Politike

Ata kanë vjedhur për çdo punë që kanë bërë, ndërsa ne kemi vijuar para me reformat dhe kemi transformuar çdo bashki ku kemi drejtuar”, deklaroi sot Kryeministri Edi Rama.

Në çelje të fushatës elektorale për zgjedhjet e 30 qershorit, Kryeministri Rama u ndal te transformimi që ka kryer Rilindja Urbane në çdo bashki.

“Opozita që sot është në rrugë vetëm akuzon për vjedhje sepse të punosh për ata do të thotë të vjedhësh. Ata nuk e kanë nisur kurrë një punë pa menduar se çfarë ka për të vjedhur dhe kanë vjedhur në çdo punë që kanë bërë. Nuk kemi ça t’u bëjmë, janë të mbrapshtë”, tha Rama.

Kryeministri tha se bashkitë e qeverisura nga PS-ja në këto 4 vite janë si nata me ditën me bashkitë e qeverisura nga PD.

“Kujtoni Tiranën, Korçën, Dibrën në kohën e tyre dhe shikojini këto bashki në qeverisjen tonë. Kujtoni Fierin, Elbasanin, Pukën, Roskovecin, Divjakën kur ishin në dorën e tyre dhe shikoni sot. Kujtoni çfarë bënë ata me Shkodrën për 30 vjet me radhë dhe shikoni se çfarë bëmë ne me Vlorën për vetëm 4 vjet”, tha Rama.

Kryeministri u ndal në investimet kryesore që kanë transformuar jetën e banorëve, siç është impianti i përpunimit të mbetjeve në Sharrë.

“Shikojeni sot Sharrën e plehrave që në kohën e tyre digjeshin në buzë të lumit dhe prodhonin re të zeza në gjithë Kombinatin. Na shajnë dhe akuzojnë se si e kemi kthyer atë kancer në një park ekologjik të kohës të fundit, duke zeruar ndotjen në Tiranë”, tha Rama.

Kryeministri theksoi se “kudo ku kemi investuar për të zeruar ndotjen e tmerrshme nga djegia e plehrave rrugëve, ata kanë dalë dhe kanë thënë se është vjedhje”.

“Edhe për zhdukjen e kancerit të Porto Romanos që do ta transformojmë në një park të madh për të gjitha moshat, jam i sigurt se do të thonë të njëjtën gjë”, tha Rama.

Duke u ndalur te investimet në Vlorë, Rama tha se edhe për Lungomaren dhe Bulevardin e Ri ku po përfundon puna transformuese që do t’i japë kuptim qytetit turistik, ata kanë të njëjtat akuza për vjedhje”.

“Në Lezhë jemi aktualisht duke ‘vjedhur’ në rrugën Milot-Balldren që ata e kthyen në autostradën e vdekjes, ndërsa ne do ta transformojmë në një autostradë europiane me standard A. Bashkë me Pjerin Ndreun ne do të vazhdojmë me rrugën e re turistike Shëngjin-Velipojë”, tha Rama.

Në Shkodër, Kryeministri tha se “kemi bërë një punë të madhe duke anashkaluar kryebashkiaken më të paaftë, ndërsa bashkë me Valdrin Pjetrin do t’i japim Shkodrës uanzën turistike të liqenit, që do të jetë njësoj e bukur si Lungomare e Vlorës”. /atsh

Kryeministri Edi Rama në fjalën e tij në çelje të fushatës zyrtare të Partisë Socialiste për zgjedhjet vendore të 30 qershorit, e vuri theksin edhe tek ajo çka përfaqëson Partia Socialiste, duke e cilësuar atë të vetmen parti politike të shqiptarëve që kurrë nuk ka tradhtuar interesin kombëtar.

“Le të thonë çfarë të duan. Kjo është e vetmja parti politike e shqiptarëve që kurrë nuk e ka tradhtuar interesin kombëtar, që me të gjitha të metat e dështimet që mund t’i numërohen, mbetet forca politike më e madhe, me e fortë, më e aftë dhe padiskutim më atdhetarja ndaj edhe më e besueshme për shqiptarët”, theksoi Rama.

Nga kjo foltore theksoi ai, apeli është se 30 qershori vërtet do të nxjerrë se kush do i drejtojë bashkitë e vendit, por po ashtu do të vendosë ikjen përfundimtare të politikës shqiptare përpara dhe lënien pas të fantazmave dhe hijenave të së shkuarës.

“Të gjithë do ta shohin vetë sesi pas 30 qershorit, gjërat nuk do jenë më njësoj si më parë. Kush kujton se meqë nuk hynë në zgjedhje disa parti të falimentuara, shkatërrohen zgjedhjet, e ka gabim. Disfata e tyre do të jetë ripërtëritje demokratike për Shqipërinë dhe për ata vetë, nëse më në fund do dinë ta lexojnë të vërtetën se pse vetëm humbasin, kur të marrë fund aventura e çmendur e imponimit mbi shumicën, mbi shtetin, mbi ligjin. Nuk do ndodhë, nuk kemi për ta lënë të ndodhë. E kanë zgjedhur vetë të nisen me sy mbyllur drejt murit ku do përplasin kokën”, tha Rama.

“Zgjedhjet vendore janë shumë të rëndësishme për ata që do votojnë ose nuk do votojnë. Ndaj do mobilizohemi të jemi në lartësinë e kësaj sfide historike dhe të vazhdojmë rrugën jashtëzakonisht të vështirë, por të sigurt në çdo aspekt. Në 30 qershor nuk do fitojmë vetëm ne, por vetë Shqipëria Europiane e fëmijëve tanë”, përfundoi kryeministri Edi Rama. /atsh

Artistë dhe sportistë kanë shprehur hapur mbështetjen për kryebashkiakun Erion Veliaj edhe për një mandat të dytë në krye të bashkisë së Tiranës.

Gjatë takimit hapës të fushatës për zgjedhjet e 30 qershorit në Parkun Olimpik, ata kanë vlerësuar ndryshimet e mëdha që ka pësuar kryeqyteti dhe kanë bërë thirrje për një votëbesim edhe për katër vitet e ardhshme.

Aktori Gazmend Paja, atletja Luiza Gega, këngëtarja e mirënjohur Eneida Tarifa dhe sportisti Izmir Smajlaj janë shfaqur përkrah Veliajt.

Ata thanë se duan ta shohin vendin e tyre të ecë përpara, ndaj edhe mbështesin punën që ai ka bërë për Tiranën.

“Dua ta shoh vendin tim të ecë përpara dhe më bëhet zemra mal kur shikoj sa shkolla dhe terrene sportive shtohen çdo ditë. Dua që ky zhvillim që po i bëhet vendit, ne e meritojmë ta ngremë vendin tonë sa më lart”, tha Luiza Gega.

Ndërsa Smajlaj dha një mesazh që 30 qershori të jetë pa dhunë. ‘Kam ardhur për të dhënë një mesazh jo politik, që 30 qershori të jetë ditë e zakonshme, pa rrëmujë dhe pa dhunë’, u shpreh Smajlaj.

Aktori Gazmend Paja tha se “e di që këta çunat dhe gocat do të hyjnë në histori dhe dua të jem pjesë e historisë”.

Këngëtarja Eneida Tarifa u shpreh se “nëse do kishte bërë nëna nja 3 si Erion Veliaj, nuk e di ku do ishim këtë 4-vjeçar. Unë jam në krah të Erionit sot as sepse kam një backgruond socialist, as sepse kam ndonjë teser partie, jam këtu sepse besoj te ky djali që kam këtu pranë. Besoj sepse kam parë atë që ka ndodhur me Tiranën tonë të dashur , me një qytet që po shkon drejt Europës”.

Ndërsa këngëtarja Anxhela Peristeri u shpreh se “në 30 qershor do të votoj për të ardhmen e Tiranës, do të votoj për ndryshimet që kam parë këto katër vjet, për gjelbërimin, për pastërtinë e qytetit tonë, për amfiteatrin, për Pazarin e Ri, për çdo ndryshim që është bërë në Tiranë”./atsh

Bashkëqytetarë demokratë,

Sot Partia Socialiste nis zyrtarisht fushatën e zgjedhjeve të 30 qershorit. Ndërsa partia të cilës ju i përkisni si anëtarë apo që e keni votuar, si mbështetës ose simpatizantë, nuk merr pjesë në këto zgjedhje. Fatkeqësisht, jo vetëm për ju po edhe për vendin, udhëheqja juaj politike ka hyrë në rrugën pa krye të frikës nga zgjedhjet, të panikut nga drejtësia dhe të kërcënimeve e të orvatjeve të dëshpëruara, në dëm të Shqipërisë e të çdo shqiptari të interesuar për paqe sociale, zhvillim ekonomik, integrim të plotë të vendit në Bashkimin Europian.

Braktisja pa kthim e parlamentit, nxitja e dhunës, bojkotimi i zgjedhjeve, janë në thelb arratisje nga misioni, funksioni dhe korniza e vlerave të një partie demokratike. Jam sinqerisht i keqardhur për këtë.

Unë nuk jam ai që ju doni të shihni në krye të vendit. Nuk më keni votuar dhe sot nuk ju kërkoj të më votoni, po thjesht shpresoj të më lexoni.

Kur kemi vendosur të jetojmë në një sistem shumëpartiak dhe të synojmë bashkimin e Shqipërisë me Europën, kemi sfiduar një histori të gjatë e aspak bujare në aspektin e traditës demokratike. Hymë në rrugën krejt të re të demokracisë, pas një gjysmë shekulli diktaturë komuniste dhe një mënyre jetese të imponuar, ku kundërshtari politik ishte thjesht një armik për t’u luftuar pa asnjë mëshirë, e për t’u asgjësuar pa asnjë ngurrim. Sot e gjithë ditën, jeta jonë politike vuan ende nga paaftësia për ta respektuar kundërshtarin pa e sakatuar publikisht, me sulme që rëndom tejkalojnë çdo kufi etik dhe kthehen shpesh në dhunë gjuhe të përdalë me egërsi, deri në farë e në fis. Por sidoqoftë, kemi tejkaluar një fazë të rëndë, kur kundërshtarët politikë sakatoheshin me dhunë fizike ose kur protestat ishin të rrezikshme, sepse armët e shtetit përdoreshin për të qëlluar me plumba mbi protestuesit apo reagimi policor ndaj tyre kthehej në hu masiv. Kësisoj, edhe pse rikthimi fatkeq i protestave të dhunshme së fundmi ka treguar se ende s’jemi deprimitivizuar politikisht, kemi bërë sidoqoftë progres të madh në qasjen e qeverisë e në sjelljen e forcave të policisë ndaj protestuesve. S’është pak.

Disa mijëra ndër ju, keni marrë pjesë në protestat partiake të kohëve të fundit dhe shumë të tjerë prej jush, i mbështesni ato edhe pse, bazuar në anketimet tona, po edhe në çfarë tregojnë anketimet e pavarura të bëra nga miqtë tanë ndërkombëtarë, shumica e demokratëve nuk mbështesin as djegien e mandateve, as dhunën e ushtruar në protesta dhe as bojkotin e zgjedhjeve nga ana e udhëheqjes suaj. Gjithësesi, juve as ju pyeti kush për këto vendime politike ekstreme dhe politikisht vetëvrasëse, as nuk është qëllimi im këtu t’ju them çfarë duhet të bëni me udhëheqjen tuaj, e cila ka humbur shikimin pasi s’di të shohë përtej hundës së vet.

Askush ndër ju mbase, unë jo e jo, s’e kishte menduar se do të vinte dita kur partia juaj, e lindur si parti parlamentare nga zgjedhjet e para pluraliste, as të mos ishte më parlamentare dhe as të mos futej në zgjedhje. Çudi dhe degradim i madh njëkohësisht! Por sot, me një vendim sovran të udhëheqjes së asaj partie jemi përpara këtij fakti të kryer dhe s’kemi, mesa duket, asnjë mundësi ta zhbëjmë një zhvillim kaq negativ.

Zgjedhjet janë një e drejtë e panegociueshme kushtetuese e të gjithë atyre që duan të zgjedhin dhe një detyrim i pashmangshëm kushtetues i të gjithë atyre që duan të zgjidhen.

Udhëheqja juaj nuk do zgjedhje, sepse i trembet një disfate elektorale të radhës. Ndërsa ne nuk e shkelim dot detyrimin, sepse duam të zgjidhemi në zgjedhjet e radhës.

Kam dëgjuar shpesh pyetjen: A mund të bëhen zgjedhje demokratike pa opozitën?

Zgjedhje demokratike do të thotë që të gjithë të gëzojnë të drejtën të zgjidhen. Por nëse përjashtimi në çfarëdo forme i opozitës nga zgjedhjet i bën ato antidemokratike, vetëpërjashtimi i një partie kryesore nga zgjedhjet nuk i bën ato jodemokratike.

Prandaj unë e ngre ndryshe pyetjen: A mundet që zgjedhjet demokratike të bëhen vetëm nëse do opozita?

Imagjinoni për një moment sikur zhvillimi i zgjedhjeve në këtë vend të varet nga do apo s’do opozita të bëhen! Mendje të lehta politike e mediatike, kanë rrahur së fundmi shumë ujë në havan, lidhur me sa e tmerrshme qenka të bëhen zgjedhjet pa opozitën dhe sa e thjeshtë qenka, që të shtyhet data e zgjedhjeve meqë s’do opozita!

Sinqerisht ju them, po të ishte kaq e thjeshtë, do të isha unë i pari që do të merrja flamurin e shtyrjes së zgjedhjeve, sepse në fund të fundit do të parapëlqeja të përqendrohesha non stop tek punët e qeverisë, pa qenë nevoja t’i bija rreth e përqark për fushatë Shqipërisë. Por jo vetëm pse është e pamundur nga pikëpamja kushtetuese, por edhe pse është e tmerrshme nga këndvështrimi i bashkëjetesës demokratike, unë mbetem absolutisht kundër idesë së shtyrjes së zgjedhjeve.

Si mund të vendoset – ku është parë? – ky rregull i ri i bashkëjetesës demokratike, që zgjedhjet të varen nga dëshira ose mungesa e dëshirës së një pale për zhvillimin e tyre, në datën e caktuar nga Kushtetuta. Kjo s’është punë date apo stine, kjo është punë qëndrueshmërie e themelit të jetës demokratike. Imagjinoni pak sikur të hapej rruga e një marrëzie të tillë jo vetëm qartësisht antikushtetuese, po edhe thelbësisht antidemokratike, se çfarë do të ndodhte në zgjedhjet pas këtyre zgjedhjeve, në ato pas tyre dhe me radhë, kur sipas tekave të opozitës së radhës (apo edhe të palës tjetër në qeveri pse jo!) data e zgjedhjeve të kthehej, nga një detyrim kushtetues për ata që duan të zgjidhen, në një lojë politike e kujtdo që nuk do zgjedhje!

Disa mendje ndër ato të lehtat që lartpërmenda i bien shkurt: Po ik ti (dmth unë) e pastaj le të bëhen bashkë, andej nga vjeshta, zgjedhjet vendore e ato të përgjithshme dhe fitoji prapë po deshe, se po vazhduam kështu vendi do shkojë në përplasje civile! Kjo është një recetë nga ato që heqin dhimbjen e kokës duke e paralizuar komplet trupin! Imagjinojeni pak çfarë rruge e tatëpjetë hapet për demokracinë tonë nesër, nëse sot vendoset precedenti që mjafton të ikësh nga parlamenti, të ushtrosh dhunë e të kërcënosh me moslejim të zgjedhjeve lokale dhe e përmbys, mu në mes të mandatit qeverinë e zgjedhur – duke provokuar zgjedhje të reja kur do ti, madje me kryeministrin që vendos ti! Nuk është e nevojshme besoj të zgjatem në këtë pikë, sepse s’ka mendje normale që s’e kupton çfarë çorapi do të ishte një jetë e tillë politike, ku fituesi nuk qeveris dot sipas kontratës me popullin dhe humbësi i imponohet me dhunë edhe vetë popullit!

Shkurt, çdo zgjidhje anormale në emër të normalitetit demokratik sot, kthehet në bumerang që prodhon anormalitet antidemokratik, për vite me radhë nesër.

Edhe dy fjalë për moslejimin e zgjedhjeve. Është krim dhe ndëshkohet rëndë nga Kodi Penal i Republikës së Shqipërisë, kushdo që e kryen një krim të tillë. Po jo vetëm kaq, cilido që do të kuturisej të prekte një hallkë të vetme të procesit zgjedhor dhe do të dënohej më pas për krime zgjedhore në Shqipëri, nuk do ta kishte më të mundur të shkelte për gjithë jetën në Shtetet e Bashkuara (do të merrte në qafë edhe familjarët e afërt sipas ligjit përkatës në SHBA) dhe as do të kalonte dot më, kontrollin e kufijve të Bashkimit Europian duke u përfshirë në listën e kompjuterizuar të personave me rekorde kriminale, të cilët nuk hyjnë dot në territorin e Unionit.

A i’a vlejnë të gjitha këto pasoja të rënda për të shkuar pas berihajit? Nuk besoj dhe jam i bindur se nuk do të ketë njerëz të zakonshëm, që të bëhen pjesë e një marrëzie kaq të jashtëzakonshme.

Në 30 qershor do të votohet në të 61 bashkitë e vendit. Ne do të bëjmë më të mirën për t’i dhënë Kukësit, Shkodrës, Kamzës, Lezhës, Devollit, Mallakastrës e me radhë bashkive blu, qeverisjen e munguar deri më sot, pavarësisht nëse ju do të dilni apo jo në votime. Kudo ku do të fitojmë aty ku kemi kundërshtarë të regjistruar, njësoj si aty ku s’kemi të tillë, ne do të jemi në dispozicion të të gjithë qytetarëve pa dallim. Betejën politike me udhëheqjen tuaj ne e kemi fituar dukshëm e bindshëm, sa për meritën tonë aq edhe për paaftësinë e asaj udhëheqjeje – ndajeni vetë cila nga të dyja peshon më shumë. Por betejën e vërtetë, më të vështirën, ne e kemi me plagët e qyteteve e të fshatrave kudo në Shqipëri, po sidomos aty ku ende era e ndryshimit të madh urban të katër viteve të fundit, s’ka fryrë sa e si duhet si pasojë e keqqeverisjes vendore të shumë bashkiakëve demokratë.

Me respekt të plotë për të drejtën tuaj për të menduar ndryshe prej meje, ju përshëndes e ju uroj çdo të mirë e shëndet në familjet tuaja.

Edi Rama

1 qershor, 2019

“Ju uroj mirëseardhjen në këtë sofër tradicionale Iftari ku buka që ndajmë së bashku është dëshmia më domethënëse se si zemra i flet zemrës, sipas një shprehjeje të bukur të të madhit Kardinal Njuman”.

Më këto fjalë e nisi përshëndetjen Kryeministri Edi Rama në sofrën tradicionale të Iftarit, të shtruar në Natën e Kadrit, në kuadër të Muajit të Madhnueshëm të Ramazanit, ku ishin të pranishëm drejtues të besimeve fetare në vend, besimtarë, ministra, diplomatë të huaj, deputetë të Partisë Socialiste, etj., në Pallatin e Brigadave.

“Dëshiroj t’i uroj një mirëseardhje të veçantë Basri Tanushit, Osman Bashës dhe Rakip Cukut, baballarë dhe vëllezër të “Dëshmorëve të Atdheut” Klodian Tanushi, Ibrahim Basha dhe Artan Cuku. Ndihemi të nderuar e të prekur që ju kemi këtu mes nesh. I përjetshëm dhe i paharruar kujtimi i bijve tuaj “Dëshmorëve të Atdheut” tonë të përbashkët!”

“Përjetimin më të mirë të kësaj nate të mirë të Kadrit e bën më të ndjerë kumbimi i ndjeshëm i zërit të Ezanit, i cili paqësisht, qetësisht, qartësisht, thërret prej shembullit të përulësisë personale forcën e lutjes së përbashkët. Sipas traditës islame, i pari që e lartësoi Ezanin ishte një skllav, abisinasi Bilal, i emancipuar mbi nënshtrimin dhe përbuzjen nga mëshira e Bubekrit, ky i fundit shok i armëve dhe lutjeve të Profetit, u prek më tepër nga forca e shembullit të Bilal Etiopasit, sesa nga shembulli i forcës që mishëronin ata që kalëronin në krah të tij dhe kryqëzonin shpatën me armikun”, – theksoi Rama.

Kryeministri u shpreh se “është gjë e ndjerë dhe e bukur, kur kinse për ta respektuar zërin paqeprurës që vjen nga shkretëtirat dhe nga tutje-tëhut e kohërave edhe vetë adhuruesit e forcës, e reshtin poteren, i squllin flakadanët dhe ulen në sofër, siç thonë ata në respekt të besimtarëve. Por më pas kur Ezani hesht, ç’bëhet me poteren, ç’bëhet me flakadanët, po për besimtarët kush mendon me respekt? A thua se kur shkon lutja, shkon edhe shembulli e mbetet ndasia, e vazhdon jeta, sikur asgjë të mos kish ndodhur. Megjithatë në sofrën e Iftarit ka vend për të gjithë, edhe për hipokritët, për të cilët i shenjti Kuran dëshmon që janë gënjeshtarë”.

“Për të përligjur forcën hipokritët përpiqen t’i afrohen forcës që mbart shembulli ta shpërdorojnë dhe ta transformojnë, megjithatë më të fortë sesa shembulli i pararendësve nuk ka dhe t’u përngjash atyre është virtyt”, – tha Rama.

Duke falënderuar të gjithë për praninë në këtë sofër tradicionale, Rama tha se “jemi të rrethuar nga mure që rrezatojnë histori pushtetesh dhe që na mësojnë nëse kemi vesh t’i dëgjojmë, që pushtetet ndërrohen, por shtegu i arsyes mbetet dhe kush prej tij devijon, humb pushtetin mbi vetveten. Qoftë edhe kjo banesë meditimi sot e kthyer në e tillë për shkak të sofrës së Iftarit, një shëmbëlltyrë për urtësi dhe paqe, e dashtë Zoti, rrezatoftë edhe më gjerë!”

“Në fund fare, siç thotë fjala në Kuran, këtë banesë të mbrame ia japim atyre që nuk duan të jenë kryeneçë e të marrin njerëzit në qafë. Gjithçka në fund i përket atyre që u ka përkitur gjithmonë, janë ata që i frigohen Zotit. Iu qoftë i lehtë agjërimi të gjithë besimtarëve myslimanë, të gjithë juve dhe të gjithë atyre që sipas fjalëve të shenjta janë në besë dhe gjithë sa janë i përngjiten paqes, larg ecejakeve të ndasibërësve, zullumqarëve të pandreqshëm”, – tha Rama./atsh

https://www.facebook.com/edirama.al/videos/2364648853808101/?t=0

Opozita është qartësisht e vendosur që të pengojë hapjen e negociatave”, deklaroi kryeministri Edi Rama.

Në emisionin “Open”, Rama tha se “fjala vjen në Gjermani nuk diskutohet aq se, a duhen hapur apo jo, por koha që i duhet Bundestagut që është shumë i shkurtër që të marrë vendimin e pastaj Kancelarja duhet ta çojë në Këshill.

Duke theksuar se për hapjen e negociatave janë plotësuar kushtet teknike, Rama shtoi se është Këshilli Europian që duhet të marrë vendimin përfundimtar duke vlerësuar mbi subjektivitetin politik legjitim.

Gjithashtu, gjatë emisionit, Rama tha se Shqipëria nuk ka humbur kohë sa i përket procesit të integrimit pasi Qeveria ka nisur procesin ‘screening’ që realizohet nga secili shtet që ndodhet në negociata me BE-në.

“Ajo që ka ndohur ‘de facto’, Shqipëria hyn në procesin ku hyjnë vendet që hapin negiociatat. Pse u bë kjo? Për të mos humbur dhe sepse të dyja vendet (Maqedonia e Veriut) ishin gati për të hapur negociatat. Ne nuk kemi humbur kohë”, deklaroi Kreu i Ekzekutivit./atsh

Kryeministri Edi Rama deklaroi mbrëmjen e sotme se qëndrimet e opozitës, janë një skenë e përsëritur, e parë dy vjet më parë me çadrën e ngritur nga PD.

“Është një situatë e përsëritur, e kemi parë dy vjet më parë, ka ndryshuar formë, nuk është më një çadër, por një parti që ka braktisur parlamentin pa kthim. Kanë veshur jelekët e verdhë të një lëvizjeje e cila është karakteristikë e grupeve që krijohen për t’u bërë vizibël, por asnjëherë e partive politike dhe kërcënon njësoj si atëhere që nuk do ketë zgjedhje nëse nuk bëhet siç duam ne. Ndryshimi ndoshta është në faktin që jemi në kushtet kur ka një vendosmëri për t’i shkuar deri në fund një rruge qorre që në këndvështrimin tim është vetëvrasje politike dhe nga ana tjetër, thirrjeve për dialog i vjen gjithmonë e njëjta përgjigje standarde, e përsëritur pa pushim”, – tha Rama, i ftuar në emisionin “Open”.

Për sa i përket përgjegjësive lidhur me këtë situatë, Kreu i Ekzekutivit tha se dy përgjegjësitë e tij të mëdha janë besimi që i është dhënë përmes zgjedhjeve dhe zbatimi i Reformës në Drejtësi, të cilat sot kanë frikësuar opozitën, aq sa e kanë shtyrë të dalë në rrugë.

“Unë kam konstatuar dy përgjegjësi të mëdha, njëra është që ne kemi fituar zgjedhjet në mënyrë dërrmuese për opozitën që ka dalë tanimë në rrugë dhe kjo e bën opozitën që t’i friket zgjedhjeve dhe përgjegjësia tjetër, që kemi çelur një rrugë pa kthim për një reformë të thellë në sistemin e drejtësisë, të cilën këto forca të bashkuara rrugëve, nuk e kanë dashur që ditën e parë”, – tha ai.

“Frika nga zgjedhjet, paniku nga zbatimi i Reformës në Drejtësi, janë shtysa të forta që kanë përcaktuar rrugën qorre të opozitës”, – theksoi Rama. /atsh