Politike

/ “Ky duhet të jetë rasti i parë dhe i vetëm deri më sot në historinë e demokracisë në botë që Presidenti i Republikës në një Republikë parlamentare që bazuar në Kushtetutë e përcakton Presidentin simbol të unitetit mbi palët bën një miting dhe kjo e bën këtë miting edhe më madhështor për nga unikaliteti dhe marrëzia e vetë”, deklaroi sot Kryeministri Edi Rama, duke komentuar tubimin e thirrur sot nga Presidenti Ilir Meta.

Në një intervistë për televizionin T7 në Kosovë, Rama tha se “sot partia më e madhe e opozitës u kthye në servis për të mbushur bulevardin, pavarësisht se sa arriti, në shërbim të shfaqjes së Ilir Metës”.

Rama tha se “nuk di që qeveria dhe shumica jonë të ketë më shumë pushtet se sa i jep e drejta kushtetuese si shumicë parlamentare dhe qeverisëse. “Nëse i referohemi pushtetit vendor që është disproporcional nuk është rezultat i marrjes në rrugë jodemokratike, me ushtrim të forcës për të eliminuar kundërshtarët nga zgjedhjet por si një vendim vetëvrasës për të mos hyrë në zgjedhje i opozitës, së cilës nuk i është cenuar liria dhe e drejta për të hyrë në zgjedhje”, tha Rama, duke iu përgjigjur pyetjes së gazetarëve mbi ndarjen e pushteteve.

Kryeministri tha se “nuk është e vërtetë që i udhëheq të gjitha”. “Të qeverisësh i vetëm është rezultat i zgjedhjeve. Në Britaninë e Madhe konservatorët qeverisin të vetëm, në Francë Presidenti ka shumicën në parlament ka dhe qeverinë se ka marrë votat. Në vende të tjera ndodh sipas vullnetit të zgjedhësve”, tha Rama.

Lidhur me Gjykatën Kushtetuese, Rama tha se “i gjithë diskutimi në drejtësi që kur ka filluar reforma ka një arbitër, partneri ynë i madh SHBA e BE e kanë mbështetur dhe monitorojnë shumë afër”. “Nëse dikujt i shkon mendja që SHBA dhe BE që monitorojnë nga afër reformën në drejtësi janë të kapura apo organizatë mafioze siç e quan Ilir Meta, i shkon mendja gabim sepse nuk do të ishte e mundur të bëhej gjithë ky investim nga partnerët dhe të lihej të kapej nga unë”, tha Rama./atsh

“Unë asnjëherë nuk kam folur për ndarje të Kosovës, por e kam thënë edhe ndërkombëtarisht se këtu ka një term që është komplet i gabuar, termi shkëmbim territoresh”, deklaroi sot Kryeministri Edi Rama.

Rama tha se “ky është gabim që në start pasi ti nuk shkëmben dot territoret. “Mbi çfarë mase, që këtu është e pamundur ta realizosh sepse gjithmonë do të jetë një palë e humbur në sytë e gjithë të tjerëve”.

“E kamë thënë që në fillim se çfarëdo marrëveshje të jetë do të dali në dritë. Do shkoj Hashimi me Aleksandrin të vizatoj kufijtë me penelat e mi? Jo, do të shkoj në Kuvend, është marrëveshje ndërkombëtare që kalon në të gjitha instancat”, tha Rama.

Rama tha se “unë nuk kam folur kurrë për shkëmbime territoresh pasi është vendimmarrje në radhë të parë e liderëve në Kosovë”.

Kryeministri Rama solli në vëmendje eksperiencën e Kosovës me Malin e Zi. “Kosova dhe Mali i Zi pati gjithë atë vuajtje për të vënë një kufi me një vend me të cilin nuk ka bërë luftë dhe ka marrëdhënie shumë të afërta. Do të vijë momenti që Serbia do të njohë Kosovën. Do bëhet demarkacioni. I kam përcjellë të gjithë atyre që më kanë kërkuar opinionin tim dhe i kam thënë: jo shkëmbim territoresh, jo kufij mbi baza etnike. Këto të dyja duhet të jenë vijat e kuqe. Duhet konsensus për kufirin mes të dyja palëve nuk duhen parë ëndrra me sy hapur, por realiteti”, tha Rama./atsh

Heroi ynë kombëtar Gjergj Kastrioti Skënderbeu, siç me të drejtë ka thënë Fan Noli, do të mbetet shqiptari më i gjallë ndër të gjallët, figura më shpëtimtare dhe më frymëzuese për mbijetesë e kombit tonë, që testament na ka lënë domosdoshmërinë e bashkimit në momentet më të rrezikshme të ekzistencës së kombit tonë”, shprehet Presidenti Ilir Meta duke kujtuar ngjarjen historike të Besëlidhjes së Lezhës.

Meta thekson se “sot në përkujtim të ngjarjes historike të Besëlidhjes së Lezhës, unifikimit kombëtar përballë rrezikut të asimilimit e shkombëtarizimit, mesazhi që na sjell nga historia, uroj të na ndihmojë ne të gjithëve për reflektuar, për t’u ngritur dhe bashkuar sa nuk është vonë, në një Besëlidhje të re, po aq të fortë e gjithëpërfshirëse, përballë një rreziku të ri pushtimi nga një sekt mafioz, pa fe, pa familje, pa atdhe, që ka marrë peng të ardhmen e çdo shqiptari”.

“Zëri i popullit është zëri i Zotit! Erdhi koha të dëgjohet sa më fort! Mirësevjen Besëlidhje e re me Pranverën Kuqezi”, shprehet Meta./atsh

Partia Demokratike deklaron se “për Edi Ramën nuk do të ketë më një mandat të tretë”.

Partia Demokratike nëpërmjet një njoftimi shprehet se “në 2 mandatet e Ramës kryeministër më shumë se 300 mijë shqiptarë u larguan nga vendi. Me korrupsion, krim, arbitraritet dhe papunësi, Rama e barazoi Shqipërinë me vendet që janë në luftë për nga numri i lartë i shqiptarëve azilkërkues në Bashkimin Europian”.

“Poshtërsi është të mohosh këtë të vërtetë, duke bërë me faj herë Bashkimin Europian, herë shqiptarët që ikin se nuk pajtohen me qeverisjen e keqe të Edi Ramës. Kjo do të marrë fund me votë të lirë! Për Edi Ramën nuk do të ketë më një mandat të tretë! Për Shqipërinë nuk do të ketë më eksod!”, shprehet PD./atsh

“Ne nuk jemi në fillim, por as në fund të një projekti politik për një rilindje shqiptare ndaj krahas atyre që kemi arritur kemi operacione jo të vogla për të kryer qoftë për të shëruar plagët e vendit, qoftë për të pastruar organizmin tonë politik, është një pastrim i vazhdueshëm që duhet të shkojë më thellë dhe detyra jonë është ti bëjmë të dyja pa ngurrim dhe papushim”.

Kështu deklaroi sot Kryeministri Edi Rama në ditën e dytë të Kongresit të Partisë Socialiste.
“Kush në këtë sallë apo jashtë saj që ka mbështetjen e socialistëve si udhëheqës si ministër, deputet si delegat kryetar partie bashki si kryetar organizate socialiste që nuk e ka kuptuar se çfarë kërkohet dhe nuk ka energji për të bërë më shumë kilometra se çka bërë për të arritur këtu duhet dhe do hapë krahun. Duhet dhe do hapë krahun kush nuk ka kuptuar se PS-ja nuk është pronë ekskluzive e asnjë shefi sado i madh apo i vogël që nga kryetarët e organizatave deri tek shefat në Tiranë”.

“Pse e them këtë, e them për shumë arsye, por një arsye që vazhdon të ma bëjë të pamundur të jem i kënaqur me punën që bëhet në PS nga të gjithë nga i pari tek i fundit është se akoma sot në vitin 2020 ne kemi gardhe dhe mure dhe kanale për të kapërcyer për njerëzit që duan të na bashkohen pa fund. Akoma sot në 2020 ne kemi kryetarë organizatash, deputetë, udhëheqës që jo vetëm nuk arrijnë të shtyjnë më fortë për t’i rrëzuar këto gardhe e këto mure, por përkundrazi i justifikojnë gardhet e muret jo këtë e kemi shok të mirë, kemi që nga koha e luftës, ndërkohë që luftë ka bërë vetëm ai që është 100 vjeç këtu, njeri tjetër këtu luftë s’ka bërë. I humbi këto zgjedhje ky kryetar organizate, por ta mbajmë se shiko si është puna dhe ndërkohë ky tjetri po na prish punë se na solli një nga PD-ja, nga LSI-ja, po si mund ta lëmë ne partinë në dorën e këtyre. Ju erdhi keq juve që e latë partinë në dorën time”, – tha Rama.

Kreu i qeverisë u shpreh se “kulmi i kulmit ne vendosim që në çdo organizatë të ketë një bashkëkryetare grua, ndërkohë që tani që flasim akoma nuk i kemi bashkëkryetaret gra aty ku i kemi organizatat. Dhe këtë thirrje e kam për gratë që janë këtu dhe të gjitha gratë që na dëgjojnë, po e latë këtë në dorë të Kryesisë së PS-së, në dorë të deputetëve, po e latë këtë në dorë të shefave nuk do të bëhet kurrë. Merreni në dorë vetë dhe refuzoni çdo kryetar organizate që nuk hap dyert për gratë dhe që nuk pranon të ketë në krah një grua si bashkëkryetare, refuzojeni, denoncojeni, shkatërroheni fare sepse nëse ka një mundësi reale që nët shtojmë forcën tonë elektorale janë gratë, burrat çfarë kanë pasur për ta bërë e kanë bërë dhe tani janë vetëm çfarë marrin, jo çfarë japin”.

Janë gratë, vijoi Rama, vetëm gratë dhe nëse ka një arsye madhore për të qenë krenarë në këtë PS që nuk do mund dot ta zëvendësonte në këtë pikë është fakti se falë kësaj partie jemi në 5 vendet e para të botës për barazinë gjinore në qeverisje.

Kryeministri Rama tha se “ka shumë profesorë, ideologë, analistë, komentatorë, por ka dhe shumë brenda nesh, brenda rrethit të shefave të mëdhenj që thonë këto gratë në qeveri i kemi me profil të ulët politik, janë pak si teknike ne na duhen politike”.

“Unë po ju them se kjo është thjesht e vetëm mënyra e gabuar për të parë se çfarë janë ministrat dhe çfarë duhet të bëjnë ministrat dhe nga ana tjetër, po ju them që puna e grave e të gjithave në qeveri është një punë që garanton siguri për të gjitha punët që ne duam të bëjmë si qeveri ashtu sikundër ministrja e Drejtësisë mund të jetë dukur teknike, sot e patë këtu dhe të jeni të sigurt siç patë ministren e Drejtësisë mund të shikojmë shumë më tepër gra që të marrin shumë më tepër forcë falë faktit që dinë çfarë thonë dinë pse luftojnë dhe mbi të gjitha janë të vendosura për ti çuar përpara punët e tyre”, – nënvizoi Rama. /atsh