Turizem

Sezoni turistik i këtij viti ka qenë një nga më të mirët përsa i përket sigurisë së pushuesve dhe parandalimit të zhurmave akustike, ku Policia e Shtetit ka marr të gjitha masat për t’i siguruar ato.

Ministri i Brendshëm, Fatmir Xhafaj bëri me dije gjatë një takimi për turizmin në Vlorë, se gjatë këtij sezoni turistik u angazhuan më shumë se 1 mijë forca policore, mjete shtesë në funksion të tyre si dhe posta policie, të cilat kanë qëndruar 24 në shërbim të pushuesve.

“Ne premtuam 3 muaj me pare ne nisje të këtij sezoni se do te kishim një sezon me shume qetësi dhe shume rend, si dhe parandalimin e akteve kriminale. Padyshim besoj se me një organizmi më të mirë policor dhe është fakt që në aktivizuam mbi 1000 trupa policore, mjet shtesë në dispozicion të tyre, duke ngritur një sërë stacionesh provizore policie, si në Theth, Valbonë, Talie, Gjirin e Lalëzit,Ksamil etj, si dhe rritëm ndjeshëm shërbimet policore pa uniformë dhe shërbimet policore me mjete të lehta në territoret e plazhit. Si rrjedhojë ky ishte një sezon i sigurt dhe pa pasoja në zonat turistike si dhe me një ulje të ndjeshme të vjedhjeve në territoret e plazheve”, theksoi Xhafaj.

Policia e Shtetit në bashkëpunim me pushtetin lokal kanë marr të gjitha masat për parandalimin e aksidenteve të shkaktuar nga motorët e ujit, duke vendosur tabela informuese si dhe duke përcaktuar qartë vendin se ku motorët e ujit mund të qarkullojnë./atsh

Vlora ka përjetuar këtë vit një “bum” turistësh nga vendi fqinj Italia dhe kryesisht janë grupe të rinjsh, të joshur nga çmimet e lira dhe reklama në rrjetet sociale për plazhet e mrekullueshme.

Enrik Mehmeti, gazetar në Vlorë dhe njohës i mirë i sektorit të turizmit në tërësi, tha për “Monitor” se në përgjithësi ky sezon ka qenë më i mirë se ai i viteve të mëparshme për disa arsye, por problematikat nuk kanë munguar.

Ai nënvizoi se Vlora ende vuan numrin e kufizuar të shtretërve, pavarësisht strukturave të reja akomoduese, ndërkohë që edhe trafiku ka zbehur disi shkëlqimin e sezonit. Në Lungomare, sipas tij, u 4-fishuan bizneset e bareve dhe restoranteve ndërkohë që sektori po vuan për ide inovative dhe shërbime ekstra, të cilat mund të shtojnë vlerën e ofertës që Vlora ka për turistët.

Si e përkufizoni këtë sezon turistik veror për Vlorën apo rajonin e Jugut në tërësi? A ka pasur rritje të numrit të vizitorëve të huaj? Cilat janë vendet nga kanë ardhur kryesisht?

E quaj të suksesshëm për bizneset që lidhen me sektorin e turizmit në Vlorë, por më pak të suksesshëm për pjesën tjetër të Jugut, duke nisur nga Dhërmiu dhe në vazhdim. Vlora këtë vit ka pasur një numër të madh turistësh, kryesisht të huaj, dhe “bumi” ka qenë nga “fqinjët”. Është parë një rritje e numrit të turistëve italianë, të cilët kanë qenë të organizuar në grupe të rinjsh.

Nga kontaktet me ta, për të mësuar arsyet e zgjedhjes së Vlorës për pushime, është konstatuar se përgjithësisht janë joshur nga rrjetet sociale dhe media në të cilat tregohen çmimet e lira, vendet e mrekullueshme dhe ndryshimi rrënjësor i Shqipërisë.

Sipas tyre, nga një vend që s’duhet të vizitohej për shumë faktorë, të lidhur me sigurinë dhe deri te cilësia, Vlora tashmë është kthyer në një vend që duhet vizituar patjetër. Ndryshe ka qenë situata këtë vit në Dhërmi. Kjo për shkak të çmimeve të kripura që qarkulluan nëpër rrjete, të cilat i dhanë imazhin e një vendi i cili ishte i papërballueshëm për shumicën e turistëve. E vërteta ishte që çmimet “super të larta” ishin në lokale specifike, ndërsa në të tjera kishte çmime të klasifikuara normale për turistët.

Po lidhur me strukturat akomoduese, si paraqitet situata, a ka ndryshime në çmime, po pjesa e shërbimit?

Ka një përmirësim të ndjeshëm të kushteve të hoteleve, por ndihet mungesa e numrit të shtretërve. Rritja e numrit të turistëve të huaj të cilët kërkojnë parametra bashkëkohorë, ka bërë që investimet e reja të plotësojnë këto kritere, ndërsa të vjetrat t’i shtojnë ato. Vitet e fundit, sektori i hotelerisë ka punuar me paketa për turistët e huaj, si çekë, polakë, nordikë dhe së fundmi rusë duke bërë që shumë hotele të punojnë nga muaji mars deri në nëntor. Realisht, këto hotele janë të pakta, sepse tendenca e turistëve është në rritje, edhe pse për një periudhë të shkurtër.

“Bumi” ishte në 15-ditëshin e dytë të korrikut dhe deri në fund të gushtit, ashtu si shumë destinacione në Shqipëri, ku shumë turistë nuk gjenin vende për t’u akomoduar. Kjo kërkesë bëri që të përfitonin dhe shumë qytetarë, të cilët kanë përshtatur banesat e tyre në zonën e Plazhit të Vjetër apo dhe brenda qytetit. Për sa u përket çmimeve pati një luhatje në ulje në qershor dhe gjysmën e parë të korrikut, por më pas u rikthyen në nivelet e vitit të kaluar.

Cilat kanë qenë problematikat që kanë shoqëruar këtë sezon dhe që duhet të marrin vëmendje në vijim?

Për sa u përket problematikave ka pasur një situatë më të mirë se sa vitet e kaluara, por shumë prej tyre ngelen. Mospërfundimi ende i By Pass-it Vlorë-Orikum, bëri që fluksi i automjeteve të ishte shumë i lartë edhe për këtë sezon në rrugët e qytetit. Shumë turistë, të cilët kanë pasur si destinacion pjesën tjetër të Jugut, kanë qenë të detyruar të qëndrojnë në trafik. Një tjetër problem, i cili vlen të përmendet, është dhe stafi i lidhur me shërbimet në sektorin turistik. Në këtë pikë, pati mangësi nga vetë bizneset por jo për faj të tyre, por të mungesës së specialistëve të mirëfilltë.

Do të doja të bëja një propozim për këtë pikë. Nga çdo rreth mund të sigurohen kamerierë, banakierë, kuzhinierë apo punëtorë të tjerë të sektorit të turizmit, për të plotësuar nevojën që ka qyteti. Vlora, nga ana tjetër, ka dy konvikte, ai i Universitetit që shfrytëzohet për turistë dhe i industriales, që rri bosh dhe pikërisht këtu mund të bëhet edhe akomodimi i punonjësve me një kosto disi më të pranueshme për punëdhënësit dhe ku mund të organizohen edhe trajnimet e nevojshme nga specialistet përkatës.

Kjo do të ishte një ndihmë shumë e mirë si për bizneset, por dhe për turizmin në tërësi, duke pasur një shërbim më cilësor. Edhe për të rinjtë nga zona të ndryshme mund të ishte një mundësi e mirë punësimi, edhe pse sezonale, por me një pagesë të kënaqshme.

Turizmi në vetvete po nxit edhe zhvillimin e sektorit të shërbimeve siç janë sportet ujore, udhëtimet me paketa të dedikuara me anije por ende me një zhvillim anemik. Çfarë mund të bëhet për të nxitur plotësimin e paketave turistike, në mënyrë që Vlora të mos konceptohet vetëm si det dhe hotel?

Vitin e fundit, me hyrjen në funksion në mënyrë të plotë të Lungomares, u 4-fishuan baret dhe restorantet përgjatë zonës së Ujit të Ftohtë. Idetë e bizneseve të reja janë ndalur vetëm te këto dy biznese, kryesisht duke lënë pas dore biznese inovative dhe interesante. Vlora ka nevojë ende për shtimin e bizneseve të argëtimeve, ku turisti mund të kalojë dhe kohën e lirë. Një prej gjërave më të pëlqyera që turistët kanë kërkuar ka qenë bota nënujore, pasi në Gjirin e Vlorës janë një numër i madh anijesh të mbytura ku shumë prej tyre mund dhe të vizitohen.

Fatkeqësisht përgjatë viteve, të gjitha anijet janë vjedhur nga zhytës shqiptarë dhe të huaj duke e varfëruar shumë këtë sektor. Nga ana tjetër, pati dhe një rritje të numrit të anijeve turistike ku numri i anijeve shkoi në 7 të tilla nga 2 që ishin më parë. Konkurrenca bëri që shërbimi të kishte dhe mjete të cilat nuk ishin anije standarde. Një prej tyre ishte dhe katamarani Julka Unique i cili u prit shumë mirë për shkak të prodhimit që ishte i 2018-s, stabilitetit për shkak të strukturës dhe paketave me çdo gjë të përfshirë në anije.

Sa është ndier dora e pushtetit vendor në menaxhimin e plazheve, mbetjeve, ndërhyhet në sinjalistikë dhe infrastrukturë?

Ky vit, realisht është viti më i suksesshëm për sa i përket çdo aspekti pozitiv. Duke nisur nga infrastruktura, ku kryefjala është vendosja në funksion i Lungomares. Po ashtu dhe shumë rrugë apo lagje janë rehabilituar. Shtrimi i rrugës së Pyllit të Sodës bëri që kjo zonë së bashku me Zvërnecin të kenë një frekuentim të plazheve. Edhe siguria në plazhe, ndryshe nga çdo vit, këtë vit nuk pati asnjë të mbytur, për shkak të rojeve bregdetare, të cilët u vendosën të detyruar nga bashkia.

Një tjetër meritë, e cila bëri të shmangeshin incidentet ujore ishte dhe organizimi i lëvizjes së mjeteve ujore qindra metra larg plazheve. Asnjë gomone motor deti apo motoskaf nuk u afrua pranë vendeve ku laheshin njerëzit, pasi rrezikonin gjoba të majme. Bashkia pati një përkushtim të madh dhe në aktivitetet kulturore, ku disa prej tyre ishin të niveleve europiane. Vlora këtë vit ofroi një panoramë shumë ndryshe nga çdo vit tjetër./monitor

“Të shumtë janë ata që zgjedhin të kalojë vera dhe të nisen për pushime në shtator, kur pjesa më e madhe e njerëzve, veçanërisht në Itali, janë kthyer përsëri për të turbulluar qytetet dhe vendet e punës”.

Kështu nis artikulli i botuar në agjencinë italiane të lajmeve, ANSA që e klasifikon Shqipërinë në krye të pesë destinacioneve për të kaluar pushimet në muajin shtator.

Ndërsa kolegët tuaj përballen me stresin e kthimit, në shtator ju do të keni mundësi të zgjidhni nga dhjetëra vende në mbarë botën, duke shpenzuar shumë më pak, duke takuar pak turistë dhe duke shijuar temperaturat dhe klimat më të buta se sa muajt e nxehtë të verës.

Këtu janë pesë sugjerime për udhëtimin e shtatorit nga Peruja në Greqi, nga Afrika në Shqipëri.

SHQIPËRIA – Le të fillojmë nga ajo që disa e konsiderojnë Kroacinë e re, një krahasim që nuk është aspak i ekzagjeruar: Shqipëria është e pasur me histori, kulturë, plazhe të bukura dhe natyrë të harlisur. Përveç kësaj është lehtësisht e arritshme nga Italia dhe ka kosto shumë të moderuar. Shtatori është koha ideale për ta vizituar atë, ku ju do të keni mundësi të zbuloni mbi 460 km të brigjeve të saj pa grumbullimet e shumta të verës dhe me një klimë të freskët mesdhetare. Nëse deti ju tërheq, atëherë nuk keni veçse vështirësinë e zgjedhjes: nga Velipoja, plazhi i parë që takoni përgjatë Rivierës Shqiptare në Palasën e bardhë, nga ngjyrat ekzotike të arkipelagut të Ksamilit, në jug të Sarandës, në gadishullin e egër të Karaburunit.

ZANZIBAR – TANZANIA – Shtatori është një nga periudhat më të mira për të fluturuar në këtë ishull të bukur, që ndodhet jashtë Tanzanisë: klima është më e freskët dhe më e thatë, me temperatura maksimale rreth 27 gradë dhe sezoni i shirave do të ndodhë vetëm pas disa muajsh. Zanzibar është një parajsë e bërë nga plazhe të bardha, një det i pabesueshëm me nuanca të ngjyrave nga bluja elektrike deri te smeraldi, xhungla dhe qytete të vogla por shumë interesante, si kryeqyteti Stone Town, ku takohen kultura shumë të ndryshme: indiane, arabe, persiane dhe europiane. Mos e humbisni ishullin e Changuu, ku jeton një koloni e madhe të breshkave gjigante, si dhe Parkun Kombëtar Jozani, vendbanim i një race të majmunëve të pranishëm vetëm këtu dhe plazheve Matemwe, një vend i privilegjuar për të vëzhguar nga afër fenomenin e detit.

BUENOS-AIRES – ARGJENTINË – Në shtator, kur i ftohti i dimrit është në venitje dhe qyteti nuk është i pushtuar ende nga turistët Buenos-Aires është edhe më interesant. Në “Parisin e Amerikës së Jugut”, siç është quajtur, ju mund të endeni nëpër rrugët e artit të Palermos, duke vëzhguar Plaza de Mayo dhe Casa Rosada, qendra të qytetit dhe për të shkuar më pas në lokale si kafe Tortoni, bari më i vjetër i qytetit dhe për të kaluar nga ana e shkëlqyer e teatrit Colon, i konsideruar si një nga pesë shtëpitë më të mira të operas në botë. Destinacionet e mëposhtme mund të jenë ndërtesat shumëngjyrëshe të lagjes “La Boca” dhe i lashti “Barrio Recoleta”. Në kryeqytetin argjentinas tango është pjesë themelore e kulturës lokale dhe për ta njohur nga afër mund të prenotoni një leksion kërcimi në një nga shkollat ​​historike si ‘La Viruta’, ku për më shumë se 60 pesos mund të përballeni me disa nga kërcimtarët më të mirë në qytet.

MARRAKECH – MAROK – Muajt e nxehtë të verës janë ‘jashtë kufijve’ për ata që duan të shkojnë në Marrakech, Marok. Megjithatë, nga shtatori, klima bëhet më e butë dhe mund të jetë koha e duhur për t’u humbur në rrugët e një prej qyteteve më interesante të kontinentit afrikan, udhëkryq i kulturave të ndryshme dhe grupeve etnike, kënaqësive gastronomike dhe tregtarëve intrigues. Marrakech është në fakt qyteti i ‘souks’, i ndarë sipas llojit të produkteve (fenerë, sandale, vepra artizanale lokale). Në qytetin maroken, për më tepër, mund të qëndroni në ryad, ndërtesa të bukura tradicionale lokale, kryesisht të pranishme në Medinë (qendra historike), ndoshta duke zgjedhur një jo shumë larg kopshteve Majorelle, të dominuar nga një ndërtesë elektrike karakteristike e stilit moresco dhe bashkë me artin e ri, dhe nga Jamaja El Fna, sheshi më i madh në Marrakech.

KORFUZ – GREQI – Çdo verë ishujt grekë pushtohen nga turistë nga e gjithë bota. Por në shtator gjërat ndryshojnë: plazhet janë bosh dhe koha është më e këndshme. Korfuzi, pastaj, bëhet një destinacion edhe më joshës, falë lidhjeve të drejtpërdrejta me Italinë si nga deti dhe nga ajri. Qyteti ka një qendër simpatike historike, një vend trashëgimi e UNESCO-s nga viti 2007, me dy kalatë, një labirint të ndërtesave të lashta, e cila është në lagjen “Cambiello”, “Spianda”, sheshi kryesor i qytetit dhe një mori të restoranteve të peshkut dhe kuzhinën lokale. Jashtë qytetit janë disa nga vendet më spektakolare në Greqi: manastiri i vetmuar i Vlachéerna dhe Pontikonissi, në gjirin e Paleokastritsa – i njohur si “vendi më i bukur në botë”, i mrekullueshmi Cape Drastis dhe plazhet e shumtë me ujëra kristal, ku përfshihen të paktën Messongi, Glyfada, Pelekas – Korfuzi ofron atraksione për ata që dëshirojnë që të largohen nga deti, si pylli Makrades, i famshëm për bimët aromatike, fshati hipi i Pelekas dhe liqeni rural i Korission, i ndodhur në pjesën jugperëndimore të ishullit dhe me interes të madh natyror. /atsh

Kryeministri Edi Rama pohoi sot se Shqipëria këtë sezon turistik ka çmimet më të lira, krahasuar me vendet e tjera të Mesdheut.

Duke folur për pretendimet se në sezonin turistik çmimet janë rritur, kryeministri Rama tha se  çmimet i vendos tregu, jo qeveria.

Më tej, Kryeministri sjell si argument faktin se hotelet dhe restorantet frekuentohen dhe kjo tregon se çmimet janë në interes të pushuesve dhe turistëve.

“Kur ka çmime të larta që e lënë restorantin dhe hotelin bosh, ato sjellin falimentim. Përderisa ka njerëz që frekuentojnë dhe hotelet dhe restorantet janë plot, kjo tregon se ka një balancë dhe çmimet janë në interes të turistëve.” tha ai.

Më tej Rama shtoi se “nga ana tjetër ka dhe një argument që numri i shqiptarëve që pushojnë jashtë shteti është rritut kjo tregon se është rritje të fuqia e konsumit.

“Nuk diskutohet që në Shqipëri, çmimet janë të lira. Nga ana tjetër ka dhe një argument se numri i shqiptarëve që pushojnë jashtë shtetit është rritur. Kjo tregon rritje të fuqisë së konsumt, jo se është më lirë në vende të tjera, por janë dy komponentë që flasin shumë”, tha Rama. /atsh