Politike

Në 12 shtator të vitit 1998, u vra në Tiranë deputeti Azem Hajdari, ish-udhëheqës i Lëvizjes Studentore të Dhjetorit 1990, që çoi në përmbysjen e regjimit komunist në Shqipëri dhe vendosjen e pluralizmit politik.

Në nderim të figurës së tij, nën kujdesin e Kryetarit të Kuvendit, Gramoz Ruçi, Kuvendi organizoi sot homazhe në varrin e ish- deputetit Azem Hajdari te Varrezat e Dëshmorëve, në Tiranë ku morën pjesë përfaqësues nga të gjitha grupimet parlamentare.

Ka qenë e bija e Azem Hajdarit, deputetja Rudina Hajdari së bashku me deputetë të opozitës parlamentare që kanë vendosur kurora me lule në varrin e Azem Hajdarit.

Në homazhe ishte e pranishme edhe nën/kryetarja e Kuvendit, Vasilika Hysi e cila vendosi një kurorë me lule në varrin e Hajdarit, ndërsa shoqërohej dhe nga shumë deputetë.

Ndërsa Presidenti i Republikës, Ilir Meta, vendosi kurora me lule te memoriali i Azem Hajdarit.

“Sot ishte një detyrim për ta nisur ditën me nderimin e kujtimit të përjetshëm të veprës së Azem Hajdarit, udhëheqësit të Lëvizjes Studentore, që solli demokracinë dhe pluralizmin politik në Shqipëri. Përulje me mirënjohje e respekt para kontributit të jashtëzakonshëm të Azem Hajdarit, për rivendosjen e Shqipërisë në rrugën e duhur të demokracisë, lirisë dhe të drejtave të njeriut, pluralizmit politik dhe zgjedhjeve të lira dhe të ndershme, kolonat vertebrore të çdo sistemi demokratik që duhen mbrojtur me çdo çmim nga të gjithë”, u shpreh Meta.

Edhe Partia Demokratike do të zhvillojë në orën 10:00 një ceremoni përkujtimore pranë memorialit ndërsa në orën 10:45 do të zhvillohet ceremonia përkujtimore tek varrezat e dëshmorëve.

Azem Hajdari ishte një nga themeluesit e Partisë Demokratike, partia e parë opozitare në vend pas periudhës së diktaturës. Hajdari është nderuar me një sërë medaljesh presidenciale.

Hajdari u vra pak metra larg ish-selisë së PD-së, më 12 shtator 1998, dhe bashkë me të mbeti i vrarë edhe Besnik Çerja, ndërsa u plagos një tjetër truprojë e tij./atsh

Kryetari i Partisë Demokratike, Lulzim Basha paralajmëroi sot deputetët që do të votojnë pro rrëzimit të dekreteve të Presidentit Meta që ka kthyer për rishqyrtim në Kuvend disa ligje, sikurse atë për “Për koncesionet dhe partneritetin publik privat”, të ndryshuar”, për koncesionin e rrugës Orikum – Llogara, Porti i jahteve – By-Pass Orikum – Dukat si dhe për koncesionin e rrugës Milot – Balldren.

Në një deklaratë për mediet, Basha tha se emrat e deputetëve do të mbahen shënim dhe ata do të hetohen nga Antimafia.

“Dua të paralajmëroj çdo anëtar të seancës që ngre dorën për të miratuar vjedhjen me ligj se nesër do të jetë subjekt i ligjit Antimafia. Sot po ju vëzhgojmë dhe do ju mbajmë shënim emrat. Nesër do ju ndjekim këmba-këmbës. Çdo qindarkë dhe çdo pronë do të jetë nën lupën e ligjit Antimafia dhe të SPAK-ut”, tha Basha.

Ndërsa denoncoi votimin sot në parlament për koncesionin e rrugëve Orikum-Dukat dhe Milot-Balldren të cilën e konsideroi si grabitjen më të madhe në 30 vite, Basha tha se koncesionet e pastrimi masiv i parave në ekonomi, përbëjnë rrezik për destabilizimin e vendit, për sigurinë kombëtare dhe për ndalimin e integrimit europian të vendit.

Basha tha se të gjithë personat, duke nisur nga punonjësi më i thjeshtë e deri te kryeministri do i nënshkruhen ligjit Antimafia, në bashkëpunim me SPAK e BKH.

“I vetmi përjashtim është vjedhja e grabitja e pasurive të shqiptarëve. Çdo akt, çdo veprim e çdo firmë e Ramës, ka për qëllim grabitjen e shqiptarëve. Pasojat e aktivitetit kriminal janë shkatërrimtare për vendin për buxhetin për pasuritë kombëtare dhe kanë pasoja të rënda politike, në kapjen e pushtetit nga krimi, destabilizimin e vendit. Koncesionet korruptive kanë sjellë dëme kolosale, qindra miliarda euro të grabitura, të gjitha paratë e buxhetit po kontraktohen nga Rama për 15-20 vitet e ardhshme, do të shkojnë në xhepat e Ramës apo 4 – 5 oligarkëve të lidhur me të”, tha Basha.

Kreu i PD theksoi se, dëmi është i pallogaritshëm edhe në ekonomi. “Dëmi është i pallogaritshëm edhe në fushën e ekonomisë, po zhvendosen nga tregu bizneset e ndershme, për të vendosur monopolet”.

“Bashkë me paralajmërimin që i drejtoj sot parlamentit të cunguar dhe çdo anëtari të këtij parlamenti e bëj të qartë se nuk ka gjë më të rëndësishme se zhdukja e ndikimit e pasojave kriminale me të cilën Rama ndan plaçkën e vjedhur shqiptarëve. Hetimi në nivel i korrupsionit të lartë, është prioritet absolut, çdo kontratë do të konsiderohet vepër penale dhe do t’i nënshtrohet ligjit Antimafia në bashkëpunim me SPAK e BKH. Çdo kompani private e person privat publik i përfshirë në këto afera, nga më i thjeshti deri te kryeministri do i nënshtrohen hetimit të pasurisë e të ardhurave, të gjithë zyrtarë në detyrë ministra e ish-ministra që janë larguar pasi kanë mbushur xhepat, asnjë prej tyre nuk do i shpëtojë hetimit. Askush nuk do të shpëtojë. Të gjithë shqiptarët e dinë fare mirë se alternativa që kemi është ndëshkimi i tyre për të shpëtuar Shqipërinë. PD e ka bërë zgjedhjen e tyre, jemi në krah të shqiptarëve për të shpëtuar Shqipërinë”, theksoi Basha.atsh

Kryeministri Edi Rama po merr pjesë në samitin e Vishegradit që po zhvillohet sot në Pragë, Çeki.

Kreu i qeverisë shqiptare shprehet se ka marrë mbështetjen totale të vendeve të grupit të Vishegradit dhe Ballkanit Perëndimor për çeljen e negociatave me Bashkimin Europian të Shqipërisë.

“Në Pragë me vendet e V4 (Polonia, Hungaria, Çekia, Sllovakia) dhe vendet e Ballkanit Perëndimor – Jo vetëm mbështetje totale për çeljen e negociatave me Bashkimin Europian të Shqipërisë e Maqedonisë së Veriut, po edhe një plan veprimi për të realizuar këtë objektiv strategjik”, thekson Rama./atsh

“Presidenti i Republikës nuk ka bërë asnjë shkelje, por ka qenë mbrojtës i Kushtetutës dhe parimeve të saj”, deklaroi Meta sot pasdite në një konferencë të posaçme për mediet, ndërsa theksoi se do të bashkëpunojë me Komisionin e Venecias.

Në vijim, Meta falënderoi Kuvendin e Shqipërisë për këtë respekt dhe besim të madh që tregon ndaj Komisionit të Venecias ndërsa bëri të ditur se bashkëpunimi i Presidentit të Republikës me Komisionin e Venecias do të jetë i shkëlqyer dhe transparent.

“Në respekt të punës që ata kanë nisur dhe do duhet të bëjnë deri më 11 tetor, iu kemi dhënë një raport paraprak lidhur me disa pyetje që Kuvendi i Shqipërisë u ka drejtuar lidhur me cilësitë e Presidentit të Republikës, i cili është i qartë dhe analitik dhe i shoqëruar me dokumente. Ky dokument do të jetë publik në faqen zyrtare të Presidentit të Republikës në dy gjuhë, shqip dhe anglisht dhe do jetë i hapur për kontribute jo vetëm për transparencë, por edhe për t’u pasuruar me vërejtje, ide nga juristë vendas dhe ndërkombëtarë sepse kemi të bëjmë me një çështje shumë të rëndësishme dhe një casus në fushën e së drejtës publike dhe do jetë edhe një çështje e rëndësishme për të ardhmen dhe do diskutohet edhe në të drejtën ndërkombëtare”, – tha ai.

Po ashtu Meta theksoi se gjithçka do jetë në dispozicion të opinionit publik të gjithë anëtarëve të Komisionit të Venecias dhe të gjitha institucioneve ndërkombëtarë ku vendi ynë është i anëtarësuar dhe ka detyrime për të përmbushur.

“Kjo është një sfidë që unë e mirëpres. Jam shprehur të jem i hapur edhe më 11 tetor që të jem i hapur për pyetje më 11 tetor nga Komisionit i Venecias. Presidenti i Republikës nuk ka bërë asnjë shkelje, por ka qenë mbrojtës i Kushtetutës dhe parimeve të saj. Çdo datë për të vendosur një datë për të vendosur një datë propagande, është veprim që synon të shmangë datën më të rëndësishme atë të 18 tetorit. Presidenti do të shkojë në 11 tetor tek Komisioni i Venecias, por ju merruni më shumë për 18 tetorin, çfarë do bëhet për Shqipërinë”, – tha Meta.

Presidenti Meta deklaroi se në Shqipëri janë shkelur parimet e Komisionit të Venecias, duke sulmuar sërish Reformën në Drejtësi.

“Jam këtu për të dhënë përgjigje përtej objektit të punës së Komisionit të Venecias. Për komisionin e Venecias unë kam respektin më të madh. Nuk janë diplomatë që flasin pa përgjegjësi se do ikin nesër dhe do vazhdojnë punën e tyre. Ata janë një referencë edhe për vendet e tjera. Ndaj ka bërë shumë mirë Kuvendi që e ka ftuar. Në vitin 1998 kushtetutën e bëmë me Komisionin e Venecias. Ajo u votua. Pastaj u ndryshua brenda natës dhe nuk u pyet as Venecia as qytetarët, e duartrokitën disa ambasadorë. Kjo situatë është edhe shprehje e një krize kushtetuese institucionale të vendit. Një nga arsyet pse jemi këtu është se janë shkelur rekomandimet e Venecias për Prokurorinë e Përgjithshëm dhe për Gjykatën Kushtetuese. Prandaj duhet t’i kishim dëgjuar ata”, – tha Meta.

Presidenti Ilir Meta pranoi se me caktimin e datës së re të zgjedhjeve ka shkelur vetëm Kodin Zgjedhor duke deklaruar se kjo është tërësisht e parëndësishme.

“Dekreti nga pikëpamja kushtetuese i takon vetëm presidentit të Republikës. Komisioni i Venecias është një nga kushtetutëbërësit. Ndodh një situatë e papranueshme. Shpikim një gjë dhe e shpërndajmë kudo. Të jeni të qetë dhe të bindur se Presidenti ka respektuar Kushtetutën në mënyrë më perfekte. Vetëm në tejkalimin me dy ose tre muaj në Kod Zgjedhor, por jo në Kushtetutë, por kjo është tërësisht e parëndësishme në lidhje me të drejtën për të zgjedhur. Këtë të drejtë e ka përcaktuar Gjykata e Strasburgut. Nëse i çon qytetarit vetëm një kandidat nuk kemi zgjedhje por votim. Në këto drejtime presidenti ka mbrojtur kushtetutën duke parandaluar që antagonizmi të kalojë në pasoja të paparashikueshme”, – tha Meta./atsh

Kryetari i Partisë Demokratike, Lulzim Basha po merr pjesë në Asamblenë Politike të Partive Popullore Europiane (PPE), që po zhvillon punimet në Bruksel.

Në ditën e parë të punimeve të Asamblesë, Basha u takua me përfaqësues të partive anëtare të PPE-së, drejtues të politikës së jashtme dhe të zgjerimit në Parlamentin dhe Komisionin Europian, si dhe Parlamentet e vendeve anëtare.

Lideri i opozitës kërkoi mbështetjen e tyre për hapjen e negociatave për Shqipërinë si një aspiratë e shqiptarëve, por edhe si garanci për të ndërtuar në Shqipëri një shtet demokratik, me pushtete të ndara, ku të garantohet vota e lirë.

“Siç u dëshmua nga raporti i OSBE/ODHIR për votimet moniste dhe antikushtetuese të 30 Qershorit, zgjedhjet nuk janë as të lira, as demokratike. Hapja e negociatave është e rëndësishme, pasi do të sjellë një mbikëqyrje të shtuar nga BE për të ndihmuar në ndarjen e politikës nga krimi, i cili sot ka kapur shtetin dhe për të penguar kandidimin e personave me rekorde kriminale, siç demonstrojnë rasti i Shkodrës dhe Vorës, ku është provuar tashmë se dy të inkriminuar u caktuan të kandidonin për bashkitë”, tha Basha.

Sipas tij, “Shqipëria sot ka një krizë të thellë politike, institucionale dhe ekonomike”. Për Bashën “zgjidhja janë zgjedhjet e lira dhe të ndershme, të mbikëqyrura nga një qeveri tranzitore”.

Punimet e Asamblesë Politike të PPE-së do të vazhdojnë dhe gjatë ditës së nesërme, ku në axhendën e diskutimit, do të jenë sfidat me të cilat përballet Europa aktualisht dhe përgatitjet për Kongresin e PPE-së, i cili këtë vit mbahet në Zagreb./atsh

Komisioni Hetimor parlamentar për shkarkimin e Presidentit Ilir Meta ka nisur sot me dëshminë e Presidentit Meta në lidhje me shfuqizimin e datës së zgjedhjeve të 30 qershorit dhe caktimin e datës së re më 13 tetor.

Në nisje të seancës, kreu i Komisionit, Ulsi Manja u shpreh se “Komisioni duhet të shohë përtej rastit konkret. Respektimi i parimeve vihet shpesh herë në provë duke u mbështetur në parime”.

“E vetmja mënyrë që debatet politike të kenë aq vend sa duhet është sistemi që kemi zgjedhur duke hequr dorë nga vendimet e çastit. Kushtetuta nuk përcakton detaje për ushtrimin e kompetencave, por janë udhëheqësit e shtetit që i nxisin. Sot presidenti dëshmon si presoni ndaj të cilit ka nisur një procedurë për shkarkim. Kjo mbledhje do të incizohet për t’u zbardhur autentikisht”, – u shpreh Manja.

Presidenti Meta në fjalën e tij tha se, “të gjithë aktet e mia janë publike lidhur me dekretet për shfuqizimin e datës 30 qershor si datë për zgjedhje vendore dhe dekretimi i datës 13 tetor si datë zgjedhjesh të përgjithshme. Unë kam dhënë një përgjigje për Kryeparlamentarin Ruçi e cila është bërë publike. Kam një bindje të plotë që çdo politikan duhet të tregojë respekt ndaj institucioneve. Jam i bindur që Kuvendi e ka bërë gjykimin para se të nisë këtë proces”.

Kreu i Shtetit tha se veç Kushtetutës së Shqipërisë, është bazuar edhe në Gjykatën Ndërkombëtare të të Drejtave të Njeriut, dhe në marrëveshjen e stabilizimin asociimit për vendimet e tij për të anuluar zgjedhjet e 30 qershorit.

Para komisionit hetimor për dekretet e tij, Presidenti tha se detyra e tij është të garantojë detyrimet ndërkombëtare të Republikës së Shqipërisë. Duke thënë se në themel të Kushtetutës është pluralizmi politik, ai tha se qytetarëve u duhej bërë e qartë dallimi mes votimeve dhe zgjedhjeve të lira dhe të ndershme.

“Për të dhënë edhe disa të dhëna për të qartësuar. Po e nis me çështjen e parë të mbrojtjes apo shkeljes së Kushtetutës që i takon qytetarit shqiptar sa i takon të zgjedhurit. Nuk ka nevojë për shumë interpretime për të përcaktuar se çdo të thotë të zgjedhësh. Konventat e përcaktojnë shumë mirë dallimin mes votimit dhe zgjedhjes. Gjykata Ndërkombëtare në vitin 2015 ka marrë një vendim të ngjashëm ndaj Bullgarisë për një shkelje të vitit 2009. Në arsyetimin e gjykatës thuhet se e drejta e votës e garantuar nga neni 3 e protokollit nuk është e limituar në zgjedhjen e një kandidatit. Vota duhet të garantojë të drejtën e zgjedhjes në të kundërt zgjedhësit do i mungonte e drejta e tij. Presidenti me dekretin e tij ka mbrojtur të drejtën e zgjedhjes së qytetarëve shqiptarë. Nëse presidenti e ka respektuar apo e ka mbrojtur të drejtën e zgjedhjes”, – u shpreh Meta.

“Presidenti e ka për detyrë më shumë sesa vetë qeveria që të garantojë detyrimet ndërkombëtare të Republikës së Shqipërisë, për këtë arsye mandati i presidentit është 5-vjeçar, ndërsa i qeverisë 4-vjeçar, që të garantojë vazhdimësinë e detyrimeve ndërkombëtare. Përpara këtij parimi kushtetues çdo lloj afati është tërësisht sekondar, ndërsa parësore është mbrojtja e të drejtës për zgjedhjeve. Askush më shumë se gjykata europiane e të drejtave të njeriut, nuk mund ta sqarojë më qartë këtë të drejtë të zgjedhjes”, – tha Meta.

Presidenti Meta u shpreh gjithashtu se një nga arsyet që e shtyu të anulojë zgjedhjet ishte fakti se kishte pasur një informacion sekret që thoshte se në protestën e 8 qershorit do i vihej flaka Kuvendit të Shqipërisë.

“Një arsye themelore është siguria e vendit. Presidenti ka pasur informacione të mjaftueshme për përpjekjet për të organizuar akte destabilizimi në vend. Një ditë para se presidenti të bënte paralajmërimin e tij për anulimin e datës 30 qershor kam marrë një informacion sekret dhe të klasifikuar i cili bënte të qartë që persona të caktuar do shfrytëzonin mitingun e opozitës për djegien e Kuvendit të Shqipërisë. Ky ishte një informacion tërësisht i besueshëm. Po të kemi parasysh pasojat dhe konfrontimet në protesta me shumë policë të plagosur, duke i kombinuar këto rrethana pa dyshim që presidenti nuk mund të pranonte një situatë të tillë, një ngjarje që mund të prodhonte edhe pasoja për jetën e qytetarëve dhe shkatërrim të imazhit tonë. Do të ishte goditje shumë e fortë jo thjesht për zgjedhjet, por kthim i madh pas për vendin dhe të dy palët kishin dhënë shembuj të shkëlqyer të vendosmërisë për të ecur drejt konfrontimit dhe për të mos mbajtur asnjë përgjegjësi mbi pasojat”, – u shpreh Meta.

I pyetur nga deputetja Klotilda Ferhati nëse anulimi i datës së zgjedhjeve rrezikon një precedent, Meta u përgjigj se, “Presidenti nuk ka pasur shqetësim të plotësojë tekat e opozitës, por të garantojë një proces zgjedhor gjithëpërfshirës sa më shumë të ishte e mundur, por në çdo rast për të shmangur shndërrimin e zgjedhjeve në votime. Kjo ka qenë një përpjekje e sinqertë. Duhet të keni parasysh se qëndrimi im ka qenë forcimi i institucioneve, qëndrimi im ndaj opozitës ka qenë mjaft kritik për lënien e mandateve”.

Ndërsa deputetja e PS, Vasilika Hysi e pyeti Presidentin nëse ka cenuar Kushtetutën me vendimin e tij për anulimin e zgjedhjeve, lidhur me argumentimin e tij se shtyrja e procesit do të sillte zgjedhje të lira dhe çfarë masash ka marrë Presidenti lidhur me informacionet se cenohej siguria kombëtare.

Meta tha se autoritetin për të anuluar zgjedhjet nuk ia përcakton Kushtetuta, por nga ana tjetër as nuk ia ndalon. “E kam në bazë të praktikës së presidentëve. Nuk ma jep asnjë nen, por as nuk ma ndalon. Pyetja nuk është shumë e gjetur. Të gjithë presidentët e mëparshëm kanë bërë të njëjtën gjë për të shmangur kriza dhe gjakderdhje. Presidenti nuk mund të priste që të ndodhte një gjakderdhje për të ndërmarrë atë akt. Kodi Zgjedhor nuk parashikon ndeshje me një kandidat”, – tha Meta.

Ndërsa lidhur me argumentin për garantuar zgjedhje të lira dhe të ndershme Meta u shpreh se edhe nëse nuk do merrte pjesë në zgjedhje opozita, do i jepej më shumë kohë opozitës se re parlamentare që të gjente kandidatë”./atsh