Shendetesi

Rrezet e diellit, aq të domosdoshme për rritjen e tyre mund të sjellin edhe pasoja të rrezikshme për fëmijët në raste të ekspozimit të tepërt.

Mjekët këshillojnë prindërit që të ruajnë fëmijët pasi një djegie gjatë fëmijërisë mund të bëhet shkak për shfaqjen e melanomave dhe kancerit të lëkurës gjatë rritjes.

Tjetër kujdes duhet të tregohet edhe me nishanet, dhe alergjitë. Mjekët bëjnë apel dhe për personat që vuajnë nga sëmundja e lëkurës skeroderma pigmentoza. Specialistët thonë po ashtu se, çdo 30 minuta para ekspozimit në diell duhet përsëritur aplikimi i kremit të diellit.atsh

Noti është një nga sportet më të dobishme. Konsiderohet i tillë sepse është i vetmi sport që vë në funksion të gjithë muskujt e trupit, edhe muskujt të cilët rrallë herë janë aktivë gjatë jetës së përditshme.

Noti bën të mundur tendosjen e muskujve, duke rritur fleksibilitetin dhe zgjatjen e muskujve të ndryshëm në trup. Ai ndihmon në çlirimin e energjisë negative, apo edhe çlirimin e toksinave trupore që pengojnë tendosjen muskulore.

Noti gjithashtu është i këshillueshëm sepse ndihmon dhe forcon zemrën, pasi përbën një ndër sportet më të pasura me lëvizje dhe teknikë. Ushtrimet apo aktivitetet e tjera fizike janë më specifike siç është vrapi ose çiklizmi, ndërsa noti është gjithëpërfshirës, duke bërë të mundur vënien në lëvizje të të gjithë trupit.

Nëse bëni ushtrime fizike ose vrap, pas saj këshillohet gjithmonë të bëni pak not. Kështu pas tij do të ndiheni më aktiv dhe energjik. Noti përpunon siluetën tuaj, së pari, angazhon të gjithë muskujt tuaj dhe i zgjat ato; së dyti, shpenzon shumë energji dhe së treti mobilizon rezervat yndyrore pas rreth 40 min. Një palestër e vërtetë për t’u dobësuar!

Noti rrit cilësinë e jetës, prandaj ushtroni notin tre herë në javë, me një kohëzgjatje 30 – 45 minuta. /atsh

Fëmijëve ashtu si të rriturve, dielli u sjell përfitime të rëndësishme për humorin, sistemin imunitar, kockat dhe lëkurën.

Por, ekspozimi i pakujdesshëm dhe i papërgjegjshëm mund të ketë pasoja negative të tilla si djegie nga dielli, dhe në një afat kohor më të gjatë fillimin e tumoreve, përfshirë melanomat.

Ekspertët e Institutit të Shëndetit Publik rekomandojnë që asnjëherë të mos neglizhoni të kujdeseni për lëkurën tuaj.

“Qendroni në ambiente të freskëta gjatë intervalit kohor 10:00-17:00. Përdorni syze dielli. Përdorni kapele. 

Përdorni kremin me SPF 50. Përdorni kremin mbrojtës për lëkurën e fytyrës. Konsumoni sa më shumë ujë. Vishni veshje të lehta. Qendroni në hije”, -rekomandojnë ekspertët.

Zbulohen arsyet pse femrat janë më në rrezik për t’u prekur nga sëmundja e Alzheimerit.

”Arsyeja qëndron në lidhjen më të madhe të disa zonave të trurit të tyre, ku formohet proteina tau, përgjegjëse për grumbullimin e të ashtuquajtura ”pllaka” si edhe në disa gjene të veçanta”, sipas dy studime të ndryshme të paraqitura në Konferencën Ndërkombëtare të shoqatës ”Alzheimer” në Los Anxheles.

”Deri tani është menduar gjithmonë se shkaku i prirjes më të madhe femërore për t’u sëmurur me Alzheimer ishte në jetëgjatësinë e tyre më të madhe. Por, këto studime të reja duket se tregojnë se ky nuk është rasti’’, theksuan studiuesit.

Studiuesit kanë analizuar qindra rezonanca magnetike të burrave dhe grave dhe shpërndarjen e proteinës tau që së bashku me proteinat amiloide mund të formojnë përzierje toksike, që shkaktojnë vdekjen e qelizave të trurit duke shkaktuar probleme në memorie.

Studiuesit kanë zbuluar se ka dallime mes meshkujve dhe femrave në mënyrën se si proteina tau përhapet në tru.

Në fakt, gratë kanë lidhje më të mirë në mes të zonave të trurit ku formohet proteina tau, gjë që i bën ato më të rrezikuara për një përhapje më të shpejtë të proteinës dhe, për rrjedhojë, të prekjes nga kjo sëmundje.//atsh

Ekspozimi i tepruar ndaj rrezeve ultravjollcë të diellit jep dëmtime të menjëhershme në lëkurë si djegie, skuqje, dhe dëmtime të mëvonshme siç është zhvillimi i kancerit të lëkurës në moshë të rritur.

Ekspertët e Institutit të Shëndetit Publik rekomandojnë të qendroni në hije gjatë një orari të caktuar, në mënyrë që të mund të shmangen probleme të ndryshme shëndetësore.

“Qendroni në hije, shmangni ekspozimin e drejtpërdrejtë ndaj rrezeve të diellit gjatë orëve 10:00-17:00. Gjatë këtij intervali qendroni në vende të freskëta”, -thonë ekspertët e ISHP-së. Siguria nga dielli mbron lëkurën nga kanceri.

Ndërkaq, temperaturat më të larta të kësaj javë të korrikut do të kulmojë ditën e mërkurë, më 24 korrik./atsh

A e dini se sipas një studimi të fundit vajzat që vendosin tualet në plazh janë më të mbrojtura se të tjerat? Ekspertët thonë se tanimë makeup-i në plazh ju mbron lëkurën më shumë vetëm nëse ndiqni këto këshilla:

-Gjëja më e rëndësishme është të hidratoni lëkurën me bazë produktesh me një teksturë të lehtë. Kremi pudër duhet të jetë një produkt i studiuar për plazh, me mbrojtje të lartë, ti rezistojë nxehtësisë dhe diellit. Shmangini produktet shumë të yndryshme, më të mirë janë ata që aplikohen më lehtë. Mos përdorni produkte pluhur.

-Produktet kozmetike që përdorni për sytë duhet të jenë cilësore dhe kundër ujit. Kujdes me rimelin, duhet të jetë rezistent ndaj ujit dhe shmangni përdorimin e lapsit pasi nuk është rezistent ndaj ujit. Pra fokusohuni tek një efekt natyral me nuanca kremoze.

-Kur është fjala për buzët mendojmë se janë më pak të rëndësishmet. Por buzët janë një pikë delikate që thahen lehtësisht. Këshillohet të zgjidhni një shkëlqyes hidratues me një faktor të mirë mbrojtës. Nëse nuk hiqni dot dorë nga përdorimi i buzëkuqëve zgjidhni një që të ketë nuanca të lehta dhe të ketë faktor mbrojtës. /atsh