Shendetesi

Kryeministri Edi Rama deklaroi sot se i kemi të gjitha kapacitetet e nevojshme për të përballuar një fluks të madh të prekurish me COVID-19, ndërsa bëri të ditur se në kuadër të masave të marra janë thirrur edhe mjekë epidemiolog që janë në pension për të dhënë kontributin e tyre.

Gjatë një komunikimi live së bashku me ministren e Shëndetësisë, Ogerta Manastirliu për masat e marra dhe shqetësimet e qytetarëve, Kryeministri Rama tha se qeveria ka vendosur dhënien e një bonusi edhe për mjeket dhe infermierët në pension që do të angazhohen dhe se fondet janë aktive që këtë muaj.

“Kemi të gjitha kapacitetet e nevojshme për disa qindra në projeksionin më negativ, bazuar në modele e algoritme. Masat na ndihmojnë ta shtrijmë në kohë situatën. Ne vazhdojmë të përgatitemi për të patur gatishmëri në sistem. Problemi është numri i mjekëve, pasi na duhen të jenë të gatshëm në të gjithë harkun e kohës.

“Kemi thirrur për mjekë, infermierë dhe epidemiologë që kanë lënë gjurmë në sistemin tonë shëndetësor të na bashkohen dhe për ta do të vëmë bonusin 1 mijë euro mbi pensioni njësoj si me stafin mjekësor në vijën e parë të luftës, bonus 1 mijë euro mbi rrogën që do të jetë aktiv në fund të muajt mars” tha Rama

“Fondi do të jetë aktiv në fund të muajit mars për të gjithë mjekët e infermierët, ashtu si për shoferët e sanitarët në vijën e parë të luftës. Bonusi do të jetë mbi rrogën apo pensionin. Gjithçka është e planifikuar dhe e parashikuar”, deklaroi Rama.//atsh

“Shqipëria dhe vendet e Ballkanit kanë kapacitetin për të ngritur sistemin e vëzhgimit”, deklaroi sot Dr. Raul Gonzalez-Montero përfaqësues i Organizatës Botërore të Shëndetësisë

Në një intervistë televizive ai theksoi se, “një sistem i fortë shëndetësor, nuk ecën paralelisht me rastet e identifikuara. Shqipëria dhe vendet e Ballkanit kanë kapacitetin për të ngritur sistemin e vëzhgimit”.

Ai tha se, “është e mundshme të llogaritet sa mund të shkojë numri i të infektuarve në Shqipëri. Shihet sjellja e mundshme e virusit, kapaciteti në mjekësi dhe masat e qeverisë. Transmetimi i tij është në 2 deri në 2.5 persona, në kushte normale mund të infektohet 60% e popullsisë, prandaj duhet qeveria që t’i përcaktojë rregullat”.

“Numri përfundimtar i të prekurve do të varet nga intensiteti i masave të qeverisë dhe mënyra se si njerëzit do të veprojnë ndaj masave që do të vendosë qeveria”, tha Montero.

I pyetur në lidhje me strategjinë e ngritur nga Shqipëria, ku autoritetet thonë që kanë ngritur një strategji sipas OBSH, edhe sipas shembullit të Italisë, Gonzalez tha se, “është absolutisht e vërtetë, masat janë në përputhje me rekomandimet nga OBSH, ky vend dha instruksione shumë të qarta duke pasur vetëm 2 të infektuar, pra janë marrë masa në kohën e duhur”.

“Vende si Italia e Spanja i kanë marrë masat me vonesë, edhe pse kanë sistem shumë të fortë shëndetësor. Nevoja e masave duhet të jetë në proporcion me ekonominë dhe kapacitetin e vendin”, tha ai.

I pyetur nëse autoritetet kanë vepruar mirë në lidhje me anulimin e fluturimeve me Italinë dhe ndërprerjen e shkollave, pas shfaqjes së rasteve të para Gonzalez tha se, “ne i dhamë rekomandime të qarta që të mos mbyllin kufijtë apo të anulojnë fluturimet, sepse nuk jep rezultat. Shtetet janë sovrane dhe i marrin këto vendime vetë. Më parë nuk ishin as të përshtatshme këto masa”.

Mbi masat dhe shqetësimin e qytetarëve Gonazeles tha se, “e kuptoj shqetësimin, por masat këtu nuk janë të njëjta me ato në Itali e as numri i personave të prekur nuk është njësoj. Qytetarët duhet t’i përmbahen masave të qeverisë sepse kjo është thelbësore. Nëse ndodh në Shqipëri varet nga sa e fortë është qeveria për të detyruar zbatimin e masave dhe sa të bindur janë qytetarët për t’ju bindur atyre”./atsh

“Paniku është më i dëmshëm se sa vetë virusi”, deklaroi sot Rektori i Universitetit të Mjekësisë, Arben Gjata.

Në një intervistë televizive, Gjata bëri thirrje që të mos ketë përhapje të lajmeve të rreme, sidomos në rrjetet sociale.

“Për mua paniku është më i dëmshëm më shumë se sa virusi. Pjesa më e madhe medieve kanë treguar profesionalizëm. Ndërsa rrjetet sociale të mos bëjnë fake news. Ndërsa klasa politike duhet të ketë një konvergjencë, që të bëhet sa më e kalueshme si situatë. Fatmirësisht pacientët momentalisht nuk kanë nevojë për ndihmë respiratore. Personale mjekësor është më i ekspozuari, dhe nëse infektohen mund të kesh mungesë personeli. Po ashtu është trajnimi i tyre. Infektivi mund të paraqitet deri të pacientët që nuk kanë probleme respiratore, sepse ata nuk kanë kompetencat e mjaftueshme”, tha Gjata.

I pyetur në lidhje me pajisjet në infektiv, Gjata tha se, “ pajisjet e infektivit dhe pajisjet bazë të domosdoshme janë gati dhe gjithashtu ekziston mundësia e diagnostifikimit. Di që kjo skema e telefonatës nga shtëpia dhe vet izolimi në shtëpi, marrja e analizës në shtepi me tampon janë udhëzime të OBSH”.

“Është e domosdoshme të ulim në minimum shkallën e infektimit të popullatës. Sa më shumë të ulim infektimin aq më e lehtë do jetë për sistemin shëndetësor ta përballojë situatën”, tha ai.

“Do të doja shumë që në mënyrë të përsëritur të ftoja mediat që t’i bënin thirrje publikut të zbatojë ato rregulla të thjeshta për shmangien e përhapjes së sëmundjes. Janë rregulla të thjeshta, të cilat nuk ja vlen t’i përsërisim. Që nga larja e duarve, dhe me radhë. Janë shumë të rëndësishme”, tha Gjata./atsh

Ministrja e Shëndetësisë dhe Mbrojtjes Sociale, Ogerta Manastirliu ka publikuar 5 hapat kryesorë për personat që shfaqin shenjat e COVID-19.

Këshilla për personat që shfaqin shenjat e COVID-19.

Hapi i parë: Mos shkoni pranë qendrës suaj shëndetësore, urgjencës apo farmaci.

Hapi i dytë: Kontaktoni 127

Hapi i tertë: Mund t’iu kërkohet të vetëizoloheni.

Hapi i katërt: Përgjigjuni pyetjeve që do t’iu bëjë mjeku në telefon.

Hapi i pestë: Një skuadër e pajisur mund t’iu kryej testin për COVID-19

Hapi i gjashtë: Ndiqni këshillat e mjekut si të veproni më tej./atsh