Opinione

Zëvendëskryeministri Erion Braçe iu ka bërë një apel atyre që duan të prishin zgjedhjet më 30 qershor, që para se të ndërmarrin ndonjë veprim, të reflektojnë për ndëshkimin që i pret dhe të shohin pasuritë e atyre që i urdhërojnë.

“Ne Socialistët do jemi kudo! Por e keqja s’u vjen nga ne! ! Përballjes me ligjin ruajuni! Prej saj vjen burgu dhe pas tij izolimi i përjetshëm! “, paralajmëron Braçe.

Lexova me vëmendje këtë Qarkoren e Partisë Demokratike që më herët e kisha lexuar në avujt e rakisë së një politikani e para tij në tymin e thithur të një aktori! Si thoni, “të shmanget me çdo kusht përballja me militantët e PS”? Kështu? Si vijoni, “është e pranueshme që të ketë përballje me policinë”? Kështu? Si e mbyllni, “të ngrihet grup pune që të pamundësojë votimet”? Kështu?””, vijon zv/kryeministri.

“Shikoni, ne socialistët do jemi kudo, kudo në 30 qershor. Jo për ju, fare fare! Nga ne nuk u vjen e keqja, imagjinoni ju paguheni nga shteti dhe sulmoni kolonat bazë të shtetit që ju paguan! Ne do jemi aty për të drejtën e votës! Është kushtetuese kjo, është e drejtë e fituar dhe nuk e tjetërson dot kërkush. Ju, jo e jo!”, thekson Braçe.

“Por askush tjetër që dështon e nuk fiton kurrë dot një garë pa pushtet, pa polici, pa gjykatën e tij, askush tjetër që dështon të mbajë veten, lëshuar prej panikut të Drejtësisë së Re. Pra pa frikë! Aaaa ju duhet ti trembeni përballjes me ligjin, tamam asaj që ju kërkojnë këta dy tipat të bëni! Nga përballja me ligjin vjen Burgu, madje burg i gjatë nëse pengoni zgjedhësit të votojnë, pra pamundësoni votimet! 7 vite burg!”, kujton zv/kryeministri.

“Dhe nuk mbaron! Pas burgut vjen izolimi përjetë! Madje madje, nëse këtë e kryeni në kuadër të organizatës së Dhunshme PD-LSI, nuk do ju ngelet më asgjë, zero, duke nisur nga plaçka që keni vënë. A ja vlen? Unë them jo! A i keni parë bizneset e këtyre të Qarkores? A i keni parë deklarimet e tyre të pasurisë? Po fëmijët a ua keni parë kund, i mbajnë këtu apo jashtë vendit?”, thekson Braçe.

“Kaq sillni në mendje, sa të pabarabartë jeni me ta dhe sa të pabarabartë do jeni kur ligji të bjerë fort mbi ju e jo mbi ata! Ditë të mirë!”, përfundon Braçe./atsh

Kandidati socialist për një mandat të dytë për kryetar të Bashkisë së Tiranës, Erion Veliaj është shprehur se do të donte më mirë që në këto zgjedhje të kishte përballë Sali Berishën ose Lulzim Bashën për t’i mundur edhe si një ndëshkim për të gjitha të këqijat që i kanë bërë këtij qyteti, qoftë kur kanë qenë në pushtet ashtu edhe gjatë këtyre viteve ku janë përpjekur por pa sukses të bllokojnë çdo projekt në Tiranë. Por ai theksoi se kjo është një garë ku kundërshtarin nuk e ka përcaktuar ai dhe se ai është i detyruar që ta respektojë atë.

“Kjo është si të pyes Brazilin që të ka rënë të luash me Belizën. Se ka vendos Brazili, ka rënë ai short. Do më pyesësh çfarë dua unë? Unë do të doja të rrihja dhe të bëja peshk Saliun dhe Lulin, po të jetë për dëshirën time. Të merrja dy më të fortët e tyre dhe t’i bëja copë sepse as i rrisin fëmijët këtu, as i çojnë në shkollat publike, as në çerdhet publike, as me pasaporta shqiptare. Pra mua më hanë duart të bëja peshk Saliun me Lulin sepse e kanë shkatërruar qytet kur e kishin në dorë të dy bashkë dhe nuk kanë asnjë lidhje me këtë realitet”.

E shikojnë Shqipërinë vetëm për ta mjelë, as familjet nuk I kanë këtu, as shtëpitë nuk i kanë këtu, as të ardhmen nuk e kanë këtu, as himnin nuk e kanë të këtij vendi dhe as pasaportën nuk e kanë të këtij vendi. Por thash, si Brazili nuk zgjedh dot Belizën dhe as unë nuk e zgjedh dot kundërshtarin ndaj edhe në këtë rast pot ë ishte për mua të bëja peshk kupolën e PD-së që këtij qyteti i ka marrë erzin dhe I bllokon çdo iniciativë dhe është këtu vetëm në fundjavë sepse me javën s’ka asnjë lidhje me Tiranën. Kështu që po të jetë mua do të doja këtë, por nëse më pyet se çfarë më mobilizon edhe në këtë lloj fushate është të bëj atë piramidën se besoj që 5 mijë fëmijë që do të mësonin kodimin do të ishin e ardhmja e këtij qyteti. 17 shkollat e reja nga shkolla “Dritëro Agolli”, “Kristo Frashëri” te “Nënë Tereza” në Kodër – Kamëz”, tha kryetari i Bashkisë së Tiranës./atsh

Kryebashkiaku i Tiranës, Erion Veliaj ka përshëndetur protestën paqësore të opozitës mbrëmjen e sotme, duke theksuar se kjo provon se dhuna dhe paqja në Tirane varen nga ato e nga askush tjetër.

“Urime PD dhe Lulzim Bashës për protestën e parë paqësore – provë se dhuna dhe paqja në Tiranë varet nga ju e nga askush tjetër!”, është shprehur Veliaj.

Ai e ka cilësuar si “një kthesë fantastike që krijon hapësira për ide e alternativa për zgjedhjet 2021”.

“Ndërkohë në 30 Qershor jemi njësoj, gishtat lart nr.2”, ka theksuar Veliaj./atsh

Ministrja e Shtetit Për Marrëdhëniet me Parlamentin njëkohësisht zëdhënësja e Qeverisë, Elisa Spiropali theksoi sot se Ilir Meta qenka dakord që zgjedhjet janë të popullit, por paska hallin e pluralizmit.

Në një reagim pas deklaratës së zëdhënësit të Presidentit Ilir Meta, ministrja Spiropali tha se “bukur. Pluralizëm dmth të gjithë në një mendje që populli vendos me zgjedhje dhe secili në mendjen e vet hyn apo s’hyn në zgjedhje! Pyetja që mbetet është: Pse nuk thotë gjë për dhunën Ilir Meta?”.

Zëdhënësi i Presidencës, tha sot se “shumë dakord me Kryeministrin. Zgjedhjet nuk janë të politikanëve, por të popullit. Demokracia dhe pluralizmi politik janë të panegociueshme”./atsh

Kryeministri Edi Rama tha sot pasdite nga Shkodra, ku zhvilloi takim elektoral për zgjedhjet e 30 qershorit, se i vinte keq që Voltana Ademi nuk hyri sërish në garë, që ta merrte me votë mësimin e merituar.

“Më vjen shumë keq që nuk na u dha mundësia që drejtuesen më të paaftë që është ulur në karriken e një kryetari bashkie, të majtë a të djathtë, në të gjitha vitet e shtetit shqiptar që nga koha që kur u hap zyra e një bashkie, komiteti ekzekutiv apo komune, t’i jepnim një mësim të merituar me votë në një garë alternativash, kandidatësh dhe ballafaqimi demokratik”, – tha Rama.

“Po kjo nuk është në dorën tonë, nuk e zgjodhëm ne, nuk e pamundësuam ne, nuk ishte as plani e as qëllimi ynë. Ata kapitulluan para fillimit të betejës, nuk hynë në zgjedhje se plani i tyre nuk ka lidhje me Shkodrën, me bashkitë e Shqipërisë, me të ardhmen, por është plani i katër njerëzve në një hall shumë të madh me Drejtësinë që po vjen dhe atyre rreth e rrotull që i ndjekin verbërisht nga pas”, – tha Rama. /atsh

Zëvendëskryeministri Erion Braçe ka reaguar në lidhje me ngjarjen e ndodhur mbrëmjen e kaluar në shkollën “Shejnaze Juka”, ku një grup personash i vunë flakën KZAZ-së, duke dëmtuar materialet zgjedhore.

Braçe shprehet se kryebashkiakja e Shkodrës, Voltana Ademi ka shkelur ligjin dhe është njeriu që i ka bërë më shumë dëm Shkodrës në këto 30 vitet e fundit.

Duke publikuar një urdhër të firmosur nga kryebashkiakja e PD, Braçe thekson se ajo e ka shpallur veten pronare të shkollave në Shkodër, ndaj dhe sipas tij, duhet të përballet me ligjin.

“Voltana Ademi është një keqbërëse! Voltana Ademi është një shkelëse e ligjit! Voltana Ademi është njeriu që i ka bërë dëm më shumë se kushdo tjetër Shkodrës në 30 vitet e fundit! Voltana Ademi po i vë zjarrin shkollave të Shkodrës!”, thekson Braçe.

“Shiheni urdhrin e saj! Lexojeni! Ka shpallur veten pronare të shkollave në Shkodër dhe kërkon që aty të mos shkelin administratorët e zgjedhjeve, emëruar në detyrë në përputhje me ligjin e Kushtetutën! Pas këtij akti të saj, pason djegia e shkollave, e para shkolla “Shejnaze Juka”!”, shprehet Braçe.

Braçe shton se, “Voltana Ademi duhet të përballet me ligjin, bashkë me çdo barbar zjarrvënës, punonjës i saj apo i partisë së saj! Kurrë, kush nuk ka djegur shkolla në Shkodër, veç pushtuesit! Prej asaj kohe, e dyta që e bën këtë është Voltana Ademi dhe barbarët e saj”.

Fushata elektorale në Elbasan vijon normalisht për zgjedhjet vendore të 30 Qershorit dhe takimi i radhës ishte me banorët e lagjes “Vullnetari” në Elbasan.

Kryetari i Grupit Parlamentar të Partisë Socialiste, njëherësh dhe Drejtues Politik i Qarkut të Elbasanit, Taulant Balla edhe një herë theksoi rëndësinë e zgjedhjeve të 30 Qershorit, për të ardhmen europiane të Shqipërisë dhe për ndëshkimin me votë të atyre që punojnë kundër integrimit.

“60% e shqiptarëve mendojnë sot se protesta e opozitës nuk i bën mirë rrugës europiane të Shqipërisë sepse protesta e opozitës nuk është protestë e popullit. Sa më shumë do afrojë dita për ngritjen e Prokurorisë speciale Antikorrupsion, për ngritjen e Gjykatës së re Kushtetuese apo Gjykatës së Lartë aq më keq do bëhet Saliu e Luli, Iliri e Monika. Për fat të mirë, tashmë të katërt janë bërë bashkë. Ky është një moment historik për shqiptarët, në 30 Qershor të ndëshkojnë me votë këta politikanë që kanë kaq shumë vite që pengojnë të ardhmen europiane të Shqipërisë. Iliri duhet t’i bërtasë pak Monikës, t’i thotë të mos bëjë më rrëmuja dhe u zgjidh halli. Se thotë, do bëhen rrëmuja. Po kush do t’i bëjë rrëmujat? Gruaja. Po mirë, thuaj gruas mos bëj rrëmuja dhe rregullohet kjo punë, se pastaj Monika do t’i thotë Lulit dhe u zgjidh. Kështu që, motra dhe vëllezër, 30 Qershori është një ditë shumë e rëndësishme”, – deklaroi Balla.

Gjatë bashkëbisedimit me banorët, Balla preku një nga problemet më të ndjeshme të kësaj zone, atë të përroit të Zaranikës. Ky përrua ka qenë shqetësim i madh, sidomos për këtë lagje, pasi rrezikonte përmbytjen e saj. Më në fund, Ministria e Bujqësisë miratoi fondin për rikonstruksionin e këtij përroi dhe pritet të nisë puna.

“Dua ta them që në fillim, se për ne ishte shumë e vështirë të vinim, të kërkonim mbështetjen tuaj, nëse sot nuk do të ishim në fazën e fillimit të punimeve për rikonstruksionin e plotë të Zaranikës. Gjatë gjithë takimeve që kemi zhvilluar me banorët, ky ka qenë problemi kryesor që është sjellë në vëmendje. Elbasani, sot në drejtimin e Qazim Sejdinit ka bërë një ndryshim spektakolar. Ky ndryshim patjetër që ka filluar nga qendra, por detyra e Gledit tashmë është ta përfundojë këtë ndryshim në çdo cep të qytetit tonë”, – tha Balla.

Edhe kandidati Gledian Llatja foli për projektet e tij për zhvillimin e mëtejshëm të Elbasanit dhe veçanërisht të lagjes “Vullnetari”.

“Ne kemi projekte shumë të mira për të gjithë Bashkinë e Elbasanit, projekte të cilat konsistojnë në infrastrukturën rrugore, këndet e lojërave, shkollat për qytetin në përgjithësi dhe për çdo lagje.

Por ne kemi një sfidë në 30 Qershor, është sfida jonë që të dalim të votojmë PS, të lidhim kontratën mes qytetarëve dhe kryetarit të bashkisë dhe anëtarëve të Këshillit Bashkiak”, – u shpreh Llatja. /atsh

Deputetja Rudina Hajdari ka dënuar djegien e shkollës mbrëmë në Shkodër.

Ajo ka vendosur që pagën mujore t’a dhurojë për riparimin e dritareve të shkollës që u dogj.

“Të dashur demokratë, djegia e shkollave në Shkodrën e kulturës dhe traditave ishte një traumë kombëtare dhe dhunë anti-shqiptare”, është shprehur ajo, duke iu drejtuar demokratëve.

“Për këto arsye vendosa sot që pagën (rrogën) mujore t’a dhuroj për riparimin e dritareve të shkollës që u dogj dje në këtë qytet nga ata që nuk janë as demokratë dhe as socialistë por thjesht servila të kryetarit dhe shpresojnë që në të ardhmen të shpërblehen me parimin: “Kush djeg dhe shkatërron më shumë bëhet drejtor ose doganier”, ka theksuar Hajdari

“Le të jetë paga ime fillimi i një fushate ndërgjegjësimi nga çdo shqiptar që kërkon një Shqipëri si Europa”, ka shtuar ajo.atsh