Politike

Zëdhënësja e Kryesisë së PS-së Elisa Spiropali e ka cilësuar vendimin për shfuqizimin e Dekretit të zgjedhjeve më 30 qershor si akt brutal të Ilir Metës mbi Republikën parlamentare të Shqipërisë.

Pas mbledhjes së kryesisë së PS-së, ministrja e Shtetit për Marrëdhëniet me Parlamentit, njëkohësisht zëdhënëse e qeverisë, Spiropali deklaroi sot se “kryesia e PS ka diskutuar mbi aktin brutal të Ilir Metës mbi Republikën parlamentare të Shqipërisë. Kryesia e PS ka vendosur që të enjten në seancën plenare të zhvillojë një debat të gjatë parlamentar duke shtjelluar të gjithë argumentet sesi Ilir Meta ka sulmuar brutalisht Republikën dhe ka shpikur një institucion që nuk ekziston në asnjë vend të botës në asnjë Kushtetutë të quajtur ç’dekretim”.

Sigurisht, tha ajo, “ky debat do t’i përmbledhë të gjitha argumentet tonë dhe patjetër që në fund do t’i takojë Kolegjit Zgjedhor apo KQZ ta shqyrtojë nga pikëpamja juridike. Por ne si kryesi e PS mendojmë që Ilir Meta e ka humbur të drejtën për të qëndruar në atë pozicion dhe sigurisht parlamenti i Shqipërisë do të fillojë procedurën e shkarkimit të Ilir Metës nga pozicioni i Presidentit të Republikës”.

E pyetur nga gazetarët se kur do të nisin procedurat, Spiropali tha se “do të nisë menjëherë në seancën parlamentare të së enjtes, kur të gjitha argumentet do shtjellohen plotësisht. Dhe po ju them që është detyra jonë politike për të mbrojtur Kushtetutën dhe për të mbrojtur rendin kushtetues në vend dhe për të mbrojtur Republikën tonë parlamentare”.
“Sigurisht do i takojë Gjykatës Kushtetuese në fund ashtu siç edhe ligji e parashikon, por kjo nuk na heq neve të drejta për të zhvilluar procesin e shkarkimit të Ilir Metës”, tha Spiropali.
E pyetur se kur do të mbahen zgjedhjet, Spiropali tha se, “në 30 qershor do të ketë zgjedhje. Data është 30 qershor”.
Spiropali tha gjithashtu se, PS ka vendosur ti bashkohet fondit të solidaritetit për banorët e prekur nga tërmeti në Qarkun e Korçës dhe konkretisht të alokojë një fond prej 70 milionë lekësh.
“Bashkitë socialiste së bashku me biznesin, të cilit i është thirrje për t’u bashkuar në këtë fushatë solidariteti kanë kontribuar dhe do të ndërtojnë shtëpitë e banorëve të Floqit, të Qafëzezit, Vidohovës apo fshatrave të tjerë. Partia Socialiste ka vendosur ti bashkohet kësaj fushate duke hequr nga fondet e saj dhe duke ia shtuar fondin e solidaritetit”, deklaroi ajo./atsh

https://www.facebook.com/edirama.al/videos/372543463374017/?t=0

Presidenti Ilir Meta argumentoi sot arsyet që e çuan drejt marrjes së vendimit për shfuqizimin e dekretit për datën e zgjedhjeve të 30 qershorit.

Në një konferencë për shtyp nga presidenca, Meta tha se “Presidenti i Republikës është organi i vetëm që ka për kompetencë caktimin për datën e zgjedhjeve”.

“Në zbatim të neni 92, Presidenti i Republikës është organi i vetëm kushtetues që ka për kompetencë caktimin e datës së për zhvillimin e zgjedhjeve për Kuvendin, për organet e pushtetit vendor si dhe për zhvillimin e referendumeve. Konkretisht në këtë dispozitë të saj Kushtetuta përcakton se, “Presidenti cakton datën e zgjedhjeve për Kuvendin, për organet e pushtetit vendor dhe për zhvillimin e referendumeve”. Sipas Kushtetutës, pa patur një datë të caktuar nga Presidenti i Republikës, zgjedhjet e përgjithshme apo zgjedhjet për organet e qeverisjes vendore, nuk mund të zhvillohen. Zgjedhja e kushtetutëbërësit, që të jetë pikërisht Presidenti i Republikës autoriteti që ushton kompetencën kushtetuese të caktimit të datës së zgjedhjeve është e lidhur ngushtësisht dhe në mënyrë të drejtëpërdrejtë me rolin dhe funksionin e tij si Kreu i Shtetit dhe përfaqësues i unitetit të popullit”, tha ai.

“Referuar këtij roli që i është dhënë Presidentit në nenin 86 të kushtetutës, kushtetutëbërësi ka vendosur që të jetë pikërisht ai organi që duhet të caktojë datën e zhvillimit të zgjedhjeve, sepse dita e realizimit të tyre duhet të jetë një moment bashkimi për qytetarët shqiptarë, ku ata lirisht zgjedhin midis alternativave dhe kurrsesi kjo s’mund të jetë një ditë përçarje midis tyre”,tha ai.

Presidenti tha se dita e realizimit të zgjedhjeve duhet të jetë një ditë bashkimi dhe jo përçarje për popullin dhe se 30 qershori është dekretuar në kushtet e një klime normale në vend.

“Presidenti ka ndjekur në vijimësi masat administrative për realizimin e këtij procesi, por rezulton se në skadim të afatit të regjistrimit të partive politike, ato të opozitës nuk janë regjistruar, pasi sipas tyre nuk mund të garantohen standardet për zgjedhje të lira. Ky vendim i opozitës, pason vendimin e saj për djegien e mandateve. Nga ana tjetër Shqipëria po kalon një krizë kushtetuese. E gjithë kjo gjendje është shqetësuese dhe rrezikon stabilitetin e vendit”, deklaroi ai.

“Nga ndjekja e këtij procesi, rezulton se në skadim të afatit të regjistrimit të kandidatëve dhe partive politike për pjesëmarrje në zgjedhjet e 30 qershorit, partitë politike të opozitës, nuk janë regjistruar në Komisionin Qëndror të Zgjedhjeve, duke parashtruar publikisht se shkaqet për mospjesëmarrje në zgjedhjet vendore kanë të bëjnë me faktin se nuk mund të sigurohet zbatimi dhe respektimi i standardeve kushtetuese për zgjedhje të lira dhe të ndershme. Ky vendim i opozitës për të mos u regjistruar si subjekte zgjedhore për të konkuruar për organet e qeverisjes vendore, pason vendimmarrjen e saj për djegien/dorëheqjen në bllok nga ushtrimi i mandateve të deputetëve opozitarë në Kuvendin e Shqipërisë, duke bërë kështu që edhe jeta politike parlamentare të pësojë një krizë të rëndë përfaqësimi”, tha ai.

Ai tha se “zhvillimi i zgjedhjeve në kushtet tensionuara sjell jo vetëm bojkot por edhe rrezikun e një konflikti civili. Presidenti ka përgjegjësinë që të sigurojë bashkëjetesën demokratike e cila vjen para çdo rregullimi tjetër”.

Shqipëria, tha ai, po kalon një krizë të rëndë kushtetuese, e cila evidentohet qartë me faktin se prej më shumë se një viti Republika e Shqipërisë nuk ka një Gjykatë Kushtetuese funksionale, dhe si për ta rënduar më shumë këtë gjendje, së fundmi edhe Gjykata e Lartë është jashtë funksionit të saj.

Meta tha se e gjithë kjo gjendje, është shumë shqetësuese dhe rrezikon seriozisht stabilitetin demokratik të Shqipërisë, kjo për faktin se mekanizmat kushtetues që mbajnë nën kontroll dhe garantojnë ndarjen dhe balancimin midis pushteteve nuk janë funksionalë.

“Si President i Republikës, kam bërë të gjitha përpjekjet dhe kam paralajmëruar aktorët kryesor politikë në vend, që të bashkëpunojnë midis tyre me qëllim që të shmangin ndasitë dhe konfliktet midis tyre dhe të bëjnë të gjitha përpjekjet për të bashkëpunuar për realizimin e suksesshëm të të gjitha reformave të rëndësishme, si dhe përmbushjen e të gjitha prioriteteve kyçe që Shqipëria ka të domosdoshme për të arritur sa më shpejt në rezultate pozitive që do të na mundësonin marrjen e një përgjigje pozitive nga vendet e Bashkimit Europian për çeljen e negociatave për anëtarësim”, tha Presidenti.

Më tej, Meta tha se “nga njëra anë, mazhoranca shprehet e vendosur për të shkuar e vetme në zgjedhjet për organet e qeverisjes vendore të planifikuara për zhvillim më datë 30 qershor 2019, pa ezauruar asnjë mundësi për zgjidhjen e krizës politike në vend, madje pa ndërmarrë asnjë hap për të eksploruar mundësitë e arritjes së një kompromisi politik, përpara skadimit të afatit të regjistrimit të kandidatëve dhe partive politike në zgjedhje, por edhe më tej. Nga ana tjetër, edhe opozita shprehet e vendosur se do të pamundësojë, me mjete dhe forma të panjohura, zhvillimin e zgjedhjeve të 30 qershorit, duke e konsideruar zhvillimin e tyre si një provokim të rëndë që i bëhet demokracisë në vend.

Në vlerësim të situatës që po kalon vendi dhe gjuhës së urrejtjes që po përdorin palët politike, Presidenti nënvizoi se ekziston rreziku që Shqipëria të shkojë drejt përshkallëzimit të paparashikueshëm të tensionit social, që mund të shkaktojnë pasoja të pakontrollueshme.

“Si Kreu i Shteti dhe përfaqësues i unitetit të popullit, tha ai, e konsideroj këtë moment si rrezik serioz për sigurinë publike, stabilitetin demokratik, qetësinë dhe paqen në vend. Detyra primare kushtetuese e Presidentit të Republikës është të garantojë unitetin e popullit dhe të mbrojë vlerat dhe parimet demokratike të sanksionuara në Kushtetutën e Republikës së Shqipërisë.

Duke vënë në dukje se organizimi i zgjedhjeve të lira dhe demokratike është baza themeltare e një shoqërie demokratike, Meta nënvizoi se “realizimi i zgjedhjeve për organet e qeverisjes vendore pa pjesëmarrjen e opozitës është problematike në aspektin demokratik, sepse u pamundëson qytetarëve shqiptarë të zgjedhin midis alternativave konkuruese përfaqësuesit e tyre në nivel vendor”. Sipas tij, qytetarëve shqiptarë praktikisht u hiqet mundësia e zgjedhjes mes alternativave më të mira dhe në thelb e drejta kushtetuese për të zgjedhur nuk mund të aplikohet, pra kufizohet. Ai tha se zhvillimi i zgjedhjeve për organet e qeverisjes vendore në 30 qershor 2019, pa pjesëmarrjen e opozitës, e cila përfaqëson së paku gjysmën e elektoratit shqiptarë, cenon edhe disa parime kushtetuese që gëzojnë mbrojtje të posaçme kushtetuese.

“Ky qëndrim, reflektohet edhe në Vendimin e vitit 2007 të Gjykatës Kushtetuese, ku për më tepër gjykata thekson se: “Ndryshe ndodh në rastin e zgjedhjeve vendore. Këtu synohet një lidhje më e ngushtë midis zgjedhësit dhe të zgjedhurit për vetë natyrën e organizimit dhe kompetencave të pushtetit lokal. Është pushteti vendor që kujdeset për zgjidhjen e problemeve aktuale të qytetarëve që lidhen me çështje të tilla si punësimi, kujdesi shëndetësor, arsimi parashkollor, pastrimi dhe gjelbërimi i mjediseve të njësisë vendore, etj”, argumentoi Meta.

“Kjo situatë bëhet edhe më absurde, referuar faktit që për këto zgjedhje në më shumë se në gjysmën e njësive të qeverisjes vendore konkuron vetëm një kandidat për t’u zgjedhur si Kryetar Bashkie, ndërkohë që për pjesën tjetër konkurohet me kandidatë të propozuar nga një forcë politike e regjistruar në minutat e fundit në sistemin gjyqësor, dhe e regjistruar pranë KQZ përtej afateve ligjore. Kjo gjë tregon qartë së ky proces zgjedhor është fiktiv dhe është një element shtesë që provon faktin që standardet demokratike të kërkuara për plotësim jo vetëm që nuk mund të përmbushën, por po shkelen në mënyrë flagrante”, tha ai.

Meta tha se ky rezultat fiktiv që do prodhohej, i bën zgjedhjet e dekretuara për t’u zhvilluar më datë 30 qershor, zgjedhje jo demokratike, sepse cenohen të drejtat kushtetuese të sanksionuara në nenin 1, pika 3, nenin 45 dhe 109 të Kushtetutës.

Presidenti tha se “pjesëmarrja në zgjedhje vetëm e mazhorancës, dhe aq më tepër kur në më shumë se gjysmën e njësive të qeverisjes vendore është regjistruar vetëm një kandidat, cenon rëndë parimin kushtetues të pluralizmit mbi të cilën ndërtohet funksionimi i shtetit të së drejtës”. Kryetari i Shtetit, shtoi ai, ka përgjegjësinë kushtetuese të mbrojë parimet themelore të Kushtetutës së Republikës së Shqipërisë, duke ndërhyrë në çdo rast kur këto parime rrezikojnë të kërcënohen.

“Është fakt publik, që në mënyrë të vazhduar partitë politike të opozitës, nuk kanë shprehur vullnetin për mospjesëmarrje në zgjedhje, por ngrenë shqetësimin se bazuar në faktet dhe të dhënave, si dhe historikut e mënyrës së zhvillimit të tyre ndër vite, të referuara këto edhe në raportet dhe rekomandimet e OBSE/ODHIR-it për proceset zgjedhore të zhvilluara në dekadat e fundit, zgjedhjet e planifikuara për zhvillim në datën 30 qershor 2019, nuk do të jenë të lira dhe të ndershme”.

Sipas tij, opozita dëshiron të marrin pjesë në zgjedhje, por me kushtin që të garantohet liria e të gjithë qytetarëve për të votuar të lire, si dhe konkurim i lirë i të gjithë forcave politike, në përputhje me parimet kushtetuese dhe rregullat e mirëpërcaktuara ligjore.

Më tej, Presidenti deklaroi se “zhvillimi i zgjedhjeve në kushtet e një situate të tensionuar politike, mund të sjellë si pasojë jo vetëm mospjesëmarrjen në zgjedhje të rreth gjysmës së votuesve, por krijon rrezikun e një konflikt civil, gjë e cila përbën rrezik serioz për dëmtim të jetës dhe shëndetit të qytetarëve, stabilitetin demokratik të vendit, unitetin e popullit dhe rendin kushtetues”. “Presidenti i Republikës, si Kryetar i Këshillit të Sigurisë Kombëtare, ka vënë re se sjellja e aktorëve politike në vend, ka krijuar një klimë të theksuar konflikti që rrezikon stabilitetin e e rendit publik, çka do të përbënte rrezik edhe për vet sigurinë kombëtare të Republikës së Shqipërisë dhe do të defaktorizonte rolin e vendit tonë si faktor paqe e stabiliteti në rajon. Presidenti i Republikës, ka ndjekur të gjitha protestat zhvilluara nga forcat opozitare, ashtu sikundër ka evidentuar edhe kundërpërgjigjen e mazhorancës nëpërmjet mitingjeve të organizuara prej saj në të njëjtën ditë dhe në të njëjtën kohë. Të dy palët kanë bërë nxitje për provokime ndaj njera-tjetrës, ku shpesh herë me deklaratat e tyre i ndajnë qytetarët e vendit në dy pjesë duke i vendosur kështu për shkak të bindjeve politike përballë njeri-tjetrit, të gatshëm për të demostruar fuqinë e secilës palë”, vuri në dukje Meta.

Sipas tij, zhvillimi i protestave dhe i deklarimeve të opozitës si dhe i antimitingjeve apo thirrjeve kërcënuese të mazhorancës nuk japin aspak siguri për zhvillimin e zgjedhjeve, të qeta, të lira, të ndershme, kunkuruese dhe me standarde.

“Nga ana tjetër në protestat e zhvilluara deri më tani nga opozita, janë vërejtur elementë të dhunës ndaj forcave të rendit, apo ndaj pronës publike, ndërkohë që edhe nga forcat e zbatimit të ligjit, janë përdorur mjete, teknika, dhe në disa raste reagime jo proporcionale”, shtoi ai.

“Në kushtet aktuale, anulimi i zgjedhjeve, është mjeti i vetëm emergjent për zgjidhjen e krizës së rëndë politike dhe parandalimin e një përshkallëzimi të pakontrolluar të saj dhe shtyrja e tyre për në një datë tjetër të dakordësuar mes palëve politike, do të shërbejë si nxitje për dialog për zgjidhjen e krizës që po kërcënon stabilitetin demokratik të vendit”, deklaroi Meta.

Presidenti tha se “shfuqizimi i dekretit dhe rrjedhimisht dhe anulimi i datës së zgjedhjeve dhe shtyrja e tyre përtej periudhës zgjedhore të përcaktuar nga Kodi Zgjedhor, në kushtet kur bëhet për të mbrojtur vlera dhe parime kushtetuese, bazë për funksionimin demokratik të shtetit dhe institucioneve, nuk paraqet pengesa nga pikëpamja kushtetuese”.

Presidenti vlerëson të rëndësishëm faktin që, nga mosrealizimi për arsye kushtetuese të zgjedhjeve brenda afatit ligjor, të mos cenohen interesat e qytetarëve shqiptarë.

Meta tha se “si President i të gjithë shqiptarëve, pavarësisht nga bindjet politike, ai nuk mund të qëndrojë indiferent ndaj dëmit të jashtëzakonshëm që kriza politike ka shkaktuar e pritet të shkaktojë edhe më shumë në ekonominë e çdo familje shqiptare dhe në mbarë vendin. Ajo ka injektuar pasiguri tek konsumatori, tek bizneset e vogla dhe të mëdha, investitorët vendas dhe të huaj, në turizëm dhe çdo aspekt tjetër të mbarëvajtjes sociale-ekonomike të vendit.

“Zhvillimi i zgjedhjeve më datë 30 qershor 2019, pa garë dhe pa pjesëmarrjen e opozitës, do të shënonte ngrirjen e progresit të integrimit të vendit në Bashkimin Evropian, do të minonte çdo mundësi për çeljen e negociatave dhe përmbushjen e kriterit kryesor të Kopenhagës për zgjedhje të lira dhe të ndershme, si dhe do të dëmtonte imazhin e Republikës së Shqipërisë si vend anëtar i NATO-s dhe si kryesues i OSBE-së në vitin 2020, kur për vetë OSBE-në çështjet e standardeve zgjedhore janë thelbësore”, tha ai.

“Në rast se në Republikën e Shqipërisë do të zhvillohen zgjedhjet e datës 30 qershor, ku në pjesën dërrmuese konkurron për organet drejtuese vetëm një forcë politike, atëherë kjo situatë përbën shkelje të drejtpërdrejtë të detyrimeve të Marrëveshjes së Stabilizim Asociimit dhe pikërisht në parimet bazë të saj, çka do të përbënte një regres me pasoja shumë të rënda për të ardhmen Europiane të vendit”, deklaroi Meta.

“Ftoj të gjithë aktorët e përgjegjshëm vendas dhe ndërkombëtarë të bashkojnë kontributet konstruktive për rivendosjen urgjent të dialogut të pazëvendësueshëm politik dhe për gjetjen e një zgjidhjeje të shpejtë që i shërben të ardhmes evropiane të Shqipërisë. Ndaj i bindur për rëndësinë e këtij akti historik për të shpëtuar të ardhmen evropiane të vendit dhe për të mbrojtur bashkëjetesën demokratike të të gjithë shqiptarëve po e nënshkruaj këtë dekret përpara të gjithë shqiptarëve”, përfundoi Presidenti./atsh

“Rekomandimi i Komisionit Europian për hapjen e negociatave është njohje e rezultateve të prekshme të reformës gjithëpërfshirëse dhe të plotë të drejtësisë dhe të arritjeve të Shqipërisë në luftën kundër korrupsionit dhe krimit të organizuar”, deklaroi sot përfaqësuesja e lartë për Punët e Jashtme dhe Politikën e Sigurisë, nënkryetare e Komisionit Europian, Federica Mogherini në një takim në Bruksel me ministrin në detyrë për Europën dhe Punët e Jashtme, Gent Cakaj.

Përfaqësuesja e Lartë Mogherini përgëzoi ministrin Cakaj për përsëritjen e rekomandimit të qartë të Komisionit, duke theksuar se ky është një vlerësim i merituar dhe rezultat i reformave gjithëpërfshirëse të ndërmarra nga vendi ynë, duke veçuar arritjet e prekshme në Reformën e Drejtësisë dhe luftën kundër korrupsionit dhe krimit të organizuar. Bashkëbiseduesit ndanë vlerësimin se Shqipëria është e gatshme dhe ka bërë të gjitha detyrat e kërkuara për të hapur negociatat me BE dhe është e nevojshme që Këshilli Europian të reagojë pozitivisht, në linjë me rekomandimin e Komisionit.​

Ndërsa Cakaj u shpreh se, “ishte kënaqësi e madhe për të takuar Federica Mogherinin dhe shkëmbyer pikëpamjet mbi rëndësinë e hapjes së negociatave për tani. Ne presim që t’i respektojmë premtimet e saj dhe kështu të sigurojmë një shtysë të re për reformën dhe progresin në rajonin dhe rajonin”./atsh

“Kjo nuk është një protestë e popullit, por janë protesta të një opozite me një udhëheqje të degraduar që ka humbur logjikën”, – deklaroi mbrëmjen e djeshme Kryeministri Edi Rama.

I ftuar në një studio televizive, Kryeministri Rama tha se “ata tani janë në një situatë dramatike, pasi kanë hedhur në erë urën nga mund të ktheheshin”.

Sipas Ramës, “djegia e mandateve është një gabim strategjik i jashtëzakonshëm dhe duhet të jesh i marrë të bësh atë që bën ata”. Tani, tha Rama, ata i udhëheq marrëzia.

Kjo nuk është një protestë e popullit, tha Rama, duke shtuar se “është një protestë e telekomanduar nga një elitë politike e udhëhequr nga një udhëheqje e verbër”.

“Unë jam shumë krenar për faktin që ne kemi ndryshuar rrënjësisht qasjen e qeverisë dhe shtetit ndaj protestës dhe Policia e Shtetit ka një qëndrim superproporcional. Faktikisht bilancet janë skandaloze me 10, 12 dhe 15 policë që shkojnë në spital. Herën e fundit njëri nga punonjësit mund të kishte humbur syrin”, – tha Rama.

Në këtë aspekt, Rama tha se, “kemi qenë një model i ri”. “Unë kam dalë në protestë në një kohë kur ishte reale mundësia që të humbisje dhe kokën, dhe kanë humbur jetë”, – tha Rama.

Kryeministri shprehu bindjen se “protestat vijnë duke rënë në numër dhe vijnë me premisa dhune më të mëdha”. “Ky është degjenerim i partisë që lindi si krijesa e parë e pluralizmit.
Trazirat prodhojnë imazhe skandaloze për Shqipërinë”, – tha Rama.

Ai u shpreh se “unë mund të bëj gabime dhe mund të mos arrij dot t’i bëj të gjitha gjërat si dua, por unë gjithmonë prirem për të bërë një gjë të drejtë, jo për të bërë një gjë të shtrembër, apo për t’i bërë keq të tjerëve”.

“Nuk ndjehem si një njeri që është punësuar kryeministër për karrierë politike, por sepse ndiej se kam një mision, një detyrim dhe përpiqem të bëj gjënë e duhur. Nuk bëj kurrë gabime të qëllimshme, si rasti i Gërdecit, që ishte të bëje me qëllim një gjë komplet kriminale. Nëse ne do të shpërblenim politikën e destruksionit ekstrem, ne do të hynim në një epokë politike ku destruksioni do të vendoste rregullat”, – tha Rama./atsh

Kryeministri Edi Rama deklaroi sot në mbrëmje se “përgjimet nuk janë prova, por indicie të caktuara që duhen hetuar”.

I ftuar në një studio televizive, Kryeministri Edi Rama foli për rastin e përgjimeve të publikuara nga “Bild”.

“Së pari, dua të them diçka që më duket e rëndësishme dhe nuk më është dhënë mundësia ta them më parë. Një urdhër absurd i Prokurorisë për të ndaluar mediat që të publikojnë, që nuk e di sa i referohet ndonjë ligji të shkruar apo jo. Por di se është i gabuar, sepse mediat për atë punë janë, të nxjerrin çfarë gjëje u bie në dorë. Nuk ka asnjë kufizim në këtë pikë, Wikileaks tronditi botën, por nuk di të jetë hapur ndonjë proces penal apo gjyqësor për ‘Nju Jork Times’, por u shpall një arrest ndërkombëtar për Asange”, – tha Rama.

Sipas tij, “mediat janë lajmësi, që në këtë rast nuk ka asnjë faj në raport me publikimet”.

Çështja, tha Rama, “ka disa aspekte”. “Së pari, e kam thënë dhe e përsëris, kam neveri nga përgjimet dhe përdorimi i përgjimeve, sepse janë shumë të rrezikshme në aspektin e devijimit nga e vërteta, sepse mund të nxirren apo futen në një kontekst të caktuar”, – tha Rama.

Por, sipas tij, “ka një aspekt moral dhe jemi në kushtet kur kryetari i bashkisë së Durrësit nuk është më kandidat, por është një njeri i lirë që duhet të përgjigjet deri në fund lidhur me të vërtetën”.

“Nga ajo që kam parë, shikoj që ka një shëmti që të vjen për të vjellë kur dëgjon biseda të caktuara, por e rëndësishme është se sa këto janë muhabete të materializuara në fakte, ose sa këto janë muhabete njerëzish të cilët bëjnë sikur kontrollojnë planetin me telefon dhe bëjnë sikur do zgjidhin problemet”, – tha Rama.

Po ashtu, Kryeministri theksoi se “ka një aspekt ligjor, pasi kemi të bëjmë me një katastrofë nga pikëpamja e administrimit të gjithë këtij procesi”.

“Është përgjegjësi e prokurorëve të ruajnë sekretin hetimor, të hetojnë në mënyrë transparente dhe të përputhin çfarë indiciesh jep një përgjim. Zanafillën kjo e ka te iniciativa e Policisë së Shtetit shqiptar që filloi ndjekje ndaj një bërthame të caktuar dhe e ka referuar në Prokurori. Gjithë këta njerëz janë në burg, jo në gjendje të lirë”, – theksoi Rama.

Në aspektin politik, që është aspekti më problematik, Kryeministri tha se beson se kjo është një dosje që është mbajtur në sirtar për shantazh politik dhe është një dosje që lidhet me atë që unë e kam quajtur tërmeti që do të krijojë Reforma në Drejtësi që është në proces”.

Rama tha se “nuk është rastësi, por përkundrazi, të shikosh se si një material i tillë nuk është përdorur as për të vepruar, as për t’u thelluar e kapur në flagrancë nëse do të kishte diçka”.

“Por ajo u përdor për t’u mbajtur e nxjerrë përmes politikës, për qëllime politike, si rezultat i lidhjes së një segmenti të caktuar në prokurori me politikën”, – tha Rama.

Pastaj, shkon edhe më tutje, shtoi Kryeministri, duke iu referuar faktit se këto materiale u morën dhe u ekspozuan në një gazetë me tirazh shumë të madh në Gjermani, duke synuar ta fusin në një kornizë të një zbulimi gjerman.

“Nuk është zbulim i askujt, është shpërdorim i detyrës, nxjerrje e sekretit hetimor, kalim të politikës dhe sugjestionim. Një gazetar gjerman ka marrë çfarë i kanë dhënë, dhe kjo në momentin kur ne presim nga Gjermania dhe vendet e tjera të marrim një ditë jeshile për negociatat”, – tha Rama.

Po ashtu sipas tij, “kjo përdoret si ushqim që helmon shumë njerëz këtu dhe situatën atje, duke u dhënë argumente të gjithë atyre që duan të kapen”./atsh

Edi Rama është kryeministër i Shqipërisë që prej vitit 2013. Kryetari i Partisë Socialiste të Shqipërisë dhe ish-kryebashkiaku i Tiranës, Rama, shquhet edhe për faktin se ai është gjithashtu një artist i afirmuar. Përtej drejtimit të reformave historike, zhvillimit urban të vlerësuar me çmime dhe përgatitjeve për fillimin e negociatave për anëtarësim e Shqipërisë në BE, ai gjithashtu ka projektuar dekorin e zyrës se tij, ku janë vendosur vepra arti dhe shpesh bën piktura të gjalla që lidhen ngushtë me axhendën e tij, shkruan gazeta e njohur gjermane ”Die Welt”, në një intervistë me kryeministrin Edi Rama.

”Përmes elementeve të gjalla plot ngjyra, ai përshkruan bukurinë dhe të pazakonshmen e udhëtimit të Shqipërisë për të siguruar fillimin e bisedimeve për pranimin në BE dhe arsyen pse Angela Merkel tashmë është shndërruar në kampionen kryesore të vendit të tij”, shton gazeta gjermane.

Kjo intervistë shoqërohet edhe me një jetëshkrim origjinal për kryeministrin Rama, ku mes të tjerash thuhet se:

I konfirmuar për mandatin e tij të dytë si kryeministër i Shqipërisë në 2017, Edi Rama i ka përqëndruar gjithë energjitë e tij në përshpejtimin e hapjes së negociatave të anëtarësimit në BE-në. Edhe pse sondazhet flasin për një mbështetje popullore prej 80 për qind për përpjekjet tij në procesin e integrimit dhe progresin e qëndrueshëm në reformat me shkallë të gjerë, Rama ende përballet me probleme që pengojnë ambiciet e tij për t’u integruar në BE.

Një artist, dhe më vonë profesor arti, shumë kohë para se të hynte në politikë, kryeministri Edi Rama ka ndërmarrë një mision për të sjellë ngjyra në jetën e njerëzve. Për shumicën e shqiptarëve të epokës komuniste, mungesa e lirisë rivalizonte aksionet e mjerimit me mungesë shërbimesh, arsimim që linte shumë për të dëshiruar, strehim jashtë standardeve dhe mjedis të shëmtuar.

Pasi u bë kryebashkiak i Tiranës, i hyri punës për të ngritur moralin e vendit dhe dhe njerëzve. Buldozerët shkatërruan ndërtesa të reja të ndërtuara pa respektuar asnjë kriter nga spekulatorët dhe shumë blloqe të vjetra apartamentesh u pikturuan me ngjyra të forta dhe të ndritshme. Përmirësimi i infrastrukturës eci më ngadalë pasi duheshin shumë fonde për ta realizuar.

Kryeqyteti dikur sa një rrethinë qyteti u zgjerua pesëfish në sipërfaqe.

“Ngjyrat nuk ishin art për mua”, thotë Rama. “Ishte një veprim politik, me ngjyra. Ne nuk kishim para për projekte të mëdha ndërtimi. Njerëzit asokohe kishin nevojë për gjithçka: furnizim me ujë, rrugë, ndriçim. Kur unë mora postin e kryetarit të bashkisë, në Tiranë kishte vetëm 78 drita në rrugë të cilat ishin në gjendje pune. ”

Megjithatë, zgjidhja e shpejtë që ishte lyerja me bojë pati një impakt të jashtëzakonshëm. Niveli mesatar i mbledhjes së taksave vendore ka qenë rreth katër për qind. ‘’Në zonat ku ishin pikturuar apartamentet, niveli u rrit deri në 100 për qind’’, thotë ai. Menjëherë pasuan projekte më të mëdha dhe më të mira, duke përfshirë rinovimin e sheshit Skënderbej në Tiranë, i cili fitoi Çmimin Europian për Hapësirën Publike Urbane 2018, një nga çmimet më prestigjoze në arkitekturë.

Hyrja e Ramës në politikë ndodhi në vitin 1998, kur ai u kthye në Shqipëri për të ndjekur funeralin e të atit teksa po konsolidonte karrierën e tij në Paris si artist.

Një ristrukturim i qeverisë la një vend bosh në krye të Ministrisë së Kulturës dhe Rama u zgjodh për këtë post, i cila përfshinte edhe portofolin e të rinjve dhe të sportit. Një personazh që tërhiqte shumë vëmendje, por edhe fizikisht – 1.95 m i gjatë- më i gjatë se shumica e njerëzve, Rama shfrytëzoi kontaktet e tij me botën e artit europian, me pothuajse asnjë financim nga qeveria, duke i ndihmuar krijuesit dhe kuratorët për të hapur një ekspozitë ndërkombëtare me vepra arti.

‘’Ne kemi qenë jashtëzakonisht me fat që kemi jetuar dhe punuar në të njëjtën kohë me Angela Merkel … Unë shpresoj sinqerisht se vizioni i saj nuk do të humbasë, dhe për me tepër , Gjermania duhet të kuptojë se nuk mban përgjegjësi vetëm për të ardhmen e fëmijëve në Gjermani, por edhe për fëmijët në Europë dhe përtej saj “, tha Edi Rama në janar 2019.

Gjatësia e tij e ndihmoi atë të bëhej pjesë e ekipit kombëtar të basketbollit dhe Rama e pranon se kishte një motiv të dytë pas ambicie për sport. Udhëtimet jashtë vendit ishin të ndaluara deri në vitin 1990 dhe arsyeja që ai “dëshironte” të futej në ekipin kombëtar ishte mundësia për të shkuar jashtë.

Udhëtimi i tij i parë jashtë vendit ishte në Austri, edhe pse Muzeu Kunsthistorisches në Vjenë të cilin ai e kishte rrethuar për ta vizituar ishte mbyllur të martën, ditën që ai ishte atje.

Në periudhën e komunizmit, Tirana ishte një rrethine me rreth 200,000 banorë. Deri në vitin 1991 automjetet private ndaloheshin me ligj, dyqanet ishin të pakta dhe të varfra në larmi produktesh dhe ofrohej shumë pak argëtim. Tani ai është një kryeqytet i gjallë, me një hapësirë turistike gjithnjë e në rritje, aktivitete të shumta argëtuese dhe një popullsi prej një milion banorësh, më shumë se një e treta e popullsisë së vendit. Qendra e re për Hapje dhe Dialog ka një galeri arti, një bibliotekë, pika WIFI dhe është e hapur deri në mbrëmje pa pagesë. Qëllimi, Kryeministri citohet në shtypin britanik, ishte të “vendosim katin e parë në dispoziocion të qytetarëve, katin e dytë për qeverinë”.

Pasioni i Ramës për të bërë skica u shtua edhe më shumë gjatë dy viteve në krye të ministrisë së kulturës. Pothuajse pa e vënë re, ai vazhdimisht zbukuronte printimet A4 të axhendës së tij. “Nuk gjeta një mënyrë më të mirë për të menaxhuar këto takime të gjata sesa vizatimi i cili më ndhmoi shumë me përqëndrimin”, tregon ai për ‘’The Guardian’’. “Është një proces që është bërë krejtësisht një pjesë e a imja. Nëse nuk e bëj, ndihem nervoz, thjesht ndjehem sikur nuk jam atje “.

‘’Die Welt’’ e mbyll portretin për kryeministrin Rama duke theksuar se prania e tij në vend dhe rajon sa vjen e rritet.

Intervista e plotë e kryeministrit Rama:

Negociatat për pranimin e Shqipërisë në BE mund të nisin në fillim të qershorit. Cilat janë pritshmëritë tuaja?

Vitin e kaluar, Komisioni i BE-së rekomandoi fillimin e bisedimeve me Shqipërinë. Kjo nuk ndodhi. BE-ja, megjithatë, është angazhuar për fillimin e bisedimeve për anëtarësimin e Shqipërisë në 2019. Jean-Claude Juncker, president i Komisionit Europian, deklaroi në vitin 2014 se procesi i zgjerimi i BE-së mund të ngrinte për pesë vjet dhe tani është viti 2019. Marrëveshja e Maqedonisë së Veriut me Greqinë paraqet një moment historik në diplomaci dhe rajon dhe, në njëfarë mënyre, ka revolucionarizuar mënyrën se si i integron shqiptarët në vend. Duket se ka ardhur momenti i duhur. Në të njëjtën kohë, nuk mund të parashikosh dot asgjë se çfarë do të bëjë më tej BE-ja.

Është një çështje familjare dhe parashikueshmëria është gjëja e fundit që mund të kërkojmë. Ajo që është e rëndësishme është se ne i kemi bërë detyrat tona të shtëpisë dhe që nga viti i kaluar, ne jemi konsideruar nga Komisioni Europian të gatshëm për të filluar negociatat. Komisioni, sipas mendimit tim, është i vetmi trup që ka ekspertizën dhe njohuri të plota mbi historinë e një vendi. Megjithatë, pjesa tjetër është vetëm politike dhe nuk i dihet asnjëherë. Por, në fund të ditës, ajo që është e rëndësishme është se ne nuk e bëjmë atë për të tjerët; ne po e bëjmë atë për vete dhe për fëmijët tanë, sepse procesi i integrimit është një mjet i shkëlqyer drejt modernizimit. Përfshirja e standardeve të BE-së përbën pikërisht atë që brezat e ardhshëm meritojnë.
Unë jam i sigurt se nëse individët që ndërtuan BE-në do të ishin ende përreth, ata do i kishin kuptuar shumë më mirë përfitimet që do të kishin nga anëtarësimi ynë. Për ne, BE-ja është ajo që ishte për ta – një projekt paqeje dhe një hapësirë e caktuar ku nuk kërcënohesh nga konfliktet e së kaluarës.

A ndiheni më pak optimist rreth gjithë këtij procesi?

Jo, unë gjithmonë kam qenë shumë optimist. Jeta ime dhe historia jonë vazhdojnë të më tregojnë se të mendosh me optimizëm të lartë është gjëja më e mirë. Tani, madje edhe holandezët, të cilët ishin skeptikë, kanë thënë se kemi bërë hapa të mëdhenj. Holanda, së bashku me Gjermaninë dhe Austrinë, gjithashtu na kanë ardhur në ndihmë. Të tre vendet janë pjesë e një koalicioni që po na ndihmon në reformën në drejtësi. Ne kemi bërë atë që askush tjetër nuk e ka bërë. Ne kemi ndryshuar Kushtetutën – por jo vetëm këtë; ne i kemi kaluar të gjithë gjyqtarët dhe prokurorët përmes një procesi shumë të vështirë të vetingut dhe po pastrojmë një sistem në mënyrë të tillë që vendet e tjera që janë ende duke negociuar nuk e kanë arritur ta bëjnë. Kjo është bukuria dhe e pazakonshmja e këtij procesi sepse ne mendohet t’i hapim negociatat dhe ne kemi bërë gjëra që vendet e tjera që janë duke negociuar nuk i kane bërë ende.

Mos ndoshta po sugjeroni se ky proces ka qene asimetrik?

Sigurisht. Nuk është një sekret dhe këtë e dinë të gjithë. Për vendet që u anëtarësuan të parët, presioni ishte më i vogël, kishte më pak kërkesa dhe procesi nuk ishte i rreptë. Dhe më pas, për çdo vend që anëtarësohej, ka qenë më e vështirë.

A mendoni se ka më pak dëshirë për vendet e reja që të bëhen pjesë e Bashkimit Europian?

Duhet të tregohem i qartë se nuk kemi ndërmend të hyjmë në BE tani – ne duam hapjen e negociatave. Koha për t’u bërë pjesë e Bashkimit Europian do të vijë më vonë. Është si të diskutosh rreth martesës, jo të martohesh. Kjo e bën atë mjaft të mërzitshme dhe madje absurde sepse kemi bërë gjithçka për hapjen e negociatave dhe po trajtohet sikur po vendosin nëse ne do të hyjmë apo jo në BE. Kjo nuk është e vërtetë.

Si mund të përfitojnë BE-ja dhe Gjermania nga fillimi i këtyre bisedimeve?

Nuk do t’u them asgjë. Ata janë në një pozicion ku mund të mendojnë çfarë duan. Ata janë më të fortë; ata nuk kanë parë luftë në jetën e tyre. Pra, për ta, nuk është kaq e lehtë për të kuptuar arsyet pse kemi një ndjenjë kaq të fortë për BE-në. Unë jam i sigurt se nëse individët që ndërtuan BE-në do të ishin ende përreth, ata do i kishin kuptuar shumë më mirë përfitimet që do të kishin nga anëtarësimi ynë. Për ne, BE-ja është ajo që ishte për ta – një projekt paqeje dhe një hapësirë e caktuar ku nuk kërcënohesh nga konfliktet e së kaluarës. Për njerëzit në Europë sot, lufta është vetëm një “fiction” televiziv bardhë e zi. Nga ana tjetër, natyrisht që BE-ja ka problemet e veta. Është një situatë mjaft komplekse, dhe nuk është e lehtë të bëhen parashikime.

A mendoni se është krijuar një ide te gabuar rreth Shqipërisë në Europë?

Unë do të thosha se ka qenë dhe më keq. Po bëhet më mirë dhe do të vazhdojë të bëhet gjithnjë e më mirë sepse shumë njerëz që vazhdojnë të vijnë në Shqipëri po kuptojnë se vendi është tërësisht ndryshe nga përgjithësimet negative të cilave ata u besonin. Kjo ide do të përhapet. Por, në të njëjtën kohë, gazetaria dembele është një karakteristikë e kohës sonë. Nga një gazetari dembele, nuk mund të presësh lajme të mira; mund të presësh vetëm lajme të këqija sepse ato shesin më shumë.

Vitin e kaluar ekonomia shqiptare u rrit me 4,1 për qind, sipas BE-së. Si do ta përshkruanit situatën makro-ekonomike të vendit?

Sipas vlerësimit tonë, në fund të vitit 2018, rritja ishte 4,5 për qind, por kjo rritje vazhdon të ketë të njëjtën vlerë. Ne duam të mbajmë një rritje mbi 4 për qind. Ne kemi pasur gjithashtu një rënie të ndjeshme të papunësisë, nga 18,7 në 12,3 për qind. Qëllimi ynë është ta ulim në 8 përqind. Nuk do të jetë e lehtë, por është e mundur. Kjo është ajo për të cilën ne po luftojmë. Kancelarja Angela Merkel është unike dhe ka një vizion shumë të qartë rreth Ballkanit – për të kaluarën dhe për të ardhmen e këtij rajoni. Kjo është arsyeja pse ajo ka qenë përkrahësja kryesore, ”kampionia” jonë dhe ende mbetet e tille.

Si do ta karakterizonit marrëdhënien dypalëshe mes Shqipërisë dhe Gjermanisë?

Shumë të mirë. Gjermania është Gjermani. Kancelarja Angela Merkel është unike dhe ka një vizion shumë të qartë rreth Ballkanit – për të kaluarën dhe për të ardhmen e këtij rajoni. Kjo është arsyeja pse ajo ka qenë kampionia jonë dhe ende mbetet kampionia jonë. Në sajë të udhëheqjes së kancelares Merkel, Gjermania është bërë shpëtimtarja e Europës. Unë nuk e di se ku do të ishte Europa sot nëse Angela Merkel nuk do të kishte qenë gjatë krizës së refugjatëve. Megjithëse asaj iu desh te paguante një çmim të lartë për këtë, gatishmëria e saj për të paguar atë çmim e bën atë një udhëheqëse të madhe. Gjermania është shumë e drejtë dhe shumë e arsyeshme në përgjithësi, gjë që nuk është e vërtetë për çdo vend.

Është raportuar se Shqipëria ka përfituar një grant historik nga Gjermania. A mund të më tregoni më shumë për rëndësinë e tij?

Ky nuk është një grant – media e bëri që të kuptohet kështu – por është një financim. Në kuadër të bashkëpunimit dypalësh, është një plan shumëvjeçar i financimit përmes Bankës Gjermane për Zhvillim, KfW-së.

Në vitin 2016, Gjermania u bë partneri i katërt më i madh tregtar i Shqipërisë. Çfarë fushëveprimi shihni për të rritur tregtinë dypalëshe?

Ka shumë potencial për të rritur tregtinë tonë dypalëshe dhe unë jam shumë i bindur se pikërisht kjo do të ndodhë, veçanërisht kur bëhet fjalë për produktet tona bujqësore.
Sipas të dhënave të fondacionit ”Heritage”, një e dhjeta e të gjitha IHD-ve që vijnë në Ballkanin Perëndimor vijnë në Shqipëri.

Cilat janë mundësitë për të tërhequr më shumë?

Është një e dhjeta sepse nuk kemi qenë në gjendje të krijojmë një rrugë të qëndrueshme për të rritur IHD-të në turizëm, ku ka potencial më të madh. IHD-të në turizëm kanë qenë në nivele të ulëta dhe në vend të kësaj, sektori i energjisë ka qenë më i rëndësishëm. Tani kemi arritur në fund të testeve përfundimtare me kompaninë ”Shell” për kërkimet e naftës dhe të gazit në zonën offshore. Treguesit sugjerojnë se kjo do të jetë një histori suksesi. Do e marrim vesh këtë pranverë. Nëse lajmi është pozitiv, ne do të kemi një shtim investimesh vjetore në vitet në vijim. Tani, kemi filluar gjithashtu të investojmë në energjinë diellore. Oferta jonë e parë shkoi shumë mirë dhe tani jemi duke përgatitur një të dytë. Prodhimi dhe bujqësia gjithashtu ofrojnë mundësi interesante për investitorët e huaj.

Çfarë ka bërë qeveria juaj gjatë vitit të kaluar përsa i përket infrastrukturës dhe hapjes së korridoreve me pjesën tjetër të Europës?

Ka ende shumë punë për t’u bërë, por aktualisht po zhvillohen disa projekte të mëdha. Unë shpresoj se do të ketë edhe shumë të tjera që do te vijnë nga Procesi i Berlinit.

Për me tepër ju identifikoheni në mënyrë unike midis politikanëve, edhe si një artist. Çfarë po bëni si kryeministër për të mbështetur sferën kulturore?

Për fat të mirë, ne kemi shumë të talentuar dhe njerëz që tashmë po e shprehin veten jashtë vendit. Për shembull, në orkestrën e Filarmonisë së Berlinit ka shqiptarë, ne kemi këngëtarë të shkëlqyer të operas si dhe artistë të shkëlqyer vizualë. Për një vend të madhësisë sonë, ne kemi shumë ndikim në botën e artit. Rehabilitimi i fundit i sheshit ”Skënderbej” në qendër të Tiranës fitoi çmimin prestigjioz europian për hapësirën publike urbane te vitit 2018, që është një nga çmimet më të larta në arkitekturë./atsh