Politike

Kryeministri Edi Rama i përgjigjet kryetarit të PD-së Lulzim Basha në lidhje me propozimet e tij me tri pika për situatën pas tërmetit.

Rama tha se Basha nuk duhet që të bëjë propozime si ato që bën për Reformën Zgjedhore apo Reformën në Drejtësi, por të shtrojë propozimet në tavolinë.

“Do të ishte mirë që Lulzim Basha dhe forcat politike të mos bënin propozime si ata propozimet si Reforma Zgjedhore ose Reforma në Drejtësi, si gjithmonë e ke aty, ose hap krahun, por të vijë në tavolinë dhe t’i diskutojmë gjërat me njerzillëk, pa parti, sepse këtu nuk jemi duke bërë garë socialistët me demokratët, por këtu jemi duke bërë një garë jo me njëri-tjetrin, por një garë me kohën, një garë me tensionin dhe emocionet e rënda që përjetojnë njerëzit, dhe natyrisht një garë me të ardhmen, që të mos humbim mundësinë, që të ringrihemi më të fortë se ç’ishim përpara”, – tha Rama.

Rama tha se iu përgjigjëm ftesës së Presidentit, se ajo që kemi me Metën s’është asgjë përballë asaj që na ra të gjithëve.

“Ne me Presidentin e Republikës jemi në konflikt të hapur, kemi konflikt institucional ekstrem, kemi një komision të ngritur për ta shkarkuar. Presidenti i Republikës na thërret dhe ne do themi ‘jo nuk vijmë’? Ne shkuam aty sikur s’ka ndodhur asgjë dhe realisht nuk ka ndodhur asgjë në raport me atë që na ka ndodhur të gjithëve, dhe këtu kushdo që do të japë një kontribut është i mirëseardhur, ne duhet ta përqafojmë. Por këto pikat që më thoni ju janë qesharake dhe shumë zhgënjyese”, – tha ai. /atsh

Ministri i Shtetit për Diasporën, Pandeli Majko, në një prononcim për mediet e ka quajtur të paprecedent thirrjen e Presidentit Ilir Meta për një tubim mbarëpopullor në sheshin “Demokracia” në Qytetin Studenti në datën 8 Dhjetor, me të cilin ai synon Nisjen e një Dialogu me Shqipërinë.

Ministri Majko shprehet se në asnjë vend tjetër demokratik nuk mund të ndodhë që Presidenti të thërrasë një miting, pasi detyra e tij është të përfaqësojë të gjithë qytetarët shqiptarë.

“Nuk është koha për tubime, 8 Dhjetori i takon një situate të caktuar. Presidenti i duhet të ulë palët në tavolinë dhe jo të bëhet palë. Nuk e kuptoj të dalë Presidenti nëpër Shqipëri dhe të bëjë miting. Nuk di të ekzistojë ky precedent në vende të tjera Perëndimore ku ne aspirojmë,” u shpreh Majko.

Presidenti Meta pretendon të risjellë në 8 dhjetor 2019 të ashtuquajturën “Lëvizja e Dhjetorit 1990” me tubimin e paralajmëruar në Qytetin Studenti, aty ku dhe nisi Lëvizja Studentore e viteve ’90. /atsh

“Tani ka ardhur koha për një reagim gjithëpopullor për ta ndalur këtë gjendje të rëndë ekonomike ku është futur vendi”, – tha sot kryetari i PD Lulzim Basha, në komunikimin me gazetarët pas takimit me Fondin Monetar Ndërkombëtar.

Basha tha se sapo kam mbaruar një takim të gjatë, thuajse shterues me përfaqësuesit e FMN në Uashington dhe për rajonin në Vjenë. Kemi ndarë me ta shqetësimin e thellë për krizën e tmerrshme ekonomike në të cilën e ka zhytur vendin kjo qeveri me dështimet e saj. Shqetësimet tona të 1, 2, 3 viteve janë konfirmuar nga raportet e FMN-së dhe organizatave të tjera. Një nga problemet kryesore është çështja e qindra-milionë dollarëve, të cilat në vend që të shkojnë për të ndihmuar shtresat në nevojë, apo për të hartuar politika që rrisin pagat, pensionet apo investimet publike që ndihmojnë ekonominë, përfundojnë në duart të 13 oligarkëve apo të ashtuquajtura koncesione, apo PPP, po që në fakt janë skema të pastra vjedhje”.

“Sot dhe me vitin ardhshëm, në qoftë se buxheti që kanë planifikuar do të kalojë përbën një vjedhje, një makutëri të hapur të qindra-miliona euro. Janë 146 milionë dollarë që planifikohen të jepen 13 njerëzve nesër për PPP dhe kjo do të çojë në thellim të krizës dhe rritje të mëtejshme të borxhit publik”, – tha ai.

Basha tha se rruga për të dalë nga kjo krizë ekonomike është e qartë.

“Lajmi i vetëm i mirë që ndamë me FMN është se opozita e bashkuar dhe Partia Demokratike me ndihmën e partnerëve perëndimorë kanë një plan të qartë për ta ndalur këtë krizë ekonomike dhe për ta nxjerrë vendin nga kriza, në planin tonë ekonomik që ka filluar të shpaloset edhe gjatë rrugëtimit tim nëpër Shqipëri. Ne do mund t’ja dalim që t’i ndalim menjëherë këto koncesione korruptive, të rikthejmë paratë e destinuara për 13 oligarkët tek qytetarët, tek universitetet, tek studentët, tek fermerët, tek biznesi i vogël dhe së dyti, do të arrijmë të kthejmë kushtet ligjore të barazisë para ligjit, të konkurrencës, të tregtisë të lirë dhe kushteve të favorshme për biznes duke hequr dhjetëra-qindra barriera të hapura e të fshehura, kurthe e gropa që i hapin biznesit, duke eliminuar bandat e inspektorëve tatimorë, një plan që do të mundësojë që biznesi ta ketë qeverinë në krah dhe jo si sot, kërcënimin kryesor të tyre”, – tha ai.

Më tej Basha shtoi se “me planin tonë me ndihmën e partnerëve ndërkombëtarë ne do t’i japim fund kësaj situate. Do vëmë nën kontroll borxhin publik që ka dalë jashtë kontrollit, do orientojmë paratë e shqiptarëve drejt dy burimeve kryesore, përmirësimit të fuqisë blerëse të shqiptarëve përmes pagës minimale prej 300 euro, përmes rritjes së pensioneve vit për vit, pra fuqizimit ekonomik të shqiptarëve, që do të thotë cilësi jete më e mirë për shqiptarët, përmes politikave sociale, siç janë politikat tona për arsimin e lartë, arsimin profesional dhe politikave të mbështetjes së të pamundurve, dhe blloku i dytë ka të bëjë me investimet publike që ndihmojnë ekonominë, jo fasada, jo buzëkuq elektoral”.

“Unë them se në tërësi, bashkëbisedimi me misionin e FMN-së që largohet nesër e konsideroj të frytshëm. Brenda mandatit të tyre, këmbanat kanë rënë, por e rëndësishme të kuptohet është se përtej konstatimeve të FMN-së, përtej konstatimeve tona prej shumë vitesh tashmë duket se kjo rrugë e vjedhjes dhe e grabitjes së pasurisë publike dhe vjedhjes së shqiptarëve këtu do të çonte. Tani ka ardhur koha për reagim mbarëpopullor”, – theksoi ai.

“E vetmja përgjigje që kam për këtë është të hapë veshët e të dëgjojë mirë se nga Shkodra në Vlorë, nga Tiranë në Korçë mesazhi është i qartë, largimi i kësaj qeverie dhe hapja e rrugës për zgjedhje të lira e të ndershme është ilaçi për këtë krizë të thellë të thellë politike që është arsyeja e krizës ekonomike dhe krizës sociale”, – theksoi Basha. /atsh

Kryeministri Edi Rama deklaron se paketa speciale AntiKÇK e prezantuar sot, është paketa më agresive ligjore, që një qeveri ka formuluar ndonjëherë në këta 30 vjet, kundër krimit të organizuar dhe aleatëve të tij në sistemin e vjetër e të korruptuar të drejtësisë.

Duke iu përgjigjur akuzave të opozitës joparlamentare se ligjin kundër “KÇK-së” është një mashtrim që synon të nënshtrojë drejtësinë dhe të pengojë veprimin e saj kundër krimit të organizuar, Rama thekson se “pres shumë më tepër reagime idiotike ndaj paketës më agresive ligjore, që një qeveri ka formuluar ndonjëherë në këta 30 vjet, kundër krimit të organizuar dhe aleatëve të tij në sistemin e vjetër e të korruptuar të drejtësisë! S’kemi dëgjuar gjë akoma, po ama s’kanë parë gjë akoma”.

“Operacioni Forca e Ligjit (OFL) as nuk dublon, as nuk pengon, as nuk anashkalon institucionet që po lindin nga Reforma në Drejtësi, po është komplementar me to dhe do t’i bëjë një shërbim të madh shoqërisë, në këtë fazë tranzitore të sistemit të drejtësisë! Kaq për momentin”, nënvizon Kryeministri Rama. /atsh

“Prej sot nis faza e re e luftës me krimin dhe korrupsionin: Masa ligjore speciale kundër krimit të organizua dhe terrorizmit; masa ligjore urgjente kundër abuzimit me detyrën të anëtarëve të KÇK, organizatë e disa gjykatësve dhe prokurorëve që bashkëpunojnë, i shërbejnë krimit të organizuar”, tha sot kryetari i grupit Parlamentarë të PS-së Taulant Balla gjatë një interviste televizive.

Balla tha se sot është një ditë e shënuar edhe në një aspekt të një faze të re të luftës kundër krimit të organizuar dhe korrupsionit në Shqipëri.

“Kryeministri Rama ka prezantuar dy paketa të cilat përmbajnë brenda vetës disa nisma ligjore që kanë të bëjnë me luftën kundër krimit dhe korrupsionit dhe paketa e dytë ka të bëjë me një paketë të fortë kundër çdo prokurori apo gjyqtari që e ka renditur veten, pjesë të organizatave KÇK, duke e ditur mirë që qoftë në aspektin e figurës apo të justifikimit të pasurisë nuk e kalojnë procesin e vetingut, atëherë disa prej këtyre gjyqtarëve dhe prokurorëve janë turrur për të dhënë vendime të padrejta për të grabitur pa fund qytetarët, që i drejtohen prokurorisë dhe gjykatës dhe në këtë këndvështrim, si pjesë e atij procesi historik vetingut duhet të marrim një masë parandaluese për t’i pezulluar këta anëtarë të organizatës kriminale deri kur të përballen me procesin e vetingut, ndërkohë që nuk duhet të harrojmë edhe disa çështje të tjera. Ajo që kemi prezantuar sot, pra kryeministri si Kryetarë i PS-së janë dhe disa elemente shumë të rëndësishëm që kanë të bëjnë me qasjen tonë nga sot dhe deri në 2021 kur ne do të paraqitemi para shqiptarëve”, tha ai.

Balla shtoi se “Bundestagut gjerman tek sa hapi dritën jeshile për të mbështetur fillimin e bisedimeve me Shqipërinë, nënvizoi edhe fazën post vetting, pra jo vetëm një gjyqtar dhe prokuror i korruptuar të largohen nga sistemi, por nënvizoi domosdoshmërinë e hetimit të tyre me qëllim zbulimin dhe ndëshkimin e çdo mënyre të paligjshme të vendosjes së pasurisë dhe në këtë kontekst edhe paketa kundër KÇK ka parandalimin e gjobëvënies dhe shërbimin e këtyre prokurorëve dhe gjyqtareve për kundrejt botës kriminale dhe të jenë pjesë e një hetimi për transparencën për pasurinë e paligjshme”./atsh

Zëvendësministri i Brendshëm, Besfort Lamallari deklaro gjatë një emisioni televiziv se në kuadër të paketës speciale anti-KÇK do të ngrihet edhe një strukturë hetimore brenda Policisë së Shtetit në kuadër të luftës kundër krimit të organizuar.

Lamallari tha se “është një akt normativ i mbështetur edhe nga ekspertë ndërkombëtarë, ku përfshihen edhe ekspertë izraelitë që do asistojnë në zbatimin e kësaj pakete dhe do të prezantohet të hënën”.

Zëvendësministri Lamallari tha se “është punuar intensivisht prej një muaji, në nivel politik janë bërë të gjitha takimet me ekspertë në Shqipëri si dhe me ekspertë izraelit të cilët do të asistojnë si në aspektit ligjor dhe të implementimit. Mendoj se drafti do të prezantohet të hënën”.

“Ka një grup punë e që i ka konsideruar rekomandimet e ekspertëve ndërkombëtarë ashtu edhe atyre që kanë eksperiencën e Anti-mafies italiane, janë disa konsultime që janë bërë. Ekspertët izraelitë do të fokusohen dhe te pjesa e implementimit”, sqaron ai.

Lamallari tha se shumë shpejt në një hark kohore dy javë, super policia do jetë gati të ndërhyjë kundër krimit të organizuar.

Në lidhje me të ardhurat e pajustifikueshme, Lamallari tha se “çdo politika bënë deklaratë të pasurisë dhe është e pakuptim se si këto persona bëjnë një deklaratë të tillë dhe është shumë e thjeshtë të gjithë organet, policia, tatimet bëjnë verifikim dhe konstatohen shtesat e pasurisë. Të hënë do kemi draftin final të ligjit.

I pyetur nëse është një ligj në vetë, Lamallari tha se është një akt normativ i cili do të ketë dhe akte të tjera që do ta pasojnë. /atsh

“Qeveria jonë e ka marrë vendimin që vitin e parë të mandatit dhe nuk udhëton me ‘Business Class’”, ndërsa shtëpia ime në Surrel është një banesë individuale si e të gjithë shqiptarëve të tjerë e deklaruar në çdo detaj me çdo faturë”, tha sot Kryeministri Edi Rama.

Në aktivitetin e organizuar për prezantimin e programit dyvjeçar të qeverisë, Kryeministri Edi Rama iu përgjigj po ashtu në kohë reale edhe pyetjeve të dërguara nga qytetarët.

Rama iu përgjigj një qytetari i cili e pyet se si i duken kryeministrit udhëtimet me “Business Class” me avion, të gruas të kreut të PD-së Lulzim Basha dhe të Monika Kryemadhit, bashkëshortes së Presidentit, si dhe për ‘vilën’ e tij në Surrel.

“Fatkeqësisht jetojmë në një kohë kur secili thotë menjëherë atë që i vjen ndër mend dhe koha për të menduar është shkurtuar në minimum. Koha për të dyshuar dhe verifikuar është shkurtuar në minimum, nuk mund të presësh të dyshojnë dhe verifikojnë qytetarët kur vetë mediat nuk dyshojnë dhe nuk bëjnë verifikime, pavarësisht se kush mund të jetë axhenda e tyre. Vila ime në Surrel?! Cila vilë në Surrel?”, tha Rama.

Kryeministri tha se “ne kemi bërë një inventar së bashku me Ministren e Shëndetësisë dhe Mbrojtjes Sociale, në funksion të një programi për të ndihmur familjet që jetojnë në shtëpi shëmbëlltyrë e mjerimit”.

“Bëhet fjalë për ato shtëpitë që bëjnë lajm, ato që kur shfaqen në rrjetet sociale bëhen virale dhe që bëjnë treçerekun e komentatorëve të thonë kjo është Shqipëria. Në fakt inventari që kemi bërë tregon se këto shtëpi në të gjithë territorin e vendit janë 1600 e ca. Por sa janë vilat si puna e asaj të Surrelit që janë ndërtuar në Shqipëri?”, tha Rama.

Kryeministri tha se janë gjysmë milionë shtëpi me 2, 3, apo 4 kate që kanë qenë produkt i punës në pjesën më të madhe të tyre.

“Ajo vila ime në Surrel ka një formë të ndryshme, siç jam unë i ndryshëm nga të tjerët, por në raport me tërësinë e banesave individuale të shqiptarëve është një banesë individuale e një familje shqiptare më shumë dhe kaq. Për të gjithë ata që kanë hedhur pa fund baltë lidhur me këtë mund të them vetëm që shtëpia ime është e deklaruar në çdo detaj me çdo faturë”, tha Rama.

Kryeministri tha se “unë do të isha shumë i lumtur nëse të gjithë bashkëjetuesit në hapësirën publike të zhurmës politike do të bien dakord që të bëjnë një sqarim shtëpi më shtëpi për të ardhurat dhe sa korrespondojnë të ardhurat me produktin”, tha Rama.

Sa i përket “Business Class, Rama tha se “qeveria jonë e ka marrë këtë vendim që vitin e parë dhe nuk udhëtoj me “Business Class’ me përjashtim të rastit kur 198 cm e mia duhet të spostohen përtej oqeanit, për të mos dal i paketuar bashkë me shtyllëm time kurrizore”, tha Rama. /atsh