Shendetesi

Jo mjekim interneti për COVID-19. Ky është apeli që ka bërë sot kreu i Urgjencës Kombëtare, Skënder Brataj. Ai u ka bërë thirrje qytetarëve të mos ndjekin këshillat e internetit për mjekim kundër koronavirusit.

Ai ka marrë rastin e betadinës, duke sqaruar se ajo nuk shërben për shpëlarje fyti, por është një dezifektant për plagët.

“Përshëndetje qytetar shqiptar kudo ndodhesh. Sot po qarkullon në rrjetet sociale një mjekim apo protokoll mjekimi i cili po shpërndahet nga të gjithë personat që mendojnë se do të ndihmojnë sadopak njerzit dhe të afërmit e tyre”, ka thënë Brataj.

“Jo terapi interneti, jo terapi nga çdokush. Në atë mesazh ka gjëra mjekësore të ngatërruara, të shpjeguara jo nga specialist të fushës. Nuk ekziston betadinë për shpëlarje fyti, betadina është një dizifektant për plagët. Terapia dhe medikamentet merren nën këshilla mjekësore, pasi vlerësohen shenjat dhe simptomat, por mbi të gjitha kur vlerësohen parametrat jetësorë si presioni i gjakut, frekuenca kardiake, frekuenca respiratore, niveli i oksigjenit në gjak (saturimetria) që duhet të jetë në njerëzit normal nga 94-100%, në ata me patologji pulmonare jo më pak se 90%. Nëse është më poshtë këtyre shifrave i duhet dhënë oksigjen të sëmurit”, është shprehur ai.

“Nëse saturimetria e oksigjenit është 43% siç thuhet në atë mjekim mund të jetë i papërshtatshëm më me jetën, prandaj ju lutem jo terapi interneti. Mjeku i familjes, mjeku i 127, mjekët e urgjencave, specialistët si infeksionist dhe pneumolog janë profesionistët që në këtë moment mund t’ju këshillojnë pasi t’i keni kontaktuar ata. Çdo mjek që ju njihni ose keni besim në ta duhet t’i kontaktoni, të këshilloheni dhe nëse ata ju këshillojnë ose ju drejtojnë te specialistë të tjerë atëherë veproni”, ka thënë Brataj./atsh

Ministrja e Shëndetësisë dhe Mbrojtjes Sociale Ogerta Manastirliu në kushtet e masave kundër përhapjes së pandemisë COVID-19, shprehet se, “mbajtja e barrierave mbrojtëse është e detyrueshme në ambientet e mbyllura për çdo qytetar”.

Ministria ka publikuar mesazhin sensibilizues të doktor Drini Dobi, i cili thekson rëndësinë e mbajtjes së maskës nga qytetarët për të frenuar infektimin nga COVID-19.

“Mos e konsideroni maskën si pengesë për të folur, por konsiderojeni atë si një mjet më të rëndësishëm që do t’ju lejojë të flisni lirisht me njerëzit që doni në të ardhmen!”, shprehet mjeku Dobi.

“Mbajeni maskën jo vetëm me njerëzit e panjohur, por edhe me miqtë e të afërmit tuaj në ambientet e mbyllura, sepse vetëm kështu ndihmoni ata dhe veten, për të qenë të shëndetshëm”, apelon doktori Drini Dobi, në mesazhin e tij drejtuar qytetarëve. /atsh

Mjeku Pëllumb Pipero, gjatë një interviste televizive ka theksuar se maska është e domosdoshme, teksa shtoi se nëse jeni në plazh e keni shenja të COVID-19, izolohuni e telefononi 127.

“Natyrisht jemi ende brenda pandemisë në vendin tonë. Shifrat ndryshojnë dita ditës. Më shqetësojnë rastet që shtrohen në spital jo vetëm për ne por edhe për familjet, do të thosha midis tyre rastet e rënda e sidomos humbjet e jetëve. Fakti që një 43-vjeçar pa sëmundje shoqëruese ka humbur jetën do të thotë se ky virus në vetvete mund të shkaktojë dëmtime serioze madje mund të marri jetën edhe në rastet kur nuk kanë sëmundje kronike edhe kur nuk janë të moshuar. Dua të përsëris kujdesin që duhet të kemi kudo dhe maskën që duhet ta kemi kudo”,- shprehet Pipero.

“Duhet që çdo pushues, nëse ka shenja klinike, veçanërisht temperaturë, do këshilloja të qëndroj në shtëpi. Nëse ndodh që kur është me pushime të ketë shqetësime mjaftoj të komunikoj me 127 dhe shërbimin shëndetësor do ta ketë në dispozicion. Tamponi nuk është procedurë që të shëron por procedure diagnostikuese që ju ofrohet të gjithë qytetarëve qoftë shqiptarë apo të huaj. Kam një këshillë për operatorët turistikë, jo vetëm t’i ftojnë pushuesit por para se t’i rekomandojnë akomodimin t’i pyesin nëse kanë shenja klinike dhe të mos i rekomandojnë të vijnë nëse kanë shenja klinike. Shqipëria, bregdeti, malet tona për pushuesit janë shumë të sigurta, me kushtin që si pushuesit edhe ne qytetarët të respektojmë protokollet dhe masat e domosdoshme siç është maska dhe distanca. Kaq mjafton për të qenë të sigurt edhe në bregdet edhe në mal”, thekson Pipero.

Duke folur nga Vlora, mjeku Pipero tha se në qytetin jugperëndimor po respektohen masat nëpër lokale dhe nga qytetarët.

“Tavolinat dhe çadrat janë në distancën e duhur. Dy tre qytetarë që kam shkëmbyer ishin me maskë të vendosur. Maska është e domosdoshme, qoftë edhe maska e thjeshtë është e rëndësishme për të qenë të sigurt kudo”, u shpreh mjeku Pipero./atsh

Mjekja hematologe, Alma Cili, e cila u përball me virusin e rëndë COVID-19, tregon se ajo ndjen ende shenjat e tij.

Në një intervistë në media, mjekja shprehet se ende e ka të vështirë të ecë apo të flasë gjatë, pasi i duhet të ndalet dhe të marrë frymë thellë.

Lidhur me akuzat e ngritura se QSUT u kthye në vatër e rrezikshme e përhapjes së COVID-19, Cili e konsideron absurde ta cilësosh QSUT vatër infeksioni.

“Në QSUT unë kam hyrë 18 vjeç dhe është i vetmi spital ku bëhet shkencë. Aty nuk bëhet korrupsion, në asnjë formë. Nuk po them që rroga ime është maksimale, por absolutisht nuk mund të blesh një fustan me ato lekët e vdekjes“, deklaroi mjekja.

Në një ditë, thotë Cili, në një klinikë në kat, në një godinë me gjashtë kate, mund të qarkullojnë të paktën 60 pacientë, që janë absolutisht me maska.

“Që kur u zbulua rasti zero, jemi munduar t’i mbajmë në dhoma të ndara, por sigurisht që është verë dhe hapet dera, s’mund të thyejmë atë lidhjen mes pacientëve. Ju shkoni në një supermarket, ku mund të keni 5 veta në radhë dhe nëse njëri teshtin, virusi mund të përhapet deri në 8 metra. Vendosja e maskave duhet të ishte bërë mandatore me kohë. Ne gjithë kohës kemi pasur mbrojtje, jemi të mbuluar totalisht, na duken vetëm sytë”, tha ajo./atsh