Turizem

Projektet e ndryshme infrastrukturore, por jo vetëm po e transformojnë qytetin bregdetar të Vlorës, nga qendra në periferi, nga vija bregdetare në hapësirën e blloqeve të banimit, deri në zonat rurale, në të gjitha njësitë administrative.

Çdo rrugë e rrugicë, çdo lagje e fshat, është pjesë e kësaj pune që po vijon prej pak vitesh dhe që po e bëjnë qytetin një hapësirë me standard bashkëkohore. Radha e projekteve është e gjatë dhe pasurohet çdo ditë, pavarësisht fund, apo fillim viti.

Kështu u shpreh në një intervistë për ATSH-në kryetari i bashkisë Vlorë, Dritan Leli, i cili shpalosi një sërë projektesh që janë zhvilluar, kanë nisur e do të bëhen realitet edhe gjatë 2021.

Por nuk mungon edhe fusha më e rëndësishme ajo e turizmit, ku bregdeti i saj vijon të tërheqë një numër të lartë turistësh edhe pse këtë vit për shkak të pandemisë numri i tyre ishte më i ulët.

-Vlora, në këto vite ka përjetuar një “boom” investimesh, të cilat kanë patur impaktin e tyre të drejtpërdrejtë në turizëm. A mund të na bëni një përshkrim të tyre?

Mjafton të sjellim në vëmendje faktin se, sot, qyteti i Vlorës, ka dy epiqendra të rëndësishme të jetës urbane me profil dhe në funksion të drejtpërdrejtë të zhvillimit të turizmit, për të evidentuar rëndësinë që i është kushtuar investimeve të kësaj natyre, me mbështetjen e Qeverisë Shqiptare dhe angazhimin personal të Kryeministrit Rama.

“Lungomare” dhe Qendra Historike e Vlorës, janë shndërruar sot, në dy pole të rëndësishme të zhvillimit të turizmit dhe që i kanë dhënë një impuls të spikatur zhvillimit. Kjo na ka bërë ne optimistë, për efektivitetin e investimeve madhore të realizuara gjatë viteve të fundit dhe për pritshmëritë për të ardhmen. Këto dy pole, me dimensionet e tyre, spikasin edhe në këtë atmosferë festash, kur ato gjenerojnë gëzim dhe besim tek njerëzit, tek qytetarët, ku, pavarësisht kufizimeve orare për shkak të pandemisë, mbeten destinacion i preferuar për vizitorët edhe në këto ditë dimri. Prandaj dhe vazhdimi i investimeve në projekte të tilla, është vlerësuar si mënyra më e mirë për të ecur drejt një zhvillimi të qëndrueshëm, drejt standardeve më të përparuara. Vlora e transformuar e këtyre viteve është produkt i vizionit të Qeverisë Shqiptare, Kryeministrit Edi Rama, i punës së palodhur të administratës së Bashkisë. Për ne, të investosh, do të thotë të evidentosh dhe të vësh në eficiensë resurse, të krijosh dimensione zhvillimi në dinamikë, të përvijosh profile dhe modele të të ardhmes.

Prandaj dhe administrata bashkiake është orientuar dhe orientohet në vijimësi për të qenë sa më pranë modeleve më të mira zhvillimore, për t’i bërë ato qeliza të suksesit të të ardhmes. Për të orientuar investimet aty ku impakti është i dukshëm, ku çdo vlerë financiare e hedhur, përkthehet në ekonomi, në standard, në cilësi jetese. Është kjo filozofia që na ndjek në punën tonë të përditshme, në jetëzimin e vizionit tonë. Prandaj dhe, në bashkëpunim me të gjithë faktorët, të mbështetur fuqimisht nga Qeveria Shqiptare, ne evidentojmë dhe këmbëngulim që projektet të ecin dhe të ndjekin kohën, pavarësisht vështirësive. Prandaj dhe në bashkëpunim me Fondin Shqiptar të Zhvillimit(FSHZH), ne po punojmë për vazhdimin e investimeve edhe në pjesën tjetër të Qendrës Historike të Vlorës, apo konkretizimin e projekteve të tjera madhore që mbështeten e financohen nga Qeveria.

Është e paprecedent ajo që po ndodh tashmë në Vlorë, ku investimet pasojnë njera tjetrën, ku projektet po transformojnë gjithçka, të gjithë hapësirën nga qendra në periferi, nga vija bregdetare në hapësirën e blloqeve të banimit, nga qendra e qytetit, deri në zonat rurale, në të gjitha njësitë administrative. Çdo rrugë e rrugicë, çdo lagje e fshat, është pjesë e kësaj pune që po vijon prej pak vitesh dhe që po e bëjnë qytetin një hapësirë me standard bashkëkohore. Radha e projekteve është e gjatë dhe pasurohet çdo ditë, pavarësisht fund, apo fillim viti.

Projekti “Lungomare 2”, segmenti që nis nga fushat sportive deri tek Tuneli i Ujit të Ftohtë, është aktualisht, pika e referencës për vëmendjen tonë në fushën e transformimit të mëtejshëm të Vlorës, në funksion të turizmit. Ecuria dhe ritmi i punimeve në këtë projekt, përbën edhe një sfidë për kohën, për problematikat që dalin në terren. Në vlerësimin tonë, ky projekt, me një impakt të rëndësishëm, do të përfundojë përpara fillimit të sezonit turistik të vitit që vjen. Puna që po bëhet është intensive, tepër profesionale, e pandërprerë dhe në përputhje me plotësimin e afateve të përcaktuara. Në ditët e para të janarit do të nisë edhe segmenti tjetër pas tunelit të Ujit të Ftohtë, i financuar tashmë, i cili do të pasohet në tej edhe nga pjesët e tjera të këtij projekti të jashtëzakonshëm transformues, ndërkohë që po vijon puna intensivisht me investimin e Bypass-it të qytetit, që krijon një tjetër mundësi lidhjeje me bregdetin.

Asnjë vështirësi nuk mund të verë në diskutim përkushtimin tonë për të vazhduar me zbatimin e projekteve, të cilat e kanë shndërruar Vlorën në një kantier të vërtetë pune. Në Vlorë punohet, në Vlorë ndërtohet, pavarësisht se pandemia ka krijuar situata që deri një vit më parë ne as që mund t’i imagjinonim. Puna vazhdon në të gjithë shtrirjen gjeografike të qytetit, në të gjithë territorin e Bashkisë. Ky fakt, mund të konstatohet sot fare lehtë. Jemi çdo ditë në terren, duke punuar për të tashmen dhe duke menduar për ditët që vijnë. Për ne, përbën motiv pune, çdo shqetësim, çdo problem që konstatojmë, apo që na vjen nga komuniteti, çdo kërkesë e njerëzve, e qytetarëve për standarde në cilësinë e jetesës. Një gropë, apo një dëmtim asfalti, bëhet pjesë e angazhimit tonë të përditshëm, po aq sa edhe puna për të çuar përpara projektet e rëndësishme. Dhe në vijim të prezantimit të këtyre projekteve, po veçoj atë të ndërtimit të segmentit që lidh rrugën “Transballkanikja”, me portin e Vlorës, për të përfunduar më së fundi këtë projekt të ëndërruar prej kohësh nga qytetarët vlonjatë dhe që do të krijojë një dimension të plotë lidhjes së kësaj nyjeje të rëndësishme portuale, me akset kombëtare. Ky është një projekt tepër i rëndësishëm, që shkon në koherencë me projektin tjetër të transformimit të ballinës së portit, aty ku është Muzeu Kombëtar i Pavarësisë. Ky projekt, që është një nga investimet më të rëndësishme që ne po realizojmë përgjatë vijës bregdetare të qytetit, do të shndërrojë në një pyll të gjelbëruar të gjithë këtë hapësirë përreth godinës së Muzeut Kombëtar të Pavarësisë dhe godinave e hoteleve që ndodhen në këtë zonë.

Duke qëndruar në këtë pikë, pra në atë të investimeve që janë në proces, apo që pritet të nisin, çfarë vendi zë projekti i transformimit të Sheshit të Flamurit, në tërësinë e transformimeve që po ndodhin në Vlorë?

-Projekti i transformimit të Sheshit të Flamurit, është një ndër investimet me impakt të shumëfishtë dhe me pritshmëri të larta nga komuniteti i qytetarëve, por jo vetëm. Rëndësia dhe vendi që zë Sheshi i Flamurit në historinë e Vlorës, të Shqipërisë dhe të shqiptarëve, i jep këtij investimi një peshë të jashtëzakonshme. Prandaj dhe që në krye, unë dua të falenderoj të gjithë këshilltarët bashkiakë, të cilët u bënë pjesë e votimit në mbledhjen e miratimit të paketës fiskale për të filluar procedurën e shndërrimit të Sheshit të Flamurit, në sheshin e të gjithë shqiptarëve, për t’i kthyer dinjitetin kësaj hapësire simbol të historisë.

Tashmë, është miratuar projekti dhe është zhvilluar edhe procedura përkatëse e tenderimit dhe puna për transformimin e Sheshit të Flamurit do të nisë shumë shpejt. Është një projekt fantastik që e transformon tërësisht këtë zonë. Godina shumëkatëshe , që është në këtë shesh prej më shumë se 30 vjetësh, nuk do të jetë më pjesë e tij. Në procedurat e konkretizimit të projektit, përfshihet edhe ajo e shpronësimit të kësaj ndërtese, e cila do të shembet, për t’i lënë vend një hapësire që do të konceptohet në raport me të gjithë pjesën tjetër të përreth Monumentit të Pavarësisë, Qendrës Historike etj.

Zoti Leli, çfarë ishte 2020-ta për turizmin. Si do ta vlerësonit ju Vlorën turistike për këtë vit?

Sezoni turistik i vitit të kaluar, në këndvështrimin tim, ishte sezoni i mbijetesës. Kjo, sepse, 2020-ta u shoqërua me situata të paprovuara më parë për shkak të pandemisë. Por, pavarësisht kësaj, disa nga pritshmëritë u tejkaluan. Ne u përshtatëm me situatën e rëndë të pandemisë dhe, mbi të gjitha, ato që u përshtatën më tepër ishin bizneset. Mes tyre, bizneset e turizmit ishin ato subjekte që treguan më tepër zhdërvjelltësi, u përballën me problematikat dhe arritën të jenë fituese(sigurisht aq sa lejoi pandemia) në ato rrethana të pazakonta.

Në Vlorë, pavarësisht problematikave të mëdha, mund të them se sezoni turistik gjatë muajve gusht-shtator, shënoi një rritje të rëndësishme. Njësitë hoteliere dhe lokalet e shërbimit edhe për arsye të numrit shumë të ulët të rasteve me Covid të konstatuara në territorin e Bashkisë Vlorë, patën një rritje të rëndësishme të fluksit. Në raste të caktuara, kjo rritje ishte deri në 50 përqind gjatë muajit gusht dhe 70% gjatë muajit shtator, krahasimisht me periudhat respektive të vitit paraardhës.

Këta tregues, të kënaqshëm për vetë rrethanat që përshkrova, na krijuan ndjesinë e mirë, për drejtësinë e vendimeve që morëm për të mbështetur biznesin, veçanërisht atë të turizmit. Sepse, ajo që dua të veçoj në këtë drejtim, është marrëdhënia e veçantë që ne, bashkia Vlorë, ndërtuam me komunitetin e biznesit, duke synuar minimizimin e pasojave që sigurisht solli pandemia.

Ne, i paraprimë situatës me një kuadër masash të caktuara dhe të efektshme, në bashkëpunim dhe koordinim me bizneset përkatëse, mes të cilave, ristrukturimi i taksave, apo falja e tyre në një masë të rëndësishme. Parimi se jo vetëm sukseset duhet të ndajmë bashkë, por edhe në momentet e vështira duhet të jemi pranë njeri tjetrit, në këtë rast, u shfaq i plotë dhe në të gjitha dimensionet./atsh

Vlonjatët janë teje krenarë për qytetin dhe identitetin e tyre “lab”, siç u pëlqen edhe shqiptarëve nga qytete të tjera t’i quajnë! Vlora është një ndër ato qytete shqiptare, që ka se për çfarë të dallohet: për historinë dhe rolin e saj në vendosjen e Pavarësisë, apo për bukuritë natyrore që ofron. Megjithatë, veçantitë e Vlorës nuk mbarojnë vetëm këtu!
Bregdeti i Vlorës karakterizohet nga një larmi habitatesh, nisur nga fakti se Adriatiku dominohet nga bregdeti i ulët, ranor, me gjire, kepe dhe laguna interesante, ndërkohë që e kundërta ndodh me Jonin shkëmbor, me gjire e plazhe me gurë, me shpella e zgavra të shumta. Bota bimore përgjatë vijës bregdetare shqiptare paraqitet me një bio-diversitet të lartë që pasqyrohet edhe nga numri i konsiderueshëm i algave të kuqe, të murrme e të gjelbra dhe prania e disa llojeve të bimëve me farë. Specialistë të mjedisit në qytetin e Vlorës shtrojnë domosdoshmërinë e ruajtjes së standardeve mjedisore në hapësirën detare, përmes aplikimit të formave bashkëkohore në këtë fushë, mes të cilave përfshihet krijimi i Zonave të Mbrojtura Detare. “Invertebrorët detarë përbëjnë pjesën më të madhe të faunës detare dhe janë shumë pak të njohur në Shqipëri, megjithëse janë përcaktues të strukturës trofike brenda ekosistemit dhe influencës në ciklin e dioksidit të karbonit në det”. Pyjet në Gadishullin e Karaburunit janë konsideruar si pyjet më të mirë të ruajtur në Shqipëri. Një diversitet i lartë i llojeve të bimësisë karakterizon shpatet e kodrës dhe habitate të tjera të gadishullit dhe të ishullit. Një numër i konsiderueshëm i llojeve bimore tokësore, të cilat i përkasin Librit të Kuq të Florës së Shqipërisë janë të pranishme në këtë zone. Kjo zonë është mjaft e pasur me habitate bregdetare dhe detare. Ne pjesën perëndimore të Ishullit të Sazanit dhe Gadishullit të Karaburunit, në ujërat detare të kësaj zone, është regjistruar prania e breshkave ujore mishngrënëse, delfinit dhe Foka mesdhetare. Prania e tyre është një rast shumë i rrallë, të cilat janë ndër llojet më të kërcënuara në shkallë globale, si dhe shumë lloje të tjera si lloje të ndryshëm peshqish, korale, barërat detar dhe specie të tjera të rëndësishme detare me interes ndërkombëtar, që janë të mbrojtura nga disa konventa ndërkombëtare (Barcelona, Bonn, CITES, Bern).
1. DET, DIELL DHE PLAZH
Arsyeja kryesore përse Vlora tërheq turistë, është padyshim për shkak të plazheve të saj. Mund të bëni plazh brenda qytetit të Vlorës, për të patur më afër edhe hotelet, baret, restorantet dhe gjallërinë e qytetit, ose mund të lëvizni me makinë pak më tutje. Gjetja e hoteleve për të qëndruar gjatë pushimeve verore nuk është aspak e vështirë, si në Vlorë, ashtu edhe në rrethinat e saj. Një plus për hotelet është edhe afërsia e tyre me detin, si dhe plazhet private, kështu që turistët nuk kanë përse të lodhen duke kërkuar një plazh perfekt. Nëse plazhi privat i hotelit nuk ju mjafton, mos u shqetësoni aspak: mjafton të keni një makinë dhe dëshirën për të eksploruar, dhe mund të kaloni çdo ditë të pushimeve tuaja në nga një plazh të ri. Ku do të ishte qejfi i pushimeve pa pakëz eksplorim dhe aventurë brenda tyre? 2.
2.SPORTE UJORE PËR AVENTURIERËT DHE PESHKIMI
Nëse nuk keni provuar asnjëherë sporte të tilla si zhytje, hedhje me parashutë, rafting, lundrim me kajak etj., atëherë keni provuar shumë, shumë pak aktivitete mahnitëse! Ne ju këshillojmë të mos humbisni më kohë, e nëse keni frikë, mposhteni frikën tuaj dhe përqafojeni aventurën! Ju premtojmë që do t’ia vlejë!Në Vlorë mund të provoni për herë të parë zhytjen në ujërat e pastra të Rivierës tonë. Nëse preferoni paragliding, apo hedhjen me parashutë, , e cila organizohet në Vlorë një cdo vit për profesionistët apo edhe amatorët! Mos u shqetësoni: nëse nuk keni provuar kurrë hedhje me parashutë, një profesionist ju shoqëron gjatë gjithë fluturimit tuaj. E vetmja gjë që ju duhet të bëni, është të qetësoheni, të merrni frymë thellë dhe të shikoni bukuritë e natyrës vlonjate. Na besoni, syri juaj nuk do të ngopet kurrë! Nëse dëshironi të mos jeni as në ajër e as nën ujë, por mbi ujë, atëherë udhëtimet me kajak gjatë Rivierës Shqiptare që ofron ky vend janë të duhurat për ju! Kajaket nuk janë e vetmja gjë që ofron por edhe: rafting, çiklizëm, kanoe, ture kulturore etj. përfshihen gjithashtu në shërbimet e këtij vendi. Mjafton vetëm që t’i vini gishtin një eksperience dhe gjithçka tjetër do të jetë gati për ju!
Sipas nenit 39 të LIGJIT Nr. 64/2012 për peshkimin, i cili lejon dhe kategorizon llojet e peshkimit në: a) Peshkim amator, peshkim i kohës së lirë, me grepa ose mjete të tjera, peshkimi jo tregtar, i paorganizuar i palidhur me ngjarje ose gara të përcaktuara, pa mjete lundruese. b) Peshkim sportiv, peshkim i organizuar që përfshin garimin e lirë midis peshkatarëve për të zënë individin (peshkun) më të madh të disa llojeve, numrin më të madh të individëve ose peshën më të madhe të përgjithshme në varësi të rregullave të çdo gare të veçantë.c) Peshkim turistik, peshkim i kryer nga peshkatarë profesionistë ose nga profesionistë të peshkimit çlodhës, të konsideruar si palë e tretë, e cila organizon ekspeditat e peshkimit.
Qëndra e Peshkimit në Radhimë, është një kompleks peshkimi i cili ofron për qytetarët jo vetëm peshkun më të freskët i cili mbërrin çdo ditë nga varkat e peshkimit të peshkatarëve te zonës. Kompleksi ofron dhe parkim për mjetet detare si dhe udhëtime turistike .Në këtë qendër mund te shikoni dhe shumë specie te veçanta detare në akuariumet e përshtatura me ujë deti. Gjithçka brenda rregullave dhe pa dëmtuar ekosistemin dhe detin e Vlorës.
3.LLOGARA, VLORË
Nuk jemi duke folur vetëm për rrugën sfiduese të Llogarasë, në të cilën djemtë kanë fort dëshirë të provojnë veten dhe aftësitë e tyre si shoferë! Mund të jetë një eksperiencë mjaft e bukur për ta (dhe pakëz e frikshme, mbase), por rruga është gjëja më e paktë që mund t’i shijosh një bukurie të tillë si Llogaraja e cila është një ndër parqet natyrorë më të rëndësishëm të vendit tonë, e meriton plotësisht famën që ka: kudo në Llogara të zë syri gjelbërim, me pemë konifere si pisha e zezë dhe frashër. Edhe fauna nuk ngelet pas për nga shumëllojshmëria, me kaprojtë, thëllëzat, shqiponjat, lundërzat, dhitë e malit, ketrat etj. Këto kafshë mund të gjenden edhe në zonën turistike të Llogarasë, e cila ka edhe shtëpi pushimi prej druri, gjelbërim mahnitës dhe ajër të pastër malor. Ndër monumentet natyrore në Llogara mund të vizitoni Pishën “Flamur”, e cila ka marrë formën e një flamuri për shkak të erërave të forta që fryjnë në atë zonë. Shpella e Lepenicës është një tjetër zonë që nuk duhet lënë pa u vizituar, sepse në muret e saj gjenden shkrime që nga kohët prehistorike. Të tjera shpella janë shpella e Shëngjergjit, e cila thuhet se përdorej nga mbretëresha Teutë e Ilirisë, dhe shpella e Haxhi Alisë, që vizitohet vetëm nga deti, nga Vlora në kepin e Gjuhëzës.

Parku Kombëtar i malit të Tomorit mbetet një nga destinacionet e preferuara turistike nga turistë vendas dhe të huaj në çdo stinë të vitit.

Këto ditë të ngrohta të shtatorit, mali i Tomorit po vizitohet nga të apasionuarit e natyrës, turistë vendas dhe të huaj.

Gjatë fundjavës një grup vizitorësh nga qytete të ndryshëm të vendit kanë shijuar kulinarin dhe peizazhet e mrekullueshme që ky vend ofron.

“Një grup vizitorësh nga qytete të ndryshëm të vendit, në një fundjavë të bukur në Malin e Tomorrit. Duke bujtur pranë Bujtina në Rroshnik, pas shijimit të gatimeve tradicionale dhe verës, përshkuan edhe shtegun Zalli i Dardhës – Qafa e Skurrës – Kalaja e Tomorit, në Malin e Tomorit”, bën të ditur Administrata Rajonale e Zonave të Mbrojtura Berat.

Fillimi i vjeshtës e bënë Tomorin një vend atraktiv për turistë, sepse jo vetëm bukuritë natyrore, pamjet madhështore, shtigjet malore, uji i ftohtë, por dhe shtimi i ngjyrave të vjeshtës e bëjnë këtë vend një parajsë turistike. /atsh