Politike

“Shqipëria ka vetëm një të ardhme, Europën, identitetin e së cilës ia ka përcaktuar Skënderbeu”, është shprehur Presidenti Ilir Meta gjatë takimit me arbëreshët e rajonit të Puljas në Itali.

Në kuadër të nismës së ndërmarrë prej tij “U’ jam Arbëresh”, Presidenti Ilir Meta vizitoi Komunën e Kazalvekios në rajonin e Puljas, ku u prit nga përfaqësues të shumtë të komunitetit arbëresh dhe autoritetet lokale, të cilat kishin organizuar edhe një aktivitet kulturor për t’i uruar mirëseardhjen Kreut të Shtetit shqiptar.

Në fjalën përshëndetëse, Kryetari i Komunës së Kazalvekios, Noe Andreano e falenderoi Presidentin Meta për vëmendjen dhe kujdesin e përhershëm të treguar ndaj komunitetit arbëresh, veçanërisht të rajonit të Puglia-s, si dhe vlerësoi nismën “U’ jam Arbëresh”.

Pas takimeve me banorët e shumtë që kishin dalë për ta pritur, Kreu i Shtetit mori pjesë në konferencën me temë “Zhvillimi i raporteve social-ekonomike midis komuniteteve arbëreshe dhe Shqipërisë”.

Në këtë veprimtari ishin të pranishëm personalitete të shumta të pushtetit vendor, Kryetari i Komunës së Casalvecchio, Noe Andreano, Drejtori i Zhvillimit Ekonomik dhe i dërguar i Presidentit të Rajonit të Pulias, Domenico Laforgia, Zv/Prefekti i Foxhias z.Ernesto Liguori, si dhe Kuestori i Foxhias, Paulo Sirna.

Në fjalën e tij Meta tha se “Ne u jemi shumë mirënjohës arbëreshëve, sepse jo vetëm kanë ruajtur për shekuj identitetin, historinë, traditën e ritet e tyre, por mbi të gjitha e mbrojtën si të shenjtë figurën e Skënderbeut dhe e rikthyen atë në kohën e duhur për të nxitur rilindjen dhe pavarësinë e Shqipërisë. Ne nuk e harrojmë investimin e jashtëzakonshëm që bënë personalitetet e mëdha të botës arbëreshe si Jeronim De Rada, Zef Serembe e Gavril Dara, për të frymëzuar popullin shqiptar, të shtypur për disa shekuj nën Perandorinë Osmane, për t’u ringritur për pavarësinë e Shqipërisë. E them me bindje dhe ndërgjegje të plotë institucionale, politike e kulturore që ne e kemi shtetin tonë në radhë të parë edhe falë atij kontributi historik të arbëreshëve të Italisë.

“Dua t’i falënderoj përfaqësuesit e shtetit Italian për kujdesin dhe angazhimin e tyre për ta zbatuar sa më mirë në praktikë legjislacionin shumë të avancuar sa i takon mbrojtjes dhe ruajtjes së gjuhës e kulturës së minorancave. Nëse në 5 shekuj arbëreshët ruajtën identitetin, kjo është meritë jo vetëm e karakterit të tyre, por një meritë të jashtëzakonshme ka edhe populli italian. Nga nivelet më të larta deri në ato lokale në Itali kam konstatuar se ka vullnet dhe ndërgjegjësim që trashëgimia kulturore arbëreshe është një pasuri e përbashkët e Italisë dhe e Shqipërisë”, tha ai. /atsh

Partia Socialiste organizoi sot në Tiranë takimin “Ti Zgjedh” me kandidatët për delegatë të Kongresit që do të zgjidhen më 16 nëntor.

Fjalën e hapjes e mbajti ministrja për Marrëdhëniet me Parlamentin, Elisa Spiropali duke deklaruar se “ne zgjodhëm rrugën e përballjes me të vërtetën, zgjodhëm rrugës e transformimit të drejtësisë, rrugën e punës, luftës kundër informalitetit, kthimin e financave në binarë, ne zgjodhëm të jemi një qeveri e përgjegjshëm jo për brezin që shkoi, por për brezat e rinj, për të gjithë ata që duan një Shqipëri Europiane”.

Spiropali tha se “në qeverisjen socialiste prej gjashtë vitesh, nuk e kemi pasur të lehtë. Mund të kishim zgjedhur dhe ne rrugën e konformimit, rrugën e lehtë të të thënit nuk mbajmë përgjegjësi, bëni ç’të doni, ndërtoni ku të doni, financat le të shkojnë në gropë, le të bëjmë fushata dhe të presim shirit, le ta lëmë drejtësinë në gjenden e mjeruar ku është. Punë e madhe, ne jemi politikanë dhe politikanët nuk kanë nevojë të kalojnë përpara procesit të ndëshkueshmërisë, as të mbajmë përgjegjësi për atë që bëjnë. Ashtu siç e bënte ai plaku që vazhdon e flet në forumet dixhitale”.

Spiropali theksoi se e zgjodhëm rrugën e përballjes me të vërtetën. “E zgjodhëm këtë se Partia Socialite nuk e ka qëllim në vetvete pushtetin, por mjet për të transformuar jetët e njerëzve, për të ndryshuar mendësitë, për të transformuar qytetet tona. Mjafton të hedhësh sytë në Tiranë dhe shikon ndryshimin e madh, transformimin e jashtëzakonshëm që i ka ndodhur këtij qyteti, që nuk dallon nga qytete të tjera europiane, madje është qyteti më i mirë në rajon. Rilindja urbane transformoi shumë nga qendrat urbane, jo vetëm Tiranën por dhe Kavajën, së shpejti dhe Kamzën e cila ishte kthyer një vatër informaliteti por abuzimi me pushtetin kur njerëzit nxirreshin si turma për të ardhur në Tiranë për të bllokuar rrugët dhe djegur Kryeministrinë”, tha ministrja.

Spiropali tha se “me 30 qershor ne nuk votuam për të zgjedhur kryebashkiakët, por ne votuam për të thënë se Shqipëria është shtet dhe askush nuk mund ta marri peng dhe këtë e bënë socialistët”.

“Janë këto arsyet që ne prej shtatorit kemi nisur procesin e riorganizimit e rivitalizimit të PS-së në çdo qelizë. Është bërë një punë e jashtëzakonshme nga drejtuesit e PS-së, pasi vetëm në Tiranë janë bërë 2230 mbledhje, takime dhe organizime dhe ristrukturime. Janë mbledhur të gjithë asambletë, kemi ripërtërirë organizatat janë bërë zgjedhjet në më shumë 90% të organizatave, dhe lajmi i mirë është se në 168 prej tyre, nga 674 kemi një bashkëkryetare grua dhe vazhdojmë të zgjedhim gra në drejtim. Dua të falënderoj kryetarin e PS-së Edi Rama i cili nuk është ndalur të promovuarit të grave. Sot kemi më shumë se 50% gra në qeveri, duke e bërë Shqipërinë një nga 5 vendet me barazinë gjinore në qeverisje”, tha ajo.

Duke folur në këtë takim, deputeti Ervin Bushati nënvizoi se përpara tyre qëndron një mal me punë. “Ne jemi në rrugën e duhur sepse në shpirtin tonë ne besojmë në barazinë sociale ndaj qeveria ka ndërmarrë reformën në drejtësi që të gjithë të jemi të barabartë para ligjit. Çdo punë e nisur na ne është e bazuar në vlerat tona që na mbajnë bashkë si familje”, – tha Bushati.

Bushati tha se fokusi i tyre është tek organizimi sepse sipas tij, vetëm organizimi mund të sjellë fitoren në 2021.

Duke folur edhe për opozitën, Bushati u shpreh se “që nga 2013 opozita kërkon çdo ditë zgjedhje të parakohshme dhe vazhdon thotë është krizë. Opozita atë punë ka. Do vazhdojë ti kërkojë deri në 2021, puna jonë është përveç se të bëjmë pjesën e zhvillimit të reformave, punëve që i janë ngarkuar qeverisë dhe bashkive, është të përcjellim pozitivitetin dhe të kujtojmë që e vetmja forcë që mund të bëjë Shqipërinë është Partia Socialiste”.

Sipas Bushatit, Partia Socialiste do fitojë një mandat të tretë në 2021, një rekord për politikën shqiptare./atsh

Kryeministri Edi Rama deklaroi sot se “brenda nëntorit fillon furtuna mbi foletë e krimit dhe korbat e KÇK-së”.

Rama informoi se sot e ka nisur ditën me grupin e punës për Ligjin Special kundër krimit të organizuar dhe masat kundër KÇK që po finalizohen në letër.

“Kur dal përditë, pse del përditë, pse del përditë, kur s’dal ca ditë çfarë ka që s’del përditë, historia e vjetër hip se të vrava, zbrit se të vrava”, tha Rama.

Kreu i Qeverisë informoi gjithashtu se po udhëton drejt Ohrit, ku nisin sot takimet për marrëveshjet e bashkëpunimit rajonal dhe nesër bëhet mbledhja e radhës ku janë ftuar të gjitha vendet e Ballkanit Perëndimor dhe partnerët europianë të nismave rajonale”./atsh