Politike

Deputetja e Partisë Socialiste Mirela Kumbaro, gjatë takimit elektoral në Gjirokastër për prezantimin e kandidatëve për kryetar bashkie, në bashkinë e Libohovës Luiza Mandi dhe atë të Gjirokastrës, Flamur Golemi u shpreh se në këto 4 vite pushteti lokal nuk u tregua nikoqir.

“Por, ama qeverisja e PS, qeverisja e Edi Ramës ka bërë për Gjirokastrën në këto 5 vite, sa Gjirokastra e kishte harruar në këto vite. Rikthimi i shkëlqimit, i trashëgimisë kulturore, infrastrukturës së fshatrave, i hartës turistike, por edhe ekonomike ka qenë fantastike”, – tha Kumbaro.

“Gjirokastritët treguan që po t’i jepje pak dorën ata të japin zemrën. Po t’i japësh një ide, ata të japin projekt, po t’i japësh dhe ca para, ata e kthejnë në realitet. Kjo është Gjirokastra ime, që duke u lidhur dorë për dore me doktor Golemin ne do të bëjmë atë që fëmijët tanë na kanë besuar për të ardhmen e tyre. Jam shumë e lumtur që mbas datës 30 do të kthejmë Gjirokastrën 100% me Partinë Socialiste”, – tha Kumbaro. /atsh

Kryeministri Edi Rama tha sot nga takimi elektoral për zgjedhjet e 30 qershorit në Gjirokastër se askush nuk mund të frenojë ndryshimin dhe rrugën e vendit drejt BE-së.

Duke marrë shkas nga daljet e mbështetësve të PD-së në rrugë, Rama solli në vëmendje kohën e themelimit të PD-së dhe PS-së, kur shqiptarët, siç tha ai e përqafuan me shumë pasion ndryshimin e disa humbameno përpiqeshin ta frenonin.

“Të kujtojnë kohën kur u krijua PD e PS, kur populli shqiptar e përqafoi me shumë pasion ndryshimin. Aq sa arritën ata humbameno atëherë të frenonin ndryshimin, e aq sa arritën të mbahen mend ata, aq edhe do e frenojnë këta. E katandisën PD si kokoshi një thelë dhe e lanë rrugëve duke ikur nga zgjedhjet”, – tha Rama.

“U shndërrua nga një parti politike, në një organizatë të dhunshme që kërcënon popullin, që kërcënon se do marrë peng shtetin dhe bën çmos për të hedhur në erë urën që mezi u ndërtua, edhe për të cilën kanë kontribuar edhe ata vetë, për të arritur në pragun e derës së BE, për ta ulur Shqipërinë në tryezën e bisedimeve të anëtarësimit. Një parti e krijuar nga ëndrrat e shpresat e një populli të tërë dhe që po mbytet në filxhanin e fallxhores, më keq sesa të mbyteshin në një gotë uji”, – tha Rama. /atsh

“Partia Socialiste jo vetëm që nuk do t’i hapë kurrë rrugë atyre që kërcënojnë dhe duan të marrin peng vendin, por në 30 qershor do t’u japë një përgjigje siç e meritojnë”.

Kështu deklaroi sot Kryeministri Edi Rama, në një takim me banorë të Gjirokastrës. “Ka ardhur koha që ata të treten rrugëve dhe që atyre të mos u jepet asnjë mundësi e vetme si në të shkuarën”, – tha Rama, ndërsa kujtoi marrëveshjen e 2017.

“Mbase është krijuar ideja te ata se, socialistët janë njerëz të butë, me mend në kokë, janë njerëz që nuk e duan konfliktin, kështu që hajde t’i marrim para se socialistët të hapin rrugë. Dhe në fakt, në të shkuarën nuk është se nuk u ka dalë me sukses, por iku ajo kohë kur socialistët i hapnin rrugë budallait”, – tha Rama.

Sipas tij, “të gjithë duhet të mësojnë se kush shkel rregullat për të imponuar rregulla të reja me dhunë, presion dhe imponim ka vetëm një fund, përfundon rrugëve si ata”.

“Ky që po ndodh nuk është një film i ri, por është një seri e re, më e shëmtuara, më e turpshmja e një filmi që ne e kemi parë në të shkuarën, në 2017. Shumë veta mund të thonë se Edi Rama i do të gjitha pushtetet, por nëse kjo do të ishte e vërtetë ne mund të kishim një parlament me 140 deputetë socialistë që para dy vitesh”, – tha Rama.

Kryeministri tha se “tani ata po kërcënojnë se nuk do ta lënë popullin të marrë pjesë në zgjedhje, sikur janë ata që do e vendosin nëse do të votojnë apo jo shqiptarët”.

Lidhur me dekretin e Presidentit për anulimin e zgjedhjeve, Rama tha se “këtë nuk e ka bërë askush në botë”. “Shteti mbahet me firma dhe nëse një tufë humbësish të tmerruar nga çfarë vjen mbrapa i imponohet shumicës atëherë këtu nuk ka më as shtet, as ligj, as demokraci në zhvillim”, – tha Rama.

Rama tha se “ka ardhur koha që politikanët jo vetëm të zbatojnë ligjin, por të jenë shembull i zbatimit të tij”. “Kush kërkon rrugë të shkurtra që e nxjerrin popullin në rrugë të gjatë, do të marrë atë që meriton në 30 qershor”, – tha ai. /atsh

“30 qershori nuk është për të zgjedhur kryetarët e bashkisë, kjo është për të zgjedhur midis dy rrugëve, ose një Shqipëri me shtet, ku politikanët jo vetëm janë të parët që respektojnë ligjin, por janë shembulli për respektimin e ligjit, ose një Shqipëri përsëri në rrumpallë në rrëmujë dhe patjetër pastaj me ekonominë që nuk ngrihet lart”, deklaroi sot kryeministri Edi Rama gjatë takimit elektoral në Sarandë.

“E dëgjoni kur thonë do bëhet 97-a? Po pse do bëhet 97-a? Kujt i kanë humbur këtu kursimet e gjakut dhe djersës për shkak të qeverisë. Ku është këtu populli që është ngritur gjithandej që kërkon dorëheqjen e qeverisë. Ku janë këtu depot e armëve që janë hapur nga NATO për të bërë ’97. Është shumë e thjeshtë. Mjafton që Iliri t’i thotë fallxhores mos bli kafe turke deri në 30 qershor nuk ka ’97 dhe s’ka asgjë. Mjafton ata mos pinë kafe turke deri në 30 qershor këtu bie qetësia. 4 veta. Të tjerët janë ose qorra ose nuk kanë lidhje me këta këtu mbrapa, janë demokrat të zakonshëm që se duan rrëmujën, që s’pajtohen me djegiet e shkollave dhe kjo është e gjitha”, tha Rama.

Prandaj, theksoi kryeministri, “në 30 qershor vota nuk është hajde votojmë për PS, por për Shqipërinë që ne duam jo me socialistë e demokratë, por si familjarë, si prindër, si banorë të çdo komuniteti që rrëmujën, pisllëkun maskarallëkun, zhurmën e kaosit të predikuar nga këta pseudo opozitarë ta lëmë pas në të shkuarën. Që kjo komedi që përsëritet si komedi e enveristëve të dikurshëm që sot janë këto çeta të qorrave që dalin në rrugë të mbarojnë dhe të ndahet shapi nga sheqeri se Shqipëria nuk është e politikanëve as e atyre që kanë të drejtën e votës, është në radhë të parë e fëmijëve tanë”.

“Nëse fëmijët që lindën në ’90 u bënë nga 30 vjeç dhe vetëm vitet e fundit po shohin një përpjekje për të bërë shtet, fëmijët që lindin sot s’mund të bëhen 30 vjeç dhe akoma të vuajnë pasojat e një historie që në 30 qershor duhet të ndërpritet njëherë e mirë”, tha Rama./atsh

Lirohet ish deputeti i PD Bardh Spahia. Gjykata e Shkodrës ka vendosur masën e sigurisë ‘arrest shtëpie” për ish-deputetin e akuzuar për ngjarjet e ndodhura mbrëmjen e së martës, ku u sulmua shkolla “Shejnaze Juka”, e përcaktuar si KZAZ numër 3.

Seanca gjyqësore e zhvilluar me dyer të mbyllura, u shoqërua me masa të rrepta sigurie për shkak se dhjetëra simpatizant të Partisë Demokratike dhe ish deputet ishin mbledhur jashtë ambjenteve të gjykatës në mbështetje të Spahisë.
Prokuroria e akuzoi ish deputetin e Shkodrës, për mos bindje ndaj urdhrit të policisë, teksa pala mbrojtëse paraqiti argumentat e saj duke pretenduar se ndalimi i tij ishte i paligjshëm.

Trupa gjykuese vendosi masën e sigurisë “arrest shtëpie” ndërsa në përfundim të gjyqit, i deleguari i partisë Demokratike, në Qarkun e Shkodrës, Flamur Noka lëshoi akuza ndaj policisë së shtetit dhe kryeministrit Rama.

Gjykata e Shkodrës ka dhënë masën e sigurisë edhe për të arrestuarit e tjerë. Për dy policët bashkiak , Alfred Nikollin dhe Gentian Bytyçin, u vendos “arrest me 30 ditë burg”, “arrest shtëpie” për shtetasit Adi Garuci dhe Aleks Ndoj, ndërsa për të miturin Orlando Thepi masën e sigurisë detyrim paraqitje.