Opinione

Ish-nënkryetarja e Kuvendit dhe e Partisë Demokratike, Jozefina Topalli, një nga figurat më të spikatura të kësaj partie, reagoi sot pas ngjarjes në Shkodër, ku pati zjarr në një klasë të një shkolle që do të shërbejë si KZAZ për zgjedhjet e 30 qershorit.

“Djegia e shkollës nuk është historia e Shkodrës. E kundërta është historia e këtij qyteti. Kjo nuk ka ndodhur kurrë në 3 dekada”, tha Topalli.

“Një demokrat nuk djeg as mandate, as shkolla. Një demokrat i vërtetë nuk hedh as molotov as ka frikë nga zgjedhjet. Demokratët nuk kanë patur frikë në ‘97 kur gjysma e territorit kontrollohej nga bandat”, vijoi Topalli.“Nuk largohet Rama duke refuzuar parimet e vlerat e demokracisë. Partia Demokratike lindi si ëndërr e lirisë dhe e së drejtës me votu.

Ai që mendon se do pengojë të drejtën e votës nuk është demokrat. Shqiptaret duan paqe. 3 milion shqiptarë nuk mund të mbeten gjatë peng të 4-5 vetëve”, tha Topalli. /atsh

Deputeti i PD-së Myslym Murrizi ka kërkuar sot që të hetohet pasuria e politikanëve.

Duke folur në seancën plenare ku është paraqitur raporti vjetor i ILDKPI-së, Murrizi ka thënë se tashmë vendi ynë ka nevojë për një ligj më të strukturuar.

Duke komentuar pjesë nga raporti i ILDKPI-së për sa u përket spiunëve të Shtetit, Murrizi ka thënë se shqiptarëve u ka ardhur në majë të hundë me spiunët.

Ndër të tjera Murrizi ka deklaruar se duhet të fillojnë hetimet për politikanët pasi sipas tij nuk janë më shumë se 500 prej tyre që kanë marrë në qafë Shqipërinë.

“10 faqe për spiunët e shtetit dhe privatit që nuk kanë funksionuar. 126 njësi sinjalizues tek sektori publik dhe 426 për sektorin privat. Quani arritje që janë gjobitur disa subjekte. Shqiptarët janë ngopur me spiunë dhe bilbilfryrës. Shqiptarëve u ka ardhur në majën e hundës me spiunët. Vini për të raportuar po ishte krahasimi me 2003 dhe 2013 ajo që nuk më pëlqeu. Kjo është një llojë me regjimin komunist që e krahasonte me 38’”, tha Murrizi.

“Do të doja që të përgatisim një ligj për objektin e punës. Miliona pasuri kanë banorët e kësaj salle. Unë prap shoh se ata që kanë marrë vendin në qafë nuk i kalojnë 500. Këto që kanë qenë këtu dhe këta që janë këtu. Ata nuk i justifikojnë. A ka verifikim. Ka zyrtarë që kanë aksione në supermarketet e Serbisë dhe që blejnë vila në Firenze”, u shpreh Murrizi./atsh

Presidenti i Republikë, Ilir Meta, ka konflikt interesi institucional, pasi gruaja e tij është Kryetare e Lëvizjes Socialiste Integrim, pra bashkë-kryetare e opozitës, duke e kthyer dhe kreun e vendit si palë politike.

Kështu u shpreh sot kryetarja e opozitës parlamentare, Rudina Hajdari gjatë seancës parlamentare që po zhvillohet sot, ku në rend të ditës është rezoluta mbi zhdekretimin e zgjedhjeve të 30 qershorit nga Presidenti i Republikës.

Në fjalën e saj, Hajdari nënvizoi se, Kushtetutshmërinë e vendimit të Presidentit e vlerëson vetëm Gjykata Kushtetuese.

“Gjykimin mbi vendimin e Presidenti të Republikës së Shqipërisë e merr vetëm Gjykata Kushtetuese, duhet të jemi të qartë me shqiptarët. Sipas nenit 90’, pika 2, mocioni për shkarkimin e presidentit vjen me 1/4 e kuvendit, pra 35 deputet dhe firmoset e i depozitohet kryetarit të kuvendit, që ka për detyrë të hap një komision hetimor për të verifikuar argumentet që kanë çuar presidentin për të marrë këtë vendim”, tha Hajdari.

“Më pas Komisioni ka për detyrë të konstatojë, të dëgjojë presidentin dhe më pas të përpilojë një raport që diskutohet në parlament dhe që i depozitohet Gjykatës Kushtetuese dhe fakti që ne se kemi këtë gjykatë (Kushtetuese) është fatkeqësi e madhe, këtu është thelbi i gjithë debatit, prandaj shqiptarët po shohin këtë tragjedi që na merr zvarrë të gjithëve. E theksoi dhe njëherë se gjykata është organi i vetëm që konstaton këtë lloj shkelje”, theksoi Hajdari.

Ajo shtoi se, pavarësisht mungesës së Gjykatës Kushtetuese vendim i Presidentit ngre shumë pikëpyetje, pasi kreu i vendit ka një konflikt institucional me gruan e tij, bashkë-kryetare të opozitës.

“Janë tre pikë-pyetje, që do doja të dija unë nga presidenti, pse mendon se ai mund të zgjidh krizën me këtë vendim? Nëse ai e vlerëson këtë si akt patriotik, duke vënë palët para përgjegjësisë, nëse palët nuk ulen bashkë e nuk arrin në kompromis, a e fusim vendin në krizë totale? A e fusim vendin në më shumë pasiguri, çfarë duhet të ndodh, nëse ne nuk gjejmë dot një zgjidhje? Nëse gruaja juaj është palë e opozitës dhe kjo palë ka ngritur këtë padi, a e bënë presidentit ky vendim pjesë të këtij konflikti? A nuk është ky, konflikt i pastër institucional? Dua përgjigje për këtë gjë?”, tha Hajdari, duke kujtuar se Kryemadhi është bashkë kryetarja e opozitës.

“Unë si qytetare dhe si deputete ngre pikë pyetje ndaj presidentit, pse merr këto vendime? Pse zhdekreton presidenti dekretin e tij, këtë se kishim parë”, tha më tej Hajdari.

“Dua t’ju sjell në vëmendje një shembull, duhet të kuptojmë thelbin e aktit për hir të kombit. Nëse e argumentojmë në mënyrë juridike, dëgjo, kriminaliteti është rritur shumë në Shqipëri, është shumë problematike, unë mendoj se duhet ta rikthejmë vendimin e vdekjes. Ne nuk duam më Shqipërinë të shkoj në destabilitet, jemi lodhur me këtë gjendje. Jemi lodhur dhe çfarë mund të ndodhi, në më të mirën e rastit zgjedhjet do shtyhen vetëm me një muaj, muajin tjetër do keni zgjedhje… A ja vlejti barra qiranë, që opozita të digjte mandatet, a ja vlejti që ne të bllokonim reformën në drejtësi, a ja vlejti të mbyllnim dyert Europës, absolutisht jo”, theksoi Hajdari. /atsh

“Akti i Presidentit konsiderohet si tejkalim i kompetencave të tij dhe për rrjedhojë një akt administrative absolutisht i pavlefshëm që nuk prodhon efekte mbi procesin zgjedhor tashmë në fazën e tij vendimtare”, u shpreh deputeti i Partisë Socialiste Fatmir Xhafaj gjatë seancës parlamentare për zhdekretimin e zgjedhjeve të 30 qershorit nga Presidenti i Republikës.

“Në vlerësimin tim Presidenti ka gabuar në rrugën e zgjedhur jo vetëm se mekanizmi i zbatuar prej tij është në tejkalim kushtetues por dhe sepse nuk i shërben realisht zgjidhjes së krizës por acarimit të saj duke i dhënë një alibi më shumë krijuesve të kësaj krize”, tha Xhafaj.

Ai vijoi se, “Presidenti imponoj mekanizma juridik në një krizë politike, në një kohë që duhej të përdorte autoritetin e tij kushtetues për të ndërtuar ura dialogu dhe për të mundësuar kompromise politike gjithmonë në respekt të Kushtetutës dhe të ligjit. Kur kemi vepruar kështu kemi patur kompromise të shëndetshme edhe zgjidhje të mençura”.

“Ka një krizë politike të sajuar e cila ka në thelb të saj një përplasje midis standardeve demokratike dhe anarkisë politike. Problemi i vërtetë nuk është data e zgjedhjeve në vetvete por mënyra e sjelljes së lidershipit politik”, u shpreh Xhafaj.

“Prej muajsh opozita jashtë parlamentare e frymëzuar dhe e dhunuar nga Sali Berisha dhe e veshur me autoritetin fals të Lulzim Bashës po sillet si një forcë antikushtetuese. Kjo sepse ka dal së funksionuari jashtë sistemit demokratik parlamentar dhe me presionin e rrugës po i shërben destabilitetit dhe cenimit të rendit kushtetues. Opozita ka një krizë të brendshme që kërkon imponoj si një krizë të shoqërisë shqiptare. Kriza e opozitës është kriza e lidershipit të saj politik”, përfundoi deputeti i Partisë Socialiste Fatmir Xhafaj.//atsh

https://www.facebook.com/edirama.al/videos/2807743779241418/?t=0

“Kushtetuta i jep afate kufizuese dhe një nga dispozitat e saj parashikon se kompetenca e Presidentit të Republikës për caktimin e datës së zgjedhjeve ushtrohet me patjetër me detyrim 9 muaj përpara kësaj date”.

Juristi Plarent Ndreca tha gjatë një interviste televizive se shfuqizimi i dekretit nga ana e Presidentit është një akt i pavlefshëm juridikisht.

“Neni 92 i kushtetutës përcakton shumë qartë kompetencën e Republikës në të cilën thuhet se cakton datën e zgjedhjeve. Edhe për kompetencë të presidentit të Republikës është një kompetencë e kufizuar. Kushtetuta i jep afate kufizuese dhe një nga dispozitat e saj parashikon se kjo kompetencë e Presidentit të Republikës ushtrohet me patjetër me detyrim 9 muaj përpara datës së zgjedhjeve. Kushtetuta dhe kodi zgjedhor parashikon shprehimisht periudhat zgjedhore që janë deri në 30 korrik, deri në 30 tetor.Data 30 qershor është data ekstreme e periudhës zgjedhore e cila është vendosur po nga Presidenti i Republikës, kështu që edhe në këtë kuptim Presidenti e ka ushtruar kompetencën e tij. Kompetenca e heqjes së datës së zgjedhjeve nuk është parashikuar gjëkundi dhe kjo është një shkelje flagrante e kushtetutës së Shqipërisë”, tha Ndreca.

Juristi sqaroi se vendimi i Presidentit nga pikëpamja juridike nuk sjell asnjë pasojë në këtë situatë.

“Vendimi i Presidentit është një akt i pastër politik. Nga pikëpamja juridike nuk sjell asnjë pasojë në këtë situatë, është një akt nul absolutisht i pavlefshëm sikurse quhet në njohjen juridike” tha ndër të tjera ai.

Ndreca shtoi se “në kushtet ku ne jemi, pra ku jemi në brenda një procesi zgjedhor që do të thotë që është një proces i pandalshëm nga askush sepse tashmë i është menduar administratorëve të procesit zgjedhor dhe qytetarëve ditën e zgjedhjeve. Ky akt mund të konsiderohet vetëm si një tentativë sepse patjetër nuk ka sjellë dhe nuk do të sjellë asnjë pasojë. Është një tentativë nga ana e Presidentit për të ndërhyrë në procesin zgjedhor tashmë të nisur dhe që do të mbahet në data në 30 qershor. Por, sigurisht mbetet një akt tjetër që është një akt politik i presidentit të republikës, fatkeqësisht. Presidenti e ka hequr kostumin e tij prej Presidenti dhe përfaqësues i unitetit të kombit dhe është ulur në një prej bazës politike duke e konsideruar vetëm argumente të një pale politike dhe ka hyrë në mes të debatit politik duke mbajtur krah dhe duke dëmtuar gjithë procesin zgjedhor”.

Më tej, Ndreca theksoi se ” nga pikëpamja juridike, besoj se Komisioni Qendror i Zgjedhjeve duhet të shprehet për deklarimin e këtij akti si absolutisht të pavlefshëm, duke deklaruar që ky akt nuk ndërhyn në procesin zgjedhor dhe procesi zgjedhor të vazhdojë normalisht ashtu sikurse e parashikon Kushtetuta”.

Në lidhje me procedurën e shkarkimit, juristi u shpreh se ky proces është i ndarë nga ai zgjedhor. “Kjo është një çështje tjetër që duhet ndarë nga procesi zgjedhor. Procedura për shkarkimin e Presidentit është një procedurë e cila ka të bëjë edhe me një reagim politik e juridik të mazhorancës për të reaguar ndaj vendimmarrjes së Presidentit të Republikës, për të respektuar Kushtetutën e republikës së Shqipërisë, sepse në momentin që Presidenti shkel rëndë Kushtetutën ka një parashikim kushtetues që i jep mundësi mazhorancës për të zhvilluar procedurën e shkarkimit.

Ndreca shpjegoi po ashtu se “hapi i parë i mazhorancës është mbledhja e firmave për shkarkimin e Metës, komision i pavarur për të hetuar administrativisht mbi veprimtarinë e kryer nga presidenti i Republikës dhe më tej me seancën plenare që kërkon 3/5 e votave të parlamentit për të dalë në vendimmarrjen për shkarkimin e presidentit. Ky është një proces kushtetues që legjitimon mazhorancën për ta bërë por nuk ka lidhje me procesin zgjedhor dhe aktin e ndërmarrë nga Presidenti i Republikës”. /atsh

Zv/ministri i Mbrojtjes, Petro Koçi ka reaguar pas firmosjes së Dekretit për anulimin e zgjedhjeve nga presidenti, Ilir Meta, duke thënë se “strategjia e opozitës në bashkëpunim me Kreun e Shtetit ka qenë gjithnjë delegjitimimi i institucioneve”.

“Rilindja e Sali Berishës ka kaluar gjithmonë nga Meta! Strategjia e opozitës në bashkëpunim me presidentin është delegjitimimi i institucioneve. Domethënë i vetë shtetit”, – ka theksuar Koçi.

“PS mbron institucionalitetin. Presidenti cakton, por jo ç’cakton datën e zgjedhjeve!”, – ka deklaruar Koçi. /atsh

Partia Bindja Demokratike ka reaguar sot pas deklaratave të presidentit Ilir Meta, i cili gjatë prezantimit të argumenteve për anulimin e zgjedhjeve të 30 qershorit është shprehur se, “në disa bashki në vend, PS ka përballë kandidatët e një force politike të regjistruar në minutat e fundit në sistemin gjyqësor dhe e regjistruar pranë KQZ përtej afateve ligjore”.

“Kjo situatë bëhet edhe më absurde, referuar faktit që për këto zgjedhje në më shumë se në gjysmën e njësive të qeverisjes vendore konkurron vetëm një kandidat për t’u zgjedhur si kryetar bashkie, ndërkohë që për pjesën tjetër konkurrohet me kandidatë të propozuar nga një forcë politike e regjistruar në minutat e fundit në sistemin gjyqësor, dhe e regjistruar pranë KQZ përtej afateve ligjore”, – ka thënë Meta.

Por Bindja Demokratike me anë të Astrit Patozit ka theksuar se presidenti duhet të frenojë veten para se të flasë për të herë tjetër.

“Meqë presidenti i Republikës i paska lejuar vetes që të harrojë se përfaqëson unitetin e popullit dhe ka shprehur konsiderata negative në adresën tonë, na e ka bërë të detyrueshëm reagimin. I kujtojmë atij se e ka detyrim që të dëgjojë dhe marrë për bazë vetëm atë që thonë institucionet shtetërore dhe jo opinionet e partive politike për njëra-tjetrën, ndaj duhet ta frenojë veten kur të flasë herë tjetër për Bindjen Demokratike. Gjithmonë, në rast se do ta ketë këtë mundësi”, – thuhet në deklaratën e Bindjes Demokratike.

Por, vijon deklarata, “edhe në këtë kontekst, është më mirë që të pranojë heshtjen, me të cilën e ka përcjellë krijimin e Bindjes Demokratike, partia që ia la trashëgim bashkëshortes së vet, se sa të marrë si aksioma thashethemet që dëgjon nga një forcë tjetër politike, që nuk e ka fshehur mërzinë dhe shqetësimin për futjen tonë në garën e 30 qershorit”.

“Kur themi se duhet të dëgjojë institucionet, i kujtojmë presidentit se kemi përmbushur çdo detyrim ligjor të Republikës së Shqipërisë që ka të bëjë me krijimin e partive politike dhe me pjesëmarrjen e tyre në zgjedhje. Dhe kjo është e certifikuar në të gjitha shkallët e gjyqësorit në Shqipëri”, – theksohet në deklaratën e Bindjes Demokratike.

Ndërsa, vijon Bindja Demokratike, “për konsideratat e tij politike dhe jo institucionale nuk shqetësohemi fare, madje i vlerësojmë ato si një kontribut pozitiv për fushatën e Bindjes Demokratike në këto zgjedhje. Sepse është fare e qartë për këdo se ne nuk kemi asnjë përgjegjësi për krizën politike, ku është zhytur Shqipëria për shkak të partive të vjetra, ndërkohë që vetë presidenti i Republikës, si funksion dhe si personazh politik, është produkti më sinjifikativ i pazareve të pista midis tyre”. /atsh

Zëvendësministri i Mbrojtjes, Petro Koçi u shpreh se Partia Socialiste do të shkojë në zgjedhjet lokale të 30 qershorit edhe pse opozita ka vendosur që të mos bëhet pjesë e tyre.

“E para ne shkojmë në zgjedhjen e 30 qershorit, duke respektuar totalisht vendimin e Partisë Demokratike. Nuk është faji dhe as përgjegjësia e mazhorancës që në këto zgjedhje nuk marrin pjesë kandidatët e Partisë Demokratike qofshin këta për Kryetar Bashkie, qofshin këta për anëtarë të këshillave bashkiakë. Partia Demokratike është në një situatë nervoziteti sepse ka ndërmarrë disa hapa që është e pamundur të dalë. Tashmë afati i fundit për të kapërcyer këtë lloj situate ishte deri pardje, ku mund te ndërhyhej në Kod me ndonjë marrëveshje, tani është shumë e vështirë”, – theksoi ai.

Koçi diskutoi edhe për incidentin e ndodhur ditën e djeshme në protestën e opozitës, ku babai së bashku me djalin janë goditur me mjete të forta, duke përgënjeshtruar versionin e dhënë nga ish-deputeti i Partisë Demokratike, Sali Berisha.

“Lidhur me incidentin që ka ndodhur, unë mund të them se opozita ka viktimizuar vetveten në të dyja incidentet, të cilat u përdorën edhe për t’u manipuluar nga zoti Berisha. Pra kjo parti manipulon qoftë zgjedhjet, imazhet, qoftë edhe faktet. Edhe sikur të mos kishte ndodhur, të ishte bërë ajo video me ata të dy të plagosur nga dhuna brenda protestës, me siguri do të vlonte opozita duke kërcënuar me fakte në thonjëza mazhorancën si të inkriminuar në krime politike. Ne tashmë e kemi të vërtetuar që pala e cila merret me këto manipulime është opozita. Përsa i përket asaj që ka ndodhur te spitali, aty duket qartazi se është ish-deputeti që ndërhynë në mënyrë jo civile, me dhunë verbale ndaj ministrit Leshaj. Nuk është në detyrën e tij t’i tregojë Ministrit se ku duhet të shkojë tek policët, apo tek protestuesit”, – vijoi ai.

Koçi gjithashtu theksoi se opozita dhe kryetari i saj po frymëzojnë dhunën në vend./atsh