Shendetesi

Drejtori i Urgjencës Kombëtare Mjekësore, Skënder Brataj, deklaroi sot se koronavirusi është real, infekton dhe vret.

Në një reagim kundër atyre njerëzve që sipas tij hiqen si ‘gjithollogë’ dhe besojnë se dinë gjithçka Brataj tha se “ju lutem mos shkaktoni më konfuzion! Koronavirusi ekziston, Koronavirusi infekton, Koronavirusi sëmur, Koronavirusi merr jetë, Jeta e radhës që do të humbi, mos harro, mund të jetë e jotja”.

“Ju lutem na lini të shpëtojmë jetë njerëzish, na jepni kohë të mposhtim virusin, na jepni kohë të sqarojmë qytetarët, na jepni kohë të shërojmë plagët e virusit”, – u shpreh Brataj.

Mjeku Brataj i bën thirrje qytetarëve që të ndjekin 5 rregullat e higjienës dhe mbrojtjes ndaj këtij virusi që ka mbi 6 muaj që ‘po gjunjëzon’ mbarë njerëzimin.

“Prandaj për të ruajtur veten dhe familjen tënde ndiq këto pesë këshilla: mbaj maskën në ambientet e mbyllura, mbaj distancën 1.5 metër, zbato rregullat e higjienës, mos lejo të tjerët t’i shkelin këto rregulla dhe mos e përdor profilin fals deri sa virusi të ikë”, shprehet ndër të tjera Brataj./atsh

Shefja e Infektivit në Qendrën Spitalore Universitare, Najada Çomo, deklaroi sot se “COVID-19 është një realitet në Shqipëri dhe është realitet që duhet mbrohet kushdo dhe mund të marrë jetë njerëzish dhe papritur ti mund të bëhesh shkak për t’u sëmurur vetë, apo për t’ia transmetuar personave të tjerë”.

Në një intervistë televizive, Çobo tha se “fillimi i lirisë, pra hapja e Shqipërisë si edhe një pjese të vendeve të botës është perceptuar gabim. Perceptim gabim do të thotë hapet, por ruaj pjesën e masave që janë të thëna në mënyrë të vazhdueshme, sepse kjo lloj hapjeje po shton numrin e personave të sëmurë, jo atyre të infektuar që është një kategori e caktuar dhe shtimi i rasteve të shtruar në spital sigurisht është përcjellë edhe me humbje jetësh, që nuk janë pak”.

Sipas saj, njerëzit duhet ta kuptojnë mirë se hapja është bërë jo se ka mbaruar COVID-19.

“Shtimi i rasteve ishte i pritshëm, por mungesa e sensibilizmit të njerëzve ose harresa se kjo sëmundje iku dhe nuk është më mes nesh mua më shqetëson pa masë dhe ndaj kam dalë sot këtu për të thënë se COVID-19 është një realitet në Shqipëri dhe duhet të gjithë të marrim masa për t’u mbrojtur se virusi është mes njerëzve. Nuk është se ka zgjedhur të rrijë në një zonë të caktuar, ai është në ajër dhe qarkullon”, – nënvizoi Çomo.

E pyetur se nëse në verë ulet transmetueshmëria, Çomo tha se “unë s’e kam artikuluar asnjëherë. Nuk ulet transmetueshmëria e virusit gjatë verës. Madje në temperatura të larta pacientët kanë më shumë vështirësi sesa në temperaturat që kishim gjatë 3 muajve të parë. Një pacient i ftohur ka më shumë vështirësi në temperatura 40 gradë”.

“Kjo është sëmundja më e tmerrshme që unë kam parë në historinë e punës time. Kjo sëmundje ka shumë të papritura. Mendon se ke vendosur në rregull çdo gjë dhe për një orë ndryshon gjithçka. Gjendja e të infektuarve ndryshon krejt papritur”, – tha Çomo. /atsh

Doktoreshë Silvana Çeliku, shefe e repartit të Gjinekologjisë Onkologjike, i bëri apel sot qytetarëve për zbatimin e masave mbrojtëse ndaj COVID-19.

Në kuadër të fushatës së Ministrisë së Shëndetësisë dhe Mbrojtjes Sociale për përdorimin e maskës, ministrja Ogerta Manastirliu, ka publikuar videomesazhin drejtuar qytetarëve të dokotoreshës Çeliku.

”Kam 36 vjet që luftoj bashkë me pacientet e mia kundër kësaj sëmundje kaq të vështirë, të gjatë dhe të lodhshme. Jam gëzuar shpesh kur kemi fituar këtë betejë, por edhe jam mërzitur shumë kur kam patur edhe humbje jete. Më këtë virus fatkeqësisht qenka ndryshe, ky është një virus me një sëmundshmëri shumë të lartë me vdekje të shpejtë dhe shumë të dhimbshme”, – thekson dr. Çeliku.

Më tej dr. Çeliku shprehet se “shpesh i bëj pyetje vetes më falet mua që të vdes nga një grip? Unë them që jo. Ne nuk dimë shumë gjëra mbi këtë virus, por dimë diçka si të mbrohemi ndaj tij. Ato që ne dimë janë; ju lutem mbani distancën, sociale me njëri-tjetrin, mbani higjienën personale dhe kolektive sa më të mirë përdorni maskat nëse nuk keni mundësi të mbani distancimin social ose nëse jeni në ambiente të mbyllura. Së bashku me të gjitha këto masa do t’ia dalim”.

“Të dashur pacientë ju lutem shumë mundohuni të zbatoni të gjithë rregullat që ne kemi vënë në këtë spital përdorimi i maskës është i detyrueshëm brenda spitalit. Ju lutem mbani distancimin social me njëri tjetrin , dhe prisni t’iu vijë personeli shëndetësor apo koordinatori për të bërë takimin përkatës me mjekun. Ju lutem zbatoni këto rregulla, së bashku edhe njëherë të mundohemi ta mposhtim këtë virus që po merr jetë njerëzish”, – tha dr.Çeliku./atsh