Politike

Kryetari i Partisë Demokratike, Lulzim Basha, e konsideroi të turpshëm vendimin e Gjykatës së Krimeve të Rënda për Saimir Tahirin.

Basha tha se ky vendim konfirmon se Rama bëri gjithçka për ta mbrojtur Saimir Tahirin.

Sipas tij, vendimi i gjykatës provon se drejtësia në Shqipëri është peng i Edi Ramës.

Kreu i PD-së tha se “përsa kohë Edi Rama është në krye të qeverisë, në Shqipëri nuk ka për të patur drejtësi”.

“Vetëm çlirimi i qeverisjes nga krimi do t’i hapë rrugë drejtësisë së vërtetë dhe mirëqenies për të gjithë shqiptarët”, tha Basha./atsh

Kuvendi shqyrton sot në seancën plenare dy dekrete të Presidentit të Republikës dhe disa projektligje.

Kuvendi shqyrton Dekretin e Presidentit të Republikës “Për disa shtesa dhe ndryshime në ligjin nr. 7895, datë 27.1.1995, “Kodi Penal i Republikës së Shqipërisë”, të ndryshuar”.

Kuvendi shqyrton sot Dekretin e Presidentit të Republikës “Për kthimin e ligjit nr. 53/2019 “Për Akademinë e Shkencave në Republikën e Shqipërisë”.

Kuvendi gjtihashtu shqyrton sot projektligji “Për ratifikimin e marrëveshjes së financimit, ndërmjet Republikës së Shqipërisë, Republikës së Kosovës dhe Komisionit Evropian, për programin e veprimit të bashkëpunimit ndërkufitar IPA II, Shqipëri – Kosovë 2014-2020, alokimet e vitit 2017”.

Kuvendi shqyrton projektligjin “Për ratifikimin e marrëveshjes së huas, ndërmjet Republikës së Shqipërisë dhe Bankës Ndërkombëtare për Rindërtim dhe Zhvillim, për projektin për lehtësimin e tregtisë dhe të transportit në Ballkanin Perëndimor me qasje programatike me shumë faza”.

Kuvendi gjithashtu shqyrton sot projektligjin “Për ndryshimet klimatike”.atsh

Presidenti i Republikës, Ilir Meta ka paralajmëruar sot një nismë të re që siç bëri të ditur do të shpallet në 22 nëntor. Në emisionin “Tempora” në RTV Ora, Meta dha edhe disa detaje lidhur me këtë nisëm të re.

“Më 22 nëntor do të bëj publike nismën time në mbrojtje të Kushtetutës, në mbrojtje të të drejtave themelore të qytetarëve shqiptar dhe kjo do të jetë një nismë mjaft e mirëmenduar dhe e mirorganizuar në mënyrë që të mos tolerojmë më në këtë vend, shkeljen dhe dhunimin sistematik të të drejtave kushtetuese të qytetarëve tanë”, – ka sqaruar Meta.

Gazetarja: Çfarë vendimesh pret të marrë Presidenti në rast se në 11 tetor Venecia ju gjenë në shkelje Kushtetuese, në 13 tetor nuk zhvillohen zgjedhje në bazë të dekretit që ju keni nxjerrë dhe në 18 tetor nuk marrim çeljen e negociatave?

Presidenti Meta: Për Presidentin tani ka dy data: është data 18 tetor për arsye, sepse kjo datë është tepër e rëndësishme. Në çdo rast do merret një vendim dhe apelimi im ka qenë, dhe është, që në çdo rast të ketë një “PO”. Në rast se do të jetë një po dhe pa kushte, kjo do të jetë një festë e madhe, por për gjithë rrjedhën e këtyre ngjarjeve të deritanishme, është e qartë që kjo po duket shumë ëndërrimtare sot.

Dhe në rast se do të jetë një “PO” me kushte, lutja ime për Bashkimin Europian është që të ketë kushte sa më të qarta dhe sa më specifike që përfshijnë të gjithë aktorët në këtë vend.
Duke filluar dhe nga Presidenti i Republikës, nga Parlamenti, nga qeveria, nga opozita, duke ju referua standardeve të Bashkimit Europian që Shqipëria duhet të realizojë sa më shpejt, në mënyrë që çdo institucion të vihet para përgjegjësisë në raport me këtë objektiv kombëtar të të gjithë qytetarëve shqiptar, të cilët janë penalizuar padrejtësisht nga ky konflikt, nga ky antagonizëm i paprinciptë politikë.

Gazetarja: Nëse do ketë një “PO” ose një “PO” me kushte specifike siç thoni ju, në fakt a jeni optimist për këtë “PO”?

Presidenti Meta: Ne këtë “PO”-në e kemi pasur edhe vitet e kaluara, nuk është se na ka munguar optimizmi, por realisht nuk kemi patur një datë dhe situata është e vështirë që të themi që është përmirësuar, qoftë edhe në raport më zgjedhjet dhe jo vetëm kaq.

Edhe në raport me funksionimin e shtetit të së drejtës në vend, të respektimit të Kushtetutës dhe të kontrollit dhe të balancave të pushteteve, që është tronditur seriozisht. Ne shohim një shtet të propagandës apo një shtet të mazhorancës përballë shtetit të së drejtës, pra jemi gjithmonë në një betejë të shteteve paralele. Unë kam qenë, jam dhe do të jem një gjithmonë një President i shtetit të së drejtës.

Përsa i takon çështjes së Kushtetutës, duhet t’ju siguroj që për mua tani ka dy data. Data e parë është 18 tetori, pra unë, nuk do të lodhem më që t’u kujtoj partive që dekreti për 13 tetorin është në fuqi, apo që siç thotë qartë Raporti Final i OSBE/ODIHR: “mosbotimi në Fletoren Zyrtare nga ana e qeverisë, i dekretit të 13 tetorit, është i paligjshëm”.
Së dyti, për mua data tjetër përveç 18 tetorit është 22 nëntori, dita kur shqiptarët në vitin 1998 me referendum miratuan Kushtetutën, që natyrisht është sakatuar padrejtësisht që nga viti 2008 e në vazhdimësi.

Atë Kushtetutë të gjithë shqiptarët e kanë votuar me shpresën dhe besimin se ajo do të mbrojë dhe garantojë të drejtat themelore të tyre.
Ndaj unë më 22 nëntor do të bëj publike nismën time në mbrojtje të Kushtetutës, në mbrojtje të të drejtave themelore të qytetarëve shqiptar dhe kjo do të jetë një nismë mjaft e mirëmenduar dhe e mirorganizuar në mënyrë që të mos tolerojmë më në këtë vend, shkeljen dhe dhunimin sistematik të të drejtave kushtetuese të qytetarëve tanë.

Gazetarja: Kjo nismë do jetë si Presidenti i Republikës apo do t’i ktheheni betejës politike?

Presidenti Meta: Kjo është një nismë si President i Republikës, që e ka detyrim të kujdeset për të drejtat themelore të qytetarëve shqiptare, të mos pajtohet me asnjë institucion që i cenon ato. Gjithashtu të mos të pajtohet me gjithë institucionet që e kanë për të detyrë për t’i mbrojtur dhe nuk e bëjnë një gjë të tillë. Dhe do të jetë një nismë, ku shumë surpriza të tjera do të shpalosen në kohën e duhur, pasi fokusi im tani është 18 tetori, për momentin nuk është 22 nëntori.

Por pas 18 tetorit fokusi do të jetë 22 nëntori dhe ky do të jetë një aksion i vazhdueshëm që, nuk ka lidhje me partitë dhe forcat politike. Por që do të përfshijë gjithë ato personalitete të së drejtës, të të drejtave të njeriut që besojnë në demokraci, në rëndësinë e jashtëzakonshme, që ka respektimi i të drejtave të njeriut në këtë vend, të institucioneve të pavarura dhe që nuk konformohen dhe nuk pranojnë këtë situatë mjaft kritike në të cilën ndodhen sot të drejtat e njeriut në vendin tonë.

Reforma Zgjedhore ka qenë sot fokusi i takimit të kryetares së grupit parlamentar të opozitës, Rudina Hajdari me Ambasadorin e BE-së në Shqipëri.

“Sot pata kënaqësinë të zhvilloja një takim me ambasadorin e BE-së në Shqipëri, Luigi Soreca, ku diskutuam mbi rëndësinë e Reformës Zgjedhore në muajt në vijim, si dhe për hapjen e negociatave për Shqipërinë në tetor”, shprehet Hajdari.

Deputetja Hajdari i ka kërkuar Luigi Soreca-s mbështetje për një sistem të ri zgjedhor.

“Falenderova ambasadorin Soreca për mbështetjen e tij për Reformën Zgjedhore dhe shpreha nevojën për një sistem të ri zgjedhor, më gjithëpërfshirës dhe më demokratik”, shprehet ajo.

Gjithashtu, Hajdari shton se në takim me ambasadorin e BE-së Soreca, “diskutuam edhe mbi organizimin e “Shkollës Europiane” që organizohet nga Këshilli Kombëtar i Integrimit Europian, aktivitet që çdo vit është mbështetur edhe nga Delegacioni i BE-së në Shqipëri”. /atsh

“Vendimmarrja gjermane është domethënëse në Europë, njëkohësisht është dhe një premisë, që edhe Franca edhe Holanda do t’i rrinë në krah kësaj premise të hapur tashmë për një përgjigje pozitive për Shqipërinë”, tha sot ish-ministrja e Mbrojtjes, njëherësh kryetarja e Komisionit të Jashtëm Parlamentar, Mimi Kodheli e ftuar në një emision televiziv.

Duke folur për vizitën e kryeministrit në Gjermani, Kodheli tha se “Ky është një lajm i mirë. vizita e kryeministri Edi Rama në Gjermani ishte e suksesshme dhe mbështetja e një mikeje të madhe të vërtetë siç është kancelarja Angela Merkel, do të jetë një mbështetje reale, diçka që ajo ka ditur ta japë dhe ta bëjë këtë mbështetje dhe ta tregojë këtë gjë dhe vitet e mëparshme”, tha ajo.

Kodheli shtoi se qëndrimi i kancelares Merkel ka qenë konsistent, pozitiv dhe mbështetës në raport me Shqipërinë dhe rajonin në tërësi.

“Kushtëzimet do ta ndihmojnë procesin, kushtëzimet nuk janë pengesë. Përkundrazi, kushtëzimet thjeshtësojnë procesin siç janë ngeciet tona, siç mund të jetë ulja e palëve politike dhe bërja e reformës zgjedhore, vazhdimi i reformës së thellë në drejtësi”, tha ajo

Në lidhje me qëndrimin e BE-së për zgjerimin, Kodheli shtoi se vendet e BE-së kanë qenë skeptike për zgjerim nga mungesa e thellimit të reformave në Bullgari, Rumani. Janë totalisht të pakënaqur nga thellimi i reformave edhe për disa vende që kanë hyrë më parë në BE. “Ato bënë disa detyra shtëpie me nxitim siç duhet dhe pastaj mbetën, sepse ideja se ishin futur brenda nuk ka më nevojë për reforma. Pra, kushtëzimi për ne dhe duhet të jetë në ndihmë të procesit, por sigurisht hapja e negociatave është një fitore politike e Shqipërisë dhe e shqiptarëve”, -tha ajo.

Kodheli theksoi se SHBA, partner strategjik janë më prezent se kurrë në Shqipëri, amerikanët janë më prezent se kurrë në Shqipëri dhe nuk janë larguar asnjëherë.

Në lidhje me rolin e ri të zv.ndihmëssekretarit të Shtetit dhe njëherazi përfaqësuesi i posaçëm për Ballkanin Perëndimor Matthew Palmer, Kodheli shprehet se nuk ka pasur largim apo afrim të amerikanëve, pasi amerikanët kanë qenë më aktivët.

“Le te shikojmë ambasadorin e fundit në Shqipëri se çfarë protagonizmi pati dhe çfarë rëndësie pati puna dhe bashkëpunimi i tij me ambasadoren e BE-së në miratim dhe zbatimin e reformës në drejtësi. Pra se më prezent se kaq nuk ka. Nuk po flas këtu për sa i përket bashkëpunimit në fushën e sigurisë sepse në mënyrë absolute është në të njëjtin nivel dhe nuk ka munguar asnjëherë as si mbështetje dhe as si partneritet, por caktimi i Palmer, padyshim që i jep një shtytje tjetër, ka një hap cilësor lidhur me vëmendjen tashmë të SHBA-së drejtuar rreth Ballkanit”, tha ajo.

Në vijim të argumentit të saj Kodheli shtoi se “Sigurisht me ndryshimet e administratës nga Obama te Trump ka ndryshim dhe të disa politikave dhe gjeopolitikave. Ballkanit i vjen radha pak më vonë se SHBA-Kinë apo SHBA-BE, por nga ana tjetër një sy është mbajtur gjithmonë në këtë rajon, sepse ndikimi i tyre dhe në dakordësimi i emrit të Maqedonisë së Veriut ishte i padiskutueshëm. Zgjerimi NATO-s me Maqedoninë, zgjerimi i NATO-s me Malin e Zi, do të thotë që ata janë gjithmonë aty. Ulja në bisedime Kosovë Shqipëri. Megjithatë kjo tregon se ata do ta kishin dashur dhe janë duke luftuar fort në drejtim të negociatave të Shqipërisë dhe Maqedonisë së Veriut. Por kjo nuk mjafton, sepse ne kemi Kosovë-Serbi për të diskutuar, kemi thellimin e reformave të sistemit gjyqësor apo në tërësi për reformën në drejtësi, pra shumëçka për të cilat ata janë investuar më shumë sesa do ishte investuar një përfaqësues i lartë ambasador i një vendi tjetër. ”.

Gjithashtu Kodheli tha se “SHBA ka politika të qarta ata dinë qartësisht se si duhet zhvilluar një demokraci reale e vërtet dhe ku duhet shkuar, duke qenë partneri ynë strategjik më i madh dhe duke qenë se investimi që ata kanë bërë në këtë zonë që nga çlirimi i Kosovës, nuk mund dot as të dështojnë dhe sa të zhgënjehen nga puna që kanë derdhur”.

“Ndaj unë besoj fort se prezenca e ambasadorit Palmer dhe rikthimi i përfaqësimit me një ambasadori të ri në ambasadën e SHBA, do të ndihmojë këtë proces, ashtu siç shpresoj shumë dhe besoj fort që do të ndihmojë në zgjidhjen e problemit Kosovë Serbi”, tha ajo./atsh

Kancelarja gjermane, Angela Merkel priti të premten Kryeministrin shqiptar, Edi Rama në Kancelarinë Federale.

“Bisedimet u përqendruan në marrëdhëniet dypalëshe, por edhe në çështjet e politikës europiane dhe çështjet rajonale”, thuhet në njoftimin për shtyp të shpërndarë nga zyra e Kancelares Merkel.

Më tej zyra e Kancelares shprehet se “Kryeministri shqiptar nuk është vetëm një politikan aktiv, por punon edhe si artist. Ai i dhuroi sot Kancelares gjermane botimin tij më të fundit. Rama, 55 vjeç shërben si Kryeministër i Shqipërisë që nga 10 shtatori 2013 dhe u prit sot nga Kancelarja gjermane Angela Merkel me nderime ushtarake”.

Bisedimet e pranimit në BE

Në fund të shtatorit, Bundestagu do të vendosë nëse Kancelarja Merkel do të mbështesë hapjen e negociatave të anëtarësimit të Shqipërisë në BE, në samitin e Unionit në mes të tetorit.

Forcimi i demokracisë dhe sundimit të ligjit në Shqipëri

Gjermania mbështeti pranimin e Shqipërisë në NATO në 2009 dhe mbështet pranimin e shtetit ballkanik në Bashkimin Europian.

Gjatë Konferencës së Ballkanit Perëndimor në Posen, më 5 korrik 2019, Kancelarja gjermane Merkel pranoi se pavarësisht vështirësive politike të vazhdueshme, në të gjithë rajonin ka patur një progres domethënës. Shqipëria ka qenë vendi që ka mbështetur shtetin gjerman në fushën e bashkëpunimit për zhvillimin për shumë vite. Gjermania ka treguar një interes të madh duke kontribuar në kushte të qëndrueshme, demokratike dhe kushtetuese në Shqipëri duke mbështetur procesin e transformimit.

Kryeministri Rama ka vizituar edhe më herët Kancelarinë Federale në prill 2018, për të diskutuar me Kancelaren Merkel, ndër të tjera, nivelin e përafrimit të Shqipërisë në BE.

Gjithashtu gjatë një takimi për Ballkanin Perëndimor në prill 2019 në Kancelarinë Federale u zhvillua një diskutim dypalësh midis dy krerëve të qeverive./atsh

Pas takimit të zhvilluar sot me kancelaren e Gjermanisë, Angela Merkel, Kryeministri Edi Rama shprehet se ndihet i vlerësuar nga predispozita pozitive ndaj Shqipërisë e kancelares.

Kreu i qeverisë thekson pas përfundimit të takimit me kancelaren Merkel “shumë i inkurajuar nga vlerësimet dhe predispozita pozitive ndaj Shqipërisë e kancelares Merkel”.

Kryeministri Edi Rama u prit sot në takim nga Kancelarja e Gjermanisë, Angela Merkel, ndërsa më herët zhvilloi një takim me Komitetin e Çështjeve Europiane të Bundestagut, ku pati një bashkëbisedim të hapur dhe pozitiv./atsh