Shendetesi

Një spital ultramodern për kirurgjinë/ Pas 90 vitesh në QSUT, kirurgjia shqiptare ka një tempull të ri

Pas 90 vitesh në godinën e vjetër në QSUT, kirurgjia shqiptare ka një tempull të ri, ku gjithçka është fjala e fundit e teknologjisë dhe po ashtu organizimi në funksion të pacientit është në nivelin më të lartë bashkëkohor”, – deklaroi sot Kryeministri Edi Rama në përurimin e spitalit të kirurgjisë në QSUT.

Rama tha se “tashmë kemi një spital ultramodern për kirurgjinë”. “Spitali i ri “Frederik Shiroka” çon në një tjetër nivel shërbimet mjekësore në Shqipëri. 7 salla moderne operacioni për kirurgjinë e përgjithshme, kirurgjinë speciale dhe urologjinë. Aparatura mjekësore të teknologjisë së fundit. Njësi terapie intensive me pajisje bashkëkohore dhe kushte optimale. Laborator i nivelit të lartë teknologjik dhe 120 shtretër dhe dhoma me kushte si në spitalet më të mira të Europës për pacientët”, – tha Kryeministri.

Kryeministri tha se “nuk e ekzagjeroj kur them se ky spital është vepra më e madhe e 90 viteve në Shqipëri në shëndetësinë e vendit, për nga cilësia dhe thellësia e projektit dhe kapacitetet teknologjike që vendos në dispozicion të mjekëve dhe të ekipeve mjekësore”.

“Ndjehem shumë i nderuar dhe njëkohësisht nuk ka kompliment më inkurajues sesa fjalët e profesorit që ka shoqëruar një periudhë të rëndësishme të historisë së kirurgjisë shqiptare dhe fjalia e tij se, kjo është një ëndërr e bërë realitet”, – tha Rama.

Kryeministri u shpreh se “nuk mbaron këtu, sepse ëndrra ime që në momentin e parë ishte që QSUT të transformohet në gjithë perimetrin e saj, në një shëmbëlltyrë të ambicies sonë për shëndetësinë në Shqipëri”.

“Sot, spitali i kirurgjisë ka përfunduar, por QSUT është një kantier. Mjafton rruga për të hyrë deri këtu me shumë njerëz nëpër këmbë, gjë që nuk ndodh në spitalet e tjera. Është nevoja e një vazhdimësie në punën transformuese, si për sa i përket infrastrukturës së brendshme, edhe në hapësirën rreth e rrotull”, – tha Rama.

“Ndaj, jo vetëm puna në vazhdim në spitalin e Sëmundjeve të Brendshme, model i shkëlqyer transformimi, apo me pediatrinë që po ndërtohet nga ana tjetër, por edhe puna me gjithë pjesën e jashtme për të pasur më në fund një parkim, që do të grumbullojë të gjitha mjetet në hyrje dhe do ta kthejë hapësirën brenda perimetrit të QSUT-së një hapësirë ku lëvizin vetëm autoambulancat, është domosdoshmëri”, – tha Rama./atsh

Një spital ultramodern për kirurgjinë/ Pas 90 vitesh në QSUT, kirurgjia shqiptare ka një tempull të ri Read More »

Spitali i ri i Kirurgjisë në QSUT, mjeku reanimator Lilaj: Kushte moderne dhe shërbim që konkurron edhe privatin

Mjeku pranë Qendrës Spitalore Universitare në Tiranë, Krenar Lilaj tha se spitali i ri i Kirurgjisë është me kushte moderne dhe konkurron edhe privatin.

“Spitali i Kirurgjisë trajton me mijëra pacientë çdo ditë. Vetëm për ndërhyrjet kirurgjikale janë 900 pacientë në vit, pa përfshirë këtu 23 mijë që i nënshtrohen ndërhyrjeve mikrokirurgjikale dhe pa përfshirë këtu numrin e pacientëve që konsultohen dhe nuk i nënshtrohen ndërhyrjeve kirurgjikale. Kështu, është një gamë e madhe e të sëmurëve të cilët kërkojnë ndihmën e tyre në spitalin e Kirurgjisë”,- tha ai.

Në vijim, Lilaj tha se “nga ana tjetër spitali Kirurgjikal nr.2 është spitali ku pacientët i nënshtrohen kirurgjisë së specializuar abdominale në të gjithë Shqipërinë. Të gjithë ndërhyrjet e specializuara të kirurgjisë abdominale të cilat janë të pamundura të realizohen në kirurgjitë rajonale realizohen në spitalin Nr. 2. Kishte ardhur koha që të mbyllej ky hendek i madh midis cilësisë së punës që kryente stafi mjekësor, mjekë dhe infermierë dhe kushteve në spital. Kishte ardhur koha për kushte më të mira. Është një mundësi e madhe për t’u ardhur në ndihmë të sëmurëve”.

Ai tha se në spitalin e ri po inaugurohen njësi të reja që në spitalin e vjetër nuk kanë qenë. “Do instalohet njësia e reanimacionit kirurgjikal. Është një njësi e re moderne e pajisur me aparatura dhe mjete moderne dhe sigurisht aty kërkohet një staf i ri për mbarëvajtjen e punës. Masat janë marrë, janë rekrutuar mjekë dhe shërbimi do të jetë 24 orë. Është një ambient me kushte shumë të mira, pacientët do ta shohin vetë, kushtet janë bashkëkohore dhe mjetet e ambientet që na mungonin, i kemi”.

Në lidhje me besimin e qytetarëve të Shëndetësia, Lila tha se vetë njerëzit vendosin se ku do ta marrin shërbimin.

“Me kushtet e reja në spitalin e Kirurgjisë dhe të shërbimit tonë, besoj se konkurrojmë shumë privatin, lidhur me cilësinë e shërbimit,” tha ai.

Në lidhje me bashkëpunimin me njësitë spitalore, Lilaj tha se do të vazhdojë dhe trajtimi i të gjitha rasteve që vijnë nga rrethet. Që nga dita e hënë kemi filluar punë në 5 sallat e operacionit dhe e kemi ndierë veten ndryshe. Puna zhvillohet në kushte të reja, shumë të mira dhe shpresojmë që të rrisim dhe kapacitetin”.

Paraditen e sotme, kryeministri Rama dhe ministrja e Shëndetësisë dhe Mbrojtjes Sociale, Ogerta Manastirliu inauguruan spitalin e ri të Kirurgjisë, i cili është ringritur pas 90 vitesh në godinën e vjetër në Qendrën Spitalore Universitare në Tiranë. /atsh

Spitali i ri i Kirurgjisë në QSUT, mjeku reanimator Lilaj: Kushte moderne dhe shërbim që konkurron edhe privatin Read More »

Përfitojnë 62 mijë pacientë në vit/ Hapet të hënën spitali i ri në QSUT, Manastirliu: Nis epoka e re e Kirurgjisë shqiptare

Ministrja e Shëndetësisë dhe Mbrojtjes Sociale, Ogerta Manastirliu ka vizituar sot spitalin e ri kirurgjikal në QSUT, ku theksoi se “pas 90 vitesh, bëhemi gati të hapim një epokë të re për kirurgjinë shqiptare”.

“Ia arritëm ditës së madhe”, – tha Manastirliu, e shoqëruar nga mjekë e infermierë që përgatiten për ceremoninë zyrtare të hapjes së këtij spitali. “Po, kjo është epoka e re për Kirurgjinë. Jam e emocionuar. Ia arritëm kësaj dite dhe mendoj si ndihen mjekët dhe infermierët. Këtu ka ndryshuar çdo gjë, aty është zanafilla (duke iu referuar spitalit të vjetër), por këtu është fillimi i ri”.

“Tani duhet të ndryshojmë ritmin e punës, duhet performanca… planifikimi online për ndërhyrjet operatore është sfida… Të hënën do jetë ditë historike, dita e inaugurimit zyrtar. 90 vjet kishte kirurgjia e vjetër dhe kur mendojë sa breza kanë kaluar e kuptoj nostalgjinë”, – tha Manastirliu.

Mjekët u shprehën të lumtur për investimin e bërë. “Ende nuk arrijmë ta besojmë, nuk na iket në shtëpi”, – u shpreh një mjeke. “Nuk dimë si të gëzohemi”, – tha një tjetër. “Ne jemi të lumtur se më në fund marrim frymë”, – tha mjeku tjetër.

Spitali i ri i Kirurgjisë në QSUT është një investim me vlerë 8.8 milionë euro, ku do të përqendrohet i gjithë shërbimi i kirurgjisë, përfshirë edhe urgjencën. Nga ky investim përfitojnë 62 mijë pacientë në vit. Në sajë të këtij investimi, sallat e operacionit të kirurgjisë në qendrën më të madhe spitalore në vend nuk do të kenë dallim nga spitalet europiane, falë pajisjes me aparatura të teknologjisë së lartë që po instalohen në QSUT.

Spitali i ri i Kirurgjisë do të ketë një kapacitet me 120 shtretër, duke bërë të mundur transferimin e të tri klinikave të kirurgjisë së përgjithshme në këtë godinë. Spitali i ri do të ketë 7 salla operacioni (Urologji, Kirurgji e Përgjithshme, Tiroidet, Toraksi, Kirurgji Abdominale, me një kullë laparoskopie secila), njëra prej të cilave krejtësisht digjitale, që u shërben edhe studentëve të Mjekësisë për të ndjekur nga afër ndërhyrjet operatore në praktikën e tyre klinike. Spitali i ri ka edhe 2 salla leksioni kushtuar studentëve të Mjekësisë ku do të zhvillohen praktikat mjekësore, si dhe edukimi në vazhdim.

Qeveria shqiptare po investon rreth 30 milionë euro për modernizimin e QSUT-së me ndërtimin e Spitalit të Ri të Kirurgjisë, Spitalit të Ri të Sëmundjeve të Brendshme dhe Pediatrisë. Nga këto investime përfitojnë 300 mijë pacientë, rreth 5000 punonjës staf mjekësor dhe jomjekësor, si dhe rreth 1000 studentë të Mjekësisë. /atsh

https://www.facebook.com/OgertaManastirliu/videos/499834330644924/?t=0

Përfitojnë 62 mijë pacientë në vit/ Hapet të hënën spitali i ri në QSUT, Manastirliu: Nis epoka e re e Kirurgjisë shqiptare Read More »

Mamografia e lëvizshme, 44 depistime në qendrën shëndetësore Kotë në një javë

Pamundësia ekonomike dhe gjeografike ka bërë që shumë gra të mos ekzaminohen për kancerin e gjirit.

Ministria e Shëndetësisë dhe Mbrojtjes Sociale ka menduar edhe për këto kategori.
Falë mamografisë lëvizëse arritën të depistohen 44 gra të qendrës shëndetësore Kotë, vetëm në javën e parë të instalimit të saj pranë qendrës shëndetësore.

Tumori i gjirit është i trajtueshëm nëse kapet në kohë.

Njësia vendore e kujdesit shëndetësor në Vlorë ka bërë apel për të mos neglizhuar kujdesin ndaj shëndetit. “Përqafoje jetën, sepse të parandalosh është më mirë sesa të kurosh”, -thonë specialistët e njësisë vendore të kujdesit shëndetësor në Vlorë./atsh

Mamografia e lëvizshme, 44 depistime në qendrën shëndetësore Kotë në një javë Read More »

Nuk ka vend për panik,ISHP: Vetëm një rast nga infeksioni i meningjitit, nuk ka epidemi

Shefja e Departamentit të Sëmundjeve Infektive në ISHP, Silva Bino deklaroi sot se nuk kemi asnjë situatë epidemike në lidhje me meningjitin ose meningokoksemisë në Shqipëri.

Në një prononcim për mediet, e pyetur lidhur edhe me rastin më të fundit ku një person humbi jetën si pasojë e meningjitit dhe me shqetësimet e krijuara për qytetarët, Bino tha se deri më tani vetëm ky rast ka rezultuar të jetë me meningjit ndërsa rastet e tjera nuk kanë të bëjnë me këtë sëmundje.

Bino theksoi se qytetarët nuk duhet të shqetësohen pasi situata është nën kontroll, duke theksuar se ndryshe nga vitet e kaluara, këtë vit ka më pak raste personash të prekura nga gripi.

“Raste të infektuara nga meningjiti kemi çdo vit por nuk kemi epidemi. Nuk ka asnjë vend për panik dhe shqetësim pasi nuk kemi epidemi. Infeksioni nga menigokoku është një infeksion i rëndë fatal që evoluon shumë shpejt. Kjo është arsyeja që ai person të ketë pësuar një fat të keq pavarësisht mjekimit. Janë marrë masa të caktuara. Nuk ka rrezik pasi të gjithë personat e kontaktit me këtë person kanë marrë antibiotikë”, tha Silva Bino.

Ndërsa për rastin në Durrës, ku një grua rreth 33 vjeçe, humbi jetën ditën e djeshme si pasojë e problemeve shëndetësore Bino deklaroi se “për këtë rast mostrat kanë ardhur në ISHP dhe po analizohen nuk ka patur shenja për këtë sëmundje. Ndërkohë ne kemi vetëm një rast me meningjit. Nuk kemi të bëjmë me situatë epidemike. Personat që kanë pasur kontakt me të kanë marrë kurën përkatëse. Të gjitha rastet janë testuar për gripin dhe kanë rezultuar negative. Situata po monitorohet”, tha Bino.

Ndërkohë si këshill për të prekurit nga sëmundjet sezonale, Bino u shpreh se të gjithë këta persona nuk duhet të neglizhojnë.

“Këshilla për qytetarët është që duhet të besojnë se Instituti po monitoron situatën në vend. Jemi në një sezon normal të gripit, kemi intensitet të ulët të gripit. Kemi qarkullim të viruseve të gripit por është e rëndësishme të dihet për ata që kanë probleme të mos neglizhojnë”, apeloi Bino./atsh

Nuk ka vend për panik,ISHP: Vetëm një rast nga infeksioni i meningjitit, nuk ka epidemi Read More »

Si të ruheni nga gripi për të parandaluar komplikimet

Për shumicën e njerëzve gripi është një sëmundje kalimtare, por në disa raste, shkakton ndërlikime të rënda dhe deri në vdekje, ndaj duhet të bëni kujdes.

Ministria e Shëndetësisë dhe Mbrojtjes Sociale ka bërë apel për kujdes në këto ditë të temperaturave të ulëta ku mundësia e prekjes nga gripi është e madhe.

“Gripi transmetohet nga njeriu tek njeriu me spërkla gjatë teshtimave, kollitjes apo gjatë bisedimit. Në raste më të rralla, një individ mund të infektohet duke prekur objekte të ndotura me virusin e gripit dhe më pas ai i kalon në gojën apo në hundën e tij me duart e infektuara”, – thotë MSHMS.

Më tej, ministria ndan disa këshilla që duhet marrë në konsideratë për t’u mbrojtur nga gripi. “Kollituni ose teshtini duke përdorur parakrahun ose krahun. Mbani masë mbrojtëse. Lani rregullisht duart. Përdorni shami me një përdorim kur teshtini ose kolliteni”, -rekomandon Ministria e Shëndetësisë. /atsh

Si të ruheni nga gripi për të parandaluar komplikimet Read More »

Sezoni i gripit/ ISHP: Aktualisht qarkullon virusi A/H1, situata normale

Sipas Institutit të Shëndetit Publik është evidentuar qarkullimi i gripit në vendin tonë. Aktualisht qarkullon virusi A/H1 i cili gjithashtu qarkullon në gjithë shtetet e Europës dhe të rajonit.

Ekspertët e Institutit të Shëndetit Publik këshillojnë që qytetarët të bëjnë kujdes ndaj të ftohtit dhe të informohen mbi këshillat ndaj gripit në faqet zyrtare të MSHMS dhe ISHP.

Si të veproni për të parandaluar dhe mbrojtur veten edhe të afërmit tuaj nga gripi?

– Lani duart

– Pastroni hundët me shami njëpërdorimshme;

– Mbuloni hundën dhe gojën kur kolliteni ose teshtini;

– Evitoni ambientet e mbipopulluara dhe me shumë njerëz;

– Ruani një temperaturë të qëndrueshme brenda banesave tuaja;

– Ajrosni vazhdimisht ambientet ku rrini.

Kur jeni të sëmurë:

– Qëndroni në shtëpi, kufizoni daljen në ambiente të ftohta;

– Konsumoni ushqime të ngrohta;

– Pini sa më shumë lëngje;

– Kufizoni kontaktet direkte dhe indirekte (nëpërmjet objekteve);

– Mos e nënvlerësoni gripin. Sa herë nuk ndjeheni mirë, konsultohuni me mjekun.

Janë rreth 11 mijë raste në javë me infeksione respiratore. Sipas ekspertëve të ISHP situata është normale, e zakonshme dhe e pritshme për stinën. /atsh

Sezoni i gripit/ ISHP: Aktualisht qarkullon virusi A/H1, situata normale Read More »

25-vjeçarja nga Tirana, ia del të shpëtojë, pas 3 ndërhyrjesh kirurgjikale të vështira në mëlçi

Pas 30 ditësh të vështira në terapi intensive Arjola 25 vjeçare nga Tirana, ia ka dalë për mrekulli të shpëtojë, pas 3 ndërhyrjesh kirurgjikale të vështira në mëlçi.

Lajmin e ka dhënë Ministrja e Shëndetësisë dhe Mbrojtjes Sociale, Ogerta Manastirliu, e cila ka vlerësuar punën e shkëlqyer të mjekëve të klinikës 3 të Kirurgjisë prof. Arben Gjata, dr. Endri Shehu, dr. David Bellalla dhe dr. Anesti Caka.

Ministrja Manastirliu thekson se, pas 30 ditësh të vështira në terapi intensive mes momenteve shumë delikate dhe shpresës për mbijetesë, 25 vjeçarja nga Tirana ja ka dalë për mrekulli të shpëtojë, pas 3 ndërhyrjesh kirurgjikale të vështira në mëlçi”.

“Punë e shkëlqyer e ekipit të mjekëve të klinikës 3 të #Kirurgjisë prof. Arben Gjata, dr. Endri Shehu, dr. David Bellalla dhe dr. Anesti Caka”, shton Manastirliu.

“Shërim të shpejtë Arjola. Krenare për mjekët”, thekson ministrja e Shëndetësisë dhe Mbrojtjes Sociale, Ogerta Manastirliu./atsh

25-vjeçarja nga Tirana, ia del të shpëtojë, pas 3 ndërhyrjesh kirurgjikale të vështira në mëlçi Read More »