Shendetesi

Programi i depistimit, 14 mijë gra kryen falas testin HPV

Programi kombëtar i depistimit të kancerit të qafës së mitrës në Shqipëri i ofruar për herë të parë falas në vitin 2019 i ka mundësuar kryerjen e testit HPV 14 mijë grave të grupmoshës 40-49 vjeç.

“Në vitin 2019 nisëm për herë programin kombëtar të parandalimit të kancerit të qafës së mitrës falas nga i cili përfituan 14 mijë gra të grupmoshës 40-49 vjeç”, shprehet ministrja e Shëndetësisë dhe Mbrojtjes Sociale Ogerta Manastirliu.

“‪Prej tyre, 750 gra rezultuan të prekura nga HPV dhe u referuan për ekzaminime të mëtejshme tek mjeku specialist”, tha ministrja.

Ajo gjithashtu i bën apel të gjitha grave të ekzaminohen falas pranë qendrave të tyre shëndetësore.

“Ekzaminohu falas pranë qendrës tënde shëndetësore”, shprehet Manastirliu.

Ky program kombëtar ka për qëllim identifikimin e hershëm dhe parandalimin e kancerit të qafës së mitrës. Testimi me HPV kryhet i koordinuar nga Ministria e Shëndetësisë nëpërmjet Institutit të Shëndetit Publik dhe ofrohet falas për gratë e grupmoshës 40-49 vjeç, që është edhe grupmosha më e prekur nga kanceri i qafës së mitrës./atsh

Programi i depistimit, 14 mijë gra kryen falas testin HPV Read More »

Ndërhyrja e rrallë në Spitalin e Traumës shpëton nga paraliza 21-vjeçaren

Një ndërhyrje e rrallë dhe e suksesshme ka shpëtuar nga paraliza Arlindën, 21-vjeçaren nga Durrësi.

Ministrja e Shëndetësisë dhe Mbrojtjes Sociale, Ogerta Manastirliu, ka theksuar se Arlinda zgjodhi ta kryejë ndërhyrjen në Shqipëri, pavarësisht për shkak të vështirësive, mungesës së prindërve dhe ndërhyrjes tepër delikate.

Ministrja Manastirliu thekson gjithashtu se, 21-vjeçares i ofruam edhe mundësinë për të kryer operacionin në Turqi.

Manastirliu ka vlerësuar punën e shkëlqyer të ekipit mjekësor të spitalit Universitar të Traumës, dr. Fatos Olldashi, dr. Irgen Hodaj, dr. Eriketa Jaho, dr. Esma Gashi dhe infermierët Sokol Xhafa, Flutura Balla dhe Elsa Agalliu, të cilët kryen vertebrectominë anteriore, një ndërhyrje të vështirësisë së lartë, e cila rezultoi e suksesshme për 21- vjeçaren nga Durrësi.

“Një ndërhyrje e rrallë dhe e suksesshme ka shpëtuar nga paraliza Arlindën, 21-vjeçaren nga Durrësi, e cila ka zgjedhur të kryejë ndërhyrjen në Shqipëri, pavarësisht se për shkak të vështirësive, mungesës së prindërve dhe ndërhyrjes tepër delikate, 21-vjeçares i ofruam mundësinë për të kryer operacionin në Turqi.

Punë e shkëlqyer e ekipit mjekësor të spitalit Universitar të Traumës, dr. Fatos Olldashi, dr. Irgen Hodaj, dr. Eriketa Jaho, dr. Esma Gashi dhe infermierët Sokol Xhafa, Flutura Balla dhe Elsa Agalliu që kryen vertebrectominë anteriore, një ndërhyrje të vështirësisë së lartë, e cila rezultoi e suksesshme për 21-vjeçaren nga Durrësi.

Shërim të shpejtë Arlinda”, ka theksuar Manastirliu./atsh

Ndërhyrja e rrallë në Spitalin e Traumës shpëton nga paraliza 21-vjeçaren Read More »

Si ta mënjanoj aciditetin në stomak?

Refluksi i stomakut në ezofag është një fenomen normal, pasi në një kohë të shkurtër, normalisht, materiali refluks kthehet në stomak.

”Nga ana tjetër, kur ky refluks përbën problem për pacientin, atëherë ai konsiderohet patologjik”, shkruhet në gazetën italiane ”Il Giornale”.

Ja disa nga masat për mënjanimin e aciditetit në stomak:

Lënia e duhanit
Stërvitje e rregullt fizike
Rënie nga pesha
Mos u shtrini menjëherë pas ngrënies
Shmangni ushqimet e largëta në kohë
Hani ngadalë
Dietë e ekuilibruar
Shmangia e ushqimeve të skuqura dhe salcat
Shmangia e pijeve shumë të ftohta ose shumë të nxehta./atsh

Si ta mënjanoj aciditetin në stomak? Read More »

Ulet temperatura e trupit të njeriut?

Fakti që temperatura normale e trupit të njeriut është 37 gradë Celsius ishte i vërtetë në shekullin XIX, kur u formulua, por që atëherë trupi i njeriut është ftohur, aq sa temperatura e referencës është tani gjysmë grade më i ulët, sipas studimit të universitetit të Stanfordit, i botuar në revistën ”eLife”.

Përcaktimi i vlerës 37 gradë Celsius është bërë në vitin 1851, kur mjeku gjerman, Carl Reinield August Wunderlich kishte arritur në konkluzion pas në një serie matjesh kryesisht tek ushtarët.

Studiuesit amerikanë analizuan tre grupe të të dhënave të veçanta të temperaturës së trupit, një të marrë nga veteranët e ushtrisë me matjet e bëra midis viteve 1862 dhe 1930, një që daton nga vitet 1970 dhe një midis viteve 2007 dhe 2017, pra gjithsej gati 700 000 matje në tërësi.

Meshkujt e viteve 2000 janë 0,59 gradë Celsius më të ftohtë se ata të lindur në 1800, ndërsa gratë kanë humbur 0,32 gradë.

Dallimet janë llogaritur duke marrë parasysh pajisjet më të mira në dispozicion deri tani.

“Fiziologjikisht jemi ndryshe nga sa ishim në të kaluarën, pasi ambienti në të cilin jetojmë ka ndryshuar, përfshirë temperaturën e shtëpive tona, mikroorganizmat me të cilët biem në kontakt dhe ushqimin që hamë”, theksuan autorët./atsh

Ulet temperatura e trupit të njeriut? Read More »

Kirurgët e spitalit rajonal të Durrësit, ndërhyrje për heqjen e tumorit në veshka te një 45-vjeçare

Ministrja i Shëndetësisë dhe Mbrojtjes Sociale, Ogerta Manastirliu ka vizituar sot spitalin rajonal të Durrësit që i është nënshtruar së fundmit investimeve në pavionin e kirurgjisë.

“Kirurgjia po zhvillohet me ritme të shpejta edhe në spitalet rajonale, falë investimeve në infrastrukturë dhe ekipeve tona mjekësore të kualifikuara”, tha ajo.

Po ashtu, Manastiri thekson se fal pajisjeve në pavionin e kirurgjisë po realizohen operacione të vështira.

“Kirurgët e spitalit rajonal të Durrësit, dr. Shkëlqim Ferko, dr. Denis Godaj, dr. Laurian Hoxha kanë realizuar një ndërhyrje laparaskopie të vështirësisë së lartë për heqjen e tumorit të veshkës tek një paciente 54 vjeçare”, tha ajo./atsh

Kirurgët e spitalit rajonal të Durrësit, ndërhyrje për heqjen e tumorit në veshka te një 45-vjeçare Read More »

Mjeku i njohur infeksionist Tritan Kalo qetëson qytetarët: Alarm i pabazë për meningjitin, ja arsyet

Mjeku i njohur infeksionist Tritan Kalo me anë të një shkrimi qartësues ka sqaruar qytetarët se meningjiti nuk përbën shqetësim kombëtar klinik dhe epidemiologjik në vendin tonë duke bërë thirrje për qetësi për të mos përhapur panik të panevojshëm.“
Infeksionet e shkaktuara nga N.meningitidis apo Meningokoku njihen në vendin tonë, ku midis tyre vendin kryesor e zë Meningitis bacterialis i shkaktuar nga ky bakter. Gjatë viteve 2001 – 2019 janë raportuar 133 raste (pra në 20 vitet 2001-2019 kemi 133 raste të raportuara në të gjithë vendin, ose mesatarisht 6.6 raste në vit, TK). Sa mijëra e mijëra të sëmurë trajtohen në Shqipëri me infeksione nga më të ndryshmet, Përse bëhet gjithë kjo zhurmë për diçka që nuk përbën asnjë shqetësim kombëtar klinik dhe epidemiologjik?”, shkruan mjeku i mirënjohur Tritan Kalo.
Shkrimi i plotë:

Pak vëmendje dhe durim për t’a lexuar deri në fund këtë Informacion qartësues…..Në kuadër të më të fundit PPP (Protagonizëm Panikndjellës dhe Përfues), që përfshihet edhe ajo në lëvizjen KÇK (Kap Ç’të Kapësh), pa asnjë arsye objektive, shkencore, epidemiologjike e logjike, është krijuar një panik i pajustifikueshëm, deontologjikisht i pa pranueshem dhe ligjërisht i dënueshëm, në lidhje me infeksionet e cipave të trurit nga Neisseria meningitidis, ose sikundër më shpesh ky mikroorganizëm njihet, nga MENINGOKOKU….

Ju kolegë, miq e bashkëqytetar që jo pak më keni telefonuar apo shkruar këto ditë, për t’ju sqaruar edhe më shumë po u sjell informacionin më të fundmit të ISHP-së (Institutit të Shëndetit Publik): “Infeksionet e shkaktuara nga N.meningitidis apo Meningokoku njihen në vendin tonë, ku midis tyre vendin kryesor e zë Meningitis bacterialis i shkaktuar nga ky bakter. Gjatë viteve 2001 – 2019 janë raportuar 133 raste (pra në 20 vitet 2001-2019 kemi 133 raste të raportuara në të gjithë vendin, ose mezatarisht 6.6 raste në vit, TK). Gjatë vitit 2019 janë raportuar si Meningit bakterial meningokoksik 5 raste (0.2 incidence raste/100.000 banorë), Meningite bakteriale jo meningokoksik 18 raste (0.6 incidence raste/100.000 banore) dhe si Meningite virale aseptike 7 raste (0.2 incidence, raste/100.000 banore).” (ISHP)…..sa mijëra e mijëra të sëmurë trajtohen në Shqipëri me infeksione nga më të ndryshmet, përse bëhet gjithë kjo zhurmë për diçka që nuk përbën asnjë shqetësim kombëtar klinik dhe epidemiologjik?!?!?!….

Jemi në një situatë jo pak të ngarkuar epidemiologjike me Infeksione stinore respiratore, sidomos me GRIP (AH1N1, AH3N2 dhe por aspak shqetësuese për infeksionet nga N. meningitides….

Përkujdesi për mos përhapjen e këtyre infeksioneve respiratore përfshirë edhe gripin, si infeksione që merren në mënyrë aerogene pra nga rrugët e frymëmarrjes, ndikon njëkohësisht në uljen e mundësisë së infektimit nga mikroorganizma të tjerë, që përhapen me këtë rrugë përfshirë edhe N. meningitidis…..përse gjithë kjo tollovi për vaksinim ndaj Meningokokut, kur një vaksinim i tillë nuk përfshihet në skemat e vaksinimit të detyrueshëm në asnjë vend të botës…..Për profilaksinë e përhapjes në personat e kontaktit të ngushtë me një të sëmurë të tillë, ka mundësi efektive terapeutike antibakteriale (Ciprofloxacin, Rifampicine), gjë për të cilën do të merrni këshillat e duhura dhe shumë të vyera nga mjekët trajtues të tyre, përpos vaksinimit vetëm në disa raste specifike….

Nëse shkoni në Mekë për Peligrinazh në këtë vend të shenjtë, ose për arsye pune në disa vende afrikane, informohuni sepse për shkak të incidencës së lartë, pra të numurit mjaft të lartë të Meningiteve bakterialë nga N. meningitides në këto vende (“African meningitis”), bëhet e detyrueshme vaksinimi para vajtjes atje….ju lutem më pak panik dhe më shumë arsyetim logjik …..Jeta vazhdon!!!”./atsh

Mjeku i njohur infeksionist Tritan Kalo qetëson qytetarët: Alarm i pabazë për meningjitin, ja arsyet Read More »

Investimet në shëndetësi/ Fakti është se sot shqiptarët kanë një spital kirurgjie si gjithë Europa

“Fakti është se sot shqiptarët kanë një spital kirurgjie si gjithë Europa”, deklaroi sot Kryeministri Edi Rama, duke iu referuar investimit më të fundit të qeverisë me vlerë 8.8 milionë euro në spitalin e ri kirurgjikal “Frederik Shiroka” në QSUT.

Rama tha se “kush ka sy le të shikojë”, por përtej kujtdo që nuk do të shikojë ky është fakt.

“‘Kush ka sy le të shikojë’ por përtej kujtdo që nuk do të shikojë, fakti është se sot shqiptarët kanë një spital kirurgjie si gjithë Europa”, tha Rama.

Spitali i ri kirurgjikal “Frederik Shiroka” në QSUT ka 7 salla moderne operacioni për kirurgjinë e përgjithshme, kirurgjinë speciale dhe urologjinë.

Spitali ka 120 shtretër dhe dhoma me standardet më të mira. Ai është i pajisur me aparatura mjekësore të teknologjisë së lartë, me njësi terapie intensive me kushte dhe pajisje bashkëkohore.

“Këtu është një ambient që edhe në shtëpi më mungon”, tha një pacient.

“Kushtet janë të shkëlqyeshme, dhomat janë të shkëlqyeshme, me televizor me rafte me gjithçka”, tha një tjetër.

Një tjetër pacient i shtruar u shpreh se “u bëra 60 vjeç dhe këtë ambient se kam parë ndonjëherë”.

Me laparoskopi moderne në secilën prej sallave të kirurgjisë së përgjithshme, kirurgjisë speciale dhe urologjisë, një mjek i këtij spitali u shpreh se “ky është një investim kolosal që ka bërë shteti dhe Ministria e Shëndetësisë”.

“Mjekët janë të kënaqur, pacientët po ashtu. Sallat e operacionit, pajisjet, janë të gjitha të reja. Të gjitha këto kushte të reja padiskutim që do të ndikojnë në cilësinë e shërbimit ndaj të sëmurëve”, tha mjeku.

Investimi për ndërtimin e spitalit të ri kirurgjikal kap vlerën 8.8 milionë euro. /atsh

Investimet në shëndetësi/ Fakti është se sot shqiptarët kanë një spital kirurgjie si gjithë Europa Read More »

Meningjiti/ Mjeku Harxhi: Nuk ka epidemi, as vend për panik

Mjeku Arjan Harxhi deklaroi sot se nuk ka epidemi të meningokokut në Shqipëri, nuk ka vend për panik, por ka vend për të marrë masa.

Në një intervistë televizive, mjeku Harxhi tha se “nuk ka panik në realitet, edhe vjet ka pasur raste fatale, ka vend që ekspertët, institucionet të shohin fenomene të tilla për të ndryshuar strategjinë e parandalimit, por njerëzimi do ketë dhe do përballet me sëmundje efektive. Problematikat më të mprehta janë me sëmundjet infektive”.

“Jemi dëshmitarë që ka shumë informacion që qarkullon në rrjetet sociale, ka shumë interes, ka ngjallur shqetësim. Ne jemi bombarduar nga telefonatat,miq, të afërm, pacientë. Është e rëndësishme që të jepen informacione edhe në rrjetet sociale dhe të mbështetura në fakte. Bëhet fjalë për një infeksion të rrallë, sëmundje e rrallë fatmirësisht, por kur shfaq shenja klinike është agresive dhe ka risk të lartë për komplikacione të larta dhe vdekshmëri”, – theksoi Harxhi.

Sipas tij, bëhet fjalë për një infeksion nga ky bakter , që gjendet rëndom në persona në formë mbartshmërie, është bakter i njeriut nuk gjendet në kafshë apo ambiente të tjera , gjendet rëndom në përqindje të konsiderueshme 1 në 5 raste deri në 20% persona mund ta kenë ne fytin e tyre dhe në një përqindje shumë të vogël fatmirësisht kjo bakterie jep sëmundje invazive nga meningokoku.

“Dy format janë më të rënda të kësaj sëmundje infeksioni i cipave të trurit meningjiti dhe infeksioni në gjak, që është një formë e rrufeshme me vdekshmëri që shkon në 40-50% në qendra super të specializuara të trajtimit”, tha Harxhi.

Ai u shpreh se “është një sëmundje e rrallë që nuk kursen asnjë moshë dhe e hasim në moshat fëminore 1-5 vjeç dhe në adoleshencë 14-20 vjeç. Ky infeksion ka rrezik për transmetim, përmes spërklave dhe kontakti i ngushtë me personin e infektuar mbart një rrsik”,- nënvizoi Harxhi.

Konkretisht, vijoi ai, nëse i referohemi ISDS, Organizata e Kontrollit të Sëmundjeve Infektive në Europë, në 28 shtete të BE, vetëm në 2017 janë 3200 raste nga meningokoku.

“Frekuenca e rasteve është 0.6 raste për 100 mijë banorë. Nuk ka vend për panik, ka vend për të marrë masa. Ky infeksion jep temperaturë, dhimbje koke, të vjella, fotofobi (bezdi nga drita), përgjumje deri në koma dhe ngrirje të qafës. Mjekësia nuk bëhet dot nga studio apo interneti, por bëhet nëpërmjet kontaktit me pacientin. Nëse forma është më fulminante që në momentet e shfaqjes së temperaturës shfaqen brenda pak orësh njollat dhe tregon që kemi me meningokoksemi. Po dolën njollat risku është shumë i lartë. Është ‘helmim’ i gjakut. Nuk ka epidemi prej kësaj këto ditë në Shqipëri, epideminë e kanë hapur në mediet sociale”, tha mjeku Harxhi./atsh

Meningjiti/ Mjeku Harxhi: Nuk ka epidemi, as vend për panik Read More »