Politike

Kryeministri Edi Rama ka mbrojtur vendimin e tij për zhvillimin e zgjedhjeve lokale të 30 qershorit, në një intervistë ekskluzive për rrjetin informativ paneuropian, Euronews.

Ai kritikoi gjithashtu vendimin e opozitës për të bojkotuar procesin e votimit.

“Në një demokraci, kur bëhet fjalë për zgjedhje nuk janë partitë që mund të vendosin t’i Zhvillojnë apo jo ato, dhe aq më pak minoranca që të mos lejojë mazhorancën të zhvillojë zgjedhje për çfarëdolloj arsyeje… partitë kryesore politike vendosën, në mënyrë të paturpësisht, të bojkotonin. Kjo ishte një strategji vetëvrasëse për ta, por e dëmshme për njerëzit dhe jo e mirë për vendin”, deklaroi Rama.

Votimi i 30 qershorit u përfshi nga polemika, ku presidenti vendosi të shtyjë datën e votimeve me arsyetimin e sigurisë kombëtare.

Partitë e opozitës bojkotuan, duke pretenduar për mareëveshje të fshehta midis qeverisë dhe rrjeteve të krimit të organizuar në fletëvotimet e mëparshme.

Mungesa e opozitës çoi në një fitore të jashtëzakonshme për partinë socialiste të Ramës, por vëzhguesit ndërkombëtarë kritikuan zgjedhjet me një parti.

“Nuk është roli ynë të themi nëse zgjedhjet e 30 qershorit ishin të ligjshme apo jo, pasi i takon sistemit shqiptar ta vlerësojë atë… Ne i kemi ndjekur këto zgjedhje nga afër dhe ajo që na shqetësoi është fakti se elektorati shqiptar është privuar nga një alternative e rëndësishme. Dhe kjo është arsyeja pse reforma zgjedhore aktualisht është më e rëndësishme se kurrë”, thotë Luigi Soreca, ambasadori i Bashkimit Europian në Shqipëri.

Në progres raportin e BE-së për Shqipërinë të majit, Komisioni tha se “mospërfshirja e partive kryesore të opozitës ka ndikuar negativisht në përpjekjet për një reformë zgjedhore” duke bërë thirrje që ato të angazhohen përsëri./ atsh

Europa nuk po vështron më nga Lindja. Procesi i zgjerimit të BE drejt Ballkanit duket se po pëson një goditje.

Këtë gjë e thekson kryeministri shqiptar, Edi Rama, në një intervistë për rrjetin informativ paneuropian, Euronews, duke shprehur shqetësimin për precedentin që po përjeton Maqedonia e Veriut në krahasim me vendin e tij për negociatat e anëtarësimit, një fakt që sipas tij mund të destabilizojë të gjithë rajonin.

”Duhet të marrim parasysh faktin që gjithmonë e më shpesh procesi vendimtar i Këshillit nuk bazohet mbi ato që bëjmë, për ato që bëjnë vende si tonat, por mbi situatën e brendshme ose dinamikën e brendshme politike të shteteve të ndryshme anëtare”, deklaroi Rama.

Sipas rezultateve të një hetimi të Këshillit Europian, opinion publik i BE-së po bëhet gjithnjë e më kundërshtues përballë vendeve të reja pretendente për anëtare. Frika ndaj migracionit janë rritur me përfshirjen e Bullgarisë, Rumanisë dhe Kroacisë, por më tej opinioni publik ka ende shumë pengesa që Shqipëria duhet të kalojë për anëtarësimin në Bashkimin Europian.

Ka shumë fusha për të cilat institucionet shqiptare në kompleks duhet të vazhdojnë punojnë, thekson ambasadori i Bashkimit Europian në Tiranë. Lufta e përditshme kundër korrupsionit, lufta kundër krimit të organizuar dhe trafiku i drogës që po ndryshon taktikë.

”Por, anëtarësimi në BE është pikësynimi i Shqipërisë”, siç e shpjegon vetë kryeministri.

”Për ne Europa nuk është thjesht një proces burokratik, një grup vendesh të zhvilluara në të cilat ëndërrojmë të përfshihemi, për ne është ajo që ishte për Etërit Themelues që e krijuan atë si një projekt paqeje dhe bashkëpunimi”, theksoi kryeministri Rama./atsh

Zëvendëskryeministri Erion Braçe ka reaguar lidhur me deklaratën e kreut të PD-së, Lulzim Basha nga Divjaka, i cili tha se kriza politike zgjidhet vetëm me arrestime politikanësh.

Braçe thekson se kreu i PD është një nga personat e parë në listë që do i përgjigjet ligjit, jo vetëm për pasuritë e pajustifikuara, shitjen e territorit shqiptarë, vrasjet e 21 janarit, por dhe për hetimin e fundit në SHBA dhe Shqipëri.

“Po në këtë vend duhet të marrë fund pandëshkueshmëria për politikanë, kriminelë me e pa organizim, biznesmenë të paligjshëm. Por ti je i pari në radhë; Jo se dua unë kështu, por se ti ke vendosur cv-në tënde të parën në atë radhë”, shprehet zv.kryeministri.

Në vijim, Braçe shton se “ke vjedhur si kërkush aq sa nuk justifikon dot asgjë nga plaçka jote e pamatë, shpenzimet e tua te luksit; Ke vrarë si dikush tjetër mu në mes të bulevardit dhe për shkak moshe ai ta lëshon vendin me qejf; Ke shitur këtë vend duke qeshur e pa t’u skuqur surrati na i shite shitjen për blerje territoresh edhe pse në humbëm territor e zeza në të bardhe; Je i vetmi tani që hetohesh paralelisht në SHBA e në Shqipëri për një krim që është me i rëndë se pastrimi i parave!”.

Po ashtu, Braçe thotë Basha nuk ka qenë në Divjakë, po ka montuar kronikën ndërsa vazhdon pushimet.

“Lulzim Basha dje në Divjakë? Epo mirë, po përgjigjem për të dyja edhe pse këtë është gabim ta marrësh seriozisht. E para, Lulzim Basha nuk ka qenë dje në Divjakë siç thanë të gjithë mediat vizive e portalet dje, gazetat sot! Ju thashë, Lulzim Basha e ka rrenën në ADN! Lulzim Basha ka qenë në Divjakë të enjten që shkoi.U habita që mediet e PD-së dhe mediave vendore i kish kërkuar të mos e bënin publike vizitën! Dje e kuptova, ky bën kronika televizive me shumicë për t’i gënjyer të gjithë me punën e palodhur në ditët kur nuk është fare! Lulzim, unë nuk e kuptoj pse të vjen turp të thuash që po pushon! Ja ku e ke rivalin për të drejtuar opozitën që po pushon dhe jo vetëm ja tregon ngjyra por edhe e thotë publikisht çdo ditë!”, shprehet ai

Po ashtu, Braçe shton se “është krejt njerëzore të pushosh! Është krejt njerëzore edhe të gënjesh siç bën ti! Po arsyen se gjej! Pse duhet të gënjesh kur pushon! Dhe nuk me plas hiç pse gënjen mediat më të mëdha në vend që të kane ty krye lajm me rrena, por pse gënjen njerëzit, ata të opozitës se pari për një gjë krejt normale siç pushimet!”

“Ti gjithë jetën ke shitur atë që s’je, po pse nuk zë mend tani që të gjithë kanë kuptuar tamam se cili je?! Në anë tjetër, kur thërret njerëzit për mbledhje në vakt dreke, bëj atë që është njerëzore, merri për drekë; Mos ha veç ti e shpura e vogël e jotja, merri dhe ata, pak janë! Mos i lerë pa bukë herë tjetër!”, shprehet ai./atsh

“Në vend të presidentit na ka mbetur një karikaturë e vetë Ilir Metës, deklaroi sot, Ministrja e Shtetit për Marrëdhëniet me Parlamentin, zëdhënëse e Qeverise, Elisa Spiropali, ndërsa i përgjigjet Metës për kthimin e ligjit për Kodin Penal.

“Nga lartësia e maleve ku thotë se po ngjitet me Çelebiun e tij, Baba Xhikja lëshoi dje një tjetër krisëm nga dyfeku presidencial. Me një fjalor të katandisur si mos më keq ai qëlloi mbi shumicën dhe opozitën parlamentare, ai na rikujtoi se nuk kemi më President, po në vend të Presidentit na ka mbetur një karikaturë e vetë Ilir Metës”, shprehet ajo.

Po ashtu Sipiropali shprehet se për kthimin në Parlament të ndryshimeve në Kodin Penal nuk habitemi.

“Nuk kemi si presim ndjeshmëri nga Baba Xhikja për hurin në stadiume, sigurinë ushqimore, bllokimin e akseve rrugore e të veprave, vjedhjen e pronësisë intelektuale, dëmtimin e zonave të mbrojtura, për mjekët, policët apo zyrtarët e goditur për shkak në detyrës. Kur votojmë shtrëngimin e litarit të ligjit kundër dhunës në sport apo dhunuesve në tërësi, nuk kemi ç’presim tjetër nga Baba Xhikja i zjarrit të kërcënimeve ndaj zgjedhjeve, i dekreteve molotov për destabilizimin e vendit, i fjalimeve halucinante kundër ambasadës amerikane dhe delegacionit të BE-së në Shqipëri”, shprehet Spiropali.

Më tej, Spiropali shton se “Qeni i kthyer në manar në krahët e tij, tifozët skocezë të kthyer në elektorat në sytë e tij, tërmeti apokaliptik i kthyer në qëndrim zyrtar me vulën e tij dhe ngjitja majë maleve e projektuar si karshillëk kreshnikësh ndaj botës mbarë, në mendjen e tij, flasin qartë që presidenti na ka lënë”.

“Ka mbetur vetëm hija dhe vula e Baba Xhikes në presidencë, prej ku çeta e tij e mbledhur grusht nën dritën e hënës, pret tërmetin dhe urdhrat nga mali për të shkrepur dyfekun”, shprehet Spiropali./atsh

Presidenti Ilir Meta ka deklaruar sot se e vetmja zgjidhje janë zgjedhjet.

Sipas Kreut të Shtetit, moszgjidhja i shërben vetëm pakicës që nuk njeh rotacion dhe nuk e do çeljen e negociatave të Shqipërisë me Bashkimin Europian.

“E vetmja zgjidhje janë zgjedhjet. Pa zgjedhje nuk ka demokraci. Pa demokraci nuk ka drejtësi të pavarur. Pa të dyja së bashku nuk ka të drejta dhe ekonomi për të gjithë shqiptarët. Dhe as ndëshkim për politikanët”, është shprehur presidenti Meta.

Moszgjidhja, ka nënvizuar Meta, “i shërben vetëm pakicës që nuk njeh rotacion dhe nuk e do çeljen e negociatave të Shqipërisë me Bashkimin Europian, pasi ka për të humbur gradualisht pushtetin e paligjshëm politik, ekonomik dhe mediatik”.

“18 tetori po afron”, ka theksuar presidenti Meta./atsh