Politike

“Përgjimet nuk janë prova, por janë mjetet për të gjetur prova dhe në bazë të tyre hetohet më tutje për të zbardhur një të vërtetë”, deklaroi sot deputetja e Partisë Socialiste, Klotilda Ferhati, duke komentuar përgjimet e publikuara nga “Bild”.

E ftuar në një studio televizive, deputetja Ferhati tha se, “detyra e personave që kishin akses në këto dosje ishte të hetonin dhe jo të nxirrnin informacion”.

“Kushdo që ka nxjerrë informacionet hetimore për t’i bërë publike duhet ta tregonte gjithë këtë zell për profesionin. Ne nuk duhet të flasim fare për çështjet nën hetim, sepse prokuroria dhe gjykatat duhet të bëjnë punën e tyre. Nuk mundet kurrsesi të interpretohet një pasazh i shkëputur i një dosjeje dhe të dilet në konkluzione”, – tha ajo.

Ferhati theksoi se nga ajo që ka dëgjuar në kronika televizive nuk ka asnjë implikim të atyre që thuhen, në vepra penale të kryera nga eksponentë të PS-së në lidhje me zgjedhjet.

“Media, sado prestigjioze qoftë, nuk është gjykatë e prokurori. Në çdo vend të botës kështu është, ndaj organet ligjzbatuese do të doja që të bënin punën e të hetojnë dhe zbardhin të vërtetën”, – tha Ferhati.

Sipas saj, “rrjedhja e informacionit nga një dosje e cila është nën hetim, përbën shkelje”. Ferhati tha se “përgjegjësia qëndron brenda institucionit dhe kushdo që nxjerr informacion duhet të ketë kujdesin e duhur që të mos cenojë interesat e drejtësisë”.

“Këtu nuk po flitet për diskutime të natyrës morale, por për implikime në vepra të rënda. Çdo politikan është i detyruar moralisht të ketë një komunikim korrekt me të gjithë zgjedhësit në zonën e tij dhe nuk mund t’i kërkojë banorëve certifikatën e penalitetit”, tha Ferhati.

Ajo theksoi se “me këto situata synojnë të krijojnë në këto momente rrëmujë dhe “trazira” për t’i vënë perde punëve reale që po bën kjo qeveri”. “Nëse ka një çështje ku drejtësia duhet të flasë, të lëmë drejtësinë të flasë. Ne nuk mundemi me komentet tona të marrim rolin e gjykatës e të prokurorisë”, – tha ajo./atsh

Kryeministri Edi Rama gjatë një takimi elektoral, në kuadër të hapjes së fushatës elektorale në Mirditë ka theksuar se Shqipëria në 30 qershor do të jetë ndryshe, ku hienat që kërkojnë të lënë pas këtë popull do t’i lëmë njëherë e mirë me të shkuarën.

“Në 30 qershor është shumë e rëndësishme që edhe Shqipëria të jetë ndryshe dhe të përgatitet për një ndryshim shumë të madh, që këto fantazma e hiena të të kaluarës dhe këtë udhëheqje të dalë mendsh, ta lëmë pas njëherë e mirë në të shkuarën. Kështu edhe demokratët do të çlirohen se nuk do të shterojnë, dhe PD do marrë një impuls të ri dhe do kuptojnë se nuk vijohet duke shkuar pas një udhëheqjeje të marrë fund në çdo aspekt dhe mbi të gjitha s’mund të shkohet pas një udhëheqjeje që synon pushtet për vete dhe që ska asnjë sens të drejtimit të Shqipërisë”, – theksoi Rama.

“Shqipëria ka shumë sfida dhe probleme, por Shqipëria është e sigurt që bëhet dhe ne do ta bëjmë me mbështetjen e shumicës dërrmuese të shqiptarëve dhe me fuqinë transformuese të Partisë Socialiste”, theksoi Rama.

“Në mbyllje unë dhe njëherë dua t’i uroj Ndrecës të ketë sa më shumë pasion për Mirditën dhe të ketë sa më shumë ambicie për t’i çuar deri në fund projektet që ka nisur dhe të ketë respekt e mirënjohje për mirditorët dhe uroj të mos e humbasë atë asnjëherë”, – tha Rama. /atsh

Ata kanë vjedhur për çdo punë që kanë bërë, ndërsa ne kemi vijuar para me reformat dhe kemi transformuar çdo bashki ku kemi drejtuar”, deklaroi sot Kryeministri Edi Rama.

Në çelje të fushatës elektorale për zgjedhjet e 30 qershorit, Kryeministri Rama u ndal te transformimi që ka kryer Rilindja Urbane në çdo bashki.

“Opozita që sot është në rrugë vetëm akuzon për vjedhje sepse të punosh për ata do të thotë të vjedhësh. Ata nuk e kanë nisur kurrë një punë pa menduar se çfarë ka për të vjedhur dhe kanë vjedhur në çdo punë që kanë bërë. Nuk kemi ça t’u bëjmë, janë të mbrapshtë”, tha Rama.

Kryeministri tha se bashkitë e qeverisura nga PS-ja në këto 4 vite janë si nata me ditën me bashkitë e qeverisura nga PD.

“Kujtoni Tiranën, Korçën, Dibrën në kohën e tyre dhe shikojini këto bashki në qeverisjen tonë. Kujtoni Fierin, Elbasanin, Pukën, Roskovecin, Divjakën kur ishin në dorën e tyre dhe shikoni sot. Kujtoni çfarë bënë ata me Shkodrën për 30 vjet me radhë dhe shikoni se çfarë bëmë ne me Vlorën për vetëm 4 vjet”, tha Rama.

Kryeministri u ndal në investimet kryesore që kanë transformuar jetën e banorëve, siç është impianti i përpunimit të mbetjeve në Sharrë.

“Shikojeni sot Sharrën e plehrave që në kohën e tyre digjeshin në buzë të lumit dhe prodhonin re të zeza në gjithë Kombinatin. Na shajnë dhe akuzojnë se si e kemi kthyer atë kancer në një park ekologjik të kohës të fundit, duke zeruar ndotjen në Tiranë”, tha Rama.

Kryeministri theksoi se “kudo ku kemi investuar për të zeruar ndotjen e tmerrshme nga djegia e plehrave rrugëve, ata kanë dalë dhe kanë thënë se është vjedhje”.

“Edhe për zhdukjen e kancerit të Porto Romanos që do ta transformojmë në një park të madh për të gjitha moshat, jam i sigurt se do të thonë të njëjtën gjë”, tha Rama.

Duke u ndalur te investimet në Vlorë, Rama tha se edhe për Lungomaren dhe Bulevardin e Ri ku po përfundon puna transformuese që do t’i japë kuptim qytetit turistik, ata kanë të njëjtat akuza për vjedhje”.

“Në Lezhë jemi aktualisht duke ‘vjedhur’ në rrugën Milot-Balldren që ata e kthyen në autostradën e vdekjes, ndërsa ne do ta transformojmë në një autostradë europiane me standard A. Bashkë me Pjerin Ndreun ne do të vazhdojmë me rrugën e re turistike Shëngjin-Velipojë”, tha Rama.

Në Shkodër, Kryeministri tha se “kemi bërë një punë të madhe duke anashkaluar kryebashkiaken më të paaftë, ndërsa bashkë me Valdrin Pjetrin do t’i japim Shkodrës uanzën turistike të liqenit, që do të jetë njësoj e bukur si Lungomare e Vlorës”. /atsh