Turizem

Për një sezon turistik të sigurt, Ministria e Brendshme dhe Policia e Shtetit kanë ndërmarrë një sërë masash deri në përfundim të verës.

Nga qyteti turistik i Durrësit, zëvendësministrja e Brendshme, Romina Kuko foli për masat e ndërmarra, ndërsa i konsideroi këto të fundit një prioritet të qeverisë. Paketa e masave sipas saj, shtrihet në tri shtylla kryesore.

“Siguria në sezonin turistik përbën një prioritet për qeverinë, për një sezon pa incidente.
Ministria e Brendshme dhe Policia e Shtetit ka hartuar një plan të detajuar masash. Do të përmend tri shtylla kryesore. E para, garantimi i rendit dhe sigurisë publike në zonat e plazhit. Për këtë kemi shtuar forcat policore përgjatë vijës bregdetare, kemi shtuar zonat me hotspot, kemi lokalizuar masat për të shmangur vjedhjet etj”.

Lidhur me sigurinë rrugore, Kuko sqaroi se qarkullimi rrugor po kalon në një proces ristrukturimi, për këtë ajo tha se po punohet me sinjalistikën në zonat që paraqesin risk dhe po riparohen akset me potencial aksidentesh.

“Siguria rrugore, riorganizimi si dhe qarkullimi rrugor po kalon në një proces ristrukturimi për sezonin turistik. Po bashkëpunojmë me bashkitë për të vendosur sinjalistikën e duhur për akset që paraqesin risk si dhe riparimin e akseve rrugore që kanë potencial për aksidente”, – tha Kuko.

Më tej, ajo vuri në dukje se një tjetër pikë e rëndësishme të masave të marra lidhet edhe me menaxhimin e pikave kufitare.
“Për menaxhimin e fluksit në pikat e kalimit kufitar, kemi shtuar sportelet e pritjes së udhëtarëve në pikat e kalimit kufitar si dhe kemi marrë masa për të bërë korsi të veçanta për autobuzat. Kemi përgatitur fletëpalosje në disa gjuhë të huaja, për të përgatitur turistët për numrat e urgjencës, ndihmën, numrin e policisë etj.

Një problem i viteve të kaluara ka qenë edhe ndotja akustike, që sipas zv/ministres do t’i jepet fund në këtë sezon turistik, pas masave të ndërmarra për këtë çështje.

“Policia po bashkëpunon me pushtetin vendor për respektimin e orareve të vendosura nga bashkitë, por është shumë e rëndësishme që bizneset të respektojnë oraret dhe të ndërgjegjësohen”, – shpjegoi ajo.

Në fund të fjalës së saj, Kuko tha edhe do të ketë kontroll për motorët e ujit.

“Për motorët e ujit, është rëndësishme të kemi kontroll që të evitojmë aksidentet nga përdorimi pa kriter”. Sipas zv/ministres, oficerët e policisë do të angazhohen maksimalisht në këtë sezon turistik./ATSH

Fundjavat e kanë kthyer Parkun Kombëtar të Divjakës në një vend shlodhjeje dhe vëzhgimi për vizitorët vendas dhe të huaj.

Këtë fundjavë, ky park u vizitua nga një grup turistësh që vinin nga Norvegjia dhe Franca.  Administratorët e parkut konfirmojnë se janë të shumtë ata që vijnë këtu në fundjavë nga vendet europiane dhe vëzhgojnë natyrën e egër.

Tashmë, jemi në fillim-verën e këtij viti  dhe flora që mbulon këtë park është harlisur në bukurinë e saj të gjelbër. Peizazhi bëhet shumë piktoresk dhe tërheqës.

Shpendët ujorë janë gjallëruar dhe tërheqin vizitorët kuriozë. Flamingot japin shfaqjet e tyre mëngjesore dhe në mbrëmje trazojnë lagunën.

Turistë të shumtë vijnë në këtë park dhe vëzhgojnë nga afër lëvizjen e tyre dhe të shpendëve të tjer ujorë. Këtë fundjavë ata mbërritën nga Norvegjia e largët dhe Franca  për të vëzhguar  nga afër gjallesat e lagunës së Karavastasë.

Stafi drejtues i parkut i priti dhe i shoqëroi me njohës të natyrës, historisë së zonës si dhe me biologë kompetentë që u folën për faunën dhe florën që gjendet në këtë park, duke e komentuar atë në disa gjuhë për turistët e shumtë që erdhën këtë fundjavë. Në park janë hapur shtigje te reja për lëvizjen turistike si dhe janë ngritur qendra vëzhgimi të shpendëve. Një tjetër investim është dhe stacioni  i varkave që shëtisin turistët në lagunën  ujore.

Një prej këtyre investimeve që pritet të ofrojë argëtim, krahas plazhit të bukur dhe natyrës përrallorë të Divjakës, është edhe kulla e vrojtimit e ndërtuar në park, e cila të lejon të shikosh mbi pishat e larta të parkut./ATSH

Divjaka është e bukur në të kater stinët.

Ndërsa zbret poshtë valëve, ujërat e turbullta në pak metrat e parë i hapin shumë shpejt udhën ujërave të kristalta dhe pamjes marramendëse të dhjetëra e mbase qindra vazove antike në shtratin e detit, testament i udhëtimit të pafat të ndonjë tregtari me shumë se 1600 viteve më parë.

Në bregun e thyer të Shqipërisë, një prej zonave nënujore më pak të eksploruara në botë, shtrihet një thesar i madh, shkruan gazetarja e “Assosiated Press”, Elena Becatoros në një reportazh kushtuar vendit tonë.

Amfora të lashta, vazo prej qeramike që mbanin vajin e ullirit dhe verën përgjatë udhëtimeve detare mes Afrikës së Veriut dhe Perandorisë Romake, gjenden në fund të detit bashkë me rrëfenjat e fshehura të heroizmit dhe tradhtisë nga dy luftërat botërore, formacionet shkëmbore spektakolare e jetën e pasur nënujore.

Ndërsa citon një ekspert amerikan që ka eksploruar bregdetit shqiptar përgjatë dekadës së fundit, gazetarja pohon se në ujërat e vendit tonë nuk mund të notosh më shumë se disa metra pa gjetur diçka të mrekullueshme.

Tani, Shqipëria po vlerëson se si t’i studiojë e t’i mbrojë më mirë atraksionet nënujore, vijon artikulli, duke ia treguar ato edhe vizitorëve në një vend me territor të virgjër për industrinë e zhytjes.

Dikur më e izoluar se Koreja e Veriut, Shqipëria po hapet gradualisht ndaj turizmit ndërkombëtar, por reliket nënujore deri më tani janë ruajtur me fanatizëm pasi ekziston frika se nëse ato të bëhen më të aksesueshme mund të plaçkiten.

Gazetarja e “Assosiated Press” kujton se legjislacioni për mbrojtjen e trashëgimisë nënujore pritet të miratohet së shpejti, çka do të mundësojë edhe qasjen e turistëve./topchannel

Kanionet e Osumit janë shndërruar tashmë, në një destinacion turistik gjithmonë e më i pëlqyer për aventurierët e sporteve të “adrenalinës”. Këtë fundjavë, përveç atyre që ushtrojnë sportin rafting, të ngjitjeve shkëmbore, hedhjeve nga lartësitë ujore, turistëve që vijnë me familjet e tyre, Kanionet kanë pritur edhe grupe të organizuara.

Kështu, këtë javë drejt Beratit dhe Skraparit udhëtuan me dhjetëra autobuzë e mikrobuzë që vinin nga Tirana apo qytete të tjera të vendit, të mbushur me qytetarë që dëshironin të vinin në provë guximin e tyre në kanionet e bukur dhe të frikshëm të Osumit. Specialistët e ADZM-së Berat që ndoqën dhe shoqëruan në shtigje të rrezikshme aventurierët e sporteve ujore, thonë për ATSH-në se, një vargan prej më shumë se 25 makinash të rrugëve të ndryshme, që transportonin edhe 60 turistë francezë, u ngjitën në lartësitë e kanioneve të lumit Osum.

Sezoni turistik sapo ka filluar dhe Kanionet e Osumit me madhështinë, lashtësinë, mitologjinë dhe bukurinë e tyre janë përherë të lakmuar për t’u vizituar. /atsh

Nga qyteti i Durrësit, ministri i Turizmit dhe Mjedisit, Blendi Klosi ndërsa ishte i pranishëm në kompleksin Fafa ku 60% e të punësuarve vijnë nga shkollat e arsimit profesional, deklaroi se krahas punësimit të 300 të rinjve ka ende 100 vende të lira punë për ata që kanë përfunduar këtë arsimim.

Ministri Klosi e konsideroi investimin e kryer në këtë kompleks, një investim që ka kaluar parashikimet, pasi për herë të parë po krijohen brende, që po menaxhohen sipas tij me mjeshtëri.

“Është një investim që ka kaluar parashikimet në investim por edhe një investim që krijon për herë të parë disa brende të cilat në vështirësitë e tyre po arrin që të menaxhohet me mjeshtëri nga iniciativa e brendshme private por edhe nga puna dhe energjia e drejtuesve të tij. Ky hotel që po inaugurojmë sot është pjesë e një kompleksi FAFA grup që ka tre hotele në këtë zonë dhe ka një kapacitet mbi 650 dhoma. Hoteli i sotëm ka 330 dhoma dhe po ashtu në këtë zonë janë disa djem të rinj që kanë arritur të krijojnë disa brende që janë të konkurrueshme në të gjithë zonën në të cilën jetojmë”, tha Klosi.

Turistët norvegjezë dhe suedezë kanë pronotuar në këtë resort, tha ministri, duke shtuar se ky grup turistësh ka 7-fishuar numrin e vizitorëve nga vendet skandinave në Shqipëri.

“Sivjet janë 35 mijë turistë nga këto vende që kanë pronotuar në Shqipëri”, tha Klosi.

Ai i konsideroi të rinjtë e punësuar pranë këtij kompleksi, si një përgjigje ndaj thirrjes së kryeministrit në 2014 për të zgjedhur arsimin profesional.

“Sot jemi këtu me ata të rinj që ju përgjigjën thirrjen se kryeministrit në 2014, që arsimin profesional ta shndërrojmë në një energji të madhe për ekonominë e vendit tonë. Sot jemi këtu me 300 të punësuar në resorin FAFA dhe po ashtu, me shume të tjerë të arsimit profesional për të pasur një punësim të sigurt. Hoteli ka akoma kërkesa për 100 vende të reja pune”.

Ndërkaq, Klosi vuri në dukje kërkesat për punë për ata që kanë përfunduar arsimin profesional, ndaj edhe u bëri thirrje prindërve për të nxitur fëmijët e tyre të zgjedhin punësim dhe të ardhme të sigurt.

“Kërkesa është edhe këtu është ulëritëse. Kërkesa jonë e kahershme që arsimi profesional me shpejtësi  të shndërrohet në një nga burimet e mëdha të ekonomisë së vendit tonë. Bashke me kryeministrin mbështesin iniciativën që arsimi profesional të dyfishohet, të trefishohet ç’ka ka ndodhur në Durrës dhe përsëri kërkesat janë shumë më tepër se kaq”, përfundoi ministri./atsh

Punimet e nisura rreth dy vjet më parë për termainalin e ri të portit  ,u pezulluan për shkak të Lungomares,teksa me përfundimin e këtij, projekti rinisi sërish,por aktualisht për terminalin i ri duhet ende kohë për të përfunduar.

Porti i Vlorës për këtë sezon turstik do të vijojë të funksionojë me terminalin e vjetër,ndërsa do të vijohet me shtim të shërbimit. Drejtori i portit Vlorë Admir Malaj,konfirmon se punimet për terminalin e ri ,pritet të përfundojnë brenda këtij sezoni,ndërsa gjatë pikut do të vijohet të punohet me terminalin e vjetër.

Sa i përket linjes Vlorë-Brindisi në funksion mbetet vetëm një traget,ndërsa nga kompania aktuale,është rikonfirmuar vënia në funksion e një tjetër traget, vetëm gjatë pikut të sezonit turistik. Lajmi i mirë për turistët vendas dhe të huaj,mbetet hapja e ishullit të Sazanit,një pikë turistike,mjaft e kërkuar dhe me shumë atraksion. Këtë sezon veror do të jetë më i prekshëm si nga turistët vendas ashtu edhe ata të huaj.

Porti i Vlorës,mbetet ende një nga pikat kryesore për hyrjen dhe daljen e shtetasve të huaj dhe shqiptarë,turistëve që mbërrijnë nga Italia dhe anasjelltas. Ndërsa gjatë sezonit pritet më shumë fluks,megjithatë ka ende shumë për të zgjidhur ,duke nisur nga punimet për terminalin e ri dhe deri në vendosjen në funksion të një tjetër trageti në linjën Vlorë-Brindisi.