Shendetesi

130 mjekë specialistë u punësuan në spitalet rajonale gjatë vitit të fundit, ndërsa 70 mjekë të tjerë përfundojnë specializimin në dhjetor. Ata do të punësohen në spitalet rajonale vitin e ardhshëm.

Shifrat e bëra publike në “Pasqyrën e Qeverisjes” të kësaj jave flasin për punën e një viti, ku spitalet rajonale përveç investimeve në infrastrukturë dhe në pajisje të fjalës së fundit, kanë njohur edhe pasurimin me burime njerëzore.

Kështu, brenda një viti janë punësuar 130 mjekë specialistë, ndërsa 70 të tjerë do të bashkohen me ekipet mjekësore gjatë vitit të ardhshëm. /atsh

Foshnja që lindi vetëm 690 gramë në maternitetin “Koço Gliozheni”në kryeqytet, tashmë është gati që së bashku me nënën e tij të kthehet në shtëpi për të pritur Krishtlindjet e para.

Lajmin e dha ministrja e Shëndetësisë, Ogerta Manastirliu e cila tha se këto do të jenë festa të paharrueshme për këtë familje.

“E pamendueshme se si Amarisi që në ditët e para të jetës ishte vetëm 690 gramë, pas 115 ditësh në terapi intensive, nën kujdesin shembullor të mjekëve dhe infermierëve të maternitetit “Koço Gliozheni” sot është në krahët e mami Pranverës dhe janë gati të kthehen në shtëpi për Krishtlindjet e para”, tha Manastirliu.

“Festa të paharrueshme do të jenë dhe për Seanën dhe mamin e saj, që do të lënë spitalin pas 70 ditësh në terapi intensive”, tha ministrja Manastirliu. /atsh

Për herë të parë në spitalin rajonal të Korçës u realizua një intervent i ndërlikuar nëpërmjet endoskopisë së hundës.

Lajmi është bërë i ditur nga ministrja e Shëndetësisë dhe Mbrojtjes Sociale, Ogerta Manastirliu e cila thotë ky është një hap përpara drejt shëndetësisë që duam.

“Mjekët e shërbimit ORL, doktor, Tedi Minarolli dhe doktor Alfred Robo po mundësojnë ndërhyrje me metoda të avancuara në këtë spital rajonal, duke siguruar shërbime me standard të lartë, afër vendbanimit për qytetarët”, -thotë Manastirliu.

Endoskopia e hundës është një procedurë me të cilën është e mundur që të ekzaminohen me saktësi sipërfaqet e brendshme të zgavrës së hundës. Endoskopia është metodë moderne që aplikohet në kirurgji. z.tosku/atsh

Alumini i pranishëm në tabakatë metalike dhe fletët e letrës që përdoren për ruajtjen dhe gatimin e ushqimit mund ”të migrojnë” në ushqim dhe të çojnë në tejkalimin e dozës së vendosur maksimale, me rrezik potencial shëndetësor për pjesë të cënueshme të popullatës, në veçanti për bebet dhe gratë shtatzëna, deklaroi Komiteti Kombëtar italian për Sigurinë e Ushqimit (CNSA).

Rruga kryesore e ekspozimit ndaj aluminit për popullatën e përgjithshme mbetet ushqimi.

Në vitin 2008, Autoriteti Europian për Sigurinë e Ushqimit (EFSA) përcaktoi një dozë të tolerueshme javore prej 20 miligramësh për një fëmijë me peshë 20 kilogramë dhe 70 miligramësh për një të rritur prej 70 kilogramë.

Të dhënat që vijnë nga studimet e kryera tregojnë një mundësi të konsiderueshme për të kapërcyer këtë dozë tek fëmijët dhe të rinjtë pasi ato janë më të ekspozuar ndaj aluminit që përmbahet në ushqim, ndërsa grupmoshat më të larta janë më pak të ekspozuara si ndaj zakoneve të ndryshme të ngrënies ashtu edhe ndaj raportit më të ulët të konsumit të ushqimit me peshën trupore./atsh

Më shumë se 460 mijë qytetarë kanë kryer Kontrollin Mjekësor Bazë falas.

Ministrja e Shëndetësisë dhe Mbrojtjes Sociale, Ogerta Manastirliu bëri të ditur se nga 1 janari janë 462,168 qytetarë kanë kryer kontrollin mjekësorë falas.

Kontrolli Mjekësor Bazë i shërben 1.2 milionë shqiptarëve të grupmoshës 35-70 vjeç të cilët e përfitojnë falas./atsh

Premton të bëhet një armë në të ardhmen për të luftuar sëmundjet e shkaktuara nga degjenerimi i qelizave nervore, siç është Alzheimer.

”Neuroni i parë artificial i silikonit i përgjigjet sinjaleve nga sistemi nervor dhe shënon një hap përpara drejt mundësisë së riparimit të qarqeve nervore dhe rivendosjes së funksioneve të humbura”, është rezultat i studimit të koordinuar nga Alain Nogareti, i universitetit britanik të Bathit, universiteti zviceran i Zyrihut dhe universiteti i Zelandës së Re në Auckland.

Të vëzhguara për disa kohë, neuronet e para të silikonit janë një shembull i të ashtuquajturit ilaç bioelektronik, i cili me materiale artificiale imiton qarqet natyrore dhe proceset.

“Dizenjimi i pajisjeve të tilla ishte një sfidë e vërtetë. Deri më tani neuronet kanë qenë ‘kuti të zeza’, por tani ne e dimë se si të shohim brenda tyre. Puna jonë ndryshon një paradigmë sepse ofron një teknikë për të riprodhuar në detaje funksionet elektrike të neuroneve”, theksuan studiuesit./atsh