Shendetesi

62-vjeçarja asimptomatike nga COVID-19, Ministria e Shëndetësisë: Ndërroi jetë nga sëmundja e rëndë në pankreas

Ministria e Shëndetësisë njoftoi sot se, nuk ka viktimë si pasojë e COVID-19 në Spitalin Infektiv, pasi shkaku i vdekjes së një pacienteje ishte sëmundja e rëndë në pankreas.
Lidhur me lajmin e publikuar në media për vdekjen e një pacienteje me COVID-19, Ministria e Shëndetësisë dhe Mbrojtjes Sociale informon se, gjatë ditës ka ndërruar jetë në Spitalin Infektiv një 62-vjeçare si pasojë e një sëmundje të rëndë kronike të pankreasit, me vdekshmëri shumë të lartë: pankreatiti nekrotizant.
“62-vjeçarja që vuante edhe nga kanceri dhe astma bronkiale, është sjellë ditën e djeshme në gjendje të rëndë nga spitali i Shkodrës, ku rezultoi bartëse e COVID-19, por pa shenja klinike të sëmundjes. Referuar shërbimit infektiv, 62-vjeçarja nuk ka ndërruar jetë si pasojë e COVID-19, pasi ishte asimptomatike për këtë sëmundje, por si pasojë e sëmundjes së rëndë të pankreasit”, thuhet në njoftimin për shtyp të Ministrisë së Shëndetësisë dhe Mbrojtjes Sociale.
Ministria e Shëndetësisë informon se do të mbajë të informuar publikun për çdo zhvillim, ndaj lutemi t’i referoheni njoftimeve zyrtare./atsh

62-vjeçarja asimptomatike nga COVID-19, Ministria e Shëndetësisë: Ndërroi jetë nga sëmundja e rëndë në pankreas Read More »

Mbrojtja Civile/ Prefekti i qarkut Vlorë: Rritja e temperaturave do të shtojë shkeljet për të shkuar në plazh, gjë që duhet ndaluar

Problematikat e hasura dhe hartimi i planit të masave në vijim lidhur me menaxhimin e situatës për COVID-19 ishin në qendër të mbledhjes së Komisionit të Mbrojtjes Civile të zhvilluar nga Prefekti i qarkut Vlorë, Flamur Mamaj.

Çështjet të cilat hasën më tepër diskutim konsistojnë në shtimin e kontrolleve në subjekte shërbimi si lokale apo restorante, me qëllim shmangien e hapjes së tyre, si dhe shmangien e abuzimeve me fashën orare në disa subjekte të tjera.

“Rritja e temperaturave të motit do të sjellë shtim të shkeljeve për të shkuar në plazh, gjë e cila duhet ndaluar në mënyrë kategorike. Mbeten problem tregjet e tregtimit të fruta-perime, ku qytetarët nuk respektojnë distancën, ndërsa shitësit nuk përdorin maskë dhe dorashka”, – tha prefekti Mamaj.

Sipas tij, lidhur me këtë situatë, Komisioni vendosi të bëjë shenjëzimin në çdo treg dhe mbylljen e përkohshme të tregjeve ku nuk mund të menaxhohet situata.

“Pavarësisht zgjatjes së fashës së orarit për lëvizjen e qytetarëve, lejohet lëvizja vetëm, pasi të jetë aprovuar leja, për të bërë blerjet e produkteve të nevojshme”, – tha Mamaj.

Prefekti bën të ditur se “çdo bashki ka evidentuar të moshuarit e vetmuar dhe familjet në nevojë dhe gjatë gjithë kohës së karantinës ka bërë shpërndarjen e ndihmave”.

Sa i përket dezinfektimi të ambienteve të brendshme dhe të jashtme Mamaj shprehet se “ka qenë i përditshëm në çdo bashki”.

“Policia Vendore, Policia Bashkiake, ushtria dhe inspektoratet do të vijojnë bashkëpunimin e ngushtë për të vlerësuar situatën dhe për të marrë masat për të parandaluar shtimin e qarkullimit pa kriter të qytetarëve”, – tha Mamaj./atsh

Mbrojtja Civile/ Prefekti i qarkut Vlorë: Rritja e temperaturave do të shtojë shkeljet për të shkuar në plazh, gjë që duhet ndaluar Read More »

Ministria e Shëndetësisë: 21 raste të reja, shkon në 467 numri i të prekurve me COVID-19

Ministria e Shëndetësisë dhe Mbrojtjes Sociale ka bërë te ditur se brenda 24 orëve të fundit janë identifikuar 21 raste të reja, duke e çuar numrin e të prekurve me COVID-19 në 467.

Drejtoresha e Institutit te Shëndetit Publik, Albana Fico u shpreh se “në 24 orëshin që lamë pas ju bëjmë me dije se vazhdon puna në terren për identifikimin e rasteve të reja dhe gjurmimin e kontakteve të rasteve, të konfirmuara pozitive.

Dje janë testuar 193 persona të dyshuar, prej të cilëve janë konfirmuar 21 raste të reja me COVID-19, nga të cilët 1 personel shëndetësor dhe dy fëmijë asimptomatikë.

Deri në këto momente janë testuar 4070 raste të dyshuara dhe prej tyre janë të konfirmuar pozitivë me COVID-19, 467 raste’

Shpërndarja gjeografike e rasteve pozitive, është si vijon:

– Tiranë 221 raste
– Durrës 42 raste
– Lushnje 6 raste
– Elbasan 15 raste
– Fier 32 raste
– Kavajë 8 raste
– Rrogozhinë 4 raste
– Korçë 17 raste
– Vlorë 5 raste
– Shkodër 70 raste
– Lezhë 14 raste
– Berat 2 rast
– Has 13 raste
– Krujë 6 raste
-Tropojë 4 raste
– Pukë 5 raste
– Mirditë 3 raste/atsh

Ministria e Shëndetësisë: 21 raste të reja, shkon në 467 numri i të prekurve me COVID-19 Read More »

Harta e të prekurve me COVID-19 zgjerohet në Tiranë, Shkodër, Durrës e Has

Harta e të prekurve nga COVID-19 është zgjeruar në Tiranë me 6 raste, Shkodër 13 raste, Durrës me 1 rast dhe Hasi me 1 rast.

Ministria e Shëndetësisë dhe Mbrojtjes Sociale ka informuar se rastet e identifikuara në 24 orët e fundit janë kontakte të rasteve të mëparshme të prekura me COVID-19, ndërkohë që vazhdon procesi i hetimit epidemiologjik në terren.

Ministria e Shëndetësisë dhe Mbrojtjes Sociale u ka kërkuar qytetarëve të vijojnë të respektojnë masat e distancimit social. Zgjerimi i fashës orare të lëvizjes është një lehtësim që kërkon përgjegjësi nga ana e qytetarëve për të respektuar distancën e nevojshme mes njëri tjetrit, ruajtjen e higjienës personale.

“Është e rëndësishme që masat e kontrollit të infeksionit duhen të respektohen maksimalisht edhe brenda rretheve familjare duke shmangur vizitat tek të afërmit për çdo lloj arsye, për të parandaluar transmetimin e COVID-19. Nëse keni shenja të sëmundjes COVID19 telefononi numrin e urgjencës 127. Për çdo pyetje apo informacion rreth COVID19 telefononi në linjën e gjelbër 0800 40 40”,-u shpreh drejtoresha e Institutit të Shëndetit Publik, Albana Fico./atsh

Harta e të prekurve me COVID-19 zgjerohet në Tiranë, Shkodër, Durrës e Has Read More »

“Heronj shqiptarë”, Albi Rema me orë të zgjatura në vijën e parë të frontit kundër COVID-19

Albi Rema nga Njësia 9 punon Operator Koordinator pranë Urgjencës në QSUT, në vijën e parë të frontit të luftës kundër COVID-19.

Deputeti i Partisë Socialiste, Ervin Bushati, përmes rubrikës “Heronj shqiptarë”, ndau sot shembullin e Albi Remës, i cili punon me orë të zgjatura në shërbim të pacientëve.

Bushati tha se me korrektësinë e tij ai bën një punë me 3 turne dhe më këto detyra funksionale: hedhjen e të dhënave të pacientit në sistemin online të punës; bëhen shtrimet, transferimet e pacientëve në pavione të ndryshme sipas diagnozës së tyre; jep informacione për vendndodhjen e pacientit; hedh në sistem terapitë online; bën kostot dhe fletë daljet nga spitali, e shumë të tjera.

“Për luftën me COVID-19, deri tani në Urgjencën 1 e kemi menaxhuar në mënyrë shumë mirë situatën duke marrë masat e përcaktuara nga Protokolli Mjekësor. Ne, si Urgjenca e Zemrës dhe Tensionit, rastet me COVID-19 i transferojmë direkt në Infektiv apo Sanatorium. Për mua është kënaqësi kur i jap informacion familjarëve kur pyesin pacientët”, shprehet Albi./atsh

“Heronj shqiptarë”, Albi Rema me orë të zgjatura në vijën e parë të frontit kundër COVID-19 Read More »

Çfarë e Shkakton Plakjen Para Kohe tek Shqiptarët?

Procesi i plakjes është i pashmangshëm. Por a njihni njerëz që duken më të mëdhenj se mosha e tyre? AgroWeb.org flet sot për plakjen e parakohshme.

Kjo është diçka që është padyshim nën kontrollin tuaj. Fatkeqësisht, plakja e parakohshme është diçka që përjeton shumica e shqiptarëve.

Duket se shumë nga zakonet e përditshme – disa që ndoshta as nuk i pranoni se po i bëni – ju tregojnë më të vjetër se vitet e vërteta.

Gjumi i pakët dhe i keq plak para kohe
Gjumi nuk mban vetëm mendjen tuaj të shëndoshë – ai ndihmon të dukeni më të rinj për më shumë kohë.

Gjumë riparon dëmin që që merr organizmi gjatë ditës. Pra ekspozimin ndaj lodhjes, ndotjes dhe stresit. Kur merrni gjumin e duhur, lëkura juaj nuk mund të përgatitet për ditën tjetër.

Kjo dërrmon lëkurën tuaj, sjell qeliza më pak të shëndetshme dhe afron plakjen e parakohshme. Mundohuni të bëni të paktën tetë orë gjumë në natë, sugjerojnë të gjithë specialistët e mjekësisë.

Mungesa e frutave dhe perimeve në ushqim plak para kohe
Gati 80 për qind e shqiptarëve nuk hanë 2 deri 3 racione 100 gramëshe me perime në ditë. Ndërsa 72 për qind nuk arrijnë të hanë fruta mjaftueshëm, sipas të dhënave të anketave me fokus grupeve të organizuara nga AgroWeb.org.

Megjithatë, frutat dhe perimet parandalojnë dëmtimin që shkaktohet tek lëkura juaj nga plakja e parakohshme, sipas Akademisë Shkencore të Dermatologjisë.

Frutat dhe perimet janë plot me ushqyes, si antioksidantë dhe vitamina, të cilat ndihmojnë në luftimin e dëmtimeve të radikaleve të lira dhe mbajnë qelizat e lëkurës tuaj të shëndetshme.

Disa fruta dhe perime që duhen patjetër? Zarzavate me gjethe të errëta si spinaq, patate të ëmbla, portokall, speca të kuqe, luleshtrydhe, shegë, boronica, shparguj dhe kërpudha.

Sheqeri dhe brumërat bëjnë të dukeni më të vjetër
Shumë brumëra dëmtojnë edhe përtej rritjes së peshës. Ushqimet si buka e bardhë, akulloret dhe patatet e skuqura, mund të shkaktojnë të gjitha llojet e problemeve me fytyrën tuaj.

Kjo ndodh për shkak se ato rrisin maksimalisht nivelet e sheqerit në gjak. AgroWeb.org ju tregon se këto shkaktojnë inflamacione dhe nxisin daljen e puçrrave në fytyrë.

Plus, teprimi me shumë ëmbëlsira mund të çojë në glikazim, një proces në të cilin molekulat e sheqerit i bashkohen kolagjenit të lëkurës suaj. Kjo e bën kolagjenin të fortë dhe më pak elastik, duke shkaktuar rrudhat e parakohshme.

Duhanpirja ju bën të dukeni më të vjetër të moshë dhe ju plak para kohe
Para se të ndizni një cigare, mbani mend se mushkëritë nuk janë pjesa e vetme e trupit tuaj që paguan një çmim të dhimbshëm.

Pirja e duhanit bën të dukeni më të vjetër dhe shumë më shpejt. A ka prova për këtë?

Studiuesit krahasuan tiparet e fytyrës së 79 çifteve të binjakëve – në të cilat një binjak aktualisht tymoste pesë vjet më shumë se binjaku tjetër. AgroWeb.org raporton se studiuesit gjetën se ata që tymosnin më gjatë patën shumë më tepër rrathë sysh dhe rrudha pafund.

Plus, duhani është i ngarkuar me kimikate që dëmtojnë kolagjenin dhe elastinën, thotë Akademia e Dermatologjisë, të cilat janë vendimtare për një fytyrë të re.

Shumë alkool ju vjetëron tepër shpejt
Ka një arsye që askush nuk duket bukur në mëngjes pas një mbrëmje me tepri alkooli. Studimet tregojnë se alkooli ul nivelet antioksiduese në lëkurën tuaj.

Kjo shkakton dëmtime në qelizat tuaja të lëkurës, duke nxitur rrënimin e fytyrës dhe rrudhat.

Alkooli gjithashtu dehidraton lëkurën tuaj, çka bën që fytyra të duket e thatë e rrënuar dhe plakur.

Mbajini në mendje këshillat e mësipërme. Nuk janë aspak lukse, por mirëmbajtje e shëndetit tuaj./AgroWeb.org

Çfarë e Shkakton Plakjen Para Kohe tek Shqiptarët? Read More »

‘coronavirus.al’/ 3 877 teste, 446 të infektuar, 217 të shëruar dhe 23 viktima

Në vendin tonë deri tani janë evidentuar 446 të infektuar me COVID-19, 206 raste aktive, 217 të shëruar, 23 të vdekur, ndërsa janë kryer 3 644 teste gjithsej. Po ashtu në total janë 3 877 teste të realizuara.

Shifrat bëhen të ditura nga adresa zyrtare e platformës “coronavirus.al”, e krijuar me qëllim informimin e qytetarëve për shifrat zyrtare, vetëm për situatën e të prekurve me COVID-19 në Shqipëri.

Përmes kësaj platforme qytetarët kanë mundësi të ndjekin në kohë reale të rejat nga fronti i luftës kundër COVID-19.

Duke iu referuar grafikut sot është dita e parë kur numri të infektuarve aktiv është më i vogël se ai i të shëruarve, 206 kundrejt 217 të shëruarve. /atsh

‘coronavirus.al’/ 3 877 teste, 446 të infektuar, 217 të shëruar dhe 23 viktima Read More »

“Politikanët rrënimtare të shëndetësisë të heshtin në këto kohë covidiane”/Kalo: Akuzat politike s’duhet të zbehin profesionalizmin e mantelbardhëve

Mjeku i njohur Tritan Kalo deklaron se “epidemitë kanë rrënuar dhe po rrënojnë shtete e sisteme të tëra, ndaj duhet të jemi kurdoherë të përgatitur për t’u përballur me to.

Kalo thekson se politikanët rrënimtarë të shëndetësisë publike, duhet të heshtin në këto kohë covidiane.

“Jo dhe vetëm jo partitizmit, militantizmit dhe politikbërjes së pabuktë e asfiksuese të mbrothësimit të vendit….po dhe vetëm po në çdo moment profesionalizmit, përkushtimit dhe humanizmit të mantelbardhëve. Politikanët rrënimtarë të shëndetësisë publike të pas 31 Marsit 1991 të të dy krahëve të politikës, si dhe ata drejtues jo vizionarë të QSUT “Nënë Tereza” të pas 1993, së paku duhet të heshtin në këto kohë covidiane”, deklaron mjeku i njohur.

Ai thekson se “ishin medikotriteti dhe partitizmi i tyre, ato që e dëmtuan në themel strukturën mirë-funksionale në aspektin epidemiologjik dhe jo vetëm, të të vetmit Shërbim Kombëtar të Sëmundjeve Infektive në Shqipëri, atë që njihej para viteve 1990 si Spitali Infektiv nr.4.

“Pulitikanët tanë në këto 30 vitet e fundit, shpesh njëlloj si edhe pulat e kanë futur “sqepin e tyre në të njëjtin ushqim”, duke prodhuar më pas politika jo të mbara, aromëmbytëse dhe rrënuese së paku për Lëminë e Përkujdesjes dhe Ndjekjes së të sëmurëve me Sëmundje Infektive, sektor në të cilën unë kuntribuoj që prej 2 Korrikut 1981…Sot me ndërhyrjet që po bëhen edhe pse disi të vonuara e të cilat duhen shpënë më tej, shpresoj se do të bëhet e mundshme që jo larg në kohë, të korrigjohen këto ndërhyrje të gabuara, si dhe të bëhet e mundur që Shërbimi Kombëtar i Sëmundjeve Infektive të plotësohet me të gjithë infrastrukturën e nevojshme të funksionalitetit të tij….profezionalizmi kurdoherë duhet të prevalojë mbi politizmin në shëndetësi…..së bashku me ju bashkëkombasit e mi, shpresoj se do ja dalim mbanë edhe në përballjen me COVID-19!!!”, deklaron mjeku Kalo./atsh

“Politikanët rrënimtare të shëndetësisë të heshtin në këto kohë covidiane”/Kalo: Akuzat politike s’duhet të zbehin profesionalizmin e mantelbardhëve Read More »