Greqia do të hapë plotësisht të gjitha aeroportet e saj për fluturime nga jashtë më 1 korrik, njoftoi ministri grek i Turizmit, Harry Theoharis në një konferencë të përbashkët shtypi me ministrin e Shëndetësisë, Vassilis Kikilias për masat e përditësuara të sezonit turistik, ku mori pjesë edhe zëdhënësi i qeverisë, Stelios Petsas.
Njoftimet përfshijnë si më poshtë:
– Të gjitha aeroportet greke do të kujdesen për fluturimet nga jashtë që nga 1 korriku.
– Kufizimet për fluturimet nga Italia, Holanda dhe Spanja do të hiqen që nga 15 qershori
– Kufizimet për mbërritjen e jahteve nga jashtë vazhdojnë të ruhen, përveç jahteve me ekuipazh që nuk kanë pasagjerë. Të gjitha lundrimet nga vendet e tjera do të hapen plotësisht më 1 korrik.
– Së bashku me hapjen e të gjitha aeroporteve për fluturime të huaja, shtatë pika kufitare tokësore gjithashtu do të hapen plotësisht më 1 korrik.
“Plani ynë është gjithëpërfshirës dhe ne kemi kryer tashmë prova urgjente”, tha ministri.
Ai shtoi se marrja e mostrave të rastit për COVID-19 do të bëhet në aeroport dhe vizitorët do të jenë të detyruar të presin për rezultatet e testit në një hotel të caktuar.
Qeveria ka vendosur një qëndrim 7-ditor në një hotel për rezultate negative dhe një 14-ditore për ato pozitive.
”Plani i paraqitur për të siguruar një verë të sigurt… na kujton të gjithëve nevojën për të vazhduar të shfaqim përgjegjësi individuale dhe pjekuri kolektive”, tha zëdhënësi i qeverisë Petsas./ atsh
Pasditen e së premtes në aeroportin ndërkombëtar të Tiranës kanë mbërritur 189 turistët e parë nga Bjellorusia.
Kryeministri Rama ka publikuar një fotogaleri nga mbërritja e tyre në Rinas, ndërsa turistët në ditët në vijim do të shijojnë qëndrimin e tyre në Shqipëri, duke frekuentuar plazhet e jugut si dhe vizituar monumentet e kulturës.
Çarteri turistik erdhi me kompaninë “Belavia”, linja ajrore kombëtare e Bjellorusisë.
Fluturimi i planifikuar çarter do të funksionojë gjatë gjithë verës me një avion Boing 737-800, dy herë në javë, të martën dhe të premten.
Aegean Airlines, transportuesi flamurmbajtës i Greqisë si dhe Austrian Airlines kanë njoftuar se fluturimet e para, përkatësisht nga Athina dhe Vjena drejt Tiranës do të fillojnë në 15 qershor 2020. /atsh
Presidenti Ilir Meta mori pjesë sot në takimin tradicional të Mëngjesit të Lutjeve të organizuar nëpërmjet një videokonference nën kujdesin e veçantë të Kongresit Amerikan.
Në këtë takim merrnin pjesë edhe përfaqësues të lartë shtetërorë dhe personalitete politike e fetare nga SHBA dhe nga vende të ndryshme të botës.
Organizatorët e këtij takimi, kongresmenët Robert Aderhold dhe John Moolinar veçuan në mesazhet e tyre të lutjes jo vetëm bashkëjetesën dhe harmoninë tonë ndërfetare, por edhe bukuritë natyrore të Shqipërisë, duke e quajtur atë si “perla e fshehur e botës”.
Ata u lutën për mikpritjen e popullit shqiptar dhe zhvillimin e vendin tonë veçanërisht pas periudhës së vështirë të pandemisë COVID-19.
Kongresmeni Joe Wilson nënvizoi rëndësinë e një rajoni të qetë, me harmoni e paqe mes popujve, me një zhvillim të qëndrueshëm, si dhe rolin e rëndësishëm të Shqipërisë dhe shqiptarëve në këtë proces të rëndësishëm.
Edhe guvernatori David Beasley, CEO i Programit Botëror të Ushqimit dhe mik i popullit shqiptar mori pjesë në këtë aktivitet të rëndësishëm.
Në fjalën e tij përshëndetëse, Presidenti Meta shprehu mirënjohjen për mbështetjen dhe lutjet e miqve amerikanë dhe atyre të vendeve të tjera të botës, për Shqipërinë, shqiptarët dhe rajonin.
Kreu i Shtetit nënvizoi se “pavarësisht vështirësive që shkaktoi kjo pandemi asgjë nuk mund të mposhtë shpresën e besimin. Ndonëse Shqipëria u përball me dy fatkeqësi, tërmetin e nëntorit 2019 dhe COVID-19 ne po rimëkëmbemi falë edhe shpresës, besimit dhe ndjenjës së unitetit kombëtar që populli shqiptar ka në zemrën e tij”, tha ai.
Presidenti Meta shprehu besimin për kohë më të mira për Shqipërinë, rajonin dhe gjithë botën, duke i ftuar bashkëbiseduesit e këtij Mëngjesi Lutjeje të vizitojnë Shqipërinë në të ardhmen dhe të shijojnë bukuritë e saj./atsh
Ministri i Turizmit dhe Mjedisit, Blendi Klosi, deklaroi sot se “me fillimin e sezonit turistik në zonat e bregdetit, por edhe në gjithë Shqipërinë do të nisë një aksion i madh pastrimi nën drejtimin e prefektëve për të stabilizuar situatën e këtyre tre muajve sidomos në zonat turistike”.
Në fjalën e tij në takimin e parë të komitetit drejtues të menaxhimit të sezonit turistik, Klosi theksoi se “detyrat e menaxhuara nga prefektët duke administruar të gjithë forcat reale që ka çdo qark, situatën e pastrimit në një operacion të madh pastrimi me përfshirjen e të gjithë faktorët nën drejtimin e pushtetit vendor dhe institucionet të tjera dhe natyrisht me pjesëmarrjen e shoqërisë civile për të bërë një operacion në muajin qershor nga veriu në jug dhe të ketë një fokus më të madh në zonat dhe stacionet që të shndërrojmë këtë situatë në një situatë të pranueshme për vitin turistik 2020”.
“Kemi një situatë të kontrolluar në plazhe, por sa del në akset kryesore rrugore, sa kalon në rrugët dytësore që bashkojnë akset kryesore me zonat e plazhit kemi një situatë të papranueshme. Na duhet prezencë e institucioneve”, – tha Klosi.
Ministri u shpreh se “na kërkohet në kuadër të masave ndarja e stacioneve të plazhit. Është një situatë e ndryshme, sa i përket dhe situatës me koronën që ka të bëjë me ruajtjen e sa më shumë hapësirave publike dhe evitimin e grumbullimeve. Nga 3300 stacioneve plazhi ka vetëm 800 aplikime në e-albania, ndaj duhet të nxisim operatorët privatë”.
Ai kërkoi vendosjen e tualeteve dhe dusheve në stacionet e plazhit.
“Duke shpresuar se do kemi një sezon të menaxhuar normal 2020, duke ju kërkuar dhe njëherë vëmendje për ato që përmenda dhe detyra të çdo dite që do kalojmë në sezonin turistik ju kërkoj që të jemi shumë aktivë në këtë mbledhje të sotme për të pasur mundësi të ngremë piketat që të zgjidhim shumë problematika. Ditën e premte fillojnë charter-at e parë, janë shumë pak në krahasim me vitin e kaluar por që janë sinjali i parë që po zgjerohet jeta turistike. Ju kërkoj që ky vit të jetë një vit shumë më tepër i rakorduar dhe i stabilizuar dhe nga pikëpamja e komunikimit”, u shpreh Klosi.
Sipas tij, ky vit nuk është normal turistik për Shqipërinë. “Do të duhej të ishte viti më i suksesshëm për turizmin shqiptar, por situata e pandemisë na ka detyruar që marrim masa të veçanta për të trajtuar këtë situatë”, tha Klosi.
“Akoma jemi në një situatë që kërkon shumë vëmendje, nga të gjithë operatorët turistikë, por sidomos nga institucionet shtetërore që kanë detyrën të menaxhojnë këtë situatë. Situata na bën që të jemi më shumë rigorozë në ndarjen e detyrave dhe problematikat që ka sezoni i vitit 2020. Padyshim prezenca edhe e ministrit Lleshaj dëshmon edhe njëherë gatishmërinë e institucioneve të shtetit shqiptar, Kryeministrit Edi Rama dhe qeverisë së tij, për të pasur një sezon të mirë turistik, edhe pse i vështirë. Do të duhet të garantojmë dy masa shumë të rëndësishme. E para sigurinë e jetës së qytetarëve në këtë situatë të vështirë duke garantuar higjienë, pastërti, zbatimin e rregullave të koronës dhe po ashtu një vëmendje të madhe sa i përket aktiviteteve, të cilat mund të shtojnë përhapjen e virusit”, – tha Klosi.
Ministri Klosi theksoi se “e dyta po aq e rëndësishme është zbatimi i detyrave që ne tashmë i kemi bërë pjesë të punës sonë, sigurinë e jetës së qytetarëve sa i përket ruajtjes së plazhit, ruajtjes së aktiviteteve në det nga mjetet e shpejtësisë dhe natyrisht respektimin e rregullave të reja që kanë të bëjnë me stacionet e plazheve dhe menaxhimin e tyre”./atsh
Ministria e Turizmit dhe Mjedisit dhe ajo e Shëndetësisë dhe Mbrojtjes Sociale kanë publikuar protokollin e sigurisë për sezonin e ri turistik, ku parashikohen në detaje se si do operojnë sipërmarrjet në fushën e turizmit, duke nisur nga largësia e çadrave mes tyre dhe duke vijuar me higjienën në dhoma dhe në çdo ambient tjetër të shërbimeve hoteliere, bare e restorante.
Përmes urdhrit të publikuar sot në Fletoren Zyrtare me nr. 353, datë 29 maj 2020, Ministria e Turizmit dhe Mjedisit dhe Ministria e Shëndetësisë dhe Mbrojtjes Sociale kanë përcaktuar “Protokollin e masave antiCOVID-19 përgjatë sezonit turistik”.
Në urdhrin e publikuar dhe në Fletoren Zyrtare saktësohet se: Protokolli i masave antiCOVID-19” është një dokument që rekomandohet të zbatohet nga sipërmarrjet turistike, turistët/pushuesit dhe vizitorët, për mbarëvajtjen e atyre aktiviteteve të miratuara si të lejuara, përmes akteve normative të Ministrisë së Shëndetësisë dhe Mbrojtjes Sociale, si dhe institucioneve të tjera kompetente. Ky Protokoll përmban parakushtet, kushtet dhe rregullat për të orientuar dhe për të rekomanduar industrinë turistike për masat e nevojshme që duhet të ndërmerren përgjatë periudhës së pranisë së infeksionit COVID-19.
Në pikën 2 të protokollit sqarohet se, çdo sipërmarrje turistike që lejohet të ushtrojë aktivitetin rekomandohet të adaptojë këtë protokoll dhe të afishojë masat respektive në vende qartësisht të dukshme dhe pranë korridoreve të kalimit të njerëzve, mbështetur me materiale të ndryshme promovuese dhe informuese që informojnë mbi masat që duhen ndërmarrë për parandalimin e infeksionit COVID-19.
Në pikën 3 të protokollit sqarohet se stafi i shërbimit, që ka kontaktet me pushuesit/vizitorët duhet të përdorë doreza dhe maska mbrojtëse. Mbajtja e dorezave dhe e maskave janë elemente të domosdoshme në parandalimin e transmetimit të COVID-19, e kombinuar me higjienën të duarve.
Sipas protokollit, punonjësit e recepsionit duhet të jenë të mirinformuar në lidhje me masat antiCOVID-19, në mënyrë që ata të mund të kryejnë detyrat e tyre të caktuara dhe të parandalojnë përhapjen e mundshme të infeksionit në strukturën akomoduese. Recepsioni duhet të ketë në dispozicion numrat e telefonit të autoriteteve shëndetësore (Urgjencën Kombëtare dhe Epidemiolgjinë e NJVKSH-së përkatëse), si dhe të afishojë masat antiCOVID-19 në vend të dukshëm dhe lehtësisht të aksesueshëm për të gjithë.
Stafi i recepsionit duhet të mbajë pastër ambientin e tyre të punës dhe në fund të çdo ndërrimi turni të pastrojë me kujdes tryezën dhe pajisjet (për shembull: telefon, tastierë, ekran me prekje, stilolapsa, lapsa etj.). Për të lehtësuar performancën dhe efektivitetin e këtij operacioni, është e përshtatshme të hiqen të gjitha sendet jothelbësore nga sipërfaqja e punës. Nëse mjetet e punës përdoren nga shumë njerëz gjatë të njëjtit turn, rekomandohet që stafi të lajë duart më shpesh dhe t’i dezinfektojë me xhel, me përbërje alkooli 70–85%. Shkëmbimi i telefonave dhe i celularit duhet të shmanget, nëse nuk dezinfektohet siç duhet para se të kalojë nga një operator, tek tjetri.
Rekomandohet që nga sipërmarrja turistike të merren masa për të shmangur mbledhjet e shumë njerëzve në të njëjtin vend, si dhe për të zvogëluar në maksimum kohën e pritjes përgjatë procesit të regjistrimit. Kur është e mundur, të përdoret sistem elektronik për regjistrimin. Në strukturat akomoduese duhet të ruhet distancomi fizik i rekomanduar nga MSHMS-ja.
Në protokollin e publikuar rekomandohet pastrim i përsëritur i ambienteve. Pavarësisht përdorimit të maskave dhe të dorezave me një përdorim, higjienizimi dhe larja e shpeshtë e duarve konsiderohet e domosdoshme. Pasi t’i keni larë duart me sapun dhe ujë, ju duhet t’i thani ato plotësisht. Xheli me përbërje alkoolike për higjienën e duarve duhet të përdoret në mënyrë periodike, madje edhe kur mbahen doreza.
Maska, doreza të disponueshme dhe dezinfektues sipërfaqësor, mund të jenë në dispozicion për vizitorët kundrejt një marrëveshje paraprake mes sipërmarrjes dhe pushuesve/vizitorëve.
Struktura akomoduese duhet të vendosë në holle, korridore dhe ambiente të jashtme kosha të pajisur me qese plastike, për të hedhur mbetjet e mjeteve mbrojtëse higjienike. Rekomandohet të fillohet me ajrosjen natyrale të dhomës, duke hapur dritaret nëse ka.
Pastrimi duhet të përfshijë të gjitha sipërfaqet, siç janë: tavolinat, krevatet, karriget, telefoni, telekomanda, dorezat e dyerve dhe panelet, si dhe çdo pajisje tjetër që konsiderohet se mund të jetë e prekur nga vizitori.
Sipërfaqet që mund të ndoten me sekrecione të frymëmarrjes ose lëngje të tjera të trupit të personit, p.sh: tualeti, basenet e larjes së duarve dhe banjat, duhet të pastrohen me solucion të rregullt dezinfektues që përmban 0.1% hipoklorit të natriumit dhe të lihen pa u shpëlarë me ujë për 10 minuta. Sipërfaqet duhen shpëlarë me ujë të pastër pas 10 minutash kontakti me klorin. Kur përdorimi i klorit nuk është i përshtatshëm, p.sh.: pajisje telefonike, telekomandë, doreza derë, butona në ashensor etj., atëherë mund të përdoret alkooli 70%. Kur është e mundur, të përdoren vetëm materiale pastrimi me një përdorim. Të gjithë artikujt e përdorur me një përdorim (peshqir dore, doreza, maska) duhet të vendosen në një enë me kapak dhe të hidhen sipas menaxhimit të mbeturinave të rrezikshme. Nëse minibari është i pranishëm dhe aktiv, në secilin ndryshim të vizitorit rekomandohet të pastrohen të gjitha sipërfaqet e minibarit në mënyrë sistematike. Dyshemetë pastrohen dhe sanitarizohen me produkte të përshtatshme. Këshillohet të shmangni pajisjen e dhomave ose të dhomave të tjera të strukturës me elementë arredimi, që nuk janë objekte të pastrimit të përditshëm.
Në protokollin e sigurisë sqarohet edhe mënyra e administrimit të ushqimeve dhe pijeve, ku theksohet ndër të tjera se, duhet kryer larja e duarve shpesh dhe sipas kërkesës. Personeli duhet të jetë me maskë dhe doreza kur përgatisni ose përdorni ushqimin. Ndalohet përgatitja ose prekja e ushqimeve, prekja e sipërfaqeve në kontakt me ushqimin pa pasur doreza, si dhe ndalohet shijimi i ushqimit me gishta.
Në protokoll thuhet se ndalohet prekja e flokëve ose e pjesëve të tjera të trupit pa doreza, kur ndodheni brenda zonave të përgatitjes apo të servirjes së ushqimit, pasi mund të rezultojnë në ndotje të ushqimit.
Gjithashtu në protokoll bëhet me dije edhe organizimi i punës në plazhe dhe restorante. Në protokoll theksohet se tavolinat duhet të vendosen në atë mënyrë që distanca nga pjesa e pasme e një karrigeje në pjesën e pasme të një karrigeje tjetër të jetë më shumë se 1 m larg dhe që klientët të përballen me njëri-tjetrin nga një distancë prej të paktën 1 m.
Personeli që shërben ushqimin duhet të jetë i pajisur përgjatë gjithë periudhës së shërbimit me maska dhe dorashka të higjienizuara. Në rastin e ofrimit të shërbimit bufe, administratori/menaxheri i strukturave akomoduese të kapaciteteve të mëdha (hotel/resort) rekomandohet të përcaktojë dhe të shënojë dukshëm korridorin e lëvizjes së klientëve. Klientët rekomandohet të respektojnë distancën e rekomanduar nga Ministria Shëndetësisë dhe Mbrojtjes Sociale. Në rast se përdoren makinat automatike, pijet të shërbehen vetëm në gota kartoni njëpërdorimëshe.
Deri në përfundim të gjendjes së epidemisë së shkaktuar nga infeksioni COVID-19, të gjitha stacionet e plazhit, si dhe plazhet publike duhet të kenë të afishuara këshillat dhe rregullat në kuadër të mbrojtjes nga COVID-19. Këto rregulla konsistojnë, në: Mbani parasysh rregullat bazë për parandalimin e COVID-19: a) lani dhe dezinfektoni duart, vazhdimisht dhe në mënyrën e duhur; b) përdorni maskat sipas udhëzimeve; c) shmangni grumbullimet në njerëz dhe çdo lloj kontakti; d) mos prekni fytyrën dhe hundët me duar të palara e të padezinfektuara; e) kur kolliteni ose teshtini, mbulojeni gojën/hundën me parakrah ose me facoleta njëpërdorimëshe; f) nëse vini re simptomat e COVID-19, telefononi nr. 127.
Në marrjen e shërbimeve në ambientet e stacionit të plazhit, respektoni gjithmonë, sipas masave të miratuara të MSHMS-së (1,5 m). Ruani gjithmonë distancën edhe gjatë shëtitjeve në plazhe, bregun e detit, liqenit, lumit apo përgjatë shëtitoreve.
Stafi që shërben pranë stacioneve të plazhit të ketë uniformë dalluese. Shërbimi për pastrimin dhe mirëmbajtjen e stacionit të plazhit dhe të gjitha ambienteve të tjera të jetë ditore. Të kryhet dezinfektimi i krevateve të plazhit, shërbimeve higjienike dhe aksesorëve të ndryshëm në mënyrë periodike; gjatë orarit të hapjes së stacionit të plazhit duhet të sigurohet vazhdimësia e pastërtisë dhe boshatisja e koshave të mbeturinave. Të gjitha aktivitetet (si bare, beach-bare) duhet të jenë në përputhje me direktivat e Ministrisë së Shëndetësisë dhe Mbrojtjes Sociale.
Deri në përfundim të gjendjes së epidemisë së shkaktuar nga infeksioni COVID-19, brenda brezit të shërbimeve në stacionet e plazhit, mund të realizohen këto struktura: kioskë menaxhimi për plazhin, kabina, shërbime higjienike, depo, pika vrojtimi/kulla e vrojtimit, hapësirë për rojën e plazhit (në rastin e plazhit publik), beach-bar, hapësirë për vendosjen e biçikletave. Tavolinat në beach-bar duhet të kenë distancë, sipas udhëzimeve të MSHMS-së.
Deri në përfundim të gjendjes së epidemisë së shkaktuar nga infeksioni COVID-19, kushtet minimale që duhet të përmbushë një stacion plazhi, në plazhet e tipit A, janë si më poshtë vijojnë: a) për çadrat dhe ndenjëset e pushuesve të respektohet një distancë prej të paktën 7 m nga vija e bregut të detit, liqenit, lumit; b) hapësira midis çadrave (nga çadra në çadër) nuk duhet të jetë më e vogël se 3.5 m në linjë horizontale me vijën e ujit, si dhe jo më e vogël se 3.5 m në linjë vertikale me vijën e ujit; c) të ketë në dispozicion të pushuesve 1 dush me ujë të ëmbël për çdo 100 (njëqind) çadra, i cili duhet të pajiset me sapun, xhel higjienizues; d) të gjitha kushtet e tjera, përveç sa më sipër, të përcaktuara nga vendimi i Këshillit të Ministrave nr. 171, datë 27.3.2019, “Për miratimin e rregullores ‘Për kushtet dhe kriteret e ushtrimit të veprimtarisë së stacionit të plazhit’”.
Kushtet minimale, që duhet të plotësojë një stacion plazhi, në plazhet e tipit B, janë si më poshtë vijon: hapësira midis çadrave (nga çadra në çadër) duhet të jetë të paktën 3,5 m; të ketë në dispozicion të pushuesve 1 (një) dush me ujë të ëmbël për çdo 100 (njëqind) çadra, i cili duhet të pajiset me sapun, xhel higjienizues.
Sa i takon pishinave, mbështetur në urdhrin nr. 351, datë 29.5.2020, të gjitha pishinat janë të mbyllura deri në një urdhër të dytë. Uji i pishinës duhet të pastrohet nga qarkullimi përmes një sistemi filtrimi të detyrueshëm. Duhet të largohen rregullisht papastërtitë e dukshme në sipërfaqe të ujit. E gjithë zona dhe të gjitha objektet e pishinës dhe të banjave duhet të pastrohen dhe të dezinfektohen të paktën një herë në ditë, por dhe më shpesh, nëse fluksi i klientëve është i lartë. Klorinimi i ujit të bëhet rregullisht sipas standardeve. Shezlonget e pishinës duhet të jenë me distancë të paktën 2 metra larg nga njëri grup tek tjetri. Hoteli duhet të sigurojë materiale dezinfektuese në zonën e pishinës për të lejuar punonjësit e pishinave dhe klientët të pastrojnë shezlongët. Pishina të ketë kosha dhe peshqirë letre. Punonjësi i pishinës duhet të dezinfektojë shtresat e shezlongëve dhe krahët mbështetëse.
Në protokoll janë parashikuar dhe zonat SPA, Sauna dhe masazhet, ku në fokus do të jetë pastrimi i ambineteve, mureve, dyshemeve. Sipërfaqja e shtratit të masazhit duhet të jetë prej plastike të qëndrueshme për larje ose material tjetër i papërshkueshëm nga uji, i cili është i lehtë për pastrim, dezinfektim dhe mirëmbajtje. Sipërfaqja e shtratit të masazhit duhet të dezinfektohet dhe më pas të shpëlahet me ujë dhe të thahet pas çdo përdorimi. Mbulesa letre me një përdorim duhet të hidhen në një kosh pas përdorimit. Nëse për klientët sigurohen veshje, ato duhet të vendosen në qese plastike të sigurta dhe t’i nënshtrohen procesit të duhur të pastrimit pas çdo përdorimi. Bazuar në madhësinë e ambientit, hoteli/ resorti mund të lejojë një numër maksimal të klientëve në të njëjtën kohë në zonën SPA, duke respektuar distancën 1,5 metra midis tyre.
Për klientët që dëshirojnë të shijojnë një masazh apo të përdorin sauna apo jakuzi, çdonjëri prej tyre duhet të bëjë një rezervim, në mënyrë që të kontrollohet numri i tyre në respekt të distancës 1,5 metra. Materialet e dezinfektimit duhet të jenë të disponueshme përreth zonës SPA.
Po ashtu në protokoll parashikohet dhe mbajtja e konferencave në hotele. sipas këssaj pike, në rast të përmbushjes së kritereve për hapësirat rekomandohet të zhvillohen: zhvillimi i konferencave/eventeve, aty ku është e mundur, në sallat që mund të lejojnë distancimin fizik; rekomandohet që ulja e pjesëmarrësve të jetë e tillë që të respektojë protokollet e aprovuara nga MSHMS-ja. /atsh
Ministri i Turizmit dhe Mjedisit, Blendi Klosi tha se, paketat mbështetëse të qeverisë dhe masat që u morën, i dhanë mundësi turizmit të rimarrë frymë më shumë se sektorët e tjerë, në kushtet e vështirësisë që krijoi situata COVID-19.
Gjatë një interviste televizive, Klosi tha se, turizmi është rikuperueshëm më i shpejtë i ekonomisë shqiptare dhe respektimi i masave ndaj COVID-19, na bëri ne që të hapeshim më herët dhe gradualisht.
“Ne kemi hapur kufijtë në datën 1 qershor dhe numrat e lëvizjeve në kufi janë rritur pak, pasi kemi patur problem me mbylljen e kufijve nga ana maqedonase. Mali i Zi i hapi, por me karantinim dhe lëvizja e shqiptarëve të Kosovës ishte deri dje me protokolle. Hapja e kufijve tokësorë na jep shpresë se nëse do të kemi hapje të kufirit edhe me Greqinë, turizmi që vjen nga toka, nga 4 kufijtë tokësorë të rëndësishëm të vendit, të kemi më shumë prurje, pasi turizmi tokësor, ka sjellë vitin e kaluar 80% të turizmit në vendin tonë dhe nëse hapet kjo linjë edhe për sezonin korrik-gusht, ne të kemi një lëvizje me makina, që kontribuon në dinamikën e turizmit në përgjithësi”, – tha Klosi.
Sipas tij, në rast se do të kishin një situatë normale, që në maj e qershor do të kishim fluks të çarterave me kapacitet të plotë. “Por mbyllja e Korfuzit dhe e shumë aeroporteve të tjera na ka bërë që ta shtyjmë në kohë sezonin e turizmit të çarterave”, – u shpreh ministri.
“Por ama, – vijoi ai, – nga data 12 qershor çarterat e parë do të mbërrijnë në Shqipëri nga Bjellorusia e Ukraina, e më pas të shpresojmë që do të kemi lëvizje të premtuara nga Polonia nga vendet Balltike, nga Çekia, që kërkojnë të hapin tregun e turizmit dhe shpresojmë që me kalimin e mesit të qershorit, fundin e këtij muaji të hapen edhe aeroportet plotësisht dhe në korrik, gusht të kemi lëvizjet me çartera”.
Duhet të kuptojmë tha ai që nuk do të kemi fluksin e një viti më parë, por nese do të kemi aq sa janë pronotimet do të jetë një gjë shumë e mirë.
“Po synojmë të kemi lëvizje nga toka, nga deti që siguron 10% të turizmit në Shqipëri të kemi lëvizjen e emigrantëve dhe çarterat do të jenë vlerë e shtuar. Po punojmë të orientojmë turizmin e brendshëm”, – theksoi Klosi.
Klosi shprehu bindjen se turizmi në Shqipëri është një strukturë e re që është në zhvillim, ku vijojnë investimet e reja në strukturat akomoduese.
“Asnjë press 3086 struktura akomoduese në sektorin e turizmit nuk është mbyllur apo falimentuar nga situata e krijuar nga COVID-19 dhe fakti është që pronotimet nuk janë kançeluar, por ato janë shtyrë dhe me lehtësimin e lëvizjes industria do të fillojë të vihet në punë“, – tha Klosi.
Unë mendoj tha Klosi, se Shqipëria është në 1/3 e shfrytëzimit të kapaciteteve në sektorin e turizmit dhe jemi një vend në rritje.
Ministri tha se turizmi në Shqipëri është e vetmja degë që ka një investim të brendshëm jashtëzakonisht të madh që arrin deri në 500 milionë euro. Trendi në rritje i investimeve i adresohet politikës lehtësuese që ka ndërmarrë qeveria që nga TVSH-ja, 6% për hotelet, grantet për agroturizëm etj.
“Mbështetja për këtë sektor në kushtet e COVID vijoi me heqjen e taksave për strukturat hoteliere, pagat e luftës për të gjithë strukturat, shtyrja e kë steve të kre disë në banka, apo kreditë për likuiditet nga garancia sovrane”, – tha Klosi.
Ministri theksoi se ky sektor do të paguajë taksa vetëm për strukturat e plazhit që kanë në menaxhim të tyre.
Ai theksoi se turizmi po hapet sipas protokolleve të miratuara nga Ministria e Shëndetësisë dhe OBSH-së që garantojnë siguri për t’u mbrojtur nga COVID-19.
Kërkesa për higjienë, ndarje të vendeve për plazh nuk do të neglizhohen në asnjë rast, tha Klosi.
Klosi theksoi se përmes ligjeve të reja synohet të kthejmë detin në ekonomi të zhvilluar. /atsh
“Në fillim të javës tjetër do të fillojnë dhe çarterat e parë të cilët janë dedikuar për turizëm nga vendet të cilat ne tashmë kemi një marrëdhënie bilaterale”, deklaroi ministri i Turizmit dhe Mjedisit, Blendi Klosi gjatë mbledhjes së Task Forcës së Turizmit i cili zhvilloi takimin e parë për këtë vit, në ambientet e Manastirit ‘Fjetja e Shën Mërisë’ në Parku Arkeologjik Kombëtar Apoloni, në fokus të së cilit ishin masat e marra dhe ecuria e turizmit gjatë këtij sezoni turistik të ndikuar nga COVID-19.
Me pjesëmarrjen e tour operatorëve dhe hotelierëve, ministri i Turizmit dhe Mjedisit Blendi Klosi dhe ministrja e Kulturës, Elva Margariti bënë të ditur detaje nga paketa e përbashkët turistike me kosto të ulët.
Ndonëse një vit i vështirë për shkak të pandemisë, Klosi shprehu besimin se “në qoftë se ne ofrojmë rregulla në plazhe, garantojmë higjienë, garantojmë mbrojtje nga pandemia, mund t’ia dalim që të kemi një sezon të pranueshëm turistik edhe në 2020-ën”.
Në fjalën e tij, Klosi tha se edhe pse po përballemi me pandeminë sikurse e gjithë bota, duhet të bashkëpunojmë jo vetëm për Fierin si destinacion turistik, por edhe për një fushatë të madhe për të vizituar Shqipërinë turistike nga turistët vendas dhe të huaj.
“Duke qenë të parët që hapëm edhe kufijtë dhe duke promovuar Shqipërinë turistike në rajon, duhet të përfitojmë një turizëm rajonal u cili ka qenë jo aty ku duhet duke menduar që kemi shumë më tepër, duhet të afrojmë turizëm për vëllezërit tanë të Kosovës, të cilët kanë qenë gjithmonë mbështetësit kryesorë të turizmit të huaj që vinin në Shqipëri, por po ashtu me Maqedoninë e Veriut, Malin e Zi, Bosnjën, Bullgarinë, Turqinë për të qenë më rajonal dhe me një ofertë të re turistike”, tha ministri.
Gjithashtu, ministri Klosi u ndal edhe në sistemin e ri të menaxhimit të vijës bregdetare duke përmbushur një nga kërkesat e vet komunitetit të hotelierëve, të operatorëve tanë turistikë si një nga prioritetet e menaxhimit të ekonomisë së jetës sonë.
Ai tha se vija bregdetare, një pasuri e jashtëzakonshme që ne kemi, duhet mirëmenaxhuar që të prodhojë më shumë para në radhë të parë për Bashkinë dhe nëpërmjet këtyre parave plazhi të pastrohet dhe të mirëmbahet më mirë si dhe të rritet siguria në plazhet tona.
“Së bashku me Bashkitë kemi monitoruar të gjithë vijën tonë edhe në kuadër të luftës së përhapjes së pandemisë, por dhe në kuadër të masave që duhet zbatuar për higjienën, plazhet tona duhet të administrohen shumë më mirë, që të sigurojnë drejt për së drejti dy problem të mëdha që ka patur gjithmonë plazhi, higjienën dhe vendosja e ruajtësve të plazhit, tha ai.
“Parimet e ndarjes së re të plazheve bregdetare dhe nga 400 km vijë bregdetare që bregu shqiptar ka, vetëm 10 deri 12% e saj shfrytëzohet, prandaj kemi hapësira të mëdha pa fund të cilat i kemi akoma si ofertë të re për turizmin për t’u zhvilluar bregu shqiptar, por që s’mund të lejohet që të vazhdojë të zhvillohet dhe menaxhohet pa asnjë kriter”, deklaroi Klosi.
Ai tha se “së bashku me forcat e ruajtjes së rendit, me inspektoriatet e ndryshme të qarkut të Fierit nën drejtimin e Prefektit do të ndërmarrim një situatë shumë më të kontrolluar të plazheve tona për të pasur mundësi që ndarja e plazheve të realizohet mbi dy parime. Parimin e administrimit nga operatorët turistikë dhe Bashkia të jetë përfituese e drejt për drejt e të ardhurave që mblidhen nga plazhet. Dhe e dyta parimi kryesor, tha Klosi është ruajtja e mos përhapjes së pandemisë në plazh dhe sigurimin nëpërmjet këtij menaxhimi të higjienës dhe të sigurisë.
Ai tha se “skema e re është realizuar dhe në plazhet e Divjakës dhe të Fierit ku kemi bërë një ndarje sipas vendimit të bashkisë se kë kemi përcaktuar zonë të gjelbër, zonë e cila do të jetë në plazhe e përcaktuar si plazh për publikun, pra si plazh që nuk do të lejohet të vendosen shezllon edhe çadra, zonë e cila do të jetë për qytetarët e tjerë që vijnë dhe duan të bëjnë plazh në mënyrën e tyre pa qenë të detyruar që të shkojnë te shezlloni dhe të paguajnë çadrën dhe zona e cila konsiderohet si zonë për t’u menaxhuar është ndarë në parcela të cilat do t’i ofrohen atyre”.
Gjithashtu, Klosi tha se kemi edhe një përmirësim të jashtëzakonshëm sa i përket sigurisë në plazhe.” Padyshim kemi përmirësim të jashtëzakonshëm, kemi ulur me 3 herë numrin e jetëve të humbura në plazhet shqiptare, por këtë vit duhet të jetë shumë më i sofistikuar”.
Klosi apeloi edhe për pastrimin e plazheve duke shtuar se “kemi nevojë që të bëjmë një operacion të madh pastrimi për të shkuar në korrik dhe gusht në një sezon intensiv më të stabilizuar”. /atsh
Qendra Historike, ose Vlora e Vjetër, e rikonstruktuar përmes një projekti të përbashkët të Fondit Shqiptaro-Amerikan të Zhvillimit(AADF) dhe Qeverisë Shqiptare, është shndërruar tashmë në një mjedis atraktiv dhe me interes për vizitorët.
Kjo hapësirë me vlera të shumëfishta, përmbledh në vetvete historinë e qytetit, ngjarje e momente me rëndësi kombëtare e mbarëkombëtare, ndërkohë që evokon segmente të të shkuarës shumëshekullore në aspekte të ndryshme, një prej të cilave është tradita në arkitekturë.
Ndërtimet në këtë zonë, të evokuara në kohë përmes procesit të restaurimit selektiv dhe në tërësi, përfaqësojnë vlera të vërteta në arkitekturë, të materializuara në shekujt XIX dhe XX, vazhdë e traditave shumë më të hershme.
Në këndvështrimin e historisë së arkitekturës, nuk mund të flitet për një banesë tipike vlonjate, si element urban, ashtu siç përkufizohet dhe veçohen banesat tiranase, shkodrane, elebasanase, beratase, gjirokastrite e korçare. Kjo, sepse, banesa qytetare e realizuar në Vlorë në dy shekujt e fundit, është një përzierje stilesh dhe ndikimesh, e kushtëzuar nga një sërë faktorësh ku përfshihen edhe mentaliteti edhe niveli ekonomik i individëve, ashtu si edhe zhvillimi shumëdimensional i vetë qytetit. E trajtuar në këtë këndvështrim, banesa në Vlorë përfaqëson një tërësi, një simbol ndikimesh e gjykimesh për përditshmërinë.
Në Vlorën e Vjetër, në çdo godinë apo banesë të saj, ne zbulojmë të gjitha fazat e zhvillimit të arkitekturës shqiptare, të materializuara në nivelin lokal. Ndeshim traditën qytetare në ndërtim, stilet arkitekturore otomane dhe më tej, ndikimin e arkitekturës italiane, në variantet e saj neoklasike dhe moderne në katër dekadat e para të shekullit XX, ndikime të stilit austriak etj, të selektuara në raste të veçanta etj.
Këtu, ne hasim dhe shijojmë mrekullinë e artit arkitektonik të të njohurve Gherardo Bosio e Morpurgo, Paolo Palleri etj, të cilët me talentin dhe fantazinë e tyre, kanë lënë gjurmë të pashlyeshme në Vlorën e Vjetër dhe njëkohësisht të re, ashtu sikundër edhe në qytete të tjera të Shqipërisë.
Banesat e shekujve XIX dhe XX në Vlorën e Vjetër, janë produkt i këndvështrimeve të ndryshme, janë përzierje e banesës qytetare beratase, gjirokastrite, korçare, por edhe më gjerë, ashtu si edhe e përvojës së mjeshtrave popullorë që kanë ndërtuar dhe që vinin kryesisht nga Korça, Panariti e Dibra(Golloborda), mes të cilëve Usta Nuredini e Usta Hasani.
Prandaj dhe çdo banesë e ndërtuar në Vlorë në periudhën e dy shekujve të fundit, duhet lexuar në atë që shfaq dhe në atë që mban të fshehur.
Vlora, për shkak të pozicionit gjeografik, vlerësohet të ketë qenë historikisht një qytet i hapur, një destinacion për migrimin e brendshëm dhe rajonal.
Familje me origjinë nga zona dhe krahina të ndryshme të Shqipërisë, nga Berati, Korça, Gjirokastra, Tirana, kanë mbërritur në këtë qytet, duke sjellë me vete edhe mentalitetin, traditën në stilin e jetesës, në përditshmëri, në ndërtim. Përmes aktivitetit ekonomik tregtar, apo prodhues, kanë rritur standardin ekonomik dhe kanë ndërtuar për të jetuar më mirë, por edhe për të treguar. Sepse, banesa, si njësia bazë e jetesës, është vlerësuar edhe si tregues i pozicionit të individit në shoqëri, si shfaqje e nivelit ekonomik të një familjeje.
Ky tipar i shoqërisë shqiptare në tërësi dhe asaj vlonjate në rastin konkret, reflektohet në çdo godinë të Qendrës Historike të Vlorës, në çdo banesë të kësaj lagjeje të njohur me emrin e saj historik “Muradie”, ku ishin vendosur dhe ndërtuan shtëpitë, pjesa më e madhe e familjeve të pasura, apo të njohura në Vlorë.
Banesa të tilla, si ato të familjeve Bezhani, Strati, Papa, Skrami, Karbunara, Dëma, Kuçi, Seit Qemali, Kume, Sorra, Koleka, Papa, Aristidh Ruçi, Shehu, Shyti, Hoxha, Levi e Jakoel, Matathia, Shamo, Beqa, Dhimitriadhi etj, përfaqësojnë jo vetëm shkëlqimin e pronarëve të tyre, por edhe arritje të spikatura në aspektin arkitekturor.
Sot, të restauruara, ato kanë fituar një dimension tjetër, në një hapësirë të ndryshuar, e cila pritet të shndërrohet në një pol të ri të zhvillimit të qytetit të Vlorës.
Prandaj dhe, në këtë zonë gjen dhe zbulon të gjithë Shqipërinë, personazhe që kanë lënë gjurmë në historinë e saj, Ismail Qemalin, Isa Boletinin, Marigo Posion e Babë Dudë Karbunarën, Avni Rustemin e Fan Nolin, ashtu sikurse edhe ngjarje të përmasave kombëtare si Shpallja e Pavarësisë, Lufta e Vlorës, Revolucioni Demokratik i Qershorit etj.
Kështu, Qendra Historike e Vlorës, përmes këtij projekti të financuar nga Fondi Shqiptaro Amerikan i Zhvillimit(AADF) dhe Qeveria Shqiptare, përjeton tri dimensionet kohore, duke evokuar të shkuarën në funksion të të tashmes dhe të perspektivës./atsh
