Politike

Avokati Spartak Ngjela ka folur për ndryshimet e fundit në qeveri dhe situatën politike mes Shqipërisë dhe Kosovës.

Në një intervistë në Abc News, Ngjela tha se ndryshimet në qeveri janë diçka e zakontë, ndërsa shtoi se është e kotë që të bëhen këto ndryshime pasi Shqipëria është një vend i zakonshëm dhe nuk pritet që ministrat e rinj të bëjnë diferencën.
Ngjela tha se Rama ka marrë në qeveri njerëz të paaftë dhe të panjohur, siç ishin ministrat nga Kosova, Gent Cakaj dhe Besa Shahini.

Ai aku zon Ramën duke thënë se kryeministri është kundër bashkimit kombëtar, ndërsa u shpreh se sjellja e Ramës me presidenten Vjosa Osmani nuk ishte e drejtë.

“Shqipëria është një shtet i zakonshëm dhe që të kesh potencë në politikën e jashtme nuk duhet të jesh i tillë, është një shtet që nuk reflekton në qytetërimin modern në asnjë fushë të tij. Është një shtet shumë i zakonshëm dhe është e kotë që të analizojmë se çfarë do të bëjë Xhaçka në politikën e jashtme.
Ai mori nga Kosova njerëz të panjohur. Politika ka një rregull, duhet të ishin njerëz të njohur. Këto ende nuk kanë një marrëveshje juridike me Kosovë. Rama nuk e do bashkimin kombëtar dhe nuk e shikoj fare çfarë flet ai por i shikoj sjelljen. Si mund të lejohet një sjellje e tillë me Vjosa Osmanin. Ajo u artikulua politikisht ndërsa ky me përralla. Bota intelektuale e Kosovës është shumë më lart se ne. Ai mori njerëz të paaftë dhe të panjohur. Problemi qëndron se të gjithë këto nuk i kam parë me ndonjë vështrim optimist, por ato që e kanë në dorë do e çojnë deri në fund”, tha Ngjela.

Përmes një postimi në rrjetet sociale, ministri në detyrë për Evropën dhe Punët e Jashtme, Gent Cakaj, ka njoftuar sot se i ka dorëzuar dorëheqjen e parevokueshme kryeministrit Rama.

Teksa ka shprehur mirënjohjen për kryeministrin dhe stafin e ministrisë, Cakaj thotë se angazhimi i Shqipërisë për të thelluar bashkëpunimin e forcuar marrëdhënien me shqiptarët në rajon duhet të vazhdojë me çdo kusht apo çmim.

Deklarata e plotë

“Të nderuar qytetarë, dëshiroj të ju njoftoj që sot, e martë, 29 dhjetor 2020, i kam paraqitur Kryeministrit të Republikës së Shqipërisë, z. Edi Rama, dorëheqjen e parevokueshme dhe me efekt të menjëhershëm si Ministër në detyrë për Evropën dhe Punët e Jashtme të Republikës së Shqipërisë.

Pas përfundimit me shumë sukses të kryesisë së OSBE-së, hapjes së negociatave për anëtarësim me BE-në, punës së jashtëzakonshme për të siguruar një ulëse në Këshillin e Sigurimit për 2022-2023, zbatimit të një sërë masash të pashembullta për ngritjen e faktorit shqiptar në Ballkanin Perëndimor, si dhe duke qenë se Shqipëria është në pragfushatë zgjedhore, ku unë nuk synoj të angazhohem në asnjë cilësi, konsideroj që kapitulli i shërbimit tim në krye të diplomacisë shqiptare është i përfunduar.

Dua të shpreh mirënjohjen dhe falënderimin tim ndaj Kryeministrit Rama, për besimin e dhënë dhe bashkëpunimin e ngushtë në rrethana jo të lehta për Shqipërinë. Po ashtu, u jam shumë mirënjohës të gjithë bashkëpunëtorëve dhe stafit të MEPJ, për mbështetjen e vazhdueshme në rrugëtimin e përbashkët, për të ndërtuar një sistem diplomatik të denjë për ambiciet e Shqipërisë evropiane dhe të pakompromis në mbrojtje të interesit qytetar e kombëtar.

Në mbyllje, nënvizoj, mes tjerash, se angazhimi i Shqipërisë për të thelluar bashkëpunimin e forcuar marrëdhënien me shqiptarët në rajon duhet të vazhdojë me çdo kusht apo çmim.

Faleminderit nga thellësia e zemrës të gjithëve për mbështetjen, kritikat e punën e përbashkët! E keni për jetë mirënjohjen time – shërbimi ndaj jush ka qenë nderi më i madh i jetës sime”, shkruan Cakaj.

Ndërkohë, Rama njoftoi menjëherë në rrjetet sociale, se në vend të Cakajt do të ulet Olta Xhaçka dhe vendin e saj si ministre e Mbrojtjes, do ta marrë Niko Peleshi.

Presidenti Ilir Meta i bëri thirrje të gjithë të rinjve që të bashkohen për të sjell ndryshimin në Shqipëri.

Ai tha sot në “Quo Vadis”, se të rinjtë nuk duhet të ankohen duke qëndruar në kafe por të jenë të zëshëm dhe të bashkohen brenda shkollave, universiteve, grupeve të interesit etj për të shtuar presionin ndaj qeverisë.

“Nuk është e thënë patjetër brenda një force politike. Ata, ndryshimin mund ta bëjnë duke ushtruar një ndikim dhe një presion më të madh, duke u bashkuar brenda shkollave, brenda universiteteve, duke rritur presionin edhe si shoqëri civile, përmes grupeve të interesit. Por duke u bërë të zëshëm, duke qenë prezent, jo duke u ankuar në kafe, apo përpara kompjuterit”, tha ai.

Meta shtoi se të rinjtë i kanë të gjitha mundësitë të reagojnë dhe të mos presin më nga kjo klasë apo elitë politike, që të zgjidhë problemet e tyre.

“Është një përgjegjësi që ata, duhet ta marrin për veten e tyre dhe për të ardhmen e vendit, sepse largimi nuk është zgjidhje. Largimi është dezertim nga Shqipëria europiane si projekt, sepse ata mund të gjejnë një punë më të mirë në çdo vend që mund të shkojnë, por atje do të jenë thjesht një statistikë. Asgjëkundi nuk do të gjejnë Atdhe”, presidenti.

Presidenti i Republikës është përfshirë në debatin që hapi opozita pas dekretit të presidentit grek për zgjerimin nga 6-12 milje detare në detin Jon.

Me anë të një deklarate, që e ka publikuar edhe në rrjetin social, Meta paralajmëron se do të marrë një vendim të fortë për çështjen e negociatave të detit me Greqinë, pasi sipas tij, qeveria vijon të mos e informojë.

“Nuk do të lejoj për asnjë moment të cenohen interesat shtetërore dhe kombëtare të Republikës së Shqipërisë nga cilido individ, që keqpërdor autoritetin e deleguar nga populli shqiptar. Sipas traditës së vendosur, pasi të vihem në dijeni të plotë të informacioneve të kërkuara zyrtarisht, do të bëj plotësisht transparent vlerësimet dhe qëndrimet e mia në lidhje me të gjitha zhvillimet ndaj kësaj çështjeje”, deklaroi Meta.

Deklarata e plotë

Duke mirëkuptuar ndjeshmërinë e lartë të opinionit publik shqiptar mbi aktin më të fundit të nxjerrë nga autoritetet më të larta të Republikës së Greqisë dhe pasojat e mundshme të tij ndaj vendit tonë, dëshiroj të evidentoj si vijon:

Në ushtrim të detyrave dhe përgjegjësive të mia dhe në zbatim të vendimit të Gjykatës Kushtetuese Nr.15/2010, kam autorizuar Plotfuqinë për Negocim Nr.733, në emër të Republikës së Shqipërisë, të ekipit negociator me përbërjen e 13 anëtarëve për negocimin e “’Projekt Marrëveshjes ndërmjet Republikës së Shqipërisë dhe Republikës së Greqisë për kufizimin e zonave të tyre detare’, me qëllim saktësimin e Vijës Delimituese të Kufirit Shtetëror Detar dhe delimitimin e Shelfit Kontinental dhe Zonës Ekskluzive Ekonomike midis të dy vendeve”, datë 19.03.2018.

Gjatë gjithë kohës, kam ofruar të gjithë bashkëpunimin në këtë proces, duke siguruar respektimin e vendimit të Gjykatës Kushtetuese.

Deri në këto momente, nuk kam asnjë njoftim apo kërkesë zyrtare, që të sugjerojë ndërprerjen, pezullimin apo përfundimin e procesit të negociatave dypalëshe, nga ekipi negociator apo nga qeveria shqiptare.

Për çdo zhvillim, që lidhet drejtpërdrejt apo ndikon në procesin e negociatave për delimitimin e hapësirës detare ndërmjet dy vendeve, kam kërkuar informacion shterues dhe analizë të plotë të qeverisë shqiptare, sipas përgjegjësive, që i takojnë sipas ligjit.

I rikujtoj edhe një herë përfaqësuesve të institucioneve në të gjithë nivelin hierarkik shtetëror, detyrimin dhe përgjegjësinë për përputhshmërinë e plotë të veprimtarisë së tyre kushtetuese dhe ligjore, në shërbim të interesave shtetërore dhe kombëtare.

I siguroj të gjithë qytetarët shqiptarë se do të vijoj të ushtroj me përgjegjësinë maksimale shtetërore dhe kushtetuese detyrat e mia dhe se nuk do të lejoj për asnjë moment të cenohen interesat shtetërore dhe kombëtare të Republikës së Shqipërisë nga cilido individ, që keqpërdor autoritetin e deleguar nga populli shqiptar.

Sipas traditës së vendosur, pasi të vihet në dijeni të plotë të informacioneve të kërkuara zyrtarisht, do të bëj plotësisht transparent vlerësimet dhe qëndrimet e mia në lidhje me të gjitha zhvillimet ndaj kësaj çështjeje.