Politike

Komisioni Hetimor parlamentar për shkarkimin e Presidentit Ilir Meta ka nisur sot me dëshminë e Presidentit Meta në lidhje me shfuqizimin e datës së zgjedhjeve të 30 qershorit dhe caktimin e datës së re më 13 tetor.

Në nisje të seancës, kreu i Komisionit, Ulsi Manja u shpreh se “Komisioni duhet të shohë përtej rastit konkret. Respektimi i parimeve vihet shpesh herë në provë duke u mbështetur në parime”.

“E vetmja mënyrë që debatet politike të kenë aq vend sa duhet është sistemi që kemi zgjedhur duke hequr dorë nga vendimet e çastit. Kushtetuta nuk përcakton detaje për ushtrimin e kompetencave, por janë udhëheqësit e shtetit që i nxisin. Sot presidenti dëshmon si presoni ndaj të cilit ka nisur një procedurë për shkarkim. Kjo mbledhje do të incizohet për t’u zbardhur autentikisht”, – u shpreh Manja.

Presidenti Meta në fjalën e tij tha se, “të gjithë aktet e mia janë publike lidhur me dekretet për shfuqizimin e datës 30 qershor si datë për zgjedhje vendore dhe dekretimi i datës 13 tetor si datë zgjedhjesh të përgjithshme. Unë kam dhënë një përgjigje për Kryeparlamentarin Ruçi e cila është bërë publike. Kam një bindje të plotë që çdo politikan duhet të tregojë respekt ndaj institucioneve. Jam i bindur që Kuvendi e ka bërë gjykimin para se të nisë këtë proces”.

Kreu i Shtetit tha se veç Kushtetutës së Shqipërisë, është bazuar edhe në Gjykatën Ndërkombëtare të të Drejtave të Njeriut, dhe në marrëveshjen e stabilizimin asociimit për vendimet e tij për të anuluar zgjedhjet e 30 qershorit.

Para komisionit hetimor për dekretet e tij, Presidenti tha se detyra e tij është të garantojë detyrimet ndërkombëtare të Republikës së Shqipërisë. Duke thënë se në themel të Kushtetutës është pluralizmi politik, ai tha se qytetarëve u duhej bërë e qartë dallimi mes votimeve dhe zgjedhjeve të lira dhe të ndershme.

“Për të dhënë edhe disa të dhëna për të qartësuar. Po e nis me çështjen e parë të mbrojtjes apo shkeljes së Kushtetutës që i takon qytetarit shqiptar sa i takon të zgjedhurit. Nuk ka nevojë për shumë interpretime për të përcaktuar se çdo të thotë të zgjedhësh. Konventat e përcaktojnë shumë mirë dallimin mes votimit dhe zgjedhjes. Gjykata Ndërkombëtare në vitin 2015 ka marrë një vendim të ngjashëm ndaj Bullgarisë për një shkelje të vitit 2009. Në arsyetimin e gjykatës thuhet se e drejta e votës e garantuar nga neni 3 e protokollit nuk është e limituar në zgjedhjen e një kandidatit. Vota duhet të garantojë të drejtën e zgjedhjes në të kundërt zgjedhësit do i mungonte e drejta e tij. Presidenti me dekretin e tij ka mbrojtur të drejtën e zgjedhjes së qytetarëve shqiptarë. Nëse presidenti e ka respektuar apo e ka mbrojtur të drejtën e zgjedhjes”, – u shpreh Meta.

“Presidenti e ka për detyrë më shumë sesa vetë qeveria që të garantojë detyrimet ndërkombëtare të Republikës së Shqipërisë, për këtë arsye mandati i presidentit është 5-vjeçar, ndërsa i qeverisë 4-vjeçar, që të garantojë vazhdimësinë e detyrimeve ndërkombëtare. Përpara këtij parimi kushtetues çdo lloj afati është tërësisht sekondar, ndërsa parësore është mbrojtja e të drejtës për zgjedhjeve. Askush më shumë se gjykata europiane e të drejtave të njeriut, nuk mund ta sqarojë më qartë këtë të drejtë të zgjedhjes”, – tha Meta.

Presidenti Meta u shpreh gjithashtu se një nga arsyet që e shtyu të anulojë zgjedhjet ishte fakti se kishte pasur një informacion sekret që thoshte se në protestën e 8 qershorit do i vihej flaka Kuvendit të Shqipërisë.

“Një arsye themelore është siguria e vendit. Presidenti ka pasur informacione të mjaftueshme për përpjekjet për të organizuar akte destabilizimi në vend. Një ditë para se presidenti të bënte paralajmërimin e tij për anulimin e datës 30 qershor kam marrë një informacion sekret dhe të klasifikuar i cili bënte të qartë që persona të caktuar do shfrytëzonin mitingun e opozitës për djegien e Kuvendit të Shqipërisë. Ky ishte një informacion tërësisht i besueshëm. Po të kemi parasysh pasojat dhe konfrontimet në protesta me shumë policë të plagosur, duke i kombinuar këto rrethana pa dyshim që presidenti nuk mund të pranonte një situatë të tillë, një ngjarje që mund të prodhonte edhe pasoja për jetën e qytetarëve dhe shkatërrim të imazhit tonë. Do të ishte goditje shumë e fortë jo thjesht për zgjedhjet, por kthim i madh pas për vendin dhe të dy palët kishin dhënë shembuj të shkëlqyer të vendosmërisë për të ecur drejt konfrontimit dhe për të mos mbajtur asnjë përgjegjësi mbi pasojat”, – u shpreh Meta.

I pyetur nga deputetja Klotilda Ferhati nëse anulimi i datës së zgjedhjeve rrezikon një precedent, Meta u përgjigj se, “Presidenti nuk ka pasur shqetësim të plotësojë tekat e opozitës, por të garantojë një proces zgjedhor gjithëpërfshirës sa më shumë të ishte e mundur, por në çdo rast për të shmangur shndërrimin e zgjedhjeve në votime. Kjo ka qenë një përpjekje e sinqertë. Duhet të keni parasysh se qëndrimi im ka qenë forcimi i institucioneve, qëndrimi im ndaj opozitës ka qenë mjaft kritik për lënien e mandateve”.

Ndërsa deputetja e PS, Vasilika Hysi e pyeti Presidentin nëse ka cenuar Kushtetutën me vendimin e tij për anulimin e zgjedhjeve, lidhur me argumentimin e tij se shtyrja e procesit do të sillte zgjedhje të lira dhe çfarë masash ka marrë Presidenti lidhur me informacionet se cenohej siguria kombëtare.

Meta tha se autoritetin për të anuluar zgjedhjet nuk ia përcakton Kushtetuta, por nga ana tjetër as nuk ia ndalon. “E kam në bazë të praktikës së presidentëve. Nuk ma jep asnjë nen, por as nuk ma ndalon. Pyetja nuk është shumë e gjetur. Të gjithë presidentët e mëparshëm kanë bërë të njëjtën gjë për të shmangur kriza dhe gjakderdhje. Presidenti nuk mund të priste që të ndodhte një gjakderdhje për të ndërmarrë atë akt. Kodi Zgjedhor nuk parashikon ndeshje me një kandidat”, – tha Meta.

Ndërsa lidhur me argumentin për garantuar zgjedhje të lira dhe të ndershme Meta u shpreh se edhe nëse nuk do merrte pjesë në zgjedhje opozita, do i jepej më shumë kohë opozitës se re parlamentare që të gjente kandidatë”./atsh

Kandidatja e Lidhjes Demokratike të Kosovës për kryeministre, Vjosa Osmani u ka premtuar gjithë prodhuesve vendor se me marrjen e detyrës, do të ndërmarrë një seri masash për t’i larguar të gjitha pengesat që kanë aktualisht prodhuesit vendor që merren me bujqësi.

Sipas Osmanit, e rëndësishme është që të rritet subvencionet në bujqësi, të hiqet akciza në naftë dhe të merret disa masa tjera ligjore për t’iu lehtësuar punën këtyre bizneseve.

Këto premtime, kandidatja për kryeministre i bëri gjatë vizitës së sotme në një kompani qumështi në Fushë Kosovë.

Osmani tha për mediet se njëra prej temave të para që do të angazhohet është siguria në ushqim, teksa bëri thirrje që të konsumohet më shumë produktet vendore./KosovaPress/

Deputetja e opozitës në Kuvend, Rudina Hajdari tha sot se “duhet një “shkollë politike” për kryetarët e partive kryesore mbi ndryshimin e sistemit, në mënyrë që të bien me këmbë në tokë”.

Sipas saj, marrëveshja nuk e shpëton dot këtë herë opozitën joparlamentare.

“Deri tani Kryetari i Partisë Demokratike duhet të kishte dhënë dorëheqjen 2 herë, dhe me këtë marrëveshjen tjetër që kërkon të bëjë me Ramën me anë të “Platformës Kombëtare” (pa realizuar asnjë objektiv deri tani) do jetë e treta e vërteta. Sepse demokratët nuk kanë ndërmend ta bëjnë Edi Ramën, të pavdekshëm”, theksoi ajo. /atsh

Lëvizja Socialiste për Integrim shënoi mbrëmjen e sotme 15-vjetorin e themelimit si forcë politike. Kryetarja e LSI, Monika Kryemadhi ka marrë fjalën në mbledhjen e Konventës Kombëtare të LSI, me rastin e 15-vjetorit të kësaj partie.

“Në këto 15 vite të rrugëtimit tonë politik, sfidat me të cilat jemi përballur kanë qenë të shumta e të jashtëzakonshme. Kauzat për të cilat u krijuam dhe kemi luftuar në këto 15 vite, janë akoma reale. Prandaj mbështetja për forcën tonë politike nuk ka shteruar asnjëherë nga njerëzit e thjeshtë, të cilët e duan Shqipërinë anëtare të denjë të Europës”, – tha ajo.

Kryemadhi gjatë fjalës së saj para anëtarëve u ndal edhe te plani ekonomik duke qenë në një linjë me PD-në për vendosjen e taksës së sheshtë dhe jo progresive./atsh

“Raporti i OSBE/ODIHR-it për zgjedhjet e 30 qershorit ka konfirmuar legjitimitetin e plotë të procesit dhe ofruar një paketë të vlefshme rekomandimesh”, deklaroi sot ministri në detyrë për Europën dhe Punët e Jashtme, Gent Cakaj.

Në një konferencë për shtyp ku analizoi gjetjet e raportit të OSBE/ODIHR-it, Cakaj tha se “tani është koha për dialog dhe bashkëpunim në funksion të Reformës Zgjedhore për zgjedhjet e vitit 2021”.

Duke cituar raportin e OSBE/ODIHR-it, Cakaj tha se “procesi ishte i rregullt në më shumë se 95% të vendit, ndërsa pjesa tjetër çështjet teknike ato që u vlerësuan negativisht”.

Zgjedhjet e 30 qershorit, sipas tij, vendosën një shembull të pakthyeshëm historik duke dëshmuar se qëndrueshmëria e institucioneve kombëtare është më e lartë se shuma e interesave partiake edhe kalon sjelljet e dhunshme dhe antiinstitucionale.

“Raporti i fundit i OSBE/ODIHR- i cilëson sjelljet e PD-së dhe LSI-së në raport me godinën e kryeministrisë si të dhunshme dhe sjelljet e tyre në përgjithësi si vandaliste. Në qershor Shqipëria ka pasur shumë më shumë se zgjedhje vendore, pasi është përballur me sfidën e rendit demokratik”, tha Cakaj.

Përveç dhunës vandaliste, opozita sipas tij, “ka edhe një program të mirëplanifikuar për të dëmtuar procesin e hapjes së negociatave në qershor dhe tani në tetor”.

Cakaj tha se “raporti i OSBE/ODIHR-it i vlerëson zgjedhjet e 30 qershorit si një proces i rregullt, demokratik dhe i njohur ndërkombëtarisht”.

Tani, tha ai, “kemi edhe një udhërrëfyes se si mund të rritet besueshmëria dhe cilësia e organizimit të zgjedhjeve”.

Cakaj tha se “gjatë këtyre ditëve është diskutuar mbi përmbajtjen e raportit dhe ka ekzistuar përpjekja për të keqpërdorur referencat e ndryshme ndërkombëtare para opinionit vendor”.

“PD dhe LSI janë të angazhuara në keqinformimin e faktorëve ndërkombëtarë, ndërsa tani kanë keqpërdorur referencat ndërkombëtare për konsum të brendshëm. Ky raport është më shumë kritik për opozitën se sa për procesin e zgjedhjeve vendore në veçanti”, tha ai.

Cakaj u shpreh se nevojitet rifillimi i një dialogu politik për të adresuar të gjitha shqetësimet e OSBE/ODIHR-it.

Duke u ndalur te disa prej gjetjeve kryesore të raportit, Cakaj tha se “vetë raporti sqaron se zgjedhjet janë zhvilluar pa konsideratë të mjaftueshme të interesave të elektoratit dhe mundësi të plotë të zgjedhjeve mes grupimeve politike, por ai shtoi se “kjo vjen nga bojkotimi i zgjedhjeve nga opozita dhe nuk do të thotë se zgjedhjet kanë qenë jolegjitime në tërësi”.

“Raporti sqaron se në Shqipëri për zgjedhjet vendore nuk ekziston një prag minimal i numrit të votave për të kualifikuar një kandidat legjitim”. Kuadri ligjor në Shqipëri mundëson pluralizmin dhe garën e lirë dhe përgjegjësi e qeverisë është të siguroj mundësinë e pjesëmarrjes në zgjedhje, por sipas ministrit, nuk mund të mbajë përgjegjësi për garantimin e pjesëmarrjes së opozitës në zgjedhje.

Raporti evidenton se klima gjatë fushatës ishte tepër e polarizuar dhe nuk i është kushtuar vëmendje programeve elektorale apo debateve dhe kjo, sipas Cakajt, “është rrjedhojë e natyrshme e një procesi atipik elektoral ku përgjegjësia u takon atyre që e kanë bojkotuar procesin”.

“Opozita në veçanti ka ushtruar presion madhor për mospjesëmarrje në zgjedhje. Kjo tregon se klima e zgjedhjeve ka qenë e ndikuar negativisht jo për shkak të veprimeve abuzive të qeverisë, por për shkak të një sjellje të caktuar politike që ne nuk e dëshirojmë”, tha Cakaj.

Përkundër kësaj sjellje, Cakaj tha se “askund në raport nuk konstatohet se zgjedhjet kanë qenë jolegjitime sepse opozita ka vendosur të mos marrë pjesë në to”.

Sa i takon dilemave juridike, Cakaj tha se “raporti nuk vjen në përfundimin se kjo është shkaktuar nga një ndërmarrje e njëanshme e qeverisë shqiptare, por rrethana e parë është mungesa e kuorumit në Gjykatën Kushtetuese që vjen si rrjedhojë e reformës së paprecedentë të reformës në drejtësi dhe e dyta zhdekretimi i zgjedhjeve dhe bojkotimi i tyre”.

Cakaj tha se “është koha për reflektim të sinqertë dhe marrje të përgjegjësive të secilit për gjetjet raportit”. “Nuk mund të jesh shkaktar i një problemi dhe të ankohesh se ekziston ai problem. Kjo është e papërgjegjshme”, tha Cakaj./atsh

Presidenti Ilir Meta u shpreh sot se mezi pret të kthehet tek Parlamenti, duke deklaruar se do të paraqitet në komisionin parlamentar hetimor ndaj tij.

“Të dashur miqtë e mi gazetarë. Më ‘çmendët’ me sms tuaja, si asnjëherë tjetër! Po ç’është kjo pyetje kaq absurde që më bëni të gjithë: A do shkoj tek Parlamenti?! Unë mezi pres të kthehem tek Parlamenti”, tha Meta.

Po ashtu ai theksoi se Presidentit si Kryetar i Shtetit, i takon të jetë shembull i bashkëpunimit institucional.

“Dhe besoj se në këto dy vite kam bërë gjithçka për të vendosur këtë bashkëpunim, në respekt të plotë të Kushtetutës, shtetit ligjor dhe interesit publik”, tha ai.

Komisioni hetimor parlamentar për hetimin e Presidentit Ilir Meta në mbledhjen e djeshme vendosi të thërrasë Presidentin Meta më datë 6 shtator. Meta do të thirret për t’u pyetur rreth dekretit të tij për anulimin e zgjedhjeve të 30 qershorit./atsh