 rezultojnë të kryera vetëm 23 % e totalit të lejeve të dhëna për banorët e qarkut bregdetar, ndërsa 76% e këtij totali është kryer në 5 vitet e fundit. Për periudhën janar- shtator 2018 janë bërë 917 legalizime objektesh.

Kryeministri Edi Rama paralajmëroi dje, rritje pagash për arsimtarët, infermierët dhe ushtarakët pas 1 prillit 2019. Në mbledhjen e Këshillit Ekonomik Kombëtar, ku u diskutua për projektbuxhetin e vitit 2019, kryeministri Rama u shpreh se në sektorin e shëndetësisë do të bëhet rritja më e lartë, prej 10%. “Në sektorin e arsimit do të kemi një tjetër rritje të konsiderueshme prej 7%. Janë 4650 mjekë dhe 13765 infermierë në të gjithë vendin, përfshihen edhe laborantët dhe farmacistët e spitaleve, si dhe 350 mijë arsimtarë që do përfitojnë nga këto rritje. Po ashtu do kemi një rritje në sektorin e mbrojtjes për 6800 ushtarakë në një masë që do të variojë sipas kategorive, 5%-7%”, sqaroi kryeministri.

“Brenda stru-kturës së buxhetit, ju do të shikoni që ky buxhet nuk është thjesht buxheti më i madh i radhës, por është një buxhet ku rritja e të ardhu-rave, krahasuar me vitin aktual, është shumë dome-thënëse dhe në raportin brenda për brenda kornizës së buxhetit është më dome-thënësja, krahasuar me buxhetet e mëparshme, pothuajse 300 milionë dollarë në një vit të vetëm”,-u shpreh Rama, sipas të cilit ky është një buxhet lirie. Sipas kreut të qeverisë të ardhurat e parashikuara do të mbështesin në radhë të parë, një numër apo një masë të rëndësishme politikash sociale, duke përmendur futjen për herë të parë të çekut të bebes. “Janë afro 30 mijë familje që do të përfitojnë nga një fond për rreth 20 milionë dollarë”, tha më tej Rama.

“Përtej shakasë që është gjysma e të vërtetës gjithmonë, kemi mundësinë të bëjmë një rritje tjetër, duke nisur nga 1 prilli. Qëllon që është një ditë përrallash, por për ne ka qëlluar një ditë ku kemi pasur disa zhvillime pozitive për vendin dhe kështu ka qenë edhe për rritjen e pagave më parë, kështu do të jetë përsëri, për mjekët, për infermierët, për mësuesit dhe për ushtarakët. Sipas kryeministrit, “buxheti i ri do të mbështesë dhe një numër politikash të reja që nga ndërmarrjet sociale, si program alternativ integrimi për grupet e pafavorizuara, me target punësimin e personave në nevojë, tek ngritja e 27 shërbimeve të reja të kujdesit social dhe qendrave në mbështetje të shtresave më të prekura, tek familjet përfituese të ndihmës ekonomike me paketat social-shëndetësore dhe këtu përfshihen një sërë elementësh për 69 mijë familje”. Rama tha se janë parashikuar rreth gjysmë miliardi lekë në buxhet për të mbështetur qoftë infrastrukturën e rrugëve kombëtare, qoftë infrastrukturën e ujësjellësve, si dhe trajtimin e mbetjeve, rehabilitimin e mëtejshëm të rrjetit energjetik.

Shkrimin e plotë e gjeni sot në Gsh.al

Jemi në mesin e muajit tetor dhe temperaturat janë krahasimisht me gushtin e dy apo tre viteve më parë. Por ndërsa ende nuk keni marrë masa për stinën e ftohtë, bëni mirë të nisni nga puna. Javën e ardhshme moti “kthen faqe”. Madje meteorologët parashikojnë që do të kemi edhe flokët e para të dëborës që i paraprijnë sezonit të ardhëm dimëror.

Moti mbetet me kthjellime dhe vranësira të lehta e kalimtare deri të shtunën kur pritet shtim i vranësirave në territor. Vranësirat do të fuqizohen gjatë së dielës dhe kryesisht të hënën kur priten shira në të gjithë vendin. “Në zonat Lindore shfaqet mundësia për reshje dëbore në data 22 – 23 tetor”, parashikon Meteoalb.

Temperaturat e ajrit vijojnë pa luhatje të ndjeshme gjatë gjithë javës; ku minimumet variojnë nga 6°C mëngjeset në zonat malore deri 14 – 16°C në zonat e ultësirës ndërsa vlerat e mesditës, do të variojnë nga 20°C në Juglindje deri në 27 – 28°C vlerat maksimale në Jugperëndim të vendit.

Mesdita e së dielës sjell një rënie të theksuar të vlerave termike; kryesisht gjatë mesditës duke ulur maksimumet në vlerat 15 – 18°C në zonat malore dhe deri 23°C në zonat e ultësirës (vlera tipike të stinës së vjeshtës).