Shendetesi

Ministrja e Shëndetësisë dhe Mbrojtjes Sociale, Ogerta Manastirliu ka vizituar binjakët e ardhur në jetë pak minuta pas tërmetit të datës 26 nëntor në maternitetin “Koço Gliozheni” në Tiranë.

“Bekimi dhe Armandi kanë ardhur vërtet si një bekim për familjen Metushi në Tiranë, vetëm pak minuta pas tërmetit të fuqishëm që tronditi vendin mëngjesin e 26 nëntorit. I vizitova me kënaqësi në maternitetin “Koço Gliozheni”, ku çdo ditë po bëhen më mirë dhe tashmë janë gati për t’u kthyer në shtëpi”, u shpreh ministrja Manastirliu.

Binjakët Bekim dhe Armand Metushi janë pritur nga doktoreshë Anika Dokle dhe stafi i maternitetit “Koço Gliozheni”. Aktualisht të dy bebet gëzojnë shëndet të plotë dhe ndodhen nën kujdesin e mjekëve.

Ministrja Manastirliu falenderoi ekipin shëndetësore të maternitetit për punën dhe sakrificën e bërë për nënat dhe të porsalindurit, në ato momente të vështira.

“Shumë faleminderit dr. Anika Dokle, dr. Florjan Llabani, dr. Ervis Vata, dr. Evelina Kreka, dr. Nordjan Xhindi dhe të gjithë stafit mjekë, infermierë, mami, që i kanë qëndruar pranë bebeve dhe nënave në ato momente të vështira”, tha ministrja./atsh

Kryeministri Edi Rama, gjatë prezantimit të Paketës Speciale AntiKÇK, iu është përgjigjur edhe pyetjeve të qytetarëve të cilët e kanë ndjekur prezantimin e kësaj platforme përmes rrjeteve sociale. Duke folur mbi shqetësimin e një qytetari i cili ankohet për gjendjen e Shëndetësisë Rama tha se pavarësisht perceptimit përgjithësisht të atyre njerëzve që sipas tij nuk e kanë prekur vetë këtë shërbim, shëndetësia sot nuk krahasohet me atë të vitit 2013.

“Kjo është një tjetër qasje që shpreh një frustrim që nuk është në një kategori të ngushtë, por në një kategori të gjerë njerëzish dhe që lidhet jo me atë që ishte, por me pritshmëritë. Ushqehet çdo ditë me toksina dhe helmohet çdo ditë me lajmin e keq, me gënjeshtrën me shpifjen me manipulimin. Mbetemi në një pozicion të vështirë në raport me të vërtetën dhe faktet, sepse sot në Shqipëri bëhen 60 mijë operacione kirurgjikale, në total, duke përfshirë dhe mikrokirurgjinë shkojnë në 95 mijë ndërhyrje në vit. Por, një dështim këtu, një skandal atje krijojnë një atmosferë ku është vërtet e vështirë që njeriu i zakonshëm që e ndjek jetën nga kanali i televizionit, apo kanalet e tjera të komunikimit të racionalizojë këtë raport. Ama, opinioni lidhur me mjekësinë sot mbetet një opinion i krijuar nga shumica e atyre që nuk marrin shërbim. Ndërkohë që, opinioni i atyre që marrin shërbim është shumë herë më pozitiv, pasi e kanë prekur vetë këtë eksperiencë,” tha Kryeministri Rama.

Ai tha se korrupsioni në shëndetësi është reduktuar. “Është e pavërtetë që kur shkon te mjeku duhet të japësh lekë. Nëse në trupën e bluzave të bardha ka të tillë që e njollosin atë me sjellje korruptive, e vërteta tjetër është se këta janë pakicë. E them këtë me bindje pasi e ndjek këtë çdo ditë dhe falë përkushtimit të ministres si dhe falë njohjes së të gjithë problematikës që ajo ka është e qartë, natyrisht që përsëri jemi në udhëkryq. Por raporti me të shkuarën, kur njerëzit vareshin nëpër kangjella dhe ulërinin me receta në dorë se nuk kishte ilaçe ka ndryshuar. Duke parë përmirësimin njerëzit kuptojnë që u bëka dhe kjo, atëherë pse nuk bëhet edhe ajo,” deklaroi Kryeministri i vendit. /atsh

Buxheti i vitit 2020 në sektorin e ministrisë së Shëndetësisë mbështet tre politika të reja të rëndësishme.

Ministrja e Shëndetësisë dhe Mbrojtjes Sociale, Ogerta Manastirliu thotë se buxheti për vitin e ardhshëm do të mbështesë Programin Kombëtar të Kancerit të Gjirit, Transplantin e palcës së kockës si dhe shërbimin e kardiokirurgjisë në spitalin “Shefqet Ndroqi.

“Buxheti i vitit 2020 financon qëndrueshmërinë e programeve drejt mbulimit shëndetësor universal dhe mbështet politikat e reja në shëndetësi. Program kombëtar për depistimin e kancerit të gjirit, ngritja e shërbimit të dytë të kardiokirurgjisë në vend si dhe transplantin e palcës së kockave”, -thotë ministrja./atsh

Kilogramët e tepërt mund të ndikojnë te kujtesa, të paktën te gratë, sipas një studimi të kryer nga ekspertë të departamentit të psikologjisë të Universitetit të Kalifornisë.

Studimi i botuar në revistën ”Eating Beh Behaviour”, që përfshiu 4 769 individë të moshës deri në 29 vjeç, tregoi se gratë obeze kanë më pak memorie si për shembull për të kujtuar një llogari për të paguar, një numër telefoni ose një takim të programuar.

Studime të tjera kanë zbuluar se kilogramët shtesë shoqërohen me probleme të sferës njohëse, pra në përgjithësi me aftësitë mendore të një individi dhe mbipesha shoqërohet me një përkeqësim të dukshëm të kësaj kujtese vetëm te gratë./atsh