Lajmi i fundit

Studentët vazhdojnë protestën e tyre nën moton “Dhjetori i Dytë” edhe sot.

Në rrjetet sociale, që janë edhe “zemra” e kësaj proteste, studentët publikuan axhendën dhe në bazë të saj janë mbledhur para Korpusit Universitar në orën 9:30 dhe prej aty kanë nisur marshimin drejt Ministrisë së Arsimit.
Studentët i kanë vendosur si afat të fundit Ministrisë së Arsimit, ditën e martë, kur duhet të jenë plotësuar të gjitha kërkesat e tyre.

“Jemi të gjithë të bashkuar. Do i kërkojmë ministrisë dhe qeverisë të njëjtat kërkesa me 8 pika. Deri të martën është ultimatumi. Nëse nuk plotësohen, të martën do jetë protesta më masive që keni parë ndonjëherë”, u shpreh një prej studentëve për mediat.

E sotmja, do të jetë dita e 5-të e protestave të studentëve për të drejtat e tyre, teksa ata vazhdojnë të bëjnë thirrje për mos politizim të tubimit. Sipas tyre ka pasur tentativa nga disa grupe për t’i përçarë, ndaj kanë hedhur disa ide. Ata kërkojnë që mos ketë një drejtues, por organizimi të bëhet nëpërmjet rrjeteve sociale dhe e dyta që të bëhen të dallueshëm nga grupe politike propozojnë që të mbajnë në dorë një shami të kuqe.

“Studentë, të gjithë të bashkuar për të kërkuar me ngulm plotësimin e kushteve! Kush nuk ka mundësi të shkojë të mblidhet pranë fakulteteve të vet, të vijë direkt në Ministrinë e Arsimit”, thuhet në faqen e Facebook të Universiteti.info.

Edhe “Lëvizja për Universitetin” bën thirrje që politika të qëndrojë larg studentëve.

“Studentët në protestë para Ministrisë së Arsimit po përballen me një fushatë të koordinuar dezinformimi dhe orvatjesh për t’i përçarë. Lëvizja Për Universitetin u bën thirrje të gjitha partive politike që të ndalin veprimet përçarëse ndaj studentëve. Edhe më fort se nga ne, thirrja për mospërfshirjen e partive vjen nga mijëra studentë njëzëri. Janë ata që e kanë kuptuar se partitë kanë vetëm një interes: përçarjen e studentëve dhe instrumentalizimin e protestës për agjendat e tyre”.

Studentët nuk kanë ndërmend të tërhiqen edhe pas refuzimit që i bën dje ministres Lindita Nikolla, e cila hyri mes turmës për të komunikuar me ta, por u refuzua, pasi studentët nuk kërkojnë negociata por vetëm plotësim të kushteve.

GAZETA “SHQIP” RENDIT KËRKESAT E PLOTA TË STUDENTËVE
Drejtuar: Ministrisë së Arsimit dhe Sportit
Ministres së Arsimit dhe Sportit Znj. Lindita Nikolla
Lënda: Kthim përgjigje me shkresë zyrtare

Përgjysmim i tarifës së studimi
Rritja nga 10% në 50% e peshës totale të votës së studentëve për të zgjedhur kandidatët për dekan/rekor dhe rritja e përfaqësisë së studentëve në senatin akademik me 20%.
Mbështetur në nenin 99 mbi Këshillet Studentore, Ligji i Arsimit të Lartë pika 2 kërkojmë që Bordi i Administrimit të IAL-ve të ketë numër të barabartë votash si nga Ministria e Arsimit dhe Sportit dhe IAL-të dhe të shtohet një përfaqësues në këtë bord nga studentët.
Mbështetje e studentëve për kërkime shkencore.
Mbështetje e studentëve të doktoraturës me fonde për kërkimin shkencor.
Përmirësim i kushteve të konvikteve të Universiteteve.
Dyfishim i buxhetit për arsimin e lartë.
Pajisja e të gjithë studentëve me kartën e Studentit brenda vitit akademik 2018-2019. Presim përgjigje zyrtare me shkrim deri në orën 14:00. Kërkesa drejtohet nga Këshilli Studentor.

Prokuroria e Rrethit Gjyqësor Berat, ka nisur hetimet për 5 persona, pasi akuzohen se kryenin aktivitete të paligjshme në Malin e Tomorit, duke nxjerrë gurë gëlqerorë.

Burime zyrtare nga policia bënë me dije se materialet janë referuar për shtetasit me inicialet I. L., 42 vjeç, banues në Poliçan, B. L., 43 vjeç, banues në Berat, C. Q., 41 vjeç, banues në Poliçan, A. B., 32 vjeç, banues në Çorovodë si dhe S. Q., 59 vjeç, banues në Tiranë. Mësohet se në cilësinë e provave materiale janë sekuestruar makineri, mjete dhe vegla pune që shërbenin për ushtrimin e këtij aktiviteti.

Materialet hetimore do t’i kalojnë Prokurorisë Pranë Gjykatës së Shkallës së Parë Berat për veprat penale “Fshehja e të ardhurave”, “Shkatërrimi i pronës” dhe “Punësim i paligjshëm”. Policia e Beratit do të vazhdojë të marrë masa për të gjithë ata shtetas që shkatërrojnë dhe ndotin mjedisin si dhe zonat e mbrojtura

Prokuroria e Krimeve të Rënda ka dërguar për gjykim tre gjyqtarët e apelit Durrës Kliton Spahiu, Petrit Ceno dhe Petraq Dhimitri për “ Korrupsion pasiv të gjyqtareve, prokurorëve apo punonjësve të tjerë të Drejtësisë ”, duke u bazuar te neni 319/ c, I K. Penal dhe shtetasin Namik Sadiku për veprën penale “ korrupsion aktiv të gjyqtareve, prokurorëve apo punonjësve të tjerë te drejtësisë ” te parashikuar nga neni 319 I K.Penal.

Sipas hetimit, Gjyqtarët Kliton Spahiu, Petraq Dhimitri dhe Petrit Çeno kanë zhvilluar dy udhëtime, njëri prej të cilëve në Spanjë për të parë ndeshjen e futbollit mes Real Madrid dhe Barcelonës në 2014.

Rasti që po hetohet nga prokuroria implikon gjyqtarët e Apelit të Durrësit me biznesmenin Namik Sadiku dhe ka të bëjë me një çështje gjyqësore midis këtij të fundit dhe ish-ortakut të tij, Oliver Ushina. Ushina kishte paditur Namik Sadikun për ndërtimin e një pallati 10-katësh në zonën e Shkëmbit të Kavajës, çështje të cilën ai e fitoi në shkallën e parë. Por vendimi u rrëzua nga Gjykata e Apelit me ndërhyrjen e treshes Spahiu, Dhimitri dhe Çeno, i pari në cilësinë e relatorit dhe dy të tjerët anëtarë të trupit gjykues. Më pas të tre gjyqtarët kanë shkuar dhe kanë parë derbin “El Clasico” në Spanjë bashkë me Sadikun, i cili dyshohet se ka mbuluar të gjitha shpenzimet. Këtu nis dhe hetimi prokurorisë. /atsh

Reshjet e fundit të shiut që kanë përfshirë vendin kanë sjellë shtimin e sasisë së prurjeve të lumit Vjosë ku për pasojë ka pasur dhe përmbytje.

Gazetarja e ‘Fax Neës’ Ervina Shehaj raporton se lumi Vjosa ka dalë nga shtrati dhe ka përmbytur Bypass-in e Tepelenës.

Vazhdimi i reshjeve të shiut me një intensitet të lartë mund të shkaktojë përkeqësimin e situatës. Kujtojmë që vitin e kaluar Shqipëria pati probleme të mëdha pothuajse në të gjithë vendin pas daljes së lumenjve nga shtrati që sollën pëmbytje të mëdha dhe evakuim të shumë banorëve.

Gjykata e Krujës pranoi kërkesën e Rexhep Rrajës, djalit të deputetit Rrahman Rraja, për gjykim të shkurtuar. Seanca e radhës do të zhvillohet në datë 4 Dhjetor.

Në rast dënimi, Rraja do përftojë ulje dënimi me 1/3. E pranishme në seancë ishte edhe Xhisiela Maloku. 25-vjeçarja para gjyqtares Engjëllushe Tahiri ka deklaruar se ka gënjyer për të gjithë kallëzimin e saj. Xhisiela në këtë proces ka statusin e të dëmtuarës.

Në datë 24 Tetor Gjykata e Krujës pranoi kërkesën e prokurorisë, e cila për djalin e deputetit socialist ka ngritur akuzën e kanosjes ndaj Xhisiela Malokut. Rexhep Rraja ndodhet në burg me akuzën e përndjekjes së ish-të dashurës së tij.

Ka nisur prap protesta e banorëve të Unazës së Re për të mos lejuar prishjen e banesave dhe të pronës së tyre.

Në mbështetje të protestuesve kanë shkuar edhe deputetët e opozitës.
Edhe sot banorët kërkojnë që të dëmshpërblehen 100 për qind për pronën e tyre.

Ditën e sotme gjykata vendosi burg pa afat për të riun Daniel Dobra që i hodhi kapsollen në dorë polices Ina Nuka.

“Shtëpitë tona do t’i mbrojmë me gjak”, dëgjohen në kor të gjithë banorët, ndërsa lëshojnë edhe thirrje në mbështetje të 18-vjeçarit Daniel Daniel Drobaj, i cili u la sot në burg për plagosjen e polices Ina Nuka. /Lajmifundit.al