Shendetesi

Fituan betejën ndaj COVID-19, çifti nga Shkodra mesazh prekës mjekëve të Infektivit

Çifti Kraja ka arritur të fitojë betejën e vështirë me COVID-19 dhe në shenjë falenderimi i ka bërë një dedikim shumë prekës mjekëve të spitalit Infektiv.

Çifti nga Shkodra i është drejtuar me një letër personelit mjekësor që u kujdes për ta në QSUT. Ata janë shprehur shumë mirënjohës ndaj tyre duke i falënderuar familjarisht ata bashkë me fëmijët, nipërit e mbesat e tyre, sepse bënë të mundur që të riktheheshin shëndoshë e mirë në shtëpi.

“Drejtuar personelit mjekësor të COVID-19, spitalit Infektiv QSUT. Ju urojmë nga zemra, shëndet jetë të gjatë e lumturi pa kufi me familjet tuaja. Ju ruajt Zoti. Jemi shumë mirënjohës ndaj Jush. Punë të mbarë nga familja Kraja”, thuhet në letër.

Shefja e Infektivit Najada Çomo ka dhënë lajmin e mirë për çiftin Kraja. “Dy shkodranë të fisëm fituan betejën me COVID-19, betejë shumë e vështirë, ky falënderim vlen shumë për gjithë stafin e shërbimit infektiv. Mirënjohje çifti Kraja për këtë dedikim të ndjerë”, është shprehur Çomo./atsh

Fituan betejën ndaj COVID-19, çifti nga Shkodra mesazh prekës mjekëve të Infektivit Read More »

Tomini për ATSH-në: Monitorim intensiv i zonave të kuqe e të gjelbra, rikthimi mund të jetë i mundshëm nëse nuk respektohen udhëzimet

Shefja e Survejancës dhe Shërbimit të Inteligjencës Epidemike në Institutin e Shëndetit Publik, Eugena Tomini deklaron se marrja në kohë e masave për distancimin fizik, vetizolimi i ndërgjegjësuar, masat e higjienës personale dhe respiratore patën peshën madhore në atë ç’ka epidemia COVID-19 u paraqit në Shqipëri.

Në një intervistë për ATSH-në, Tomini shprehet se COVID-19 në vendin tonë pati karakteristikën e një epidemie të butë, krahasuar me peshën që pati në vendet e tjera europiane, duke krijuar mundësinë për një menaxhim cilësor dhe shërbim shëndetësor korrekt dhe në kohë.

“Kjo epidemi u paraqit me pikun në javën e fundit të muajit mars dhe me një trend të qëndrueshëm në vijim, duke sjellë një menaxhim cilësor dhe shërbim shëndetësor korrekt dhe në kohë, për sa i përket përgjigjes së sistemit shëndetësor ndaj të gjitha rasteve, sigurisht nën efektin e masave të marra kundrejt distancimit fizik, por dhe strategjisë së ndjekur kundrejt testimit të çdo rasti të dyshuar dhe të gjithë kontakteve të evidentuara nga gjurmimi i thelluar epidemiologjik. Marrja në kohë e masave për distancimin fizik, vetizolimi i ndërgjegjësuar, masat e higjienës personale dhe respiratore patën peshën madhore në atë ç’ka epidemia COVID-19 u paraqit në Shqipëri”, thekson Tomini për ATSH.

Në vend, thekson ajo, vazhdon prezenca e rasteve sporadike, prezenca e vatrave dhe nuk vërehet qarkullim i dendur në popullatë. “Por, transmetimi komunitar në disa zona është evident, sepse kemi shfaqjen e rasteve pozitive COVID-19 të pa lidhur epidemiologjikisht me njëri-tjetrin”, shprehet Tomini.

Monitorimi në mënyrë intensive i “zonave të kuqe” dhe ”të gjelbra”, shpjegoi Tomini, njëkohësisht sjell evidentimin e rasteve të reja aktive dhe kjo është në sajë të gjurmimit epidemiologjik të rasteve.

“Rastet e hospitalizuara, paraqiten në një nivel shumë të ulët aktualisht dhe kjo situatë flet në mënyrë pozitive për një klinikë jo agresive, sepse vetëm këto raste kërkojnë shërbim shëndetësor spitalor”, shprehet Tomini për ATSH.

Por sipas saj, këto të dhëna nuk flasin për faktin që pas rasteve me klinikë dhe me tampon pozitiv COVID-19, probabilisht kemi shumë herë më tepër raste asimptomatike në popullatë.

Megjithatë, Tomini thotë se aktualisht COVID-19 është nën kontroll, por vlerëson ajo, rikthimi mund të jetë i mundshëm dhe mund të mos përjashtohet nëse udhëzimet nuk do të respektohen.

“Duhet të kemi vazhdimësi në respektimin e distancimit fizik dhe masave të higjienës personale pavarësisht lehtësimit të masave, janë mundësitë e vetme të parandalimit dhe të shkëputjes së zinxhirit të transmetimit të infeksionit”, apelon Tomini./atsh

Tomini për ATSH-në: Monitorim intensiv i zonave të kuqe e të gjelbra, rikthimi mund të jetë i mundshëm nëse nuk respektohen udhëzimet Read More »

18 raste të reja në 24 orët e fundit, Manastirliu: Nevojitet përgjegjshmëri, jemi në kufirin ekstrem të lejuar për fazat e rihapjes

Gjatë 24 orëve të fundit janë identifikuar sërish 18 raste të reja me COVID-19. Në Durrës janë identifikuar 7 raste në një fasoneri, kontakte të një rasti pozitiv. Janë 5 raste të reja në Berat, 4 raste në Tiranë dhe 2 në Krujë, të gjitha kontakte.

Duke ngritur shqetësimin për rritjen e rasteve pozitive në ditët e fundit, Ministrja e Shëndetësisë dhe Mbrojtjes Sociale Ogerta Manastirliu kërkoi nga qytetarët respektimin e rregullave për të mos u kthyer në gjendjen e mëparshme.

“Ekspertët tanë e kanë thënë që në kryer të herës. Faza e lehtësimit merr kuptim vetëm nëse shoqërohet me një ulje të qëndrueshme të numrit të infektimeve. Plani i lehtësimit të masave varet vetëm nga bashkëpunimi me ju. Është e vërtetë që ndëshkimet nuk janë zgjidhja, por është po aq e vërtetë se nuk mund të penalizohet një popull i tërë nga një pakicë, veprimet e së cilës mund të shkaktojnë dëme të pallogaritshme”, tha Manastirliu.

Duke deklaruar se Ministria e Shëndetësisë dhe Mbrojtjes Sociale mbështet planin e hapjes dhe lehtësimin e masave, Manastirliu deklaroi se nëse do të vijojnë rritje të rasteve, sipas skenarëve, mund të përdoren frenat e emergjencës.

“Rritja në këto shifra e rasteve të reja është maksimumi i lejuar nga skenarët tanë të hapjes. Rritja e mëtejshme do të na detyronte të ndërmerrnim hapa të menjëhershëm për të mos lejuar një valë të dytë goditëse, që do të hidhte në erë atë që është arritur deri më sot”, nënvizoi Manastirliu.

Ministrja Manastirliu u shpreh se “nëse do të vazhdohet me tendencën përkeqësuese të ditëve të fundit, do të jemi të detyruar të bëjmë hapa pas. Dhe kjo nuk është në interes të askujt! Sigurisht nuk ka vend për alarm, por jemi në një moment ku kërkohet përgjegjshmëri nga çdo qytetar”.

Sipas saj, mbrojtja e shëndetit të qytetarëve është mbi gjithçka.

“Ditët në vijim do të jenë vendimtare për planin e rihapjes”, tha Manastirliu./atsh

18 raste të reja në 24 orët e fundit, Manastirliu: Nevojitet përgjegjshmëri, jemi në kufirin ekstrem të lejuar për fazat e rihapjes Read More »

Ministria e Shëndetësisë: Rastet e reja në Tiranë, Durrës, Berat e Krujë, 916 të prekur në total e 705 të shëruar

Në 24 orët të fundit janë testuar 219 qytetarë të dyshuar si të prekur me Covid-19 dhe kanë rezultuar pozitivë 18 qytetarë, duke e çuar në total numrin e të prekurve në 916, ndërsa janë shëruar deri tani 705 persona.

Silva Bino, përgjegjëse e departamentit të sëmundjeve infektive në Institutin e Shëndetit Publik në komunikimin e përditshëm të Ministrisë së Shëndetësisë për situatën COVID19 në vend tha sot se “pjesa më e madhe e tyre janë kontake të rasteve të mëparshme, ndërkohë që vazhdon hetimi epidemiologjik në terren. Në Durrës janë identifikuar 7 raste në një fasoneri, kontakte të një rasti pozitiv. Në Berat janë edhe 5 raste të reja; në Tiranë 4 raste dhe në Krujë 2 raste”.

“Këto të dhëna na tregojnë se ka shumë rëndësi të zbatohen rregullat nga të gjithë qytetarët, të mos e ulim vigjilencën. Kujdesi i qytetarëve duhet të vazhdojë, për të respektuar masat e vendosura, në mënyrë që të minimizojmë sa më shumë përhapjen e virusit tek kontaktet familjare apo më gjerë. Vetë bizneset duhet të respektojnë protokollet e përcaktuara për të ruajtur qytetarët dhe punonjësit”, – shtoi ajo.

COVID-19 – Statistika (15 Maj 2020)

Testime totale 11988

Testime molekulare 11458

Testime serologjike 530

Raste pozitive 916

Raste të shëruara 705

Raste Aktive 180

Humbje jete 31 (Qarku Tiranë 18, Durrës 6, Fier 3, Vlorë 1, Shkodër 2, Kukës 1)

Shpërndarja gjeografike e rasteve aktive është si vijon:

Tiranë 77

Krujë 46

Shkodër 16

Kamëz 12

Berat 10

Durrës 9

Fier 5

Elbasan 2

Kurbin 1

Mirditë 1

Korçë 1

/atsh

Ministria e Shëndetësisë: Rastet e reja në Tiranë, Durrës, Berat e Krujë, 916 të prekur në total e 705 të shëruar Read More »

Situata në spitale e qëndrueshme, 19 të shtruar dhe 4 në terapi intensive

Situata në spitale paraqitet e qëndrueshme me 19 qytetarë të shtruar, prej të cilëve 4 janë në terapi intensive.

Silva Bino, përgjegjëse e departamentit të sëmundjeve infektive në Institutin e Shëndetit Publik në komunikimin e përditshëm të Ministrisë së Shëndetësisë për situatën COVID19 në vend theksoi sot se deri tani janë kryer rreth 12 mijë testime dhe kanë kaluar 900 raste pozitive nga fillimi i epidemisë, ndërsa aktualisht janë 180 persona aktivë me COVID19, kryesisht në Tiranë, Krujë, Shkodër, Kamëz, Durrës dhe Berat”.

“Prandaj është vendi për një apel për të gjithë qytetarët: të respektojmë masat, të mos dalim nga shtëpia pa arsye të domosdoshme, të mos neglizhojmë shenjat e sëmundjes dhe duhet telefonuar 127 nëse keni shenja të Covid-19”, – tha Bino.

Gjatë 24 orëve të fundit janë identifikuar sërish 18 raste të reja me COVID-19.

Në Durrës janë identifikuar 7 raste në një fasoneri, kontakte të një rasti pozitiv. Janë 5 raste të reja në Berat, 4 raste në Tiranë dhe 2 në Krujë, të gjitha kontakte./atsh

Situata në spitale e qëndrueshme, 19 të shtruar dhe 4 në terapi intensive Read More »

“Hapja graduale rrit imunitetin”/ Pipero: Rastet e fundit nuk dëshmojnë sëmundshmëri, por rënien në kontakt

Mjeku i njohur Pëllumb Pipero e konsideron të qetë dhe të butë epideminë në vendin tonë pavarësisht një rritjeje të ndjeshme të numrit të të infektuarve në 24 orët e fundit.

Gjatë një interviste televizive, Pipero tha se “sot kemi 18 raste pozitive, por dje dhe sot nuk kemi asnjë rast të ri të shtruar. Janë raste që nuk dëshmojnë sëmundshmëri, por rënien në kontakt”.

Por Pipero apelon që qytetarët nuk duhet të humbasin kujdesin dhe vëmendjen përballë koronavirusit.

“Është një virus me shumë të panjohura dhe vendet që nuk kanë respektuar gradualitetin janë kthyer pas në masa. Hapja duhet të jetë graduale dhe rajonale, pasi ato mikrovatra që janë ende t’i mbajmë të survejuara, të mos na ndodhi t’i kthejmë mbrapsht”, tha Pipero, duke theksuar se është shumë e rëndësishme mbajtja e distancës fizike dhe larja e duarve nga qytetarët.

Ai theksoi se rastet edhe pse sporadike janë pa komplikacione, duke nënvizuar se epidemia është nën kontroll.

“Ka një teori që me kalimin nga një person në një tjetër bie virulenca dhe ky është fakt. Dhe ekspozimi, vazhdimi i hapjes do na japi dy gjëra: së pari në aspektin psikologjik do jemi më të qetë, në aspektin ekonomik po e po , por edhe rritja e imunitetit”, deklaroi mjeku Pipero.

Ai theksoi se “virusi tek ne ka jo vetëm rënie të qarkullimit të transmetueshmërisë, por edhe rënie të virulencës, nuk është më agresiv sa ka qenë. Pra nuk sjell sëmundje, sjell rritje të mbrojtjes”./atsh

“Hapja graduale rrit imunitetin”/ Pipero: Rastet e fundit nuk dëshmojnë sëmundshmëri, por rënien në kontakt Read More »

“Asgjë për t’u shqetësuar nga shtimi i rasteve”/Kalo: Janë kontakte me të sëmurët e mëparshëm, vetëndërgjegjësimi i qytetarëve arma për mposhtjen e COVID-19

Rastet e regjistruara sot nuk janë vatra të reja, por raste të kontakteve të mëparshme. Me rëndësi është ndërgjegjësimi i qytetarëve për respektimin e masave.

Kështu deklaroi mjeku Tritan Kalo, gjatë një interviste televizive sot, ku theksoi se, lehtësimi i masave dhe rritja e lëvizjes së popullatës e bën të pritshme shtimin e rasteve.

“Nuk janë raste të vatrave të reja, por janë kontakte me të sëmurët e mëparshëm. Kjo e bën të nevojshme që të ruajmë distancën fizike. Pra, kjo hapja dhe kjo lëvizja bën që njerëzit t’i nënvlerësojnë masat e distancimit fizik dhe kjo bën detyrimisht të shtohet numri. Kemi mbi 13 ditë që nuk kemi asnjë viktimë nga kjo sëmundje dhe këto parametra po përpiqemi t’i ruajmë. Faktori kryesor është sjellja e qytetarëve”,- tha ai.

“Gjatë këtyre ditëve po, do ketë rritje dhe pastaj shpresoj të rikthehet aty ku ishim në ditët e fundit. Mbi të gjitha, me rëndësi mbetet vetëndërgjegjësimi i popullatës për mbarëvajtjen e kësaj pandemie në vendin tonë”, – shtoi Kalo.

Ai pasqyroi dhe situatën në dy spitalet COVID. “Në të dy strukturat janë në terapi intensive tre persona jo të intubuar, por që kanë nevojë për asistencë. Jemi të lehtësuar për dy gjëra. E para, se ka më shumë jetë njerëzish të shpëtuar, ne vetë ndjehemi më të lehtësuar, sepse është lehtësuar barra. Personat më të rrezikuar në të gjithë botën është personeli mjekësor”, – tha Kalo.

“Unë e kam thënë, se mundësia është se ajo që nuk është bërë ligjore është bërë faktike nga popullata. Deri sa një gjë e tillë është bërë fakt i kryer dhe kjo është e mirë që të pranohet, por mbyllja brenda zonave është e mirë që të vijojë për ca kohë, sepse akoma kemi një numër të madh personash aktivë në Tiranë, Krujë dhe në Shkodër”, – tha ai.

Doktor Kalo u shpreh se virusi do të rishfaqet në vjeshtë, ashtu siç rikthehen infeksionet e tjera. “Unë po e shpreh tek ju, nuk është hera e parë që e kam thënë. Nuk bëhet fjalë për rikthim, por rishfaqje sepse infeksioni nuk do të zhduket. Në vjeshtë bashkë me kthimin e infeksioneve të tjera, detyrimisht një pjesë e infeksioneve do shfaqen, dhe midis tyre do të ketë të sëmurë nga COVID-19”, – theksoi ai.

“Pakënaqësia ime lidhet me dy probleme kryesore: Së pari, për shkeljen dhe mosndërgjegjësimin qytetar, i cili çalon. Një popullatë që është aktive nuk ka pse të bëhet pre e infeksionit të tillë. Nuk kemi njerëz për të humbur. E dyta, ajo që më shqetëson është politizimi i gjërave të pavlefshme. Nuk bëhet politikë me sëmundjen, me të vdekurit, me pandeminë. Politika bëhet me politika shëndetësore, me përmirësimin e sistemit shëndetësor. Një popullatë e shëndoshë tregon vitalitetin e një kombi në të ardhmen”, – përfundoi ai. /atsh

“Asgjë për t’u shqetësuar nga shtimi i rasteve”/Kalo: Janë kontakte me të sëmurët e mëparshëm, vetëndërgjegjësimi i qytetarëve arma për mposhtjen e COVID-19 Read More »

Ministria e Shëndetësisë: 18 raste të reja, shkon në 898 numri i të prekurve

Ministria e Shëndetësisë dhe Mbrojtjes Sociale ka informuar se 24 orët e fundit janë identifikuar pozitivë me COVID-19, 18 raste te reja.

Ka shkuar në 898 numri i të prekurve me koronavirus në vend.

Dr. Eugena Tomini, eksperte e Institutit të Shëndetit Publik në përditësimin e situatës theksoi se në 24 orët të fundit janë testuar 191 qytetarë të dyshuar si të prekur me COVID-19 dhe kanë rezultuar pozitivë 18 qytetarë.

“Pjesa më e madhe e tyre janë kontakte të rasteve të mëparshme, ndërkohë që vazhdon hetimi epidemiologjik në terren. Rastet e 24 orëve të fundit janë të shpërndara si vijon: 11 raste në Tiranë, 4 në Krujë, 2 në Berat dhe 1 në Durrës. Të shëruar janë 6 qytetarë”, u shpreh ajo.

Pavarësisht numrit të rasteve pozitive të identifikuara, situata epidemiologjike paraqitet e qëndrueshme, por që tregon qartë se kujdesi i qytetarëve duhet të vazhdojë, për të respektuar masat e vendosura, në mënyrë që të minimizojmë sa më shumë përhapjen e virusit tek kontaktet familjare apo më gjerë.

Deri më sot janë konfirmuar pozitivë me COVID-19 në të gjithë vendin 898 qytetarë, ndërsa 77% e të prekurve tashmë janë të shëruar.

COVID-19 – Statistika (14 maj 2020)
Testime totale 11769
Testime molekulare 11239
Testime serologjike 530
Raste pozitive 898
Raste të shëruara 694
Raste Aktive 173
Humbje jete 31 (qarku Tiranë 18, Durrës 6, Fier 3, Vlorë 1, Shkodër 2, Kukës 1)

Shpërndarja gjeografike e rasteve aktive është si vijon:
Tiranë 81
Krujë 47
Shkodër 16
Kamëz 12
Fier 5
Berat 5
Elbasan 2
Durrës 2
Kurbin 1
Mirditë 1
Korçë 1/atsh

Ministria e Shëndetësisë: 18 raste të reja, shkon në 898 numri i të prekurve Read More »