Opinione

Mjeku Tritan Kalo ka apeluar sot qytetarët për t’u mbrojtur ndaj koronavirusit.

Ai vë theksin se COVID-19 prek çdo moshë, siç ishte rasti i 34-vjeçares nga Librazhdi, e ndërsa u bën thirrje që të mos humbin vlerësimin për mjekët.

“Jetët tona janë të pakthimta dhe shumë të vlefshme. Mos vijoni të bëheni pre e idiotësirave të mos ekzistencës së Sars-Cov2/COVID-19”, ka thënë ai.

“Bëhet fjalë për një virus dhe një sëmundje me dy kuptimshmëri njëthelbësore, e cila duhet marrë sa më seriozisht. Corona-virus = Virus me Kurorë mbi kokën e tij, por edhe mbi kokën tonë nëse largohemi nga kjo jetë e nuk tregojmë kujdes ndaj një virusi të tillë. CO-VID = Bashkë – Zbrazëse e shëndetit si dhe e jetëve tona, nëse përsëri nuk bëjmë kujdes ndaj një infeksioni të tillë shëndet dhe jetëmarrës”, ka theksuar Kalo.

“Besoj se dëgjoni dhe informoheni se çfarë po ndodh në botën mbarë, por më pak vëmendje ndaj lojrave me shifrat dhe interpretimin e tyre shpesh konfuz prej shumë gjithollogëve. Ju rikujtojmë se Sars-Cov2/Covid-19 prek çdo moshë. Një sëmundje e tillë mundet të marrë jetën e pacientëve të çdo moshe. Flas nga ajo që unë dhe kolegët e mi të nderuar në COVID-1/Shërbimin e Sëmundjeve Infektive të QSUT “Nënë Tereza”, po vijojmë të përjetojmë në vijën e parë të përplasjes me këtë infeksion. Durimi dhe përkujdesja ndaj vetes dhe të tjerëve, mbeten thelbësore edhe sot e kësaj dite për tu përballur me këtë sfidë”, ka shtuar ai.

“Mirëkuptimi dhe mirëbesimi reciprok në këtë sfidë, me këtë “flamë mbarëbotërore” duhen vlerësuar për çdo sekondë, sepse janë dy “armët” tona më të sigurta në këtë betejë sociale. Mos e zhbëni për asnjë çast për ndonjë qejfmbetje jo thelbësore, vlerësimin tuaj ndaj heroizmit dhe vetësakrifikimit të mantelbardhëve, infermierëve, farmacistëve, sanitareve, barrelmbajtësve, teknikëve të imazherisë, punonjësve të koordinimit e administratës si dhe punonjësve të rendit, të cilët venë në rrezik jetët e tyre për të shpëtuar shëndetin dhe jetët tuaja. Bashkë dhe vetëm bashkë do mundemi me siguri të mbërrijmë në fund të tunelit pak sa të gjatë, por ku edhe drita jeshile për daljen mbanë në këtë sfidë Sars-Cov2/Covid-19 vijon të ndrijë”, ka thënë Kalo./atsh

Drejtori i Qendrës Kombëtare të Urgjencës Mjekësore, Skënder Brataj deklaroi sot se “respektimi i rregullave është thelbësor në këtë fazë të pandemisë, kur po vërehet transmetim i infeksionit nga vatra të kontrolluara në transmetim komunitar”.

Brataj u shpreh se “jetojmë në një moment të vështirë të pandemisë. Sot nuk dua të hyj në shifra apo përqindje thjesht të ndaj shqetësimin me ju. Pa hyrë në analiza apo polemika, pa gjetur fajtorë siç e kemi zakon në Shqipëri, pa gjykuar doja të thoja, se po vërehen tri dukuri në sfidën ndaj Sars-Cov2 që shkakton sëmundjen e COVID-19”, tha Brataj.

Sipas tij, po ndodh shtimi i rasteve në përgjithësi, shtimi i të sëmurëve dhe prekja e moshave të reja që deri dje ishin të paprekura.

Brataj tha se “ajo që më shqetëson më shumë është rritja e numrit të pacientëve si në banesë, po ashtu edhe në spital”.

“Kalimi i infeksionit nga vatra të kontrolluara në transmetim komunitar. Në këtë fazë të pandemisë a mund të bëjmë ne diçka më shumë për të parandaluar apo për të përmirësuar situatën e këtij infeksioni? Po. A kemi nevojë për masa drastike izolimi? Jo”, tha Brataj.

Duke folur për mënyrën më të mirë për të vepruar në këtë moment, Brataj nënvizoi respektimin e rregullave.

“Patjetër që varet nga ne, thjesht të respektojmë disa rregulla të thjeshta. Domosdoshmëri është përdorimi i maskave në ambiente të mbyllura, ndoshta është momenti që të ngremë zërin kur shikojmë persona të tjerë brenda këtyre ambienteve pa maska. Ruajtja e distancës 1,5-2 metra në këto ambiente. Dezinfektimi i duarve në hyrje të çdo ambienti të mbyllur pa përdorur doreza”, tha ai.

Po ashtu, Brataj nënvizoi karantinimin dhe distancimin fizik për të gjithë ata që rezultojnë të infektuar.

“Nëse ke pasur kontakt me persona të infektuar dhe shfaqen shenja e simptoma konsideroje veten si të infektuar. Mos përdor maska në ambient të hapur nëse nuk je prekur nga infeksioni. Mos përdor doreza në ambient të hapur”, këshilloi Brataj./atsh

Mjeku i njohur në spitalin Infektiv, Tritan Kalo ka kërkuar nga qytetarët vetëndërgjegjësim pasi sipas tij kujdesi për veten dhe të tjerët ka nisur të nënvlerësohet edhe pse virusi është ende mes nesh.

Ai thotë se po kryen çdo ditë të njëjtën rutinë sikur ndodhi edhe para disa muaj, kur ky virus u shfaq edhe në Shqipëri. Sipas tij, personeli shëndetësor mbetet i papërtuar për të ndihmuar çdo të sëmurë në këto kohë të cilat Kalo i quan “kohë kovidiane”.

“Kohë kovidiane….sensibilizimin ynë, vetëndërgjegjësimi, kujdesi për veten dhe të tjerët rreth nesh këto ditët e fundit kanë filluar të harohen e nënvlerësohen për shumë e shumë prej jush….MOS haroni se Sars-Cov2/Covid-19 “gjallon” ende mes nesh”, u shpreh Kalo.

Kalo i rikujton ndër të tjera qytetarëve që kujdesi i vazhdueshëm për veten dhe të tjerët nuk duhet të nënvlerësohet dhe vetëm në këtë mënyrë mund t’i dilet mbanë kësaj sfide jo të lehtë.

“Kujdesi i vazhdueshëm ndaj vetes dhe të tjerëve kurrë nuk duhet nënvlerësuar. Së bashku do ia dalim mbanë përballjes me këtë sfidë jo lehtë për t’u fituar”, thekson ndër të tjera mjeku i njohur. /atsh