Turizem

Kryeministri Edi Rama, gjatë prezantimit të projektit për aeroportin ndërkombëtar të Vlorës, ka nënvizuar se vendi ynë është kthyer në një atraksion të rëndësishëm për të huajt, ku vetëm gjatë 8 muajve të parë kanë hyrë 4 milionë e 850 mijë të huaj.

Sipas Ramës, vetëm gjatë tre muajve të verës janë regjistruar në territorin e vendit tonë, 3.4 milionë, 400 mijë më shumë të huaj se vera rekord e vitit të kaluar.

“Në tetë muajt e parë të këtij viti nga janari në gusht, në territorin e Shqipërisë kanë hyrë 4 milionë e 850 mijë të huaj, që është një shifër shumë më e lartë, se sa shifra e tre katër viteve më parë dhe vetëm në tre muajt e verës, janë regjistruar 3.4 milionë, pra 400 mijë më shumë të huaj se vera rekord e vitit të kaluar apo 900 mijë më shumë se periudha e pikut të 2017-ës dhe këtu po flasim për shifra të nxjerra nga sistemi “TIMS”, e jo për shifra të nxjerra nga kalkulime imagjinare”, tha Rama.

“Faktikisht në pesë vite kemi dyfishuar numrin e vizitorëve të huaj në Shqipëri. Kjo ka krijuar një kontekst tjetër, një nivel tjetër interesi për ata që investojnë në turizëm dhe për ata që janë të interesuar të zhvillojnë infrastrukturë të mikpritjes, gjë që ne e shohim dhe nga kërkesat në rritje për investime në hoteleri nga kompani të huaja. Po ashtu kemi dhe kërkesa goxha mbresëlënëse me të cilat shpresojmë të arrijmë të prodhojmë marrëveshje për investime të mëdha në turizëm”, – bëri të ditur Rama. /atsh

Investimet që pasojnë njëra-tjetrën në çdo skaj nga jugu e deri në veri të Shqipërisë, kanë nxjerrë në pah potencialet e pashfrytëzuara të vendit.

Fondi Shqiptar i Zhvillimit, përmes një video informuese, bën të ditur ekspozenë e punëve që ka kryer dhe po vijon të bëj nga Tamara në skajin më verior e deri në Vlorë, në jug të Shqipërisë.

Në Tamarë ka nisur puna për fazën e e dytë të rikualifikimit urban të zonës. Ndërsa në Valbonë po investohet për qendrën e re të turizmit. Puna po vijon edhe në Pukë, për fazën e dytë të rikualifikimit urban, në qytezën alpine.

Në Shirokë vazhdon puna për shndërrimin e qendrës së Shirokës në një destinacion të mirëfilltë turistik. Në krijimin e hapësirave urbane dhe natyrore të dedikuara për të apasionuarit e natyrës, historisë apo dhe sportit.

Në zonën e Myzeqesë është drejt përfundimit Unaza Bujqësore 11 km e gjatë që u vjen në ndihmë 40 mijë banorëve të zonës. Së shpejti nis puna në segmentin Kallm i Vogël-Imesht, Kallm i Vogël-Vërri-Bubullimë-Kallm-Ura Belin.

Ndërsa në Gjirokastër, vazhdon puna për rindërtimin e mozaikut të Qafës së Pazarit, nga mjeshtrat e Gjirokastrës. Ndërsa kanë përfunduar punimet në infrastrukturën nëntokësore.

Në Theth fillon puna për ndërtimin e rrugës së Thethit, një investimi shumë pritur nga banorët e zonës dhe vizitorët e apasionuar pas turizmit malor. Qafë-Thore -Theth 16 km e gjatë është segmenti që e lidh me Bogën, Qafë-Thoren dhe Shkodrën.

Gusmar-Kuç nis së shpejti puna për të lidhur malet me bregdetin. Në Vlorë kanë përfunduar punimet në bulevardin Ismail Qemali dhe është drejt finalizimit Qendra Historike. Është gati të fillojnë punimet për fazën e dytë të Lungomares me shtrirje deri në Ujë të Ftohtë që siguron hapësirë për kalimtarët dhe biçikletat. /atsh

Turizmi, industria dhe bujqësia kryesojnë me numrin më të lartë të të punësuarve në tremujorin e dytë të këtij viti.

INSTAT publikoi shifrat zyrtare të “Anketës Tremujore të Forcave të Punës”, ku citon se, punësimi pësoi rritje në sektorin e shërbimeve me 2,3%, në sektorin e industrisë me 1,5% dhe në sektorin e bujqësisë me 2,2%.

Sipas INSTAT në terma vjetorë, rritja e punësimit sipas sektorëve kryesorë të ekonomisë është 4,4% në sektorin e industrisë, 5,7% në sektorin e shërbimeve dhe 0,3% në sektorin e bujqësisë.
Krahasuar me tremujorin e mëparshëm, në tremujorin e dytë 2019, punësimi për popullsinë 15 vjeç e lart u rrit me 2,1%.

Në vitet e fundit, turizmi është kthyer në një prej sektorëve më të rëndësishëm në rritjen e ekonomisë së vendit. I konsideruar nga qeveria si një nga motorët kryesorë të rritjes kombëtare, turizmi po përjeton një zhvillim radikal kohët e fundit.

Sipas Bankës së Shqipërisë, vetëm në tremujorin e tretë, i cili përbën edhe pikun e sezonit turistik, të huajt shpenzuan mbi 683 milionë euro në Shqipëri për turizëm apo udhëtime të ndryshme ose 16% më shumë se një vit më parë.

Sot sektori i turizmit ka gjeneruar zhvillim ekonomik, punësim dhe mundësi të vetëpunësimit.

Investimet në vepra publike dhe sipërmarrje private bashkëkohore, rritën ndjeshëm numrin e të punësuarve dhe të të ardhurave familjare. Numri i përgjithshëm i vizitorëve të huaj ka shënuar një rritje të konsiderueshme në vitet e fundit, rreth 5 milionë turistë ose 10% më shumë turistë erdhën në vendin tonë, për periudhën janar-gusht 2019, krahasuar me të njëjtën periudhë një vit më parë.

Ndërsa investimet e huaja kryesisht në atë të çelikut apo sektorin minerar dhe politikat që ka ndërmarrë qeveria në mbështetje të bujqësisë, krahas rritjen së prodhimit dhe eksporteve, po gjenerojnë në vijimësi rritje të numrit të të punësuarve. /atsh

Në pikën kufitarë të Morinit nga 10 qershor deri më 10 shtator, kanë kaluar 1 milion turistë që janë pritur nga 10 të rinj të “Smile Albania 2”.

“Për 60 ditë, 10 të rinj të përfshirë në projektin “Smile Albania 2” të Ministrisë së Turizmit e Mjedisit zbatuar nga AKZM, AdZM, punuan në Pikën e Kalimit Kufitar të Morinit”, shprehet kryetari i bashkisë Kukës, Safet Gjici.

Gjici shton se ata pritën me buzëqeshje dhe informacion për destinacionet turistike, historinë, traditat, vlerat natyrore, turistët e huaj që vizituan vendin tonë dhe çekuan në Shqipëri përmes kësaj Pikë Kalimi Kufitar.

“Nga periudha 10 qershor deri më 10 shtator, të këtij viti, në Pikën e Kalimit Kufitar Morin kanë kaluar mbi një milion vizitorë”, thekson ai./atsh