Aktualitet

Komisioni Europian rekomandon çeljen e negociatave me Shqipërinë

Aktualitet, Lajmi i fundit, Politike / /

Komisioneri Europian për Politikën e Fqinjësisë dhe Negociatat e Zgjerimit, Johannes Hahn, duke lexuar progres raportin për Shqipërinë dhe vendet e tjera të Ballkanit Perëndimor, deklaroi sot se “Komisioni Europian rekomandon çeljen e negociatave me Shqipërinë dhe Maqedoninë e Veriut”.

Sipas Komisionerit Hahn, progresi i Shqipërisë dhe i Maqedonisë së Veriut në përmbushjen e kritereve të paracaktuara është mbresëlënës. Sipas tij, kusht i vetëm mbetet vijueshmëria e reformave.

“Shumë vende kanë arritur kriteret që kemi vendosur dhe në veçanti Ballkani Perëndimor. Angazhimi ynë ka dhënë rezultate konkrete. Kemi dhe arritje historike, kemi shumë sfida që mbeten ende të hapura dhe paketa e sotme tregon se duhet ecur mbi këto udhëzime”, tha Hahn.

Ai deklaroi se Shqipëria ka bërë progres me Reformën në Drejtësi dhe procesin e patjetërsueshme të vetingut. “Ky është një shembull edhe për vendet e tjera”, deklaroi Hahn.

“Në nivelin strategjik duhet t’i japim merita vendeve për atë që kanë arritur ashtu sikurse duhet theksuar se sigurisht që vendet, respektivisht do të duhet të japin rezultate”, vijoi Hahn.

“Për Shqipërinë dhe Maqedoninë e Veriut, me lejoni t’ju them se të dyja vendet kanë ecur pozitivisht me rekomandimet, sigurisht duhet të ecet më tej me çështjet problematike. Duhet të ketë rezultate më të qëndrueshme për sundimin e ligjit, për stabilitetin në rajon”, tha ai.

“Të dyja vendet kanë dhënë rezultate mbi reformat dhe ato pika që i kemi caktuar në vitin 2018. Ne mbi këtë bazë rekomandojmë hapjen e negociatave me Shqipërinë dhe Maqedoninë e Veriut, por ato duhet të mbeten të fokusuara në vijueshmëri me reformat e ndërmarra. Dua të shoh më shumë progres dhe duhet të vijojë implementimi reformave”, theksoi Hahn. “Ky është kushti për të ecur përpara në rrugën europiane dhe për të vijuar me kapitujt e negociatave që janë 23-24 të tillë”, theksoi Hahn.

“Ne nuk mund të importojmë në BE problemet mes fqinjëve, kjo është urgjente për vendet e Ballkanit Perëndimorë”, theksoi Hahn. “Përshëndesim me këtë rast marrëveshjen mes Maqedonisë së Veriut dhe Greqisë. Ekonomia ka probleme në Ballkanin Perëndimor dhe kjo nuk lejon që këto vende të përfitojnë plotësisht nga avantazhet që i japim ne (BE). Duhet luftuar papunësia dhe duhet forcuar stabiliteti ekonomik si bazë për stabilitet politik”, vijoi Hahn./atsh

Komisioni Europian rekomandon çeljen e negociatave me Shqipërinë Read More »

Parashikimi i motit, e martë, 28 maj 2019

Aktualitet / /

Moti për ditën e sotme parashikohet me vranësira të dendura dhe intervale kthjellimesh.

Shërbimi Meteorologjik Ushtarak bën me dije se do të ketë reshje shiu të herëpashershme me intensitet të ulët dhe mesatar në pjesën veriore e qendrore. Përkohësisht në mesditë në veri, reshjet do të jenë në formën e rrebesheve shoqëruar me shkarkesa elektrike.

Era do të fryjë me drejtim Juglindje-Jugperëndim mesatare dhe e vrullshme në bregdet e pasuar nga një valëzim i forcë 4 ballë.

QYTETET Temperaturat në °C Sigla
Shkodër 16/22 Re shi/diell
Kukës 14/21 Re shi/diell
Lezhë 17/23 Re shi/diell
Dibër 12/20 Re shi/diell
Durrës 15/23 Re shi/diell
Tiranë 17/24 Re shi/diell
Elbasan 16/24 Re shi/diell
Berat 14/24 Re shi/diell
Vlorë 15/23 Re diell
Korçë 13/20 Re diell
Gjirokastër 14/23 Re diell
Sarandë 15/23 Re shi/diell/atsh

Parashikimi i motit, e martë, 28 maj 2019 Read More »

KPK shkarkon kryetarin e Gjykatës së Fierit, Roland Jaupaj

Aktualitet, Lajmi i fundit / /

Komisioni i Pavarur i Kualifikimit shkarkoi sot nga detyra kryetarin e Gjykatës së Rrethit Gjyqësor Fier, Roland Jaupaj.

Trupi gjykues i cili shqyrtoi dosjen ndaj gjyqtarit Jaupaj përbëhej nga nga Genta Tafa(Bungo) kryesuese, Pamela Qirko relatore dhe Etleda Çiftja anëtare, ndërsa seance dëgjimore u monitorua edhe nga vëzhgues ndërkombëtar.

Në seancën dëgjimore të një dite më parë, Jaupaj u rivlerësua për tre kriteret e procesit të vetingut, pasurinë, pastërtinë e figurës dhe profesionalizmin.

Gjyqtari Jaupaj u përball gjatë seancës së rivlerësimit me probleme të pasurisë. Për këtë arsye, KPK vendosi shkarkimin e tij nga detyra./atsh

KPK shkarkon kryetarin e Gjykatës së Fierit, Roland Jaupaj Read More »

Prezantohet portali “Mjekë për Shqipërinë”

Aktualitet, Shendetesi / /

“Sot ka 112 vende vakante për mjekë të përgjithshëm dhe specialistë dhe 79 vende vakante për mjekë në spitale, dhe mbi bazën e rankimit do të fillojë punësimi”, deklaroi sot Kryeministri Edi Rama në lançimin e portalit “Mjekë për Shqipërinë”.

Kryeministri e konsideroi këtë portal një dritare të re për ata që përfundojnë studimet rishtaz, për mjekët specializantë, për ata që janë endur prej vitesh në kërkim të një vendi pune dhe për ata që duan të rikthehen e të shërbejnë në Shqipëri.

Rama tha se portali “Mjekë për Shqipërinë” vjen në vijim të traditës së krijuar tashmë me portalet për punësimin e mësuesve dhe të infermierëve.

“Informimi në këtë portal është në kohë reale, procedurat për aplikim janë të shkurtuara dhe të shpejta dhe nuk ka më shanse që dikush të të parakalojë nëse ti e meriton”, tha Rama.

Kjo, sipas tij, “hap rrugën edhe për ata mjekë nga diaspora që duan të punojnë në Shqipëri.

“Kemi disa raste dhe ka interesim në këtë drejtim. Përmes këtij portali të interesuarit do të komunikojnë drejtpërdrejtë dhe pa filtra e pa pengesa”, tha Rama. /atsh

https://www.facebook.com/edirama.al/videos/342232119809405/?t=0

Prezantohet portali “Mjekë për Shqipërinë” Read More »

Sinoptikanët japin lajmin e keq për javët në vazhdim

Aktualitet / /

Këtë javë mirëpresim zyrtarisht stinën e verës, por nëse nuk do të ishte për kalendarin, vetëm duke ngritur sytë nga qielli do të mendonim se jemi në vjeshtë.

Përveç uljes së temperaturave javët e fundit jemi përballur edhe me reshje të dendura shiu.

Këto reshje shiu parashikohen të na shoqërojnë jo vetëm gjatë kësaj jave, por edhe fillimin e javës së parë të qershorit, shkruan meganews.al

Vranësirat dhe shirat mbeten prezente deri në fillim të qershorit në pjesën më të madhe të vendit e kjo situatë sinoptike duket se nuk ka përmirësim pavarësisht ardhjes së verës.

Në mbrëmje dhe gjatë natës, por edhe të pjesën më të madhe, shirat mbeten mesatare deri intensive në pjesën më të madhe të territorit.

Ndonëse temperaturat nuk kanë pësuar një ulje të ndjeshme, por qëndrojnë në vlerën minimale 14 gradë e atë maksimale 23 gradë, vlen të theksojmë se këto shifra nuk janë tipike për qershorin.

Gjatë dy javëve në vazhdim temperaturat ruajnë thuajse një konstnate, në rang vendi mbi 22°C dhe minimalja vlera e sipërpërmendur.

Sinoptikanët japin lajmin e keq për javët në vazhdim Read More »

Xheison Baftit i realizohet ëndrra,bëhet me shtëpi të re

Aktualitet / /

Ëndrra e Xheison Baftit ishte që kur të rritej ta bënte familjen e tij me një shtëpi të re. Por ai nuk do të ketë nevojë të presë kaq shumë, pasi kjo ëndërr tashmë iu bë realitet, falë spektaklit “Në kurthin e Piter Pan”. Nisma e prezantuar pak kohë më parë u finalizua me sukses këtë mbrëmje finale.

Thirrjes së Alketa Vejsiut iu përgjigjen shqiptarë të shumtë nga e gjithë bota, biznesmenë e kompani të shumta në vend, të cilët të gjithë sëbashku bënë të mundur që “Taramelja” dhe familja e tij të bëhej me një apartament në Tiranë.

Gjithashtu, nismës së spektaklit iu bashkua edhe Bashkia e Tiranës, duke bërë me shtëpi edhe gjyshërit e Xheison, duke e sjellë kështu të gjithë familjen në kryeqytet.

Në këtë mbrëmje finale të spektaklit, Alketa Vejsiu ndau me gjithë publikun një klip, në të cilin shfaqej apartamenti ku Xheison do të jetojë bashkë me familjen e tij, si dhe reagimin e tij kur hapi derën e shtëpisë.

“Shumë faleminderit ju kam shumë xhan, ju kam shumë zemër…” ishin fjalët e Xheison për të gjithë ata që i plotësuan ëndërr.

E pasi u fut në shtëpi, Xheison vuri në dyshim nëse ishte në ëndërr… “Ndoshta jam në ëndërr”, tha ai mes lotëve.

Edhe në skenën e madhe të “Piter Pan”, në Televizionin Klan, Xheison ishte i përlotur nga gëzimi.

Xheison Bafti: Me lot gëzimi jam duke qarë, me lot emocionesh.

Alketa Vejsiu: Ky njeri ka një dritë speciale se nuk ka mundësi, po ku i gjen këto fjalë, o Zot i madh.

Xheison Bafti: Nuk e di, mi sjell Zoti me magji…

Xheison Bafti: Një minutë, pushoni pak publiku ju lutem. Përshëndës Lali Erin, të gjithë ata që na kanë ndihmuar për blerjen e shtëpisë, edhe mësuesn time, shkollën time dhe Myshqetanë./tvklan

Xheison Baftit i realizohet ëndrra,bëhet me shtëpi të re Read More »

Letra e gjashtë publike Lulzim Bashës

Aktualitet, Politike / /

LETER E GJASHTE PUBLIKE LULZIM BASHES

Zoti kryetar,

letrave të mia po i vjen fundi. E fundit për të tentuar Dialogun është edhe kjo javë, e cila mbyllet me çeljen zyrtarisht të fushatës së 30 qershorit.

S’ka mbetur nga ana ime ndonjë gjë e rëndësishme pa shkruar në këto letra dhe çka mbetet ende ndoshta, është detyrimi për të përmbledhur disa nga gjërat kryesore që janë thënë e shkruar.

1. Dy vjet më parë Ju bëtë fiks të njëjtën gjë dhe fiks për të njëjtat arsye: Paniku nga zgjedhjet dhe frika nga drejtësia. Asokohe kishit ikur nga Kuvendi dhe ishit mbledhur në Çadrën e Republikës së Re, për të mbrojtur drejtësinë e vjetër duke refuzuar të votoni Vetingun. Dihet si shkuan gjërat, s’po zgjatem.

2. Sivjet Ju i jeni rikthyer po atij avazi, por nga një nivel i ri papërgjegjshmërie, me mandate të djegura, bojkot zgjedhjesh dhe kërcënime për të ndaluar forcërisht popullin të zgjedhë në 30 qershor. Përsëri frika nga zgjedhjet dhe paniku nga drejtësia, Ju kanë qorruar e shurdhuar dhe shtyrë në rrugën e një lufte imagjinare çlirimtare nga tirania! Të cilën duhet ta bëni me veten ne fakt, për të përmbysur tiraninë e frikës brenda Jush, sepse Shqipëria s’është në duart e asnjë tiranie, po në duart e një shumice të zgjedhur demokratikisht, për të qeverisur deri në vitin 2021.

3. Siç e shihni dhe vetë, mbështetja Juaj në aventurën pa rrugëdalje vjen duke rënë, e sado t’i tërhiqni e t’i shtriqni trupat e ndjekësve si çamçakiz në bulevard, për të krijuar efekte fotografike e televizive masiviteti, nuk bëni tjetër veçse gënjeni veten Tuaj dhe ata që duan të gënjehen me idenë, se disa mijëra punonjësit e bashkive blu dhe masa modeste e militantëve bashkëngjitur tyre, janë populli i Shqipërisë në protestë kundër qeverisë! Kjo gënjeshtër mund t’Ju mbajë me gajret edhe për ca kohë, Juve e lidershipin politik të grupimit Tuaj. Por besomëni që zgjimi nga ëndrra me sy hapur e largimit të qeverisë pa zgjedhje apo e moslejimit të zgjedhjeve, do të jetë shumë i dhimbshëm për atë grupim e për Ju si udhëheqësi i saj, nëse do të vijoni shurdhërisht në rrugën pa dalje, ku po marshoni verbërisht.

4. Unë Ju ftoj përsëri që sa pa u djegur çdo afat kohor, të nisim Dialogun pa kushte dhe të fillojmë të shkruajmë bashkarisht, një faqe të re bashkëpunimi politik duke mos humbur më tej kohë, energji, mundësi zgjidhjeje, me këtë avaz të padobishëm për vendin, për njerëzit e për opozitën po se po!

5. Jini i sigurtë zoti Lulzim se zgjedhjet do të mbahen në 30 qershor. Kjo shumicë qeverisë do të vazhdojë të ushtrojë përgjegjësinë e saj edhe për të paktën dy vjet të tjera, kur i mbaron mandati i saj legjitim. Vetingu dhe Reforma në Drejtësi do të vijojnë pa asnjë lëkundje, asnjë ndalesë dhe asnjë rishikim, për sa kohë koha nuk do të sjellë nevojën për ndërhyrje të mundshme në korpusin ligjor të drejtësisë dhe vetëm me konsensusin e partnerëve tanë ndërkombëtarë.

Kujtesë: Shqipëria duhet të hapë negociatat për anëtarësim patjetër këtë vit dhe fatkeqësisht, Ju po bëni çmos t’i pengoni ato. Por jini po ashtu të sigurtë se populli shqiptar, përfshirë edhe çdo demokrat të arsyeshëm, që kurrë s’ka votuar e mbase s’do votojë ndonjëherë për Partinë Socialiste, nuk ka për t’Jua falur një paudhësi të tillë.

Shqiptarët janë shumë më të mençur se sa për fat të keq, shumë gabimisht, politikanë e parti të ndryshme i kanë kujtuar në momente të ndryshme të historisë së zhvillimeve demokratike. Mos e nënvleftësoni forcën e gjykimit dhe fuqinë e ndëshkimit të tyre, sepse çfarë keni parë e provuar në zgjedhje të shkuara, do t’Ju duket lule në krahasim me mësimin që do merrni kur t’Ju kërkoni përsëri votën një ditë, nëse s’do të ktheni rrugë sot përpara se sa nesër të jetë shumë vonë.

Me shëndet,

Edi Rama

27 maj, 2019

Letra e gjashtë publike Lulzim Bashës Read More »

Këto çifte të zodiakut janë destinuar të qëndrojnë bashkë

Aktualitet / /

Nëse nuk ke patur fat në marrëdhëniet e tua të dashurisë, kjo mbase ka të bëjë me faktin se ende nuk ke takuar shpirtin tënd binjak, por astrologjia mund të të ndihmojë.

Ashtu si kjo ‘shkencë’ na ndihmon të kuptojmë disa anë të personalitetit të secilit prej nesh, shërben për të na ndihmuar të gjejmë njeriun e duhur me të cilin mund të ndajmë jetën.

Ja cilat janë çiftet e shenjave të horoskopit që kuptohen aq mirë me njëri tjetrin, sa të mbeten gjithmonë bashkë:

Bricjapi dhe Peshqit

Bricjapët janë dinamikë, elastikë dhe të motivuar ndërsa Peshqit janë të ndjeshëm, kompleksë dhe intuitivë. Kur këto dy shenja bashkohen, japin dhe marrin atë që u nevojitet më shumë.

Luani dhe Peshorja

Luanët janë shumë social, të shkëlqyer dhe e duan vëmendjen, ndërsa njerëzit e Peshores janë të këndshëm, miqësorë dhe ekstroversë. Kur takohen, janë një çift perfekt dhe kanë biseda të pafundme mbi gjithçka.

Virgjëresha dhe Ujori

Virgjëreshat janë observues dhe punëtorë, ndërsa Ujorët janë progresivë dhe origjinalë. Këta të dy inspirohen teksa mendojnë në mënyrë të ndryshme.

Binjakët dhe Shigjetari

Binjakët dhe Shigjetari e duan lirinë dhe aventurën. Ky çift nuk mërzitet kurrë nga njëri tjetri. Vazhdimisht janë në kërkim të aventurave dhe zgjedhin të ndjekin këshillat e njëri-tjetrit.

Këto çifte të zodiakut janë destinuar të qëndrojnë bashkë Read More »