Politike

Kryeministri Edi Rama i është përgjigjur sot kreut të Partisë Demokratike, Lulzim Basha, i cili nga zonat e dëmtuara nga tërmeti në Ishëm foli për një gjendje të rënduar të familjeve të cilave iu janë dëmtuar shtëpitë. Kryeministri e quajti këtë një përdorim të fatkeqësisë për politikë dhe e ftoi kryeopozitarin Basha të bashkëpunojë për t’u ardhur në ndihmë atyre banorëve.

“I dashur Lulzim, asgjë më të keqe s’mund të bëjë një politikan në këto ditë të zymta, se sa të kërkojë raste njerëzish ende të pasistemuar për t’i përdorur për politikë! Ka shumë akoma që duan dorën tonë dhe ngrohtësinë e kujtdo që mundet t’ua japë! Eja të bashkëpunojmë,” shprehet Rama.

Kreu i qeverisë shprehet se kjo është një tragjedi e cila nuk duhet të përdoret as për sfond mediatik dhe as për politikën e vjetër në Shqipëri.

“Mos u mjafto me fjalët e errëta e me pamjen që dukesh sikur e ke humbur ti shtëpinë, jo ata fatkeqë që kështu bëhen sfond mediatik, për të përcjellë zymtinë e politikës së stërvjetër, në vend të ngrohtësisë njerëzore! Le t’i ndihmojmë së bashku me pak dritë, se zymti kanë boll,” deklaroi Rama.

Kryetari i PD-së, Lulzim Basha, vizitoi gjatë ditës banorët e dëmtuar nga tërmeti në Sukth, Ishëm, Gjuricaj, Kërtushë dhe Armath, nga ku tha se këta banorë janë në nevojë ekstreme për gjithçka. /atsh

Në vitin e ardhshëm do të bllokohen të gjitha blerjet e makinave, dollapeve, kolltuqeve, tavolinave, televizorëve dhe pajisjeve të tjera në të gjitha bashkitë e vendit.

Kështu deklaroi kryeministri i vendit, Edi Rama gjatë mbledhjes së jashtëzakonshme të së martës ndërsa nuk kurseu batutat për kryetarët dhe administratorët e bashkive.

“Përsa i përket fondit, ne do të kalojmë si moment të parë, si faze të parë nga buxhetit 2020, 0,4% të Prodhimit të Përgjithshëm Kombëtar duke garantuar dhe siguruar që deficiti primar pozitiv të mbetet pozitiv. Asnjë ndryshim parametrash që mund të kërcënojë qëndrueshmërinë e të gjithë sistemit makro-ekonomik dhe pasi deficiti primar pozitiv do të na mundësojë atë që është domosdoshmëri, një likujditet të domosdoshëm për operimin në vitin 2020. Njëkohësisht po studiohen edhe cilat fonde mund të transferohen për vitin e ardhshëm nga viti 2019. Ka një zë në projektbuxhet që lidhet më të gjithë shpenzimet. Në vitin e ardhshëm nuk do blihet asnjë makinë, nuk do të pajiset asnjë zyrë, nuk do të bëhet asgjë nga ato që kanë qenë rutina e përvitshme dhe do të bllokohen të gjitha blerjet e makinave, dollapeve, kolltuqeve, tavolinave, televizorëve dhe të gjithë me radhë në të gjitha bashkitë e vendit. Asnjë shpenzim për këtë punë. Kush do të jetë keq për një makinë, të gjejë një kalë edhe nuk ka problem. Kryetar bashkish me kuaj do të ishin një inovacion ekologjik dhe sidomos kryetar njësish administrative me kuaj, do të ishin të mirëse ardhur në komunitet që të shkonin shtëpi më shtëpi me kalë dhe të mos vinin vërdallë me vetura në qendrën e qytetit. Përtej metaforës, kjo është në fakt e vërteta”, -tha Rama.

Kryeministri informoi po ashtu se “donacionet në llogarinë e posaçme janë pjesë e fondit. Ndihma dhe financimet specifike për programin nga institucionet ndërkombëtare dhe ndihma për financimet specifike në marrëdhëniet dy palëshe. Portofoli do të jetë i hapur, ne do të dëgjojmë shumë, do të përgatitemi për të dëgjuar shumë dhe duhet të bëjmë ç’mos që purifikojmë sa të mundemi kanalet e komunikimit nga toksinat dhe nga kontaminimi sepse do të ketë shumë mbetje toksike të mendjeve të zymta që do të rrjedhin nëpër kanalet e komunikimit për të vazhduar çoroditjen shkatërrimin e nervave të këtij mileti. Çfarë nuk do të dëgjojmë”. /atsh

Kryetari i Partisë Demokratike ka vizituar sot të dëmtuarit nga tërmeti në Bubq, ku ka propozuar planin e Partisë Demokratike me 3 pika që duhet vepruar urgjent nga qeveria.

“Me qindra qytetarë kalojnë netët jashtë prej një jave pa asnjë siguri nëse mund të futen në banesat e tyre. Gjendja vazhdon të rëndohet për ta dhe për mijëra familje në të tre qarqet e goditura Durrës, Tiranë dhe Lezhë”, u shpreh ai.

Po ashtu, Basha shprehet se tani është momenti të veprohet me shpejtësi dhe për këtë qëllim ky është plani që ai propozon:

“Angazhimi dhe organizimi nga shteti i mbi 500 inxhinierëve që kanë shprehur gatishmërinë për të kontribuar vullnetarisht, me qëllim për të përshpejtuar vlerësimin e banesave. Kjo kontribuon për qetësimin e gjendjes dhe sigurimin e jetës së qytetarëve. Vlerësimin me urgjencë të banesave të dëmtuara dhe dëmeve të shkaktuara. Qeveria në kuadër të gjendjes së fatkeqësisë natyrore të anulojë me efekt të menjëhershëm rreth 150 milionë dollarë të planifikuara për t’ju dhënë 10 oligarkëve, dhe këto fonde t’u akordohen mijëra familjeve në nevojë, për riparimin dhe rindërtimin e banesave të dëmtuara apo të shkatërruara. Reagimi i shpejtë për të vlerësuar dëmet, dhe lëvrimi i fondeve për riparim dhe rindërtim do të ndihmojë në tejkalimin e traumës dhe rikthimin në normalitet”./atsh