Ministri i Diasporës Pandeli Majko ka komentuar deklaratën e Presidentit të Serbisë Vuçiç, i cili më herët tha se konflikti i dhunshëm me Kosovën është real dhe i ngrirë, i mundshëm kurdoherë nëse s’ka marrëveshje.
Majko përmes një shënimi në facebook thotë se ajo e Vuçiç është një deklaratë e papërgjegjshme dhe se Serbia përbën rrezik në rajon.
Më tej Majko me tone të ashpra i bën të ditur Vuçiçit se shqiptarët në çdo shtet të botës janë në gatishmëri nëse përsëritet skenari për luftë të mundshme.
Kryeministri Edi Rama ka folur për dy prej fatkeqësive që kanë goditur njëri pas tjetrës Shqipërinë, tërmetin e 26 nëntorit dhe më pas pandeminë globale të koronavirusit.
Rama shprehet i bindur se Shqipëria do të dalë më e fortë nga këto dy sfida të rënda.
Përmes një postimi në Facebook, ai shkruan se qeveria do të bëjë gjithçka të mundur në luftën kundër armikut të padukshëm. Kryeministri shtoi se qeveria do të përkushtohet në rindërtimin e të gjithë shtëpive të dëmtuara nga tërmeti.
“Ne do ta bëjmë me të gjitha forcat luftën me Armikun e Padukshëm dhe fronti ynë i mbrojtjes në spitalet Covid do të jetë deri në fund, një shembëlltyrë e vendosmërisë, kurajos, profesionalizmit, pa asgjë mangut krahasuar me kushtet spitalore, kurat farmaceutike, shërbimin mjekësor në spitalet Covid të Europës!,” – theksoi Rama.
“Ne do t’i rindërtojmë një për një shtëpitë, apartamentet, shkollat, kopshtet, spitalet e qendrat shëndetësore të shembura nga tërmeti, në kohë rekord krahasuar me ecurinë e një procesi të tillë në vendet që janë përballur me këtë sfidë!”, shtoi kreu i qeverisë.
“Dhe Shqipëria do të dalë më e fortë nga këto dy sfida të rënda, të cilat mund t’i përballojë e t’i fitojë vetëm kjo shumicë qeverisëse, sepse ne nuk jemi më të mirët dhe kemi patjetër të metat, gabimet, boshllëqet tona, po më të mirë se ne për Shqipërinë nuk ka!” – shkroi Rama, i bindur se pas pandemisë Shqipëria do të dalë më e fortë nga kjo betejë./NOA.al
Kryeministri Edi Rama ka deklaruar se vaksina kundër COVID kur të vijë në vendin tonë do të jetë falsa për të gjithë. “Po”, tha Rama pasi u pyet nga gazetarja se kur të vijë vaksina a do të jetë falas për të gjithë. Gjatë një konferencë me gazetarët që është duke u zhvilluar prej një ore në kryeministri, Edi Rama ka premtuar shkarazi dhe një paketë të re mbështetëse për qytetarët. Sipas Ramës paketa do të dalë shumë shpejt, dhe do të jetë një mbështetje për personat e sëmurë, si dhe familjet në ndihmë ekonomike, por pa saktësuar më konkretisht se në çfarë do të konsistojë ajo.
Kjo nuk është hera e parë që Rama premton një paketë ndihmëse për qytetarët, ndërkohë që paketa e tretë që u premtua nuk u pa në asnjë rast që të zbatohej në realitet. Rama tha se ai dhe qeveria nuk duan që të ketë një mbyllje të ekonomisë, e për këtë shkak nuk ka masa drastike kufizuese.
“Kemi gati edhe një paketë tjetër që do të dalë shumë shpejt, qoftë për të mbështetur të sëmurët, qoftë për të mbështetur familjet në ndihmë ekonomike. Sepse gjërat mund të shkojnë në drejtime të ndryshme.
Nuk kemi bërë masa shtrënguese të një natyre si ato që janë bërë në shumë vende. Masat shtrënguese janë minimale sepse ne nuk duam ta mbyllim ekonominë sepse mendojmë se ka mundësi të mbahet një ekuilibër. U bëj thirrje njerëzve të bëjnë detyrat e veta. Për njerëzit më në nevojë situata nuk është e lehtë. Për ata me ndihmë ekonomike, deri në mbarim të kësaj flame, të bëjmë një shtesë financiare të konsiderueshme”, u shpreh Rama.
Qindra qytetarë që janë duke u trajtuar për Covid në banesat e tyre, janë të detyruar të shpenzojnë deri në 1 mijë apo 2 mijë euro për kurimin e pasojave të sëmundjes, ndërkohë që asnjë prej ilaçeve që rekomandojnë mjekët nuk janë pjesë e listës së barnave që rimbursohen.
Kryeministri Edi Rama emëroi sot zv/ ministër të Ekonomisë dhe Financave ekspertin e fushës së ekonomisë për PD-në, Besart Kadia, madje edhe këshilltar i Bashës deri pak muaj më parë.
Eksperti i njohur i Partisë Demokratike për ekonominë, gjithashtu pedagog në një universitet privat, u shpreh se ofertën e kreut të qeverisë e pranoi, pasi qëllimi i tij është të kontribuojë për Shqipërinë.
Tashmë që ai iu bashkua ekipit të Edi Ramës, “i uroj suksese Bashës” tha Kadia në një intervistë për “Abc News”, ku edhe sqaroi arsyen pse vendosi t’i bashkohej qeverisë “Rama”.
Besart Kadia ka qenë ish-sekretar për sipërmarrjen e lirë në PD dhe këshilltar i Lulzim Bashës.
Përse e la opozitën 6 muaj para zgjedhjeve?
Mendoj që opozita kishte disa qartësi deri në 2017, më pas duket se është bërë e paqartë me politikat ekonomike.
Çfarë ju shtyu që të pranonit ofertën dhe kur iu bë?
Ideja është e sfidave të forta, tërmeti dhe pandemia, edhe unë si ekonomist që jam me shkollim perëndimor. Cdo kontribut personal për Shqipërinë.
Ofertën kush ua bëri?
Oferta ka qenë me kryeministrin.
Këto ditë keni diskutuar, apo më përpara?
Jo, vetëm nga sfida e covidit dhe nevoja për ta menaxhuar.
Takim, telefonatë …
Patjetër, që kryeministri është ai që merr vendimet për kabinetin e vet….
Çfarë përgjigje keni për ata që thonë se kaluat nga krahu opozitar te i shumicës?
Unë jam kthyer në Shqipëri pas studimeve në Angli për të kontribuar për cështjet ekonomike. Mendoj që opozita kishte disa qartësi deri në 2017, më pas duket se është bërë e paqartë me politikat ekonomike. Sfidat janë të menaxhimit të borxhit, rënia ekonomike për shkak të krizës dhe për të dalë sa më të zhvilluar pas kësaj krize.
A keni një përgjigje për ata që mendojnë se 6 muaj para zgjedhjeve kaluat me shumicën, pasi nuk iu fut Basha në listë?
Aspak! Bashës i uroj sukses edhe partisë Demokratike. Nuk është vendimi im personal që vendos fatet e Shqipërisë.
Çfarë përgjigje keni për ata që e shikojnë këtë lëvizje si fillimin e një bashkëqeverisjes mes PS-PD?
Unë i kontribuoj shtetit shqiptar, nuk ka rëndësi nëse është e majta apo e djathta, idetë e mia janë pro tregut dhe biznesit.
Shtatë komuna të Kosovës pritet të futen në karantinë nga dita e premte. Lajmin e ka njoftuar kryeministri i Kosovës, Avdullah Hoti, teksa ka thënë se nga ora 19:00 në këto komuna do të ketë edhe orë policore për qytetarët.
Komunat me këtë vendim do të jenë: Prishtina, Podujeva, Mitrovica, Peja, Gjakova, Gjilani, Ferizaj, raporton Koha.net.
Në këto komuna, qendrave tregtare dhe veprimtarive të hotelerisë dhe restoranteve u lejohet veprimtaria nga ora 05:00 deri në ora 20:00. Ndërsa bizneset lejohen që të ushtrojnë veprimtarinë e tyre nga ora 05:00 deri në orën 18:00.
Hoti ka folur për një varg masash që do të merren për të parandaluar përhapjen e koronavirusit. Ai tha se situata me pandeminë është tepër e rëndë, duke u shprehur se projeksionet e Institutit Kombëtar të Shëndetësisë Publike janë tejet pesimiste.
“Situata është tepër e rëndë, ne kemi përgatitur të dhënat konkrete që t’i shohin të gjithë qytetarët. Duke pas parasysh kapacitetet ne duhet të kujdesemi për masa me specifike. Testimet janë trefishuar në javët e fundit, numri i rasteve pozitive është rreth 1 në 3 që testohen, e ndonjëherë edhe deri në 50 për qind dalin pozitive. Edhe rastet fatale janë në rritje. Projeksionet e IKSHPK-së janë mjaft pesimisite”, ka thënë Hoti.
Në një intervistë për emisionin”Ftesë në 5”, djali i aktorit Koço Devole, Genci do të jepte shpresë duke thënë se gjendja e të atit është e stabilizuar dhe mjekët këtë e kanë parë si një shenjë të mirë. Por fatkeqësisht, disa ditë më pas, aktori dhe skenaristi i njohur nuk mundi që të fitonte betejën me COVID-19 dhe u nda nga jeta në moshën 75-vjeçare.
Fillimisht Devole doli nga spitali për ta vijuar trajtimin në shtëpi, por përkeqësimi i gjendjes shëndetësore e gjeti atë përsëri në ambientet e spitalit Infektiv, ku dha edhe frymën e fundit.
Emisioni “Ftesë në 5” i kushtoi pjesën e parë të puntatës së kësaj të hëne, ndarjes nga jeta të të madhit Koço.
Të ftuar ishin miqtë e tij, një ndër ta edhe aktori Agron Llakaj. Përpos të gjithë kujtimeve të bukura, që lidhen me aspektet profesionale por edhe ato familjare, pasi aktorët ishim miq shumë të mirë, Llakaj veçon një fakt që shumë pak njerëz flasin. Agroni citoi se “Koço ishte një thesar i humorit shqiptar, thesar dhe iku aq i varfër, është dhimbje”.
Me këtë ai iu referua vështirësive financiare që u gjend aktori në pjesën më të madhe të jetës. Llakaj e cilësoi si hipokrizi lavdet e thurura për aktorin, ndërsa shtoi se askush nuk u kujtua për të sa ishte gjallë. Ai theksoi se aktori ka jetuar në një shtëpi me qira dhe ajo që mori me vete ishin vlerësimet dhe të qeshurat e publikut.
“Ai ishte një thesar i humorit shqiptar, thesar dhe iku aq i varfër, është dhimbje. Unë do të thosha që fati i keq i artistëve, sa janë gjallë nuk kujtohet njeri për ta, por kur largohen të gjithë thurin lavde. Një hipokrizi që gjendet kudo. Vlerësojini njerëzit sa janë pranë nesh, sado që themi ne, Koço nuk dëgjoi asgjë. Të mos harrojmë që ai u largua i varfër nga kjo botë, në një shtëpi me qira, e bën dyfish dhimbjen më të madhe”, tha Llakaj në Top Channel.
SHOQATA MBARE KOMBETARE E DETAREVE SHQIPTARE “ADRIJON”, NJOFTON SE, DITEN E DJESHME ESHET NDARE NGA JETA OFICERI NAVIGATOR BAKI MUSAJ. KAPITEN BAKIU ISHTE NJE NJERI E FAMILJAR I MIRE, I THJESHTE E I KOMUNIKUESHEM ME SHOKET E KOLEGET. AI SHERBEU PER DHJETRA VITE NE FLOTEN TONE TREGETARE, DUKE KRYER DETYRA TE NDRYSHME SI OFICER I I-RE, I II-TE E I III-TE, NE KETO ANIJE. NE CDO POZICION E DETYRE QE JU CAKTUA U DALLUA PER KORREKTESI E NDERSHMERI. VITET E FUNDIT, BAKIU KREU DETYREN E PILOTIT NE PORTIN E DURRESIT, NJE SHEMBULL E MODEL PER BREZIN E RI. VDEKJA E TIJ E PARA KOHESHME HIDHEROI JO VETEM FAMILJEN E TIJ, POR GJITHE SHOKET, MIQTE E KOLEGET QE KANE PUNUAR OSE NJOHUR ATE. LAMTUMIRE KAPITEN BAKI MUSAJ! U PREHSH NE PAQE. VARRIMI I TE NDJERIT DO BEHET NE ROME, ITALI, DITEN E DJELE.
JETA DHE VERPIMTARIA E TE NDJERIT BAKI MUSAJ ESHTE PERSHKRUAR GJERESISHT TEK ” VELLIMI I II-TE I ANTOLOGJISE SE DETARISE”.
Njoftojmë se pas një sëmundje të rëndë, sot në Vlorë u nda para kohe nga jeta kallaratasi Vero Demiraj.
Verua u lind në Kallarat në vitin 1947 nga një familje me ndjenja të larta patriotike dhe atdhetare. Për një kohë të gjatë Verua, ashtu si edhe prindërit e tij, jetoi në Kotë, duke punuar me ndershmëri e përkushtim në detyra të ndryshme në Ndërrmarrjen Bujqësore të Kotës. Ndërsa kohët e fundit jetonte në qytetin e Vlorës.
Sëmundja e rëndë, e ndau atë para kohe nga familja, të afërmit, miqtë e shokët e tij të shumtë, por edhe nga ne bashkëfshatarët e tij kallaratas.
Kryesia e Shoqatës Kallarati u shpreh ngushëllimet më të thella e të sinqerta, bashkëshortes, Durimes, dy djemve Gentianit dhe Dorianit, si dhe të afërmve për humbjen e njeriut të tyre të dashur!
Varrimi bëhet nesër, datë 7 nëntor 2020, ora 11:00 në Vlorë.
