Kur duket se kampet politike, maxhorancë-opozita kanë gjetur ‘gjuhën’ për vettingun në politikë, nismë e iniciuar nga PD-ja, një zë skeptik vjen një demokrat. Bëhet fjalë për ish-deputetin e PD-së Astrit Patozi.
Ky i fundit shprehu bindjen se vettingu në politikë nuk do të bëhet, ndërsa shtoi se palët po mundohen t’ja lënë dopio gjashtën në dorën njëra-tjetrës. Po ashtu Patozi, i ftuar në emisionin “Top Talk” në Top channel theksoi se Basha përdoret nga kreu i qeverisë, Edi Rama.
“Nuk më pengon asgjë të them se, në rast se Basha e ka seriozisht sfidën apo projektin e vettingut, unë do ta mbështes në të gjitha rastet. Por dyshoj te ky seriozitet, sepse kam parë zhvillimet pas lançimit të idesë, që më lënë një shije të keqe. Mënyra sesi janë sjellë palët që nga dita e anonçimit nga Basha, është e tillë që të krijon idenë e një teatri, ku të dyja palët nuk duan që të bëhet, por që po përpiqen me shumë sforco që t’ia lënë dopio gjashtën në dorë palës tjetër. Është një ngjarje e sigurt. Është një truk i të dyja palëve, por në këtë rast opozita ka më shumë përgjegjësi për dy arsye: së pari, sepse ishte ajo që e lançoi dhe mund ta evitonte nëse nuk e kishte seriozisht; dhe së dyti, sepse opozita është ajo që duhet ta shkundë pushtetin që të shkojë në moralin e saj”, -tha Patozi.
Pak ditë më parë kryeopozitari Lulzim Basha shpalosi nisëm e PD për vettingun në politikë, projektligj që u dorëzua edhe në Kuvend. Kjo iniciativë gjeti mbështetjen edhe të kryeministrit Edi Rama, i cili ftoi Bashën që të uleshin në tryezë për bashkëpunim. Projektligji në fjalë kërkon që përveç gjyqtarëve dhe prokurorëve, pjesë e ‘sitës’ së vettingut të bëhen edhe politikanë, zyrtarë institucionesh, duke mos përjashtuar as kryeministrin.
Paralajmërimet serioze dhe gjuha teje e ashpër e kreut të PD, Lulzim Basha, nga Durrësi kanë bërë që kryetari i Kuvendit të zbythet dhe të publikojë draftin që opozita ka dorëzuar në Kuvend për Vettingun e politikanëve. Ky propozim kishte katër ditë që ishte dorëzuar zyrtarisht me gjithë firmat e deputetëve, por Ruçi refuzonte ta publikonte.
Por sot nga tryeza e Durrësit, Lulzim Basha, e akuzoi Gramoz Ruçin se po shkel hapur dhe me qëllim rregulloren e Kuvendit për këtë çështje.
“Kreu i Kuvendit Gramoz Ruçi tash e pesë ditë refuzon të botojë në faqen online projektligjin për vettingun e politikaneve dhe relacionin përkatës…Në emër të opozitës i jap këtë ultimatum Gramoz Ruçit: ‘Respekto rregulloren e Kuvendit, boto online propozimin ta shohin të gjithë shqiptarët…”, tha Basha.
Pas këtij ultimatumi të ashpër, vetëm pak minuta më pas, Basha u njoftua live, se Gramoz Ruçi ishte zbythur duke publikuar projektligjin e opozitës, për vettingun në politikë.
Qeveria e Edi Ramës sa vjen e bëhet edhe më qesharake. Në vend që t’u ndalojë vjedhjen, Edi Rama ka vendosur t’u ndalojë dashnoret ministrave, zëvendësministrave dhe drejtorëve. Me anë të një urdhri të posaçëm, Rama nuk lejon që ministrat, zëvendësministrat, kryetarët e bashkive dhe drejtorët që të udhëtojnë jashtë vendit pa i marrë më parë leje Ditmir Bushatit. Siç dihet, udhëtimet jashtë vendit janë mundësia kryesore e zyrtarëve të shtetit për t’u çmallur me dashnoret, për të fshehur paratë e korrupsionit dhe për të bërë pazare. Me hyrjen në fuqi të urdhrit të Ramës, të lartpërmendurit mund të udhëtojnë jashtë shtetit vetëm nëse u jep leje Ditmir Bushati, i cili lajmëron Fugën për çdo lëvizje të tyre.
Në urdhrin e pazakontë të Ramës thuhet se “Vizitat zyrtare dhe të punës të anëtarëve të Këshillit të Ministrave jashtë shtetit zhvillohen me miratimin e Kryeministrit, pasi ministri i Punëve të Jashtme të jetë shprehur me shkrim. Kërkesa për miratimin e vizitës i drejtohet, njëkohësisht, Kryeministrit dhe ministrit të Punëve të Jashtme. Anëtarët e Këshillit të Ministrave, brenda çdo tremujori, paraqesin me shkrim, pranë Kryeministrit dhe ministrit të Punëve të Jashtme, planin e vizitave jashtë vendit për tremujorin në vazhdim”.
Urdhri u ndalon zyrtarëve të lartpërmendur që të diskutojnë me dikë për çështje politike pa pyetur më parë Bushatin, i cili nga ana e tij pyet Fugën. Në urdhër thuhet se “Ministrat e zëvendësministrat, drejtuesit e institucioneve qendrore në varësi të Kryeministrit e të ministrave, të institucioneve të tjera të administratës shtetërore dhe të organeve të pushtetit vendor, në korrespondencën me ambasadorë e përfaqësues të tjerë të huaj, të akredituar në Republikën e Shqipërisë, për çështje me karakter politik ose me rëndësi për marrëdhëniet e Republikës së Shqipërisë me shtetet e tjera apo organizatat ndërkombëtare, duhet të njoftojnë, paraprakisht, Ministrinë e Punëve të Jashtme, e cila jep, me shkrim, mendimin e saj për qëndrimin që duhet mbajtur”.
Ata nuk duhet të bëjnë as deklarata pa pyetur Bushatin. Këtu fjala është më shumë për kryetarët e bashkive, të cilët shumica janë pa shkollë. Për këtë urdhri thotë “Ministrat e zëvendësministrat, drejtuesit e institucioneve qendrore në varësi të Kryeministrit e të ministrave, drejtuesit e institucioneve të tjera të administratës shtetërore dhe të organeve të pushtetit vendor, në deklaratat verbale e të shkruara dhe intervistat për probleme të rëndësishme të marrëdhënieve me jashtë duhet të jenë në përputhje me programin e qeverisë për politikën e jashtme të Republikës së Shqipërisë. Për çështje të politikës së jashtme të një rëndësie të veçantë, funksionarët e lartpërmendur, në deklarimet e tyre publike, duhet të konsultohen, paraprakisht, me Ministrinë e Punëve të Jashtme”.
Ministrat, zëvendësministrat, kryetarët e bashkive dhe drejtorët nuk mund as të ftojnë dikë pa leje. Për këtë çështje urdhri është i qartë, teksa thotë se “Ministritë, institucionet qendrore në varësi të Kryeministrit e të ministrave, institucionet e tjera të administratës shtetërore dhe organet e pushtetit vendor, në ushtrimin e veprimtarisë me jashtë, kanë për detyrë: a) të njoftojnë, menjëherë, Ministrinë e Punëve të Jashtme për çështjet në fushën e marrëdhënieve me jashtë që trajtohen gjatë takimeve të drejtuesve të institucionit me përfaqësues të trupit diplomatik të shteteve dhe me përfaqësues të organizatave ndërkombëtare, të akredituara në Republikën e Shqipërisë, apo në letrat dhe mesazhet që autoritete të huaja i dërgojnë drejtuesit të institucionit”.
Urdhri detyron Bushatin që të këshillojë zyrtarët para se të dalin jashtë shtetit. Në urdhër thuhet se “Të ndihmojë me materiale dhe brenda përgjegjësisë së saj, të këshillojë për përgatitjen e vizitave e të takimeve të planifikuara të ministrive, institucioneve qendrore dhe organeve të pushtetit vendor. Të ofrojë ndihmën e nevojshme ligjore në procesin e lidhjes së marrëveshjeve ndër-kombëtare nga ministritë, institucionet qendrore në varësi të Kryeministrit e të ministrave, institucionet e tjera të administratës shtetërore dhe organet e pushtetit vendor, në përputhje me legjislacionin në fuqi. T’u komunikojë përfaqësive diplomatike të Republikës së Shqipërisë kërkesat që vijnë nga institucionet e ndryshme, të cilat i gjykon të arsyeshme”./Pamfleti
Në 20 vjetorin e vrasjes së Azem Hajdarit, liderit të Dhjetorit para selisë së PD, ishin mbledhur të gjithë, kundërshtarë, kritikë, të rinj dhe të vjetër në këtë parti.
Të gjithë të mallëngjyer, të gjithë duke lotuar që nga Berisha që nuk ka lënë gjë pa bërë kundër Hajdarit, duke e denigruar, përjashtuar nga kryesia, grupi parlamentar dhe në fund sipas akuzave ndaj tij, dhe duke e nxjerrë në pritë dhe duke e vrarë.
Nuk mbeten pas dhe ata që i bënë gropën, e armiqësuan me Berishën, e armiqësuan me kupolën e PD, e lanë jashtë qeverisjes, apo thjeshtë dhe vetëm ngritën dorën dhe votuan në heshtje për denigrimin dhe përjashtimin e tij.
Por nga një pjesë e madhe e PD pranohet se kjo parti nuk është më ajo që kishte ëndërruar Azem Hajdari. Deklaratë në parim kjo, por që e thanë shumë vetë, duke deklaruar se tashmë PD nuk njihet, nuk ka më themelues, qëndrestarë, idealistë.
PD sipas Mustafajt, Bislim Ahmetajt dhe të tjerëve nuk është më partia që joshte njerëzit të vinin tek ajo edhe në ditët më të vështira të saj, por tashmë i largohen të gjithë dhe përditë.
Astrit Patozi kritik i Bashës shkoi më tej teksa tha se Lulzim Basha është njeriu që e spastroi PD-në nga demokratët dhe ka sjellë në parti sojin e tij. Dikush nën zë thotë se PD është mbushur me “kollovarë” dhe nuk bën hajr kjo parti sa të jenë ata nëpër këmbë.
Por ka qënë Haxhi Isufi një humorist i njohur, më afër të djathtës, ai që e ka perifrazuar shumë qartë gjendjen aktuale të PD, duke bërë paralele me 20 vite më parë kur Hajdari ishte gjallë.
“20 vite nga vrasja e Azem Hajdarit, vitet kalojne dhe në PD po pakësohen “Azemët” dhe po shtohen përditë “Hajdarët”, ka shkruajtur ai në rrjetin social.
Dhe se kush janë “azemët dhe kush quhet “Hajdar” në terminologjinë popullore të gjithë shqiptarët e dinë. Edhe në PD. Pavarësisht se bëjnë sikur nuk e kuptojnë./Pamfleti
Kreu i Partisë Demokratike, Lulzim Basha, ka bërë një paralajmërim të fortë për kryeministrin Edi Rama dhe ministrin e Brendshëm, Fatmir Xhafaj.
Nga Durrësi, ku po mbahet takimi i jashtëzakonshëm i opozitës kundër krimit, Basha tha se duke filuar nga nesër, PD do të nxjerrë fakte tronditëse kundër Ramës e Xhafajt, ku tregohet lidhja e tyre me bandat.
“PD do nxjerrë fakte tronditëse ku tregojnë se si Rama e Xhafaj kanë përdorur pushtetin për të ndihmuar bandat për të shtirë në dorë lojërat e fatit. Sot në Shqipëri qeveris krimi”, tha Basha.
Ish-deputetja e PD Jozefina Topalli, një nga figurat qendrore të kësaj partie, është komentuar së shumti dje, për faktin që mungoi në ceremoninë përkujtimore të 20-vjetorit të vrasjes së pishtarit të demokracisë, Azem Hajdari.
Topalli nuk reagoi as në rrjetet sociale por më në fund duket se ka thyer heshtjen e gjatë. Mbrëmë pas mesnate, Topalli ka publikuar një foto të hershme me Azemin, të dy të buzëqeshur.
Ish-deputetja ka zgjedhur mos bëjë asnjë koment për këtë foto që gjithsesi është tejet domethënëse dhe të bën të reflektosh për atë që ishte PD dje dhe për atë që është sot.
Vetëm pak orë pas arrestimit, ‘i forti’ i Krujës do të shijonte sërish lirinë. Bosi i vrasjeve me pagesë, Durim Bami, është një mesazh i qartë se policia e Fatmir Xhafjat funksionon thjesht si robot dhe nuk ka asnjë rol qendror në goditjen e krimit. Aksionet e dështuara dhe të sfumuara njëri pas tjetrit i kanë krijuar një njollë të zezë policisë dhe RENEA-s, teksa janë dëshmi e qartë se në vendin tonë drejton krimi i lidhur me politikën.
Lirimi i Durim Bamit, i cili është autor i një sërë krimesh, që nga vrasjet, rrëmbimet, kërcënimet, tritolet e droga, është rasti më skandaloz dhe pas këtij vendimi fshihet padyshim një politikan. Menjëherë sapo forcat RENEA nisën akasionin në Niklën e Bamit, grupe të fuqishme të politikës dhe biznesit u vunë në lëvizje për të bërë planin se si ta shpëtonin ‘të fortin’ e vendit, që ka nën kontroll edhe vetë politikanët.
Dhe kështu ndodhi, pa kaluar akoma pesë orë nga arrestimi i tij, vrasësi me pagesë la sërish qelinë, duke vijuar i lirë misionin e tij dashakeq. Ky vendim ka ardhur padyshim pas ndërhyrjes së grupeve të fuqishme të politikës dhe biznesit, të cilët i duan të lirë ‘kokat’ e bandës së Niklës, siç janë Durim Bami dhe Flamur Haka.
Nikla është një zonë e nxehtë, ku kanë ndodhur jo pak krime e shpërthime tritolesh. Pikërisht nga kjo zonë dyshohet se ka ardhur edhe vrasja e Artan Santos, vrasje për të cilën disa segmente të politikës nuk duan që të zbardhet.
Emri i Durim Bamit është komentuar jo pak edhe më parë, për ngjarjen e bujshme të atentatit të pretenduar ndaj Tom Doshit. Një çështje kjo që çoi me radhë në Gjykatën e Lartë krerët më të lartë të shtetit, që nga kryeministri Edi Rama, Presidenti Ili Meta, ish-kryeministri Sali Berisha, ish-deputetin Mark Frroku, etj. Durim Bami dyshohet të ketë lidhje të forta me deputetin Tom Doshi, pasi akuzohet se është pjesë e një makionacioni së bashku me deputetin.
Megjithatë, lidhjet e Bamit me politikën duket të jenë shumë të thella, ku kanë krijuar grupe të fuqishme, që nuk mund të mposhten nga policia e Fatmir Xhafajt. Këto janë dëshmi të qarta se krimi dhe politika janë bërë një dhe veprojnë të lidhura ngushtë me njëra-tjetrën, të patrembur nga askush dhe asgjë./Pamfleti
Këshilli Kombëtar i Partisë Drejtësi Integrim dhe Unitet ka mandatar dje kryetarin e saj, Shpëtim Idrizi, të nisë negociatat me Partinë Demokratike për të qenë bashkë në koalicionin e zgjedhjeve të ardhshme vendore. Ky vendim është marrë me unanimitet gjatë mbledhjes së djeshme, ku Idrizi, para anëtarësisë, u shpreh se Shqipëria ka nevojë për një front të fuqishëm opozitar.
Kreu i PDIU-së tha se kjo parti po detyrohet të largohet nga maxhoranca për shkak se çështja çame po anashkalohet. Gjatë fjalës së tij, Idrizi mori përgjegjësinë e mosrealizimit të kërkesave për çështje çame në negociatat Tiranë-Athinë. Ai tha se gaboi kur i besoi Edi Ramës zgjidhjen e kësaj çështjeje.
“Edhe unë kam faj e po ju rrëfej me zemër në dorë se si çdo njeri normal në këtë vend gabon, sepse mendova dhe besova që do e çonim përpara këtë kauzën tonë të jetës e të shpirtit edhe në një koalicion me këtë maxhorancë. Kurrë e për asnjë moment nuk kam besuar se dikush mund të arrinte sa t’i lozte fatet tona në lojëra pushteti e ky dhe vetëm ky është faji im.
Sot shpall para jush, vendimin e Kryesisë së PDIU, që votoi në unanimitet, që kryetari i PDIU të mandatohet për të përmbyllur marrëveshjen me opozitën zyrtare në vend e që së bashku të sjellim një realitet të ri për vendin e për të djathtën shqiptare që duhet t’i përmbledhë gjithë copëzat e saj në emër të një qëllimi të madh, një politike normale që t’i kundërvihet krimit, varfërisë, dhunës e arrogancës shtetërore, një politikë që do bashkojë shqiptarët dhe do kërkojë zgjidhje të mençura e larg gjuhës së urrejtjes për kauzën tonë e për të gjithë kauzat kombëtare”, tha Idirizi./korrieri
