Politike

Kryetari i PD-së Lulzim Basha, ditën e sotme ka zhvilluar një takim me një grup maturantësh në Berat dhe është shprehur se do të ketë 100% bursë për studentët, familjet e të cilëve kanë më pak të ardhura se 64 mijë lekë në muaj.

Basha shprehet se ishte “kënaqësi të bisedoja dhe ndaja mendime me maturantët e Beratit për provimet e Maturës dhe pengesat, ëndrrat e planet e tyre për të ardhmen. Maturantët më treguan vështirësitë me të cilat përballen, problematikat e mëdha që shoqëruan këtë vit, paqartësitë, pamundësia për të realizuar mësimin online, e deri tek niveli i lartë i vështirësisë së provimeve. Shumë prej gjimnazistëve janë të paqartë për të ardhmen e tyre, ndërsa vështirësitë ekonomike për të përballuar arsimimin sa vijnë e shtohen”.

Ai tha se qeveria Rama po e bën çdo ditë e më të pamundur për maturantët të vazhdojnë studimet e larta.

“Kjo situatë duhet dhe do të marrë fund. Me mua dhe PD asnjë nxënës nuk do të privohet nga e drejta për arsim për shkak të pamundësisë ekonomike. Familjet e studentëve me të ardhura më pak se 640 mijë lekë të vjetra në muaj do të përfitojnë subvencion 100% të tarifës. Familjet me të ardhura mbi 640 mijë lekë të vjetra në muaj do të paguajnë gjysmën e tarifës. Për studentët në pamundësi, buxheti i shtetit do të mundësojë bursa dhe mbështetje financiare”, theksoi ai.

Po ashtu Basha tha se “ne do ta dyfishojmë buxhetin dhe do të anulojmë Ligjin e Arsimit të Lartë, do të ofrojmë stazhe për 10 mijë studentë çdo vit. Bashkë me të rinjtë e të rejat e këtij vendi do të ndërtojmë një qeverisje normale, që ofron mundësi për arsim cilësor, punësim e një jetë normale me mundësi dhe dinjitet për të gjithë”. /atsh

Presidenti Ilir Meta tha sot në konferencën e përjavshme me gazetarët, se ai e ka përshëndetur arritjen e marrëveshjes për Reformën Zgjedhore dhe zbatimi i saj është i rëndësishëm.

I pyetur për qëndrimin e opozitës parlamentare ndaj marrëveshjes, Meta tha se nuk është çështje e tij si President.

“Mesazhet i kam dhënë në kohë, e kam përshëndetur këtë marrëveshje, jo më shumë për përmbajtjen e saj, megjithëse ka elementë mjaft të rëndësishëm që forcojë ndjeshëm integritetin e zgjedhjeve, sikurse është futja e elementit biometrik në mënyrë që të garantohemi që çdo qytetar shqiptar voton vetëm një herë dhe vota është barabartë”, tha Meta, duke shtuar se “kjo marrëveshje e sforcuar, që duhet të ishte arritur prej kohësh, mund të kishte bërë një progres shumë thelbësor në shumë aspekte, që të jepte një dimension tjetër të gjithë sistemit politik në vend”.

“Mos harrojmë në vitin 2008-ën unë dhe disa kolegë të tjerë ish-deputetë bëmë grevë urie që të mos mbylleshin listat dhe të mos bëheshin ndryshimet kushtetuese të cilat cenuan parimet e balancës dhe kontrollit në vend”, tha Meta.

Por, sipas tij, të gjitha këto nuk janë shumë të rëndësishme para vendosjes sa më shpejt të legjitimitetit, pasi Kuvendit sot e kësaj dite i mungojnë 18 deputetë në kundërshtim me kërkesën e qartë që ka Kushtetuta.

“Besoj që kjo është arsyeja kryesore që detyrohet edhe Sekretari Amerikan i Shtetit që ka kaq shumë probleme të tjera në të gjithë botën që të theksojë rëndësinë e kësaj marrëveshje ndërpartiake dhe rëndësinë e kodifikimit të saj për të forcuar demokracinë”, tha Meta.

“Të mos harrojmë që kjo marrëveshje është meritë e veçantë e angazhimit dhe përpjekjeve në nivelet më të larta të partnerëve tanë. Është vlerësuar nga nivele shumë të larta ndërkombëtare për atë që do të meritonte realisht thelbi i një marrëveshjeje të tillë, që duhet të ishte një marrëveshje e bërë si xhentëlmenët sepse për çfarëdo merremi vesh që t’i japim mundësi njerëzve të zgjedhin alternativën më të mirë në mënyrën më demokratike. Kështu që unë mezi po pres që ajo të vijë këtu dhe unë ta firmos menjëherë”, u shpreh Meta.

Meta e konsideroi si vendim pozitiv, por të vonuar vendimin e KLGJ për mbarimin e mandatit nga Gjykata e Lartë njëkohësisht dhe nga KED të Ardian Dvoranit.

“Mendoj se qëndrimi i Presidentit ka qenë dhe mbetet gjithmonë qëndrimi i Kushtetutës dhe ligjit që kanë qenë shumë të qarta që në momentin e dekretimit të anëtarit të parë të Gjykatës së Lartë. Vendimi i djeshëm në vlerësimin tim është i vonuar, por sidoqoftë është pozitiv. Dhe krijon mundësi për të ruajtur integritetin e institucioneve të reja të drejtësisë”, tha Meta.

Ndërkaq, presidenti Ilir Meta deklaroi sot se do t’i paraqesë Këshillit Kombëtar të Integrimit Europian sugjerimet konkrete për integrimin e vendit në Bashkimin Europian.

“Dihet që këto javë janë me rëndësi për negociatat. KE do të prezantojë kuadrin negociator dhe një raport për zbatimin e kushteve nga ana e Shqipërisë. Në takimin e Këshillit Kombëtar të Integrimit Europian unë si President paraqita disa vlerësime dhe sugjerime për mënyrën sesi si duhet zhvillohet ky proces. Nënvizoj se së pari duhet një ndërveprim i strukturuar dhe bashkëpunim gjithëpërfshirës në mënyrë që kushtet të mos mbeten të papërmbushuara dhe që çelja e negociatave të mos mbetet në vendnumëro”, u shpreh Meta.

Presidenca i paraqet Këshillit Kombëtar të Integrimit Europian komentet e plota me sugjerime konkrete mbi planin e veprimit të hartuar nga MEPJ.

Meta theksoi se, “zbatimi i 15 kushteve dhe i detyrimeve të marrëveshjes së stabilizim-asociimit janë mënyra e vetme për të bërë përparim të besueshëm siç e përcakton edhe metodologjia e re e BE”.

Në lidhje me kreun e ri të KLSH-së, Meta tha se do t’i qëndrojë në mënyrë të hekurt detyrimit që i jep Kushtetuta presidentit dhe në këtë aspekt “unë vlerësoj edhe shumë kandidatë nga ana profesionale, të cilët mund të jenë anëtarë të mazhorancës aktuale apo të administratës aktuale, që kanë shprehur dëshirën e tyre për këtë post”.

Presidenti Meta gjithashtu uroi socialistët për 29-vjetorin e themelimit të PS-së. “Uroj të gjithë socialistët për këtë ditë të rëndësishme për ta, dhe t’i vlerësoj për ato gjëra pozitive që kanë bërë në historinë e demokracisë, të zhvillimit të saj dhe shpresoj që të jetë një ditë reflektimi edhe për ata që drejtojnë sot dhe për të gjithë të tjerët” tha ai.

Një urim Meta e kishte edhe për Lulzim Bashën, që po ditën e sotme mbush 46-vjeç, ndërsa zbuloi edhe dhuratën që i kishte nisur. /atsh

Ministrja për Marrëdhëniet me Parlamentin dhe zëdhënëse e Qeverisë, Elisa Spiropali, uroi sot socialistët për ditëlindjen e Partisë Socialiste, që sipas saj “udhëheq betejën historike për modernizimin, transformimin dhe integrimin e shtetit dhe të kombit tonë brenda vlerave të përbashkëta të Europës”.

“Në Partinë Socialiste të Shqipërisë kam kaluar pjesën më të madhe të jetës time të rritur. Partisë Socialiste i jam bashkuar në 2009, kur isha 26 vjeç, dhe sot nënë e dy fëmijëve jam e do jem pranë saj përgjithmonë. Partia Socialiste më ka mësuar shumëçka në opozitë dhe në qeverisje, në të mirë dhe në të keq. Më ka sfiduar, por kurrë nuk më ka zhgënjyer”, – theksoi Spiropali.

Më tej, ministrja shprehet “gëzuar ditëlindjen e Partisë Socialiste të Shqipërisë, forcës politike që në të gjithë rrugën e saj të përpjetë ka ditur të jetë mishërim i guximit dhe suksesit në transformimin historik, por edhe mbrojtëse e patrembur e demokratizimit shoqëror dhe interesit kombëtar”.

“Jemi një forcë politike e pakonkurrueshme për nga vullneti për t’u korigjuar parreshtur, për t’u hapur ndaj shoqërisë për të qeverisur për të gjithë. Respekte për themeluesit, drejtuesit, anëtarët, aktivistët, votuesit, gratë, burrat, vajzat, djemtë, të rinjtë, të moshuarit, rishtarët, veteranët, që ndër vite e rritën dhe e farkëtuan Partinë Socialiste si fuqinë e ndryshimit, duke investuar tek Ajo besimin e madh te Shqipëria që duam”, – nënvizoi ajo.

Me Shqipërinë dhe për Shqipërine, suksese dhe vetëm suksese në rrugën e nisur që është fillimi i një pambarimi. /atsh

Sekretari i Përgjithshëm i Partisë Socialiste, njëherësh dhe kryetar i grupit parlamentar, Taulant Balla uroi sot të gjithë socialistët shqiptarë në ditëlindjen e 29 të themelimit të Partisë Socialiste.

Balla tha se Partia Socialiste është forca më e madhe politike jo vetëm në Shqipëri, por në mbarë trojet shqiptare.

Sipas Ballës, ky 29 vjetor e gjen Partinë Socialiste në një moment të rëndësishëm të maturimit të mëtejshëm, teksa përgatitet për fitoren e mandatit të tretë, tek i cili “ne do të kemi përmbyllur bisedimet për anëtarësim dhe unë besoj do të kemi dhe datën për anëtarësimin e Shqipërisë në BE”.

“Jemi në ditëlindjen e 29 të Partisë Socialiste dhe i uroj të gjithë socialistëve dhe progresistëve shqiptarë këtë moment të rëndësishëm të maturimit të mëtejshëm të forcës më të madhe politike jo vetëm në Shqipëri, por në mbarë trojet shqiptare dhe që e gjen PS në një etapë të rëndësishme teksa përgatitemi për 9 majin e vitit 2021, ku ne presim të rikonfirmohemi në përgjegjësinë e rëndësishme historike mandati i tretë, tek i cili ne do të kemi përmbyllur bisedimet për anëtarësim dhe unë besoj do të kemi dhe datën për anëtarësimin e Shqipërisë në BE”, tha ai.

Balla shprehu bindjen e shumicës së qytetarëve që nën drejtimin e PS dhe kryeministrit Edi Rama janë bërë hapa që në 2013 shumë pak mund t’i besonin./atsh

Kryeministri Edi Rama përcolli pamje të historikut të Partisë Socialiste ndër vit, duke uruar 29-vjetorin e kësaj force politike.

“Mirëmëngjes. Gëzuar ditën e lindjes së forcës më të madhe politike shqiptare, Partisë Socialiste, e cila në 29 vjet ka fituar e ka humbur zgjedhje, ka pasur shkëlqime e rënie, po kurrë nuk e ka bërë gabimin e cënimit të interesit kombëtar dhe gjithnjë ka ditur të ripërtërihet, në rrugën e një ideje të madhe e të shumë punëve për Shqipërinë, që vazhdon”, është shprehur Rama.

Në videon e publikuar nga Rama tregohen pamje që prej burgosjes së ish-kryetarit të saj, Fatos Nano, trazirat e 97-s, vitet e qeverisjes së Partisë Socialiste nga 1997 deri në vitin 2005. Vitet e opozitës, 21 Janari, dhe më pas rikthimi në pushtet në 23 qershor 2013. Vitet e qeverisjes, protestat për armët kimike, marrëveshja e 17 majit me PD, fitorja në 2017-n, vendimi për shtyrjen e hapjes së negociatave nga Këshilli Europian në tetorin e 2019-s, tërmeti tragjik i 26 nëntorit si dhe shumë ngjarje të tjera, të cilat kanë shënuar këto vite të Partisë Socialiste.

“Jeta juaj është e juaja, mos e lini të struket nën hijen e nënshtrimit prej goditjeve. Hapini sytë katër. Ka dalje edhe kur s’ka. Ka dritë diku. Mbase s’do ketë aq shumë dritë, por ka aq sa për të mundur terrin. Hapini sytë katër. Zotat do t’ju ofrojnë shanse. Shihini. Kapini. Ju s’mund ta mundni vdekjen, por nganjëherë vdekjen e të jetuarit mund ta mundni. E sa më shpejt mësoni ta bëni këtë, aq më shumë dritë do të ketë. Kujtojeni këtë gjithë sa kohë jetoni. Jeni mrekullia vetë. Zotat presin të kënaqen brenda jush. Nëse doni ta provoni, shkoni deri në fund përndryshe mos u nisni fare. Nëse doni ta provoni, çojini deri në fund. Gjithçka tjetër është qëndrueshmëri. Sprovë deri në çfarë pike jeni gati të rezistoni dhe do t’ia dilni pavarësisht rrëzimeve dhe shanseve fare të vogla e do jetë më mirë se ç’mund të parafytyroni. Nëse do ta provoni, shikojini deri në fund. Asnjë ndjesi tjetër si kjo nuk ka. Krejt të vetëm para zotave. Nata do ndriçojë nga zjarri juaj. Bëje, bëje, bëje, deri në fund. Do ta çoni jetën tuaj drejt të qeshurës së përsosur . Është e vetmja betejë që vlen të luftohet. Sukseset tona të mëdha s’mund t’i kemi kurrë pas, sepse fati që duam sheh nga lart”, thuhet në videon e publikuar nga Kryeministri Rama./atsh