Politike

Kryetarja e LSI-së Monika Kryemadhi deklaroi sot nga Vlora se do t’i bashkohet manifestimit në 2 mars në Bulevard, por sipas saj, “jo si kryetare e LSI por si nënë dhe qytetare”.

Gjatë një takimi me strukturat në Vlorë, Kryemadhi u shpreh se “nuk do të jem për Ilir Metën si President, as për shkeljen kushtetuese që ka bërë Rilindja dhe Edi Rama, sepse ata e kanë bërë gjithmonë atë gjë. Do të jem në bulevard për të treguar që e gjithë historia e rilindjes që ka ndërtuar dhe gjithë fabula dhe përralla mashtruese e Rilindjes dhe Edi Ramës që ka ndërtuar për Shqipërinë, jo vetëm që është një mashtrim i madh për shqiptarët, por është një mashtrim i madh edhe për ndërkombëtarët të cilëve do t’u bjerë në kokë mashtrimi që kanë ndërtuar dhe që është ndërtuar”.

“Unë në 2 mars do të jem si qytetare, si nënë. Do të jem atje për shkak të të gjithë historisë, për shkak të taksave të larta, të faturave të larta të energjisë elektrike, për shkak të mungesës së punës për të rinjtë dhe të rejat. Por ajo që është më e rëndësishme, do të jem sepse kjo Rilindje dhe ky Parlament ilegjitim, i cili pa pikë turpi falsifikojnë një ligj, një dokument zyrtar ditën për diell, të jeni të bindur që do të na falsifikojnë edhe fëmijët në maternitetet”, tha ajo.

“ Prandaj do të jem atje për të qenë një shqiptare dinjitoze si të gjitha gratë shqiptare që luftojnë për fëmijët e tyre, sepse unë besoj dhe do të bëj çdo gjë që Shqipëria të jetë shtëpia jonë dhe e të gjithë shqiptarëve”, tha Kryemadhi./atsh

Deputetja e Partisë Socialiste, Lindita Nikolla, deklaroi sot se Partia Socialiste është forca e pakonkurrueshme në vend për mbështetjen që u jep vajzave dhe grave. Nisma “Edhe një” e rriti me 10% numrin e anëtareve të partisë me vajza e gra që vijnë nga profile të ndryshme, nga arsimi, shëndetësia, ekonomia, apo gra në punë dhe të papuna”.

Në fjalën e saj në Kongresin e Partisë Socialistë, që nisi sot në Pallatin e Kongreseve në Tiranë, Nikolla tha se “33% e anëtareve të reja janë vajza nën moshën 30 vjeç, ose 55 % e tyre janë nën 40 vjeç”.

“Në fund të tetorit të vitit të kaluar shpallëm nismën “Edhe një”. Ishim 559 këshilltare të bashkive në të gjithë vendin, të cilat u angazhuan që do të shtonin edhe një, do të ftonin edhe një vajzë apo grua tjetër anëtare të Partisë Socialiste. Në katër muaj, ne sot jemi mbi 3 mijë vajza e gra të nismës “Edhe një” sepse 2507 vajza e gra të tjera u bënë anëtarë të PS duke iu bashkuar nismës tjetër të PS që organizatat socialiste të bashkëdrejtohen nga një burrë dhe një grua”, – nënvizoi Nikolla.

Deputetja Nikolla u shpreh se “sot 50 % e përfaqësuesve në këshillat bashkiakë të vendit janë gra, standard që e vendosi i pari Edi Rama në bashkinë e Tiranës, 50% e kabinetit janë gra, 47% e zëvendësministrave janë gra, po ashtu 40% e institucioneve qendrore dhe 45% e drejtorive të përgjithshme drejtohen nga gra. Edi Rama është lideri që në bashki, qeveri dhe parti ka vendosur standarde të larta përfaqësimi për gratë edhe këtë ju tashmë e dini”. /atsh

“Ka vetëm një autostradë që na duhet të ndërtojmë së bashku dhe ajo është autostrada Ballkani Perëndimor – Bashkimi Europian, kjo është ajo për të cilën kemi nevojë”, deklaroi sot Kryeministri Edi Rama, duke marrë fjalën në panelin e kryeministrave në Samitin e BERZH-it mbi investimet 2020 në Ballkanin Perëndimor.

Duke vlerësuar këtë nismë të BERZH-it, Rama tha se “jam këtu për të dëshmuar se qysh prej momentit të parë kjo nismë ka qenë kaq e dobishme, kaq rigjallëruese çdo vit”.

“Nga njëra anë procesi i Berlinit i nisur nga Kancelarja Gjermane në të njëjtin vit që BERZH-i nisi këtë nismë ka qenë në njëfarë mënyre ngushëllimi ynë, pasi ndërkohë që në procesin e integrimit europian na është dashur të përballemi me mjaft beteja e me jo pak zhgënjime, në këtë rrugëtim paralel politik dhe ekonomik kemi gjetur mjaft lehtësi, shumë mbështetje dhe sigurisht kemi mundur të bëjmë gjëra konkrete”, tha Rama.

Rama falënderoi veçanërisht kryeministrin e Kroacisë, Andrej Plenkovic që ishte i pranishëm në këtë samit. “Është vërtetë shumë e rëndësishme për të gjithë ne që jemi këtu në panel. I jemi mjaft mirënjohës për këtë Andrejit, pasi Kroacia është agjenti ynë në Bruksel dhe në të njëjtën kohë është edhe përkthyesi i Brukselit në rajon. Është më e lehtë të përkthesh Brukselin te ne, se sa ne te Brukseli por është pjesë e punës tënde dhe ti je diplomat me përvojë, ndaj paç fat me këtë”, iu drejtua Rama, kryeministrit të Kroacisë, Andrej Plenkovic.

Kryeministri Rama falënderoi të gjithë ata që morën pjesë në Konferencën e Donatorëve, ku sipas tij, “pjesa më prekëse ishte pa asnjë dyshim pjesëmarrja e miqve tanë nga rajoni”. Të gjitha këto vende dhe Kroacia kanë dhënë një shembull të shkëlqyer solidariteti. Fryma në rajon ka ndryshuar prej disa viteve edhe falë këtij forumi dhe shumë mbledhjeve të tjera. Deri në 2014 ne nuk ishim ulur kurrë në një takim të gjithë së bashku me përfaqësuesit e këtyre vendeve, për t’u ulur pa armë, urrejtje, gjakderdhje, për t’u fokusuar për të ardhmen. Kjo është e jashtëzakonshme dhe na duhet të bëjmë para”, tha Rama.

Kryeministri tha se, “nuk është e lehtë të ecësh para dhe të ndërtosh mbi këtë dhe ta shndërrosh paqen në një instrument zhvillimi dhe begatie, sepse e shkuara ende nuk është tërësisht pjesë e historisë”.

“Natyrisht kemi probleme, mosmarrëveshje, ende ka probleme të mëdha që duhen zgjidhur, por ne po punojmë së bashku e po ecim përpara së bashku e duam që së bashku të ndërtojmë një të ardhme për fëmijët tanë që të jetë krejtësisht ndryshe nga ajo që trashëguam brez pas brezi, me mosmarrëveshje, luftëra dhe konflikte”, tha Rama.

Kjo, vijoi ai, “nuk ka të bëjë me paqen si e tillë, por me zhvillimin, ekonominë, të ardhmen për popujt tanë”. “Kjo është arsyeja që besoj fort te Shengeni Rajonal. Nuk ka minishengen, nga e kanë gjetur këtë fjalë, ne jemi mesatarisht nga më të gjatët në Europë si rajon. Është Shengen Rajonal, është një hapësirë e përbashkët rajonale që i referohet shengenit thjesht për të kuptuar se për çfarë bëhet fjalë; janë 4 liritë e Europës të lëvizjes së njerëzve, mallrave, kapitalit dhe shërbimeve. Në rajonin tonë, në kufi njerëzit presin më shumë se 1 mijë vjet në vit”, tha Rama.

Ndërkohë, ai u shpreh se “Shqipëria po ecën para dhe na duhet të tejkalojmë këtë dëm shumë të madh që është shkaktuar nga tërmeti”.

“Kemi një sërë projektesh të mëdha në vazhdim e sipër, si projektin e aeroportit të Vlorës, parqet fotovoltaike, dhe për më tepër për investimet hidrike jemi mes 5 vendeve të Europës në përputhje me vizonin e Ursula von der Leyen, sepse kemi trashëguar një sistem ku thuajse gjithçka mbështetet në energjinë e ripërtëritshme dhe të gjelbër”, tha Rama./atsh

Presidenti Ilir Meta depozitoi sot personalisht në Prokurorinë e Posaçme SPAK, kallëzimin penal për ministren e Drejtësisë, Etilda Gjonaj dhe për funksionarë të tjerë të lartë.

Në një prononcim për mediet, Meta tha se “nuk ka ndodhur ngjarje e tillë në historinë e shtetit tonë, ku së fundi rezulton e përfshirë në mënyrë të drejtpërdrejtë edhe celula e strukturuar në krye të Ministrisë së Drejtësisë, që përmes shkeljes dhe dhunimit të shumë ligjeve ka tentuar një grusht shteti haptazi”.

“Këto fakte tronditëse ishte e domosdoshme t’i sillte vetë Presidenti. Kallëzimi penal për disa vepra shumë të qarta, është dorëzuar për tre titullarë të lartë të Ministrisë së Drejtësisë, me në krye Ministren. Po vlerësojmë prova të tjera për persona të tjerë të përfshirë për të çuar deri në fund shpartallimin e kësaj tentative të grushtit të shtetit, por edhe gjithë përpjekjes për të finalizuar grushtin e shtetit”, tha Meta.

Ai ftoi në 2 mars të gjithë shqiptarët në bulevard në Tiranë për të bërë të qartë se të gjithë shqiptarët janë me Kushtetutën, jo me Presidentin. “Unë kam dal në sheshin e betejës së vërtetë për çdo qytetar shqiptar që dëshiron të jetojë në liri, demokraci dhe një shtet ku ligji është i barabartë për të gjithë. Nuk ka ndodhur në asnjë vend të Europës që të shkelet ligji në këtë mënyrë”, tha Meta./atsh

“Duhet të mësojmë të bashkëjetojmë si vëllezër, ose pastaj le të dergjemi si të marrë deri në shkatërrim”.

Ishin këto fjalë të nobelistit për paqen, Martin Luther King që Kryeministri Edi Rama përcolli mëngjesin e sotëm përmes rubrikës “Fjalë të Çmuara”.

Duke cituar fjalë të shenjta nga librat e shenjtë, por edhe nga personalitetet botërore, Kryeministri Rama ka përcjellë këto muaj apelin e solidaritetit dhe ndihmës njerëzore ndaj të prekurve nga tërmeti i 26 nëntorit./atsh