Nga Lirim Nezha :
Dy javë më parë,qytetarë të Orikumit dhe fshatrave përrreth,të mbështetur nga strukturat e Partisë Demokratike dhe Forumi Rinor i saj,shkuam në mbledhjen e Këshillit Bashkiak për të protestuar rreth problemeve të panumërta me të cilat përballet Orikumi dhe rrethinat,pra e gjithë Njësia Administrative që përfshin ish Bashkinë Orikum.
Në mënyrë edhe pak të zhurmshme tentuam të ngremë shqetesimet tona dhe duhet thënë se Këshilli Bashkiak u detyrua t’i merrte në konsideratë dhe t’i fuste në rendin e ditës.Në atë mbledhje u vu re mungesa e qëllimshme e Kryetarit të Bashkisë Dritan Leli ,i cili,edhe pse ndodhej në Vlorë,i informuar për reagimin qytetar,zgjodhi ta shmangte përballjen e drejtëpërdrejtë.
Gjithsesi “na u dha e drejta” që një përfaqësi e jona do të pritej në zyrë nga kryetari Leli.Po bëhen dy javë dhe takimi me ne dhe përballja me shqetësimet tona nuk është në axhendën e kryetarit.Sepse qytetarët janë të fundit në axhendën e tij snobe.Kjo bie erë paburrëri,burracakeri.
Gjithsesi unë u përpoqa që,përmes televizionit “6+1 Vlora” t’ja bëj present edhe qytetarëve,por edhe kryetarit problemet që e shqetësojnë komunitetin e Orikumit dhe fshatrave rreth tij,Dukatin,Tragjasin,Radhimën dhe gjithë bizneset që operojnë në turizëm që nga hotelet e restorantet buzë detit e deri lart në Llogara.
Duhet thënë se turizmi elitar nis nga dalja e tunelit te Ujit te Ftohtë deri në Qafën e Llogarasë dhe pjesa më e madhe e këtij territori i përket njësisë administrative Orikum,ku është për të ardhur keq që packa se taksat që paguajnë zënë shuma të konsiderueshme,(mjafton të kujtojmë që buxheti i ish bashkisë ka qënë rreth 1 miliardë lekë),shuma që i kthehet në investime është zero lekë.
Është vetëm një shumë simbolike e investuar për klubun Oriku dhe kaq.Sigurisht që ata djem duhen mbështetur,madje edhe më shumë se kaq sepse janë krenaria e qytetit,por ka nevojë për shumë më shumë se kaq.Ka nevojë që taksat e qytetarëve të kthehen mbrapsht në formën e investimeve.E kjo përgjatë tre viteve të qeverisjes socialiste të bashkisë Vlorë,nuk ka ndodhur.
Qytetarët e Orikumit dhe të rrethinave nuk janë në axhendën e kryebashkiakut .Dritan Leli mjaftohet me kamerat që e ndjekin përgjatë lungomares,i gëzohet si fëmijë shpikjes perverse të stolave inteligjentë,por na duhet t’i kujtojmë se Vlora nuk fillon dhe mbaron në lungomare,është shumë më e madhe se aq.
Ujërat e ndotura derdhen në det edhe pse prej tre vitesh ka përfunduar një investim gjigand për këtë qëllim që është rrjeti kryesor dhe impianti modern i grumbullimit dhe përpunimit të ujërave të zeza,një investim I Bankës Islamike prej 11.5 milionë euro.Një investim që po amortizohet ende pa u vënë në punë sepse rrjeti I brendshëm ende nuk ka filluar dhe me sa duket është me pak shance për të filluar.Thuhet se Fondi shqiptar i Zhvillimit ka marrë përsipër financimin e pjesshëm të projektit,por për këtë duhet që Bashkia të planifikojë në buxhet së paku 10%-shin e fondit të investimit ,atë që quhet buxheti i pjesëmarrjes qytetare,që puna të nisë.Pra edhe këtë investim të domosdoshëm është bashkia që e pengon,që nuk i hap rrugë.
Si pjesë e të njëjtit investim u ndërtua edhe rrjeti kryesor i ujësjellësit,depozitat si dhe stacioni i pompave për Orikumin,Dukatin e ri dhe Radhimën.Por asgjë deri tash për atë që ngelet thembra e Akilit,rrjetin e brendshëm .Është ai që do të mundësojë ujë pa ndërprerje.Është vendosja e matësave si një detyrim i Ndërmarrjes së Ujësjellësit ndaj qytetarëve,prerja e lidhjeve të paligjshme dhe ndërhyrja me investime në rrjet që do të mundësojnë heqjen e pompave dhe bolierëve që janë shëmti për qytetin dhe pasiguri për qytetarin.Me dy orë ujë në ditë nuk mund të ketë turizëm.Janë qindra familje që e kanë burimin kryesor të jetesës dhënien me qera të banesave përgjatë sezonit,por nuk marrin asnjë shërbim që të justifikojë taksat dhe tarifat që paguajnë.
Hotelet ,baret dhe restorantet e bregdetit të radhimës nuk kanë ujë edhe pse tubat e ujit u kalojnë shumë pranë dhe kjo vjen gjithashtu nga neglizhenca totale e personave përgjegjës, nga mungesa e investimit për rrjetin e brendshëm.
Ndërkohë edhe plantacionet me agrume të cilat janë edhe një dekor i mrekullueshëm për turistët rrezikojnë të thahen sepse kanali i ujit që vjen nga burimet e Izvorit prej vitesh është marrë në mbikqyrje nga bashkia,por në të nuk është kryer asnjë investim për pastrimin dhe funksionimin e tij.
Plazhet që jepen me qera nga bashkia kanë gjithnjë e më shume cmim më të lartë e shtrirje kohore përtej përdorimit të tyre,por megjithatë asgjë nga këto lekë nuk u kthehet atyre si shërbim.Nuk ndjejnë dorën e ngrohtë të bashkisë,por vetëm kërbacin e taksidarëve.
Është premtuar në fushatë elektorale landfilli i mbetjeve urbane,por mbetjet deri tash hidhen në breg të lumit dhe cdo mbrëmje në verë aroma është e padurueshme ndërkohë që një pjesë e tyre gjatë dimrit,me nisjen e stinës së shirave, shkojnë përmes ujit në det.
Energjia elektike është një tjetër mungesë permanente.Orikumi është bërë proverbial për mungesat e gjata dhe të herëpashershme të energjisë.Askush nuk mban përgjegjësi për ndërprerjet me orë,por edhe me ditë të tëra të energjisë elektrike,ndërkohë që një muaj të mos paguhet fatura të ndërpresin energjinë.Pa harruar të përmendim mbifaturimet aq herë sa shteti ndihet në nevojë për lekë.Ne nuk mund të jetojmë me propogandë qeveritare për investime të mëdha.Sa kohë këto investime nuk shoqërohen me investime serioze në rrjetin e brendshëm tregon se pushteti eshte I interesuar me shume per fasadat dhe punet propagandistike se sa per zgjidhjen konkrete te problemeve të qytetarëve.
Ndarja administrative e ka lënë Orikumin krejt pas dore.Të gjitha investimet e bëra gjatë qeverisjes së PD-së në këtë qytet,nën drejtimin e kryetarit më të suksesshëm të këtyre 25 viteve,z.Kanan Braho, janë drejt degradimit sepse nuk mirëmbahen.Mjaft të shohim të gjitha rrugët kryesore të cilat kanë patur një ndricim perfekt,kryesor dhe ndricim trotuaresh.Duke filuar me bulevardin kryesor e deri tek shëtitorja që lidh qëndrën e qytetit me bregun e detit.Sot përballesh me poca të thyer e të shtrembëruar gjithandej dhe me llampa që nuk ndizen.Shëtitorja që të con buzë detit është thuajse pa ndricim dhe nuk është vënë dorë për të rreguluar dicka.
Orikumi është ndoshta i vetmi qytet pa një lulishte apo një kënd lojërash për fëmijë.Edhe investimi që u krye përpara qëndrës administrative disa vite më parë po shkon dëm sepse asgjë nuk funksionon,as disa lodra fëmijësh që u vendosën,as një shatërvan që u ndez vetëm në inagurimin e tij,as ndricimi i sheshit.
Premtimet elektorale të fushatës janë të shumta,po aq të shumta sa janë mos realizimet e tyre.
Është premtuar ristrukturimi i shkollës 9 vjecare “Balil Pelari”,por ende nuk janë gjetur koha dhe fondet për këtë qëllim.Duhet falenderuar kompania turke që operon në Pashaliman e cila me kontributet e veta ka ndërhyrë për të rikonstruktuar deri diku kopshtin dhe shkollën e mesme “Hasan Pulo”.
Gjithashtu në qëndrën shëndetesore Orikum dhe në ato të fshatrave nuk është bërë asnjë ndërhyrje për të rregulluar situatën alarmante në të cilën ndodhen.
Është premtuar rruga e Tragjasit,nga qëndra deri tek rezervat e shtetit,rrugë që të con edhe në fshatin e vjetër te Tragjasit që është një destinacion i rëndësishëm turistik për shkak të historiës dhe arkitekturës.Kjo rrugë e ka projektin të gatshëm prej vitesh,por…
Kalaja e Gjon Bocarit,sërish në fshatin Tragjas është e pa aksesueshme për shkak të mungesës së një rruge që do të bënte të mundur të ishte e vizitueshme për turistët që në këtë zonë nuk kanë interes vetëm për detin.Me që jemi tek destinacionet turistike të zonës duhet të përmendim qytetin antic të Orikut.Për të shkuar atje,përvec një rruge skandaloze bregut të detit duhet të përballesh edhe me pengesat administrative sepse është ende brenda një zone ushtarake.Një problem ky realisht I mbartur prej vitesh ,i premtuar edhe nga kryeministri Rama,e që nuk po gjen zgjidhje.
Karaburuni dhe plazhet e tij janë mollë e ndaluar për qytetarët pikërisht prej postbllokut.Ato mund te arrihen vetem me rruge detare qe ka nje kosto te larte dhe te pa perballueshme per kedo.
Është premtuar rruga e bregdetit të Orikumit si dhe rruga që të con tek një tjetër destinacion turisti,kisha 1300 vjecare e Marmiroit.Një premtim i ngelur në letër.
Kullat e Dervish Aliut janë një tjetër destinacion për turistët,por ato janë duke u shëmbur sepse nuk ka asnjë investim për to.Ketu ndoshta do të duhej një bashkëpunim më i mirë mes bashkisë dhe institutit të monumenteve.Është premtuar në vazhdimësi rikonstruksioni i Shkollës së Kuqe në Dukat Fshat,por ai monument i rëndësishëm i historisë kulturore të Dukatit është duke u shëmbur.
Dukati i Vjetër është përballur verën e shkuar me mungesën e ujit,një problem që do të ndihet edhe këtë vit sepse ende nuk është bërë asgjë për ta zgjidhur apo për ta lehtësuar si problem.Gjithashtu eshte premtuar ristrukturimi i sheshit kryesor te fshatit,por edhe ky premtim eshte harruar ose eshte lene per te qene nje premtim i gatshem per fushaten e ardhshme.
Pas gjithë këtyre premtimeve të pambajtura që përmenda e që nuk janë të gjitha,a mundet dikush të më thotë për cfarë i ka vlejtur Dritan Lelit ky mandat i marrë nga qytetarët,përpos vidiove dhe selfieve në Lungomare?!
Lirmm Nezha
Orikum Maj 2018
Një nga faktorët kryesorë të rrezikut për vdekshmërinë në mbarë botën është aktiviteti fizik i pamjaftueshëm. Aktiviteti fizik i pamjaftueshëm shton rrezikun për t’u prekur nga sëmundjet jo të transmetueshme siç janë sëmundjet kardiovaskulare, kanceri dhe diabeti. Po ashtu aktiviteti fizik kontribuon në parandalimin e sëmundjeve jo të transmetueshme.
