Politike

Zgjedhjet do të mbahen në gjithë Shqipërinë, ata që përpiqen t’i pengojnë janë gabim, luajnë me zjarrin, sepse djegin veten në raport me ligjin, dhe ligjet janë të qarta.

Kështu deklaroi sot Kryeministri i Shqipërisë, Edi Rama, në një intervistë për Radion Europa e Lirë.

“Zgjedhjet kanë një administratë zgjedhore, një gjykatë zgjedhore bazuar edhe në opinion e kahershëm të Gjykatës Kushtetuese të Shqipërisë, çdo problem i kujtdo me zgjedhjet adresohet në Gjykatën Speciale Zgjedhore dhe askund tjetër. Janë përpjekje të dëshpëruara, të cilat nuk kanë asnjë shans që të përmbysin bazën e rregullave të bashkëjetesës demokratike. Nuk është problemi që unë insistoj të shkoj në zgjedhje, unë insistoj që të respektohet Kushtetuta dhe e drejta e popullit për të zgjedhur”, – nënvizoi Rama.

I pyetur se ku e shikon zgjidhjen e krizës, kreu i Qeverisë u shpreh se “zgjidhja është e qartë është zgjidhja që mbështet gjithë komuniteti ndërkombëtar, patjetër edhe gjithë shumica dërrmuese e popullit shqiptar, që do të thotë se zgjedhjet nuk janë të politikanëve janë të popullit. Populli ka të drejtë të zgjedhë në ditën e përcaktuar nga Kushtetuta dhe nga ligji dhe politikanët kanë për detyrë të paraqiten para popullit, kush nuk paraqitet para popullit është i lirë ta bëjë, por historia ka treguar se jo vetëm nuk fiton asgjë, por përkundrazi paguan një kosto të madhe politike”.

Në lidhje me pyetjen se ku do të vërtetohet vlefshmëria e këtij vendimi dhe vlefshmëria e mbajtjes së zgjedhjes, Rama u shpreh se “Gjykata Kushtetuese e ka dhënë opinionin e vet disa vite më parë dhe ka nënvizuar se aktet e Presidentit janë akte individuale, të cilat kur lidhen me zgjedhjet adresohen në gjykatën përkatëse që është Kolegji Zgjedhor dhe askund tjetër, jemi të qartë në këtë pikë”.

Sa i përket aktit të Presidentit për zhdekretimin e zgjedhjeve, Kryeministri Rama u shpreh se “është një akt absolutisht i pavlefshëm dhe përbën një shkelje të rëndë të Kushtetutës, për të cilën Presidenti është në një procedurë shkarkimi në Parlamentin e Shqipërisë”.

Duke iu përgjigjur interesit të gazetares së Radio Europa e Lirë për përgjimet e publikuara në Gjermani nëse është i gatshëm të përballet me akuzat dhe si do ti adresojë ato, Rama theksoi se “faleminderit për pyetjen dhe pyetja që pason këtë pyetje pse këto përgjime nuk janë përdorur për të bërë një hetim shterues, pse prej 2016 këto përgjime janë mbajtur mbyllur dhe nuk është bërë asnjë hetim, dhe pse këto përgjime të mbyllura janë dërguar tek partia e opozitës, dhe pse partia e opozitës këto përgjime i dërgon në Gjermani për t’i paraqitur si zbulime gjermane”.

“Këto nuk janë zbulime gjermane, këto janë përgjime të Prokurorisë shqiptare, të cilat në mënyrë të paligjshme janë keqpërdorur duke thyer rëndë sekretin hetimor dhe përgjigja është thjeshtë përsëri, e dhimbshme, por e thjeshtë. Përgjimet janë kthyer nga një bazë për të hetuar në një ushqim për të helmuar njerëzit dhe opinionin ndërkombëtar në prag të çeljes së negociatave. Sepse gjithçka po ndodh në Shqipëri është një përpjekje për të frenuar çeljen e negociatave. Pse? Sepse me çeljen e negociatave fillon bashkëbisedimi për anëtarësim me kapitujt e drejtësisë”, – tha Rama.

Më tej kryeministri shprehet se “nuk është thjesht çfarë ligjesh ka Shqipëria, apo si po e pastron sistemin e drejtësisë përmes Vetingut, por Shqipëria duhet të provojë që ka një sistem drejtësie që i vendos të gjithë të barabartë para ligjit dhe ndëshkon këdo që nga më të gjatët deri më shkurtrit, që nga më të fortët deri tek më të dobëtit, kur ata shkelin ligjin. Këtë e dinë shumë mirë gjithë organizatorët e këtij plani dhe nxitësit e gjithë kësaj dhune”.

I pyetur nëse BE do të hezitojë për çeljen e negociatave për shkak të zhvillimeve politike dhe krizës politike, Rama tha se “rreziku që ky plan qartësisht antikombëtar të mund të funksionojë është real, sepse në fund të fundit e gjithë kjo që po ndodh nuk ndihmon ata që duan të na ndihmojnë dhe ushqen ata që s’duan të na ndihmojnë. Kështu që rreziku është real, por sidoqoftë përpjekjen ne do ta bëjmë deri në fund”.

Ndërsa pyetjes nëse ka ndonjë ofertë për opozitën, Kryeministri Rama u shpreh se “unë kam insistuar për dialog gjithmonë, kam bërë të gjitha përpjekjet për dialog, e vetmja gjë që nuk mund të negociohet është demokracia dhe patjetër nuk mund të negociohen edhe afatet kur populli duhet të marrë fjalën. Këto janë të panegociueshme, gjithçka tjetër është lehtësisht e negociueshme. /atsh

“Lulzim Basha po punon kundër interesit të vendit që Shqipëria dhe Maqedonia e Veriut të mos hyjë në BE”, deklaroi sot kryetari i grupit parlamentar të PS-së, Taulant Balla.

Në një takim elektoral me banorët e Paprrit, në Elbasan, Balla tha se “këto ditë janë turrur e janë bërë të gjithë bashkë për të hedhur baltë dhe bërë pis PS-në”.

“Po thonë se PS në 2017 fitoren e vetë e paska blerë me para. Luli ka qenë këtu në 2009 por e kujtoni se çfarë lloj-lloj kriminelësh nga çdo cep i Shqipërisë solli me vete për të bërë presion. Në 2017, Monika me Dash Gjikën shkuan lagje më lagje, shtëpi më shtëpi, duke premtuar Iphone. 1 mijë Iphone me nga 1 mijë euro bëjnë 1 milionë euro”, tha Balla.

Pavarësisht kësaj, Balla tha se “kjo nuk do të thotë se nuk duhet të vijojmë punën për të shtrënguar të gjithë kuadrin ligjor dhe të bëjmë një reformë zgjedhore të plotë për të parandaluar çdo lloj përpjekje për të ndikuar te rezultati zgjedhor”.

“Por ne nuk duhet të pranojmë kurrsesi që një tufë anadollakësh, njerëzish të shpërdoruar, të bëjnë pis Shqipërinë sot. Forca e ligjit do të veprojë dhe kush bën krime zgjedhor ta harrojë se mund të dalë më nga Shqipëria. Edhe në SHBA obstruksioni i demokracisë është vepër penale. T’i vësh zjarrin shkollave këtë nuk e bën as pushtuesi”, tha Balla.

Zgjedhjet e 30 qershorit, sipas Ballës, janë të vështira sepse kundërshtari do t’i heqi popullit të drejtën për të zgjedhur.

Kandidati i Partisë Socialiste për bashkinë e Elbasanit, Gledian Llatja tha se “duke mbështetur PS-në në 30 qershor, mbështesni zhvillimin e Elbasanit, të zonave rurale, biznesin e vogël, zhvillimin e ekonomisë e punësimin”.

“Kemi bërë shumë investime por nuk kemi bërë gjithçka”, tha ai. /atsh

Kryeministri Edi Rama theksoi sot nga Vau i Dejës se ajo që po ndodh sot në Shqipëri me përpjekjet për të penguar zgjedhjet, ndodh vetëm në Afganistan me talebanët.

Në një takim të fushatës së zgjedhjeve lokale të 30 qershorit në bashkinë e Vaut të Dejës, Rama theksoi se kandidati socialist Mark Babani nuk e ka sot përballë kandidatin kundërshtar dhe shumë demokratë nuk kanë mundësi që të zgjedhin më 30 qershor.

“Nuk kanë çfarë të zgjedhin, jo se ne ua kemi hequr këtë mundësi, as sepse ndonjë fatkeqësi natyrore ua ka hequr këtë mundësi, po sepse udhëheqja e PD-së ia ka hequr këtë mundësi. Ka vendosur të kapitullojë përpara se të fillonte beteja zgjedhore. Ka pranuar se nuk fiton dot zgjedhje me ne dhe është larguar. Jo për të shkuar te njerëzit dhe për të nxjerrë kandidatura, programe dhe ide, por për të dalë rrugëve dhe për të penguar njerëzit që të zgjedhin. Sot që flasim, kjo ndodh në dy vende të globit, në Shqipëri me PD-në dhe në Afganistan me talebanët”, – theksoi Rama.

“Talebanët aktualisht sot janë të angazhuar në një ofensivë kundër zgjedhjeve, kërcënojnë popullin afgan që të mos guxojë të shkojë në zgjedhje, sulmojnë lart e poshtë për të mbjellë frikë dhe duan të imponojnë për një popull dhe vend të tërë ligjin e xhunglës. Dhe kjo ndodh njëkohësisht edhe në Shqipëri, ndërkohë që Shqipëria ka bërë gjithçka për të çelur negociatat me BE, ka marrë rekomandimin pa kushte dhe pret që të gjithë liderët e 28 vendeve të ulen në tryezë dhe të thonë ‘ok’, të fillojmë bisedimet për anëtarësimin e Shqipërisë, që është ëndrra e të gjithëve, me parti pa parti”, – përfundoi Rama./atsh

“Rasti i përgjimeve është një histori e stisur për të shantazhuar dhe bërë pis Shqipërinë”.

Kështu deklaroi sot në mbrëmje kryeministri Edi Rama i ftuar në një studio televizive.

“Për përgjimet nuk është bërë asnjë hetim për 2 vjet. Një shërbëtor famëkeq i Sali Berishës në prokurori bashkë me një tjetër që eshtë larguar si i korruptuar nga Vetingu, i kanë marrë dhe çuar te partia. Histori e stisur për të shantazhuar dhe bërë pis Shqipërinë. I çuan dhe në Gjermani për të çoroditur dhe ushqyer opinionin e atjeshëm me gjëra që sigurisht janë të neveritshme dhe tronditëse . Unë do të kërkoj në gjykata gjermane deri në fund të vërtetën dhe pastaj të shohim se kush ka të drejtë; kush është viktima dhe kush agresori”, tha Rama.

Ai theksoi se ka dërguar njerëz për të gjetur avokatët e duhur dhe do ta ndjeke çështjen në Gjermani./atsh