Politike

Kryeministri Edi Rama po zhvillon një vizitë zyrtare në Kosovë, sikurse shprehet “për të mësuar më shumë në lidhje me aktakuzat e Prokurorisë Speciale ndaj Presidentit të Kosovës, Hashim Thaçi dhe ish-kryetarit të Kuvendit të Kosovës, Kadri Veseli”.

Rama thekson se “fletërrufeja speciale do të hyjë si njollë turpi në historinë botërore drejtësisë”.

“Në Prishtinë për të dëgjuar dhe mësuar më shumë pas fletërrufesë speciale që do të hyjë si njollë turpi në historinë botërore drejtësisë, që praktikën e akuzës publike pa aktakuzë juridike e ka njohur vetëm në epokat e sundimeve ideologjike”, tha Rama./atsh

Byroja e Kuvendit vendosi sot përjashtimin e deputetit Kujtim Gjuzi nga pjesëmarrja në komisione dhe/ose seancë plenare deri më datë 1 korrik.

Sipas Urdhrit të Kryetarit të Kuvendit, Gramoz Ruçi, sot u zhvillua mbledhja e Byrosë së Kuvendit, për shqyrtimin e ankesës së deputetit Kujtim Gjuzi kundër vendimit të Sekretariatit për Procedurat, Votimet dhe Etikën “Për marrjen e masës disiplinore ndaj deputetit Kujtim Gjuzi “Përjashtim nga pjesëmarrja në komisione dhe/ose seancë plenare për 10 (dhjetë) ditë”.

Në fund të seancës Byroja vendosi përjashtimin e deputetit Kujtim Gjuzi nga pjesëmarrja në komisione dhe/ose seancë plenare deri më datë 1 korrik./atsh

Në kuadër të vizitës zyrtare në Prishtinë, Kryeministri Edi Rama u prit sot edhe nga Presidenti i Kosovës, Hashim Thaçi.

Në takimin e organizuar në Presidencën e Kosovës, Kryeministri Rama shoqërohej nga ministri në detyrë për Europën dhe Punët e Jashtme, Gent Cakaj dhe ambasadori i Shqipërisë në Kosovë, Qemal Minxhozi.

Më herët gjatë ditës së sotme Kryeministri Rama u takua me Kryeministrin Avdullah Hoti, kryetarin e Partisë Demokratike të Kosovës, Kadri Veseli, me kryetaren e Kuvendit, Vjosa Osmani dhe me kryetarin e partisë “Nisma Socialdemokrate”, Fatmir Limaj dhe kryetarin e Lëvizjes Vetëvendosje, Albin Kurti.

Kryeministri Edi Rama po zhvillon sot një vizitë zyrtare në Kosovë, sikurse shprehet “për të mësuar më shumë” në lidhje me aktakuzat e Prokurorisë Speciale ndaj Presidentit të Kosovës, Hashim Thaçi dhe ish-kryetarit të Kuvendit të Kosovës, Kadri Veseli./atsh

Presidenti i Kosovës, Hashim Thaçi, deklaroi sot se “nëse aktakuza konfirmohet, unë menjëherë do të jap dorëheqjen si President dhe do të përballem me akuzat”.

Në një mesazh për popullin e Kosovës dhe shqiptarët kudo ku jetojnë, Presidenti Thaçi theksoi se “Kosova është shtet i ri, por udhëheqësit e saj duhet të sillen si burrështetas të vërtetë. Do ta mbaj këtë barrë dhe ta mbroj veten time, luftën tonë për liri, me çdo forcë që kam”.

“Nuk do të lejoj që këto akuza false të zhvendosin vëmendjen e Kosovës nga marrja e vendit që meriton në bashkësinë ndërkombëtare, si anëtare e Kombeve të Bashkuara, NATO-s dhe Bashkimit Europian”, – tha Thaçi.

Presidenti Thaçi u shpreh se “Kosova është atdhe i të gjithë qytetarëve të saj.Një shtet europian e një shoqëri multietnike. I them edhe një herë jo hakmarrjes dhe po tolerancës ndëretnike. Vetëm duke ndërtuar demokracinë qytetare ndërtojmë të ardhmen euroatlantike”.

“Kosova duhet të sigurojë funksionimin e qëndrueshëm të institucioneve shtetërore, në çdo rrethanë. Ditëve në vijim do të konsultohem me liderët politikë për hapat e mëtejshëm. Ju siguroj edhe një herë, me drejtësinë nuk do të përballem nga kjo zyrë. Në këtë kapitull të ri e të vështirë vetëm të bashkuar mund të ecim përpara, si në rrafshin kombëtar, ashtu edhe në atë ndërkombëtar”, – tha Thaçi.

Më tej, Presidenti Thaçi theksoi se “zemra ime është e lënduar, por jo e thyer. Mendja ime është e rënduar, por jo e turbulluar. Gjaku im është i nxehur, por i pastër dhe i njëjtësuar me gjakun e bashkëluftëtarëve që humba në luftë. Është i njëjtë me gjakun e atyre që më kanë dashur e më kanë mbështetur pa kursim në këtë rrugëtim për liri dhe shtetndërtim. E në këto çaste edhe me gjakun e atyre që më kanë kundërshtuar, më kanë paragjykuar apo gjykuar ndryshe nga çfarë unë do të dëshiroja”.

“Ndjehem sot, si asnjëherë më parë, krejt i çliruar prej brengave dhe peshës së ballafaqimeve politike. Këto brenga nganjëherë kanë marrë përmasa më të mëdha se sa që e kanë merituar. Kanë mjegulluar në sytë tuaj faktin e thjeshtë se jemi të gjithë bij e bija të kësaj toke dhe të gjithë e duam më të mirën për atdheun tonë, Kosovën”, – tha Thaçi duke shtuar se politika i ka edhe këto.

Është krejt e natyrshme, vijoi ai, që në këtë moment jo të lehtë për mua, më janë kujtuar ata që kanë dhënë jetën për liri.

“E kam kuptuar shumë herët se ne, luftëtarët e UÇK-së, do të paguanim një çmim të madh njerëzor, familjar e politik. Ky është çmimi për lirinë e Kosovës. Është e drejtë që duhet të zbardhet çdo pretendim e çdo akuzë për krime lufte, prej kujtdo dhe kudo që ka ndodh. Bashkëluftëtarët e mi, me disa prej të cilëve paqja na ka ndarë shpesh në taborë të ndryshëm politikë, i kanë sfiduar me forcën e madhe të së vërtetës shumë fabrikime të ulëta dhe në fund pafajësia e tyre ka shkëlqyer mbi plehun e akuzave monstruoze. Njësoj do të jetë edhe me mua dhe me vëllain tim nga gjaku i luftës, Kadri Veseli”, – nënvizoi Thaçi.

Kreu i Shtetit të Kosovës u shpreh se “gabime politike në paqe mund të kem bërë, por krime lufte asnjëherë! Edhe po të kthehesha mbrapa, në kohën e zezë të Sllobodan Millosheviqit, do të bëja të njëjtën gjë, duke iu përgjigjur plumbit armik me plumbin e etjes për liri dhe duke mos i hyrë kurrë në hak asnjë qytetari serb, rom apo shqiptar. Por, një gjë më lejoni ta bëj shumë të qartë: Mbi dy dekada i kam mbështetur iniciativat për ngritjen e gjykatave me përfshirje apo mbikëqyrje ndërkombëtare. Ky parim mbetet i njëjtë edhe sot, kur jam unë, Hashim Thaçi, që personalisht do të mund të përballem me një gjykatë për të cilën kam dhënë mbështetjen time politike, me fjalë e me votë. Në atë kohë, kishim përballë vetëm dy rrugë.
Njëra, të cilës i kam besuar tërë jetën e i besoj edhe sot – ecjes përpara në aleancë të ngushtë me Shtetet e Bashkuara dhe Bashkimin Europian; Dhe e dyta, që kjo çështje t’i lihet në dorë Këshillit të Sigurimit të Kombeve të Bashkuara ku kanë ndikim të fuqishëm vendet që e kundërshtojnë shtetin e Kosovës”.

Vendimi im, shtoi Thaçi, ishte strategjik në përputhje me vizionin për të ardhmen e Kosovës.

“Dhe nuk kam shikuar për përfitime ditore e politike. Sot, kush thotë se qenkam bërë pengesë, madje edhe sabotues i kësaj gjykate, në rastin më të mirë është i keqinformuar dhe në rastin më të keq është tendencioz. Por, nga ana tjetër, dikush duhet ta bëjë bilancin e këtyre 21 viteve hetime, procese dhe gjykime për krimet e luftës në Kosovë”, – tha Thaçi.

Ai u shpreh se “unë do të isha njeriu më i lumtur nëse do të shihja se bashkësia ndërkombëtare aplikon standarde të njëjta mes Kosovës e Serbisë në adresimin e krimeve të luftës. Fatkeqësisht, jo vetëm që nuk e shoh këtë standard e proporcionalitet, por shoh të kundërtën e tij. Dhe ja ku jemi sot. Serbia ecën në rrugën e negocimeve për anëtarësim europian, ndërsa Kosova nuk gëzon të drejtën e lëvizjes së lirë! Natyrisht që unë nuk shoh këtu ndonjë komplot kundër Kosovës. Por është fakt dallimi në qasjen e bashkësisë ndërkombëtare ndaj dy vendeve”.

Presidenti Thaçi tha se “padyshim edhe ne kemi gabimet dhe përgjegjësitë tona. Unë i pari dhe bashkë me mua krejt udhëheqësit e partive politike në Kosovë, që prej disa vitesh nuk kemi arritur ta ruajmë kohezionin politik. Por asnjë faj a gabim i yni apo i imi, nuk e justifikon faktin që Kosova qe 21 vjet vazhdon me proceset e ballafaqimit me krime lufte në hapësirën e saj”.

“E në anën tjetër, në Serbi ka rënë heshtja e varrit për krimet e luftës. Këtë heshtje të Serbisë e bën edhe më të rëndë heshtja e bashkësisë ndërkombëtare. Ne jemi angazhuar, unë personalisht jam angazhuar fuqimisht, për dialog e paqe me Serbinë. Por, nuk pajtohem, as nuk e pranoj dot faktin që për mijëra shqiptarë të zhdukur nga makineria vrastare e Sllobodan Millosheviqit, eshtrat e të cilëve janë në dheun e Serbisë, të mos ketë as deklarata të ndërkombëtarëve”, – theksoi Thaçi.

Presidenti Thaçi tha se, “a mos vallë duhet të presim edhe ditën kur të na thuhet se duhet t’i kërkojmë falje Serbisë për të zhdukurit tanë, për nënat e motrat tona të përdhunuara, për spastrimin etnik dhe gjenocidin kundër nesh? Kjo pyetje absurde lind natyrshëm, pasi askujt në Serbi më nuk i kërkohet llogari për krimet e luftës. Megjithatë, nuk dua të zgjatem sot me këtë temë krahasimi të proporcioneve të drejtësisë për krimet e luftës, e cila me siguri do të zërë vend në historinë e drejtësisë dhe politikës ndërkombëtare si një faqe e zymtë e tyre për këto dy dekada”.

“Jetoj për misionin historik të cilit i përkas bashkë me Kadri Veselin, Ramush Haradinajn, Fatmir Limajn, e shumë të tjerë që ishin të parët në luftën për liri, por edhe të parët të goditur e të sulmuar pas lufte. Ne nuk shkuam në luftë për të fituar zgjedhje e as për të marrë pushtet. Shkuam ja për të jetuar të lirë, ja për të vdekur për liri! Nuk kishim asgjë përveç ëndrrës së madhe për liri dhe pavarësi. Bashkërisht ëndrrën e bëmë realitet. Por, kalimi nga shtigjet e luftës çlirimtare në korridoret e institucioneve nuk mund të ishte për ne as i thjeshtë, as i lehtë. As nuk e kam mohuar ndonjëherë kur kam qenë në krye të qeverisë, as nuk e mohoj sot, se ashtu siç ka pasur arritje në zhvillimin e Kosovës, po ashtu kam pasur sfida në qeverisje dhe drejtim të shtetit”, – tha Thaçi, duke shtuar se kjo është e natyrshme për një lider.

Por, shtoi ai, një gjë është e sigurt: nuk ka pasur dhe nuk mund të ketë qoftë edhe një provë të vetme në adresën e Hashim Thaçit për shkelje të ndonjë ligji.

“Ligji i vetëm që kam shkelur është ai i Millosheviqit”, – tha Thaçi.

Ai theksoi se “nuk gjendet as në Kosovë e askund në këtë botë dikush që t’i kem borxh. Por, kujtdo që ma ka dhënë edhe vetëm një herë votën përgjatë gjithë kësaj pjese të karrierës sime që ende vazhdon, sonte dua t’i them: Më fal, në qoftë se s’kam bërë gjitha ato që ke pritur prej meje, por të jesh i bindur që besimin tënd nuk e kam shpërdoruar”. /atsh

Kuvendi është maksimalisht i angazhuar për suksesin e reformës në drejtësi, të reformës zgjedhore dhe realizimin e pritshmërive të qytetarëve shqiptarë.

Kryetari i Kuvendit, Gramoz Ruçi, priti sot Ambasadoren e Shteteve të Bashkuara të Amerikës, Yuri Kim.

Gjatë takimit u diskutua mbi ecurinë e reformës në drejtësi, të reformës zgjedhore dhe përshpejtimin e plotësimit dhe bërjes funksionale sa më shpejt të Gjykatës Kushtetuese dhe Gjykatës së Lartë.

Kryetari i Kuvendit, Gramoz Ruçi, vuri në dukje se Kuvendi është maksimalisht i angazhuar për suksesin e reformës në drejtësi, të reformës zgjedhore dhe realizimin e pritshmërive të qytetarëve shqiptarë, si kushte thelbësore për të nxitur e mbështetur progresin e Shqipërisë, konsolidimin e demokracisë dhe zhvillimin e vendit./atsh

Ministrja e Shtetit për Marrëdhëniet me Parlamentin dhe zëdhënëse e Qeverisë, Elisa Spiropali tha sot se mandati i tretë i kësaj mazhorance është tejet i rëndësishëm për finalizimin e të gjitha reformave të marra, për të mos pasur një kthim pas.

Ministrja Spiropali, gjatë një interviste televizive, u shpreh se Partia Socialiste është një parti shumë e organizuar në terren dhe organizimi elektoral ka nisur.

“Ne motorët e organizimit tonë partiak i kemi gjithnjë ndezur. Ne jemi një parti shumë e organizuar në territor dhe ka një frymëzim politik që buron nga mazhoranca në Kuvend, nga qeveria, nga reformat e marra dhe nga besimi që kemi për të marrë një mandat të tretë për të përfunduar reformat e nisura dhe çdo kthim pas do ishte fatal. Deklaratat e ish-kryeministrit Berisha apo elementëve të tjerë të opozitës që flasin për rishikim të Reformës në Drejtësi dhe reformave të tjera, që janë reforma të rëndësishme për shtetformimin, janë të rrezikshme. Këto reforma ne do t’i vazhdojmë edhe në mandatin e tretë”,- tha Spiropali.

“Organizimi ynë elektoral në territor ka nisur dhe si bashkëkryetare e PS në Qarkun e Tiranës, duam të vazhdojmë në këtë rugë në Kamëz, Kavajë, Rrogozhinë, Vorë dhe sigurisht në Tiranë ku transformimet janë të dukshme”,- tha Spiropali.

Duke folur për Reformën Zgjedhore ajo tha se nuk pati depolitizim të procesit, por vetëm ndarjen e KQZ në tre komisione. “Me forcimin e ligjit për zgjedhjet dhe me depolizitimin do kishim bërë një hap më tej për modernizimin e procesit zgjedhor. Kjo nuk u pranua, por u bë një hap përpara me KQZ, që do të ndahet në tre komisione dhe ku u gjet një rrugë e mesme”, tha Spiropali.

“Lidhur me listat e hapura, ne nuk i kemi hyrë kësaj analize, pasi jemi në fazën ku Këshilli Politik duhet të na sjellë një produkt tërësor. Ne jemi të fjalës e i qëndrojmë marrëveshjes. Jemi të përgjegjshëm që duhet të gjejmë rrugë komunikimi me opozitën parlamentare. Në këtë pikë jemi shumë të qartë, politika është tripolare sot në vendin tonë dhe nuk e kemi realizuar ne këtë trepolarizim, por largimi i PD e LSI nga Kuvendi. Ne do të bëjmë çfarë kemi mundësi për të bërë një Reformë Zgjedhore për t’i shkuar për shtat integrimit në BE”,- tha ministrja Spiropali.

E pyetur për opozitën, Spiropali tha se e sheh opozitën si gjellë e vjetër e ringrohur.

“E shoh në pozitat e atij që do të rikuperojë në një betejë shumë të gjatë humbjesh. I uroj të mira opozitës së vendit tim. S’jam nga ata njerëz që duan ta shohin opozitën të shkatërruar, edhe pse vihet re një tendencë e tillë, nga vendimmarrja e drejtuesve. Bëhet fjalë për kthim të figurave, u bëhet ftesë. Por në dijeninë time ato figura nuk janë larguar nga partia, por janë përzënë. Janë thjesht mëkëmbës. Një pjesë e madhe e PD është ende tek Berisha. PD se ka ‘vrarë babain’ për të ndryshuar qasjen ndaj politikës. Dominohet nga gjuha e urrejtjes, se ka bërë këtë kapërcim kulturor. Besoj se tani pas betejës së tyre të dështuar me miell e bojë në Kuvend, me protesta e sabotime, nuk do ta kenë të lehtë pasi besimi tek ata si forcë politike është rrënuar. S’më takon mua që të bëj një analizë për situatën brenda tyre. Çdo nismë është e mirëpritur në arenën politike. Por më duket si një nismë e re me histori të vjetër. Më duket pak si gjellë e vjetër e ringrohur.”,- u shpreh Spiropali.

E pyetur për pandeminë, Spiropali bëri thirrje për zbatimin e masave antiCovid. “Është një situatë që përsëritet këtu dhe kudo. Rrezikshmëria nuk ka kaluar dhe ende nuk dihen të gjitha karakteristikat apo virulenca e virusit, ndaj është e rëndësishme që të respektohen deri në detaj masat. Dëgjoj teori konspirative mbi mosekzistencën e virusit apo një plan të Ramës për të kontrolluar pushtetet apo dhe të Sorosit për të kontrolluar botën. Nuk mund të dalin qytetarët në protesta tufa-tufa dhe të përfundojnë në spitale, apo akoma më keq, të infektojnë dhjetëra të tjerë. Ne duhet të jemi si ditën e parë, ku qyetarët u treguan shembullorë në zbatimin e masave. Duhet të kemi durim dhe duhet të rrimë vigjilent. Është e papranueshme që të dalim në grupe dhe të bëjmë takime masive pa asnjë maskë. Sistemi shëndetësor ka qenë shembullor. Në këtë luftë ka dhe bluza të bardha, viktima të virusit. I ftoj ata qytetarë që ndoshta nuk besojnë, se në sa kushte të vështira punojnë sistemi shëndetësor. Nuk mund t’i kthehemi një mbyllje të dytë, pasi do të ishte shumë serioze për financat tona”,- tha Spiropali.

“Komiteti i Ekspertëve, Ministria e Shëndetësisë, është në diskutime të vazhdueshme. Nuk e kemi diskutuar çështjen e mbylljes së dytë, pasi do të shkaktonte dëme në ekonominë e vendit. Deri tani nuk ka rrezik për një mbyllje të dytë, ama ministrja e Shëndetësisë merr vendimet e duhura sa i përket situatës. Gjithçka është e mundur”,- shtoi ajo.

Duke folur për Reformën në Drejtësi, Spiropali tha se nëse Presidenti realizon siç duhet emërimet, në fund të korrikut, Gjykata Kushtetuese do jetë funksionale me shtatë anëtarë.

“Ne gjithmonë i kemi vlerësuar opinionet e Komisionit të Venecias. Ato janë të specializuara. Jemi të qartë se në raporte të tilla, nuk ka asnjëherë një fjalë të fundit, por një mënyrë për t’i lexuar. Ne besoj i kemi lexuar drejt dhe kemi marrë vendimet e duhura, për ne Reforma në Drejtësi është shtylla e reformave të ndërmarra nga kjo mazhorancë. Nuk kemi bërë kurrë kompromis e pazare për të. Gjykata Kushtetuese është një nga kushtet që kemi për të ecur përpara. Sa i përket Kuvendit të Shqipërisë, e ka bërë detyrën për përzgjedhjen e dy anëtarëve. Presidenti duhet të zgjedhë anëtarët e tij dhe në fund të korrikut do kemi një Gjykatë Kushtetuese, me 7 anëtarë, nëse të gjithë bëjnë detyrën e tyre”,- tha Spiropali.

“Ne jemi mësuar në fakt me uljet dhe ngritjet e tonit të ardhura nga zyra e presidentit të Republikës. Por vlerësojmë dhe respektojmë tonet institucionale. Pasi ka pasur fatkeqësisht nga zyra e presidentit, deklarata të rënda, aspak profesionale dhe aspak përfaqësuese të popullit. Këtë e kemi deklaruar dhe kemi një komision hetimor. Do të donim që presidenti t’i rrijë tonit institucional, na bën nder të gjithëve”,- nënvizoi Spiropali. /atsh

Kryetari i PD-së, Lulzim Basha tha sot se “plani ynë ekonomik është taksa e sheshtë 9%.

Basha shprehet se strategjia e Fondi Monetarë Ndërkombëtarë është taksa e sheshtë.

“Taksa e sheshtë 9% dhe plani ynë ekonomik do të inkurajojë investimet e brendshme dhe të huaja, do të nxisë punësimin dhe do të rrisë fuqinë blerëse. Shqipëria në punë, mirëqenia për shumicën dhe jo një pakicë, do të jetë realitet i prekshëm për të gjithë”, tha Basha.

Po ashtu, Basha shton se taksimi i qeverisë zbrazi xhepat e shqiptarëve, rriti çmimet, uli fuqinë blerëse, falimentoi bizneset dhe solli shkatërrimin e ekonomisë në çdo hallkë të saj.

“Raporti i FMN mbështet atë që PD do bëjë realitet: taksimin e thjeshtë dhe transparent”, deklaron ai. /atsh

Presidenti Ilir Meta ka reaguar sot në lidhje me aktakuzat e Prokurorisë Speciale ndaj Presidentit të Kosovës Hashim Thaçi dhe ish- kryetarit të Kuvendit të Kosovës, Kadri Veseli.

Në një konferencë për mediet në selinë e Presidencës, Meta shprehu solidaritetin edhe si President i Republikës por dhe si mik, shok me presidentin e Kosovës dhe por dhe kryetarin e PDK-së Vesili. “Jam i sigurt që do ta përballojnë me dinjitet dhe përgjegjësi këtë moment duke bërë dhe një shërbim tjetër për të konfirmuar drejtësinë e luftës së UÇK-së, por dhe për të rrëzuar këtë strategji të gabuar dhe tepër provokative që kërkon të mbajë peng rajonin tonë dhe të ngadalësojë proceset e integrimit evropian dhe mundësisht të minojë ato të integrimit euroatlantik”, u shpreh Meta.

Meta tha se natyrisht ky është një zhvillim sfidues i cili absolutisht do të përballet me shumë urtësi, dinjitet dhe largpamësi nga jo vetëm këto dy personalitete. “Kjo nuk është një sfidë në planin e tyre individual apo institucional por kjo do të përballohet me shumë dinjitet dhe përgjegjshmëri jashtë kalkulimeve afatshkurtra nga e gjithë klasa politike në Kosovës”, u shpreh Meta.

“Nuk është hera e parë që ndaj udhëheqësve të UÇK-së kemi aktakuza. Të gjithë kemi eksperiencën e 20 viteve ku pala e humbur, pala që shkaktoi luftën, genocidin ishte dhe përgjegjëse për vetë krijimin e UÇK-së, si e vetmja rrugë për të fituar lirinë dhe dinjitetin njerëzor dhe për t’i shpëtuar ekstreminimit nga populli i Kosovës, e ka kthyer në një strategjinë të sajën njollosjen e UÇK-së, por jo thjesht dhe vetëm kaq por dhe dëmtimin e funksionimit të shteti të Kosovës, pavarësia e së cilës është jo vetëm e njohur e konfirmuar nga Gjykata Ndërkombëtare e Drejtësisë prej shumë kohësh por edhe njëkohësisht ka treguar se është një faktor stabiliteti në rajonin në të cilin jetojmë”, tha Meta. /atsh