Aktualitet

Sipas Shërbimit Meteorologjik Ushtarak, moti për ditën e sotme parashikohet me kthjellime dhe prej orëve të mesditës do të ketë shtim vranësirash deri të dendura kryesisht përgjatë relieveve malore dhe kodrinore.

Në orët e mesditës deri ato të pasdites, parashikohen reshje shiu të herëpashershme me intensitet të ulët dhe mesatar në formën e shtrëngatave shoqëruar me shkarkesa elektrike.

Gjithashtu parashikohet breshër i izoluar në orët e mesditës. Në mbrëmje reshjet do të ndërpriten në të gjithë territorin.

Era do të fryjë me drejtim Juglindje- Jugperëndim 1-10 m/sek. Valëzimi i forcës 0-1 me lartësi vale 0.3-0.8 metër.

QYTETET Temperaturat në °C Sigla
Shkodër 15/25 Diell shi
Kukës 14/25 Diell shi
Lezhë 15/24 Diell shi
Dibër 11/22 Diell shi
Durrës 15/25 Diell shi
Tiranë 15/26 Diell shi
Elbasan 14/26 Diell shi
Berat 14/26 Diell shi
Vlorë 14/25 Diell shi
Korçë 11/22 Diell shi
Gjirokastër 13/25 Diell shi
Sarandë 15/24 Diell shi/atsh

Eksportet e produkteve bujqësore shqiptare po konkurrojnë në tregjet e huaja me cilësinë dhe çmimet e ulëta në krahasim me prodhimet bujqësore të vendeve të tjera të rajonit, por edhe Europës.

Ekspertët e Ministrisë së Bujqësisë dhe Zhvillimit Rural, shprehen për ATSH-në, se domatet shqiptare eksportohen në vendet europiane dhe të rajonit, sidomos Serbi, me çmim mesatar më të ulët se çmimi i 20 eksportuesve më të mëdhenj në botë. Ndërkohë që Italia është vendi më i shtrenjtë për eksportin e domateve mes vendeve më të mëdha eksportuese.

Sipas ekspertëve një arsye tjetër e kërkesës së shtuar të tregjeve të huaja, për domatet shqiptare është edhe cilësia e eksportit.

Shqipëria, në pjesën dërrmuese eksporton për subjekte të ndërmjetme që i përdorin për t’i përpunuar nëpër konserva në formë salce.

Në vitin 2018 Shqipëria arriti të eksportonte plot 30 milionë dollarë domate, pothuajse ekskluzivisht në vende të Bashkimit Europian. Sot në vendin tonë janë rreth 1500 ha serra në gjithë territorin e vendit që kanë produktet e para domate që dalin shpejt në treg.

Ndërsa ulja e TVSH-së për inputet bujqësore, dhe politikat lehtësuese fiskale dhe mbështetja me financime ka rritur interesin për të prodhuar produkte bujqësore cilësore dhe në sasi në rritje. e.xh/j.p/

Në vetëm 4 muajt e parë të këtij viti, 2250 qytetarë kanë përfituar falas shërbimet e paketës së Kardiologjisë në spitalet publike dhe private.

Fondi i Sigurimit të Detyrueshëm të Kujdesit Shëndetësor ka bërë të ditur se “zgjerojmë financimin publik për shërbimet shëndetësore drejt mbulimit shëndetësor universal”.

Paketa e Kardiologjisë është vetëm një prej 12 paketave shëndetësore që qytetarët e e përfitojnë falas afër vendbanimit.

Sipas të dhënave të bëra publike nga FSDKSH, 286 ndërhyrje kardiokirurgjikale janë kryer falas gjatë periudhës Janar-Prill 2019 në spitalet publike dhe private.

Po kështu, më shumë se 8 mijë qytetarë kanë përfituar procedurat dhe ndërhyrjet falas për shërbime të kardiologjisë, kardiokirurgjisë, transplantit të veshkave, dializës. z.tosku/ /a.g/

Besimtarët myslimanë festojnë sot Fiter Bajramin pas 30 ditëve agjërim, lutje dhe adhurime. Një orë pas lindjes se diellit besimtarët myslimanë falën Namazin.

Që në orët e para të mëngjesit, besimtarë të shumtë falën Namazin e Fiter Bajramit në Sheshin “Skënderbej” në Tiranë, që njihet ndryshe edhe si festa e mbylljes se agjërimit.

Agjërim, që në gjuhën arabe do të thotë “përmbahem”, është një nga 5 shtyllat e fesë islame, dhe gjatë saj si i varfëri edhe i pasuri janë të barabartë.

I vendosur në krye të lumit të njerëzve që edhe këtë vit për mbylljen e muajit të sakrificës e bënë në Bulevard dhe jo në xhami, Myftiu i Tiranës Ylli Gura dha mesazhe vëllazërie.

Dita nisi herët me ndarjen e Sadaka Fitrit për të varfrit dhe më pas me grumbullimin në shesh.

Pas drekës së bollshme me familjen, dita mbyllet me vizita tek miqtë e të afërmit.

Festa e Bajramit manifestohet duke falur namazin e Bajramit. Namazi i Bajramit është obligim i domosdoshëm për çdo mysliman. Muhamedi i ka kushtuar rëndësi të veçantë duke i urdhëruar myslimanët që të falin këtë namaz. /atsh

Zëvendëskryeministri Erion Braçe uroi sot çdo shqiptar të besimit mysliman për festën e Bajramit.

“Posaçërisht njerëzve të mirë e punëtorë në Çermë të Sipërme, Çermë Sektor, Çermë Proshkë, Çermë Pasha, Kamp, Çermë Shkumbin, Sulzotaj, Shën e Premte, Grabian, Tre Ura, Stravec, Ferras, Sopëz, Spolatë, Babunjë, Gur, Muçias, Remas, Bedat, Adriatik, Kamenicë, Kryekuq, Zharnec, Mizë, Xeng, Bishtcukas, Germenj, Hallvaxhias, Bregas, Dushk Can. Kudo ku ka shqiptarë besimtarë në Divjakë, Lushnje padiskutim, Berat, kudo: Paçi çdo të mirë në shtëpitë tuaja, familjet, për prindërit e fëmijët së pari, pastaj për miqtë e shokët, vetëm mirësi e dashuri, drejtësi e solidaritet”, u shpreh Braçe.

Braçe u kërkoi atyre falje për çdo shqetësim të ardhur nga politika. “E di që jeni plot në shpirt pas këtij muaji të paqtë, shënjuar nga lutja, reflektimi e sakrifica, ndaj dua t’u kërkoj ndjesë për çdo shqetësim ardhur në mënyrën më të pashembullt nga politika”, tha ai.

Duke iu drejtuar qytetarëve Braçe tha se “ju i keni dhënë mësim të qartë gjithkujt ndër politikanë që këtë muaj, në ditë si kjo, kujtohen për Zot e besim, flasin në emër të tij e tyre, në emrin tuaj”.

“Kurrë nuk kujtohen qoftë edhe një çast kur vjedhin, dhunojnë, djegin, vrasin, urrejnë, shajnë e mallkojnë, nuk ndalen të mendojnë, reflektojnë, mbështetur e mbi bazë të vlerave të ligjit e besimit! Sot është dita e besimtarëve, atyre që duan e gjenden për tjetrin. Sot nuk është dita e hipokritëve që urrejnë e ndajnë mes njerëzish, vjedhin e vrasin, djegin e shkatërrojnë, duke kërkuar të fshihen tek Zoti”, tha Braçe.

“Nder e respekt për çdo burrë e grua që beson e sillet si i tillë çdo ditë, që gjendet për tjetrin me dashuri e përkushtim, ndan gjithçka me cilindo në nevojë”, tha ai./atsh