Opinione

Deputeti i Partisë Socialiste, Alket Hyseni, gjatë një interviste televizive u shpreh se vendi ka parlament funksional.

”Ne kemi thenë se jemi gati të sfidohemi nga opozita. Ata kanë kapriçio, ne gjykuam në të mirë të vendit. Po të bënim zgjedhje të përgjithshme, do të ishim rivotuar më shumë. Kushtetuta i parashikon situatat, nuk mund të bësh lojëra”, – tha Hyseni.

Duke komentuar propozimin e sotëm të Presidentit Meta që më 13 tetor të mbahen zgjedhje të parakohshme parlamentare dhe presidenciale, Hyseni tha se “Meta duhet të kishte dhënë dorëheqjen, qoftë moralisht dhe nga pikëpamja juridike”. “Meta po ofendon stemën e Republikës së Shqipërisë me ato që thotë. Ai po kërcënon imazhin e Shqipërisë dhe Kushtetutën”, – tha Hyseni.

“Çështjen e moralit të tij politik e zgjidh vetë ai, pjesën juridike do ta zgjidhim ne për pak ditë nga Parlamenti dhe punë javësh do të jetë edhe nga Gjykata Kushtetuese. Sa i takon propozimit të tij ne nuk e marrim për bazë fare. Unë personalisht dhe nuk shpreh këtu opinionin e PS-së. Unë nuk do i referohem asgjëje që thotë Presidenti i Republikës, i cili edhe pse po rri në atë karrige ai po ofendon stemën e Republikës së Shqipërisë me këtë që po thotë. Do të punoj fort që një orë e më parë të mos jetë më në atë karrige, jo se më cenon gjë mua personalisht, por ai po cenon imazhin e Republikës së Shqipërisë”, – theksoi ai.

Gjatë kësaj interviste Hyseni foli edhe për zgjedhjet e 30 qershorit ku deklaroi se se me këto zgjedhje ka fituar vetëm Shqipëria.

”Glover, e tregon qartë fajtorin, grusht që i është dhënë opozitës. Ne i bëmë përpjekjet që opozita të vinte në zgjedhje. Ne mbajmë përgjegjësinë tonë, ne bëmë ç’është e mundur. Të hapur që skema politike të kompletohet, t’i japim mundësi opozitës të rikthehet rrugës politike. Kemi bërë ndaj elektoratit presion pozitiv, që të ushtrojnë të drejtën e tyre qytetare e të mos ndikoheshin nga situata aktuale. Mund të kishim marrë më shume vota, ka disa që janë stepur si intelektualë apo elektorat gri për shkak të pasigurisë së situatës. Kemi marrë më shumë vota se në 2017. Do ta bëjmë Shqipërinë me këtë opozitë, detyra jonë është t’ua shtrijmë dorën vazhdimisht, pa cenuar parimet kushtetuese e morale”, – tha Hyseni. /atsh

Zv/kryeministri Erion Braçe i cilësoi sot një superkonfirmim për Partinë Socialiste, pjesëmarrjen në zgjedhjet vendore të 30 qershorit.

“Referendum! Super, super, super, super konfirmim! Faleminderit Divjakë, faleminderit Shqipëri”, shkruan Braçe në rrjetet sociale.

Qytetarët në mbarë vendin votuan sot për zgjedhjen e 61 kryebashkiakëve të rinj si dhe për anëtarët e rinj në këshillat bashkiakë.

Me mbylljen e procesit të votimit në orën 19:00, pritet të nisë numërimi në të gjithë vendin për nxjerrjen e rezultatit të zgjedhjeve lokale./atsh

Kryeministri Edi Rama u kujtoi qytetarëve në Vorë se e kishte parashikuar caktimin e një date të re zgjedhjesh nga Meta, për në datën 21 tetor, gjatë takimit në Vorë, pasditen e sotme.

“Dy shpjegime kam unë ose 21 i binte e hënë, ose fallxhorja e ka lexuar 2-in si dy ditë para ditëlindjes së Doktorit, se ka thënë 2 është dy ditë para ditëlindjes së njëshit, se Iliri njësh e ka Doktorin, po e kapi paniku vetëm Doktorin mendon. Në politikë është pacient i Doktorit”, – tha Rama.

”Zgjedhjet bëhen më 30 qershor dhe data e re është muhabet filxhani”, – tha Rama.

“Kur e parashikova te filxhani imagjinar datën 21, ishte akoma situata e tensionuar shumë për njerëzit, se unë e kam ditur si shkon kjo punë, se e kam thënë që jam tre lëvizje para. Mund t’ju them se data e re doli se nuk e ndalën dot, nuk e bllokuan dot, nuk e vranë dot 30 qershorin. E kuptuan shumë mirë që 30 qershorin e humbën dhe nuk mund të bëjnë dot asgjë nga ato që kanë menduar e imagjinuar, se mund të bënin”, – tha Rama. /atsh

Ish-Presidenti i Republikës Alfred Moisiu deklaroi sot se në shtyrjen e hapjes së negociatave ka ndikuar hezitimi i disa vendeve anëtare dhe kriza politike në vend.

Moisiu gjithashtu kërkoi një pakt kombëtar dhe një zgjidhje për situatën në interes të Shqipërisë e jo në kurriz të saj.

Ai doli sot para medieve së bashku me disa intelektualë, përfaqësues të medies, shoqërisë civile dhe biznesit, ku deklaroi se kriza po përkeqësohet dhe se duhet një zgjidhje afatgjatë për të mos u përsëritur.

Sipas tij, janë të patolerueshme nxitja e urrejtjes mes shqiptarëve për interesa partiake; veprimet e dhunshme ndaj institucioneve; përdorimi i shprehjeve luftënxitëse e përçarëse; retorika denigruese ndaj rivalëve dhe ndaj secilës palë politike; mungesa e dialogut.

“Ministrat e Jashtëm të Këshillit të BE vendosën për të shtyrë në muajin tetor vendimin për mundësinë e hapjes së negociatave me Shqipërinë. Hapja e negociatave me BE është prioritet absolut kombëtar për vendin tonë. Në shtyrjen e tyre ka ndikuar hezitimi i disa vendeve anëtare dhe kriza politike në vend. Hapja e negociatave, në vend se të kuptohet si një çështje mes BE dhe vendit, po përdoret si instrument i luftës politike mes shumicës e pakicës. Koha deri në tetor është e shkurtër për të bindur vendet skeptike”, tha Moisiu.

“Punët për t’u kryer nuk janë të pakta. Kriza po përkeqësohet. Është koha për një zgjidhje në interes të Shqipërisë dhe jo në kurriz të saj. Koha për një zgjidhje afatgjatë për të mos u përsëritur krizat ciklike”, theksoi Moisiu.

“Janë të patolerueshme nxitja e urrejtjes mes shqiptarëve për interesa partiake; veprimet e dhunshme ndaj institucioneve; përdorimi i shprehjeve luftënxitëse e përçarëse; retorika denigruese ndaj rivalëve dhe ndaj secilës palë politike; mungesa e dialogut. Këta faktorë kanë çuar në cenim të sigurisë së qytetarëve, dëmtojnë demokracinë e brishtë shqiptare, po cenojnë imazhin e Shqipërisë në botë. Veprime që bien ndesh me dëshirat e popullit për integrimin europian”, deklaroi Moisiu./atsh

“Ajo që e kompromenton Presidentin e Republikës është pikërisht retorika që përdor. Retorika e tij është krejtësisht politike dhe ai ngjason më shumë si kryetar i një partie opozitare sesa si President që i referohet Kushtetutës së vendit”, – deklaroi sot deputeti socialist, Besnik Bare.

I ftuar në një studio televizive, Bare foli për qëndrimin e Presidentit në situatën aktuale politike dhe nismën e mazhorancës për ta shkarkuar atë.

“Një President duhet t’i referohet ligjeve, Kushtetutës dhe neneve përkatëse. Ilir Meta në asnjë moment. në asnjë element të gjithë retorikës që ka përdorur nuk i është referuar Kushtetutës”, – tha Bare.

Ndërkohë Bare tha se akuzat e mazhorancës ndaj Presidentit janë të mbështetura në Kushtetutë. “Kushtetuta nuk e parashikon në asnjë nen të drejtën e Presidentit për të zhdekretuar datën e zgjedhjeve, pasi e dekreton atë”, – tha Bare.

Për shkarkimin e Presidentit, sipas Bares, “procedura është e tillë që mblidhet komisioni i Ligjeve, fton Presidentin të paraqesë argumentet e veta dhe në finale është Gjykata Kushtetuese që vendos për shkarkimin”.

I pyetur nëse mund të ketë një përplasje në 30 qershor, Bare tha se “përplasja inspirohet nga 3-4 veta dhe kur këta njerëz nuk kanë dashur përplasje në mitingjet e PD-së nuk ndodh përplasja”. “Nëse në 30 qershor do të ketë përplasje përgjegjës do të jenë këta 3-4 veta”, – tha Bare.

Sipas tij, “PD nuk ofron një platformë politike dhe ekonomike, por vetëm alternativën si të shpëtojmë karrierën politike të Lulzim Bashës dhe Sali Berishës. /atsh