Lajmi i fundit

Hapen aplikimet për shkollën bazë të policisë

Aktualitet, Lajmi i fundit / /

Hapen aplikimet për shkollën bazë të policisë për 500 vende

Sipas njoftimit të Policisë, hapet procesi i aplikimeve për të gjithë kandidatët e interesuar për të ndjekur studimet në Shkollën Bazë të Policisë për “Patrullë të Përgjithshme”. Aplikimet do të dorëzohen pranë Drejtorive Vendore të Policisë, ku aplikanti ka vendbanimin e përhershëm. Procesi i aplikimit, është i hapur deri në datën 3 gusht 2019 dhe formularët e aplikimit tërhiqen pranë çdo Drejtorie Vendore të Policisë.

Në përfundim të të gjithë procesit të konkurrimit, kuota e pranimit do të ndjekin studimet në Kolegjin Profesional të Lartë “Kolegji i Policisë” për “Patrullë të Përgjithshme”, në Akademinë e Sigurisë 500 kursantë, të ndarë në bazë të renditjes sipas pikëve të fituara në listën e rezultateve të arritura në fazat e konkurrimit. Kjo e ndarë në 2 kurse, në periudhat: Tetor 2019 – Prill 2020 dhe Maj 2020 – Nëntor 2020.

Përzgjedhja e kandidatëve do të realizohet përmes një procesi të drejtë, të paanshëm dhe transparent, sipas parimit të shanseve të barabarta, meritës dhe mos diskriminimit.

Kriteret, që duhet të përmbushë aplikanti, për të ndjekur studimet në Shkollën Bazë të Policisë për “Patrullë të Përgjithshme”: Të jetë shtetas shqiptar; Të mos jetë i përjashtuar nga Policia e Shtetit apo të jetë larguar nga shërbimi civil; Të ketë zotësi të plotë për të vepruar;Të jetë në gjendje të mirë shëndetësore dhe i aftë fizikisht për të kryer detyrën;Të ketë mbaruar arsimin e mesëm; Të zotërojë gjuhën shqipe të shkruar dhe të folur; Të mos jetë i dënuar me vendim gjykate të formës së prerë për kryerjen e një krimi ose të një kundërvajtjeje penale me dashje; Të ketë dëshmi të aftësisë së drejtimit të automjetit të tipit “B”.

Aplikantët për punonjës Policie duhet të paraqesin dokumentacionin e mëposhtëm për aplikim në Polici: Formularin e aplikimit; Fotokopje të kartës së identitetit; Dokument zyrtar që vërteton përfundimin e arsimit; Fotokopje të dëshmisë së aftësisë së drejtimit të automjetit të tipit “B”; Certifikatë të gjendjes gjyqësore; Certifikatë familjare; Vërtetim nga Gjykata; Vërtetim nga Prokuroria; Raport mjeko-ligjor; Fotokopje të librezës së punës ose vërtetim që ndjek arsimin e lartë (nëse i disponon); Dokument të lëshuar nga institucionet shëndetësore, që vërteton se nuk është përdorues i lëndëve narkotike; Mandat pagesa e tarifës së aplikimit.

Procedura për përzgjedhjen e kandidatëve, që do t’i nënshtrohen konkurrimit, do të ndiqen hapat e mëposhtëm: Dorëzimi i dokumentacionit nga aplikanti dhe dhënia e numrit të regjistrimit nga struktura vendore e burimeve njerëzore; Shqyrtimi i kritereve dhe dokumentacionit nga struktura vendore e burimeve njerëzore, nëse aplikanti plotëson kriteret e përcaktuara; Verifikimi paraprak i aplikantëve, për rekorde të mundshme kriminale; Njoftimi me shkrim nga struktura vendore i aplikantëve, që nuk plotësojnë kriteret për të vazhduar testimin; Dërgimi në Drejtorinë e Burimeve Njerëzore i listës emërore të aplikantëve, që plotësojnë kriteret e përcaktuara; Hartimi i listës përfundimtare të aplikantëve, që plotësojnë kriteret dhe caktimi i kodit për çdo aplikant nga Drejtoria e Burimeve Njerëzore;

Pajisja e çdo aplikanti me formularin e pranimit dhe numrin personal nga strukturat vendore të burimeve njerëzore; Publikimi në faqen zyrtare të Policisë së Shtetit dhe në media për datën, orën dhe vendin e zhvillimit të konkurrimit, si dhe listën e kandidatëve që kualifikohen për të konkurruar; Procesi i apelimit; Konkurrimi.

Shqyrtimi i dokumentacionit dhe procesi i ankimimit dhe verifikimit të dokumentacionit është 10 ditë pune nga mbyllja e afatit të aplikimeve. Aplikanti, që nuk plotëson kriteret dhe nuk ka paraqitur dokumentacionin e kërkuar brenda afatit të aplikimit, skualifikohet duke u njoftuar me shkrim nga struktura e burimeve njerëzore.

Aplikanti ka të drejtën e ankimit tek Drejtori i Policisë Vendore brenda 2 ditëve nga data e njoftimit të përgjigjes. Drejtori i Policisë Vendore shqyrton dhe kthen përgjigje brenda 5 ditëve nga data e marrjes së ankesës.

Aplikanti, që kualifikohet për të vazhduar procesin e pranimit në Akademinë e Sigurisë, i nënshtrohet fazave të mëposhtme të konkurrimit: Testimi me shkrim; Testimi i aftësive fizike; Intervistë me gojë, ushtrime vlerësuese dhe testim i aftësive të të shkruarit; Testimi psikologjik; Kontrolli shëndetësor; Marrja e shenjave të gishtave; Verifikimi përfundimtar i aplikantit.

Strukturat e Burimeve Njerëzore pranë Drejtorive Vendore të Policisë do t’u japin të gjithë aplikantëve formularin e aplikimit, informacionin e nevojshëm për procedurat, kërkesat dhe çdo lloj testimi e verifikimi, si dhe për ushtrimin e të drejtës së apelimit.

Të gjithë aplikantët, për çdo paqartësi që mund të kenë lidhur me këtë proces, mund të drejtohen pranë strukturave të Burimeve Njerëzore në Drejtoritë Vendore të Policisë ose pranë Drejtorisë së Burimeve Njerëzore në Drejtorinë e Policisë së Shtetit. Po ashtu, mund t’i parashtrojnë pyetjet apo shqetësimet e tyre dhe me e-mail në adresën: [email protected]

Çdo material i nevojshëm për procesin e aplikimit, është i pasqyruar në faqen e internetit të Policisë së Shtetit www.asp.gov.al në rubrikën Akademia e Sigurisë – “Si mund të bëhesh punonjës policie”./atsh

Hapen aplikimet për shkollën bazë të policisë Read More »

Kërkuan azil në BE, vijojnë operacionet e riatdhesimit

Aktualitet, Lajmi i fundit / /

Vijojnë operacionet e riatdhesimit të shtetasve shqiptarë, të cilët kishin kërkuar azil në vendet e BE-së.

Gjatë mesditës së sotme me një avion të posaçëm, janë riatdhesuar vullnetarisht 29 shtetas shqiptarë, të cilët kishin kërkuar azil në Francë.

Ministria e Brendshme dhe Policia e Shtetit edhe njëherë apelojnë për të gjithë shtetasit shqiptarë që të mos tentojnë për të kërkuar azil dhe mos abuzojnë me rregullat për lëvizjen në hapësirën Schengen, si dhe të tregojnë kujdes mos bien pre e mashtrimeve për të marrë dokumente false me qëllim përfitimin e azilit në vendet e BE-së, pasi shanset për të përfituar janë zero.

Operacionet e riatdhesimit nga Policia Kufitare në bashkëpunim me partnerët e vendeve të BE-së do vijojnë edhe në javët e ardhshme. /atsh

Kërkuan azil në BE, vijojnë operacionet e riatdhesimit Read More »

Ambasadorja Glover: E kënaqur nga zgjedhjet e të dielës, reforma zgjedhore e domosdoshme

Aktualitet, Lajmi i fundit, Politike / /

Ambasadorja Audrey Glover, drejtuese e misionit të vëzhguesve të OSBE/ODIHR-it në zgjedhjet lokale 2019 në Shqipëri deklaroi se për zgjedhjet e 30 qershorit do të varet nga autoritetet e Shqipërisë se ҫfarë do të vendosin të bëjnë me rezultatet e tyre, ndërsa e cilësoi kryerjen e reformës zgjedhore në Shqipëri të domosdoshme dhe një orë e më parë.

Në një intervistë për Deutche Welle (DW), ambasadorja Glover thekson se “nuk ka mbaruar ende gjithë cikli i procesit zgjedhor. Jemi duke parë me shumë interes ankimimet, që janë pjesë shumë e rëndësishme e procesit zgjedhor”.

“Jam shumë e kënaqur që në zgjedhjet e të dielës vështirë se pati ndonjë akt të rëndë dhune. Zgjedhjet u zhvilluan qetë dhe në rregull, gjë që është shumë e mirë, duke marrë në konsideratë se sa shumë dhunë ka patur në zona të ndryshme të vendit, sa të dhunshëm kanë qenë muajt e fundit. Por, përderisa procesi zgjedhor nuk ka mbaruar, ende nuk mund të përshkruaj atë në tërësi”, – tha Glover.

E pyetur se çfarë pasojash solli për votuesit bojkoti i 30 qershorit nga PD dhe partitë e tjera opozitare jashtë parlamentit, Glover tha se “kandidatë për kryetarë bashkie garuan pa konkurrentë përballë. Kam folur me disa kandidatë që nuk patën kundërshtarë… ata më thanë, se kjo gjë largoi disi interesin nga zgjedhjet, kur nuk ke asnjë përballë, asnjë kundër, kjo ndikon në performancën e kandidatit, sa bindës është. Në 31 bashki nga 61 nuk pati kandidatë kundërshtarë. Votuesit në këto bashki nuk patën mundësi të bëjnë zgjedhje, në kuptimin e plotë të fjalës”.

Ambasadorja Glover theksoi se “përcaktimi i zgjedhjeve varet nga autoritetet e këtushme, varet se ҫfarë kanë ndërmend të bëjnë si rezultat i kësaj situate. Ne mund të nxjerrim në pah, të tregojmë se si ishte situata, por janë autoritetet e Shqipërisë që do të vendosin se ҫfarë do të bëjnë në të ardhmen, si pasojë e bojkotit të opozitës dhe zgjedhjeve pa kundërshtarë”.

Duke e cilësuar mospjesëmarrjen e opozitës të pazakontë, Glover tha se “zgjedhjet janë të ndryshme nga njëra-tjetra. Për zgjedhjet e 30 qershorit do të varen nga autoritetet e Shqipërisë se ҫfarë do të vendosin të bëjnë me rezultatet e tyre”.

“Të gjitha vendet anëtare të OSBE-së kanë nënshkruar angazhimet e tyre lidhur me standardet e zgjedhjeve demokratike. Por, është shteti, autoritetet e këtushme që do të vendosin se ҫfarë do të bëjë me zgjedhjet e 30 qershorit. Nuk na takon ne të vendosim. Ne do të shkruajmë raportin dhe do të bëjmë rekomandime”-, nënvizoi ajo.

Lidhur me qëndrimin e misionit të vëzhguesve të OSBE/ODIHR-it Glover u shpreh se “në raportin tonë përfundimtar do të ketë vlerësime dhe opinione të pa anshme për zgjedhjet lokale të 30 qershorit”.

Duke iu përgjigjur pyetjes se a sollën argumente shtesë, a vërtetuan zgjedhjet lokale të 30 qershorit, se kryerja e reformës zgjedhore në Shqipëri është e domosdoshme dhe një orë e më parë, Glover theksoi se “kryerjen e reformës zgjedhore e kemi rekomanduar prej një kohe të gjatë. Shqipëria duhet të ketë një sistem drejtësie që të funksionojë si duhet, të ketë Gjykatën e Lartë dhe më e rëndësishme të ketë Gjykatën Kushtetuese. Kjo do të jetë pjesë e rekomandimeve edhe kësaj here në raportin tonë final. Për Shqipërinë është e rëndësishme të ketë një sistem ligjor dhe gjyqësor, që funksionon si duhet”./atsh

Ambasadorja Glover: E kënaqur nga zgjedhjet e të dielës, reforma zgjedhore e domosdoshme Read More »

Meta: Më 13 tetor zgjedhje të përgjithshme dhe për presidentin

Aktualitet, Lajmi i fundit, Politike / /

Presidenti i Republikës, Ilir Meta propozoi sot për zgjidhjen e krizës që më datë 13 tetor të mbahen zgjedhjet e përgjithshme parlamentare dhe për presidentin.

Në një konferencë për shtyp, Meta tha se ky është propozimi i tij për zgjidhjen e krizës politike që vijon edhe pas mbajtjes së zgjedhjeve lokale më 30 qershor.

Ai tha se do të kandidojë sërish për postin e presidentit në këto zgjedhje të 13 tetorit që ai propozon, dhe thotë se kryeministri Edi Rama mund të vërë cilin kandidat të dëshirojë.

“Kjo është rruga që e zgjidh këtë krizë”, tha Meta në konferencë duke shtuar se “unë do të garoj për president me këto kompetenca që kam. Kjo është rruga që e zgjidh këtë krizë që shqiptarët të mos shkojnë sërish të futen nëpër ambasada. Boll e zbrazëm Shqipërinë. Do ta bëjmë një vend europian, një vend ku askush nuk dhunon ligjin dhe institucionet. Kjo është zgjidhja që unë jap dhe nuk është turp as për mua nëse populli nuk më voton. Kjo është rruga e zgjidhjes së krizave. Nëse ka ndonjë propozim për kandidat për president Edi Rama ta bëjë. Të mos tallet askush me Kushtetutën tonë. U tallën njëherë në 2008”.

“Nuk më intereson se kush fiton, Basha apo Rama, por nuk dua që të humbasë më Shqipëria për lojëra politikanësh dhe ambasadash”, tha Meta.

Presidenti thekson se gjithashtu zgjedhjet lokale do të mbahen më 13 tetor, duke shtuar se dekretin e tij të fundit që caktoi datën 13 tetor për mbajtjen e këtyre zgjedhjeve, nuk mund ta gjykojë Kolegji Zgjedhor, por vetëm Gjykata Kushtetuese.

Ai tha se nuk është krizë politikë, por krizë e shtetit. “Kjo është një krizë e shtetit të së drejtës, dhe kryetar i shtetit është presidenti”, tha Meta.

Presidenti tha se alternativa e tij për zgjidhjen e krizës ishte një axhendë ndryshe nga ajo e opozitë jo parlamentare, që është Rama ik. “Ajo ishte Rama reflekto, që pas zgjedhjeve të 30 qershorit, sipas Metës është kthyer në Rama kthjellohu.

“Nëse nuk je i pavarur të marrësh vendimet e duhura, unë dhe gjithë shqiptarët e ndershëm që kanë ende gjak shqiptari do ta mbrojnë Shqipërinë nga gjithë ata miliarderë që i duket Shqipëria mizë lisi e mund të tallen”, tha Meta.

Gjatë konferencës për shtyp pas procesit të 30 qershorit, kreu i shtetit tha se dekretin e tij i fundit që caktoi datën 13 tetor për zgjedhjet lokal, nuk mund ta gjykojë Kolegji Zgjedhor, por vetëm Gjykata Kushtetuese e cila ende nuk është funksionale dhe pritet të krijohet në fund të korrikut.

“E ftoj z. Rama të tregohet i përgjegjshëm. I ftoj përfaqësuesit e huaj të mos bëhen qesharak. Të mos tallen me Kushtetutën tonë. Sepse u tallën njëherë në 2008-ën. Duhet t’i zgjidhim çështjet vetë këtu si burra shteti”, tha ai.

Ndërsa për reformën në drejtësi, Meta tha se, u shndërrua në “Ramaformë”.

I pyetur nëse po flet si kryetar i opozitës, Meta tha se, “kjo është një krizë e shtetit të së drejtës dhe kreu i shtetit është Presidenti dhe jo kryetari i qeverisë që ka përgjegjësi për unitetin e popullit, për pluralizmin politik dhe sidomos në momente krize të bëjë më të mirën që shqiptarët të mos përplasen e vriten për politikë”.

“Opozita ka axhendë Rama ik, unë Rama reflekto. Si kam kërkuar t’i lerë karrigen Lulit. Edhe Bashës i kam thënë mos iu shmangni institucioneve. Po t’i kishin dëgjuar më parë këshillat e mia, shumë më mirë do kishin dale dhe as 5 % e shqiptarëve s’do kishin dalë. Socialistët janë njerëzit që kanë dhënë më shumë për demokracinë. Nuk po i kërkoj Edit karrigen e tij. Të votohemi nga populli, nuk do asgjësojmë demokracinë se kemi frikë nga populli. Mos harroni, në këtë godinë, pyesni prof. Meidanin, kam ikur nga këtu vetëm për një arsye për të mos cënuar integrimin europian”, tha Meta.

Gjatë konferencës, Meta foli edhe për një grup të strukturuar që punon kundër interesave të Shqipërisë që e quajti PPPd.”P e madhe janë politikanët, P – Propaganda (mediet), P – policia jo si Polici e Shtetit, por rrugët policeske që ndiqen për të shantazhuar njerëzit si dhe d – diplomatët e huaj që kanë braktisur parimet perëndimore dhe raportojnë sipas qejfit të Ramës”./atsh

vijon….

Meta: Më 13 tetor zgjedhje të përgjithshme dhe për presidentin Read More »

Dritan Leli konfirmohet për një tjetër mandat në krye të bashkisë së Vlorës

Aktualitet, Lajmi i fundit / /

Dritan Leli u rikonfirmua sot për një tjetër mandat në krye të bashkisë së Vlorës.

Sipas rezultateve paraprake të KQZ-së, në përfundim të numërimit të votave në 220 kuti votimi, Dritan Leli rezulton fitues me 29,733 vota ose 94.21% të tyre.

Ndërsa kandidatja tjetër Valbona Mezini rezulton se ka marrë 1,827 vota/atsh

Dritan Leli konfirmohet për një tjetër mandat në krye të bashkisë së Vlorës Read More »

Votimet e qeta, pas bojkotit të opozitës tërheqin vëmendjen e medias ndërkombëtare

Aktualitet, Lajmi i fundit / /

Zgjedhjet e kundërshtuara lokale në Shqipëri u zhvilluan në qetësi të plotë, pavarësisht thirrjes për bojkot nga ana e opozitës së qendrës së djathtë të drejtuar nga Lulzim Basha, i cili nuk merr pjesë pasi ka akuzuar mazhorancën socialiste për parregullsi të rënda gjatë zgjedhjeve të kaluara, shkruante dje agjencia italiane e lajmeve, ANSA.

“Ajo që është më e rëndësishme sot është mësimi historik që kjo ditë do t’i japë të gjithëve, sepse, një herë e mirë do të konfirmohet se me popullin nuk luhet, se sovraniteti i popullit nuk është një fjalë boshe. Dhe kush tenton t’ia marrë popullit sovranitetin nuk ka asnjë fund tjetër përveç se fundit me dështim dhe me turp”, tha Rama duke dalë nga qendra e votimit.

”Selitë më të rëndësishme europiane dhe ambasada amerikane kanë dërguar në terren një numër vëzhguesish për të ndjekur procesin e votimit”, shton ANSA.

‘’Shqiptarët kanë votuar në zgjedhje si asnjë herë tjetër, pasi opozita i bojkotoi ato, ndërkohë që incidente të vogla ndodhën në disa qendra votimi’’, shkruan rrjeti informative britanik, BBC.

”Për muaj të tërë opozita ka zhvilluar protesta duke kërkuar dorëheqjen e kryeministrit si edhe zgjedhje të reja të përgjithshme”, shton ai.

”Zgjedhjet u bënë edhe pse kritikët i konsideruan ato si zgjedhje jo të duhura, duke marrë parasysh mungesën e konkurrencës”, thekson BBC.

”Zgjedhjet lokale në Shqipëri… u zhvilluan në qetësi të plotë dhe pa incidente serioze”, shkruan agjencia e njohur italiane e lajmeve, agenzinova.it.

”Shqipëria mënjanoi një konflikt të mundshëm të brendshëm që nga momenti kur lideri i opozitës së djathtë, Lulzim Basha, kërcënoi për bojkotimin e procesit zgjedhor dhe për moszhvillimin e tyre, por që përfundoi duke u kërkuar qytetarëve që të mos merrnin pjesë në zgjedhje”, thekson kjo agjenci.

”Zgjedhjet për kryetarët e bashkive shqiptare, të bojkotuara nga partitë e opozitës u zhvilluan paqësisht… Përfaqësitë europiane dhe Shtetet e Bashkuara të Amerikës u bënë thirrje partive shqiptare, që të shmangin dhunën gjatë zgjedhjeve”, shkruan gazeta britanike ”Daily Mail”.

”Bashkimi Europian, që do të vendosë në vjeshtë nëse do të fillojë bisedimet e pranimit me Tiranën, ka paralajmëruar politikanët e vendit se dhuna dhe grindjet mes dy palëve do të jetë në vëmendjen e tyre dhe se ato do të ndikojnë në rrugën e anëtarësimit të Shqipërisë në BE”, shton ”Daily Mail”./atsh

Votimet e qeta, pas bojkotit të opozitës tërheqin vëmendjen e medias ndërkombëtare Read More »

Goro: Sot fitoi Himara e bashkuar e së ardhmes

Aktualitet, Lajmi i fundit, Politike / /

Kryetari i bashkisë së Himarës, Jorgo Goro, kandidat i Partisë Socialiste fitues për një mandat të dytë pas përfundimit të numërimit të votave nga KQZ, theksoi të hënën se “sot fitoi Himara jonë, kudo në Lumin e Vlorës dhe në Lukovë, Himara e bashkuar e së ardhmes”.

Duke falënderuar çdo banor të Himarës , Goro shprehet se “falënderoj çdo votues që ditën e djeshme duke mos marrë parasysh temperaturat e larta, largësinë nga qendrat e votimit, për vetë pozitën e vështirë gjeografike të fshatrave në bashkinë tonë, përveç ndonjë “pengese artificiale” që ka të bëjë me prezencën e kundërshtarëve tanë politikë pranë qendrave të votimit (e paligjshme). Ata kundërshtarë, të cilët gjej rastin t’i ftoj publikisht të kontribuojnë, duke hedhur kështu matanë skepticizmin dhe kundërshtinë e tyre, kjo si një sfidë e re për ta bërë së bashku Himarën. Himarën që me rrugën e Lumit të Vlorës në zgjedhjet e ardhshme do të jetë një e bashkuar”.

“Himara që punon e gjitha për zhvillimin ekonomik të banorëve të saj, të çdo bindje apo përkatësie partiake, duke parë vetëm potencialet e saj të pakrahasueshme që i ka falur Zoti, të rralla dhe të veçanta, më e bukur sa më s’ka”, shprehet Goro.

Kreu i bashkisë së Himarës falënderoi gjithashtu çdo banor të bashkisë Himarë që nuk ndodhet në Shqipëri dhe që nuk mundi dot të ishte prezent për të votuar, por që ndjek me shqetësim dhe interes atë që ndodh në vendin tonë.

Po ashtu Goro uroi këshilltarët e rinj bashkiakë të çdo spektri që rezultoi fitues në këtë garë elektorale.

Sipas rezultateve të Komisionit Qendror të Zgjedhjeve pas përfundimit të numërimit të 38 kutive kandidati i Partisë Socialiste, për këtë bashki, Jorgo Goro ka fituar duke marrë gjithsej 4209 vota. /atsh

Goro: Sot fitoi Himara e bashkuar e së ardhmes Read More »

Në 24 bashki fitojnë kandidatët e PS, vijon numërimi në 37 të tjera

Aktualitet, Lajmi i fundit / /

Në 24 bashki, ka përfunduar numërimi i votave për kandidatët për kryetarë bashkiak dhe janë shpallur fituesit.

Kështu në Divjakë, Pustec, Memaliaj, Fushë-Arrëz, Konispol, Libohovë Kolonjë, Belsh, Himarë, Roskovec, Poliçan, Vorë, Lushnje, Skrapar, Prrenjas, Mallakastër, Malësi e Madhe, Pukë, Ura Vajgurora, Librazhdi, Gramshi dhe Tropoja, Selenicë, Has ka përfunduar procesi i numërimit të votave dhe është shpallur fituesi i votimeve lokale, ndërkohë që në 37 bashki vijon ende numërimi.

Nga të dhënat zyrtare të publikuara nga Komisioni Qendror të Zgjedhjeve në të gjithë territorin e Shqipërisë më 30 qershor votuan 771 863 qytetarë apo e përkthyer në përqindje në 21.6%.

Has
Fiton Liman Morina PS (4276 vota)

Divjakë

Fiton Fredi Kokoneshi PS (13513 vota)

Selenicë

Fiton Pëllumb Binaj PS (5819 vota)

Prrenjas

Fiton Nuri Belba PS (7054 vota)

Roskovec

Fiton Majlinda Bufi PS (7740 vota)

Vorë

Fiton Agim Kajmaku PS (6208 vota)

Fushë-Arrëz

Fiton Fran Tuci PS (2462 vota)

Kolonjë

Fiton Erion Isai PS (4279 vota)

Libohovë

Fiton Luiza Mandi PS (1275 vota)

Konispol

Fiton Shuaip Beqiri PS (3328 vota)

Belsh

Fiton Arif Tafani PS (6377 vota)

Poliçan

Fiton Adriatik Zotkaj PS (4681 vota)

Himarë

Fiton Jorgo Goro PS (4209 vota)

Malësi e Madhe

Fiton Tonin Marinaj PS (7,772 vota)

Gramsh

Fiton Klodian Taçe PS (8471)

Pukë

Fiton Gjon Gjonaj PS (3730 vota)

Ura Vajgurore

Fiton Juliana Mema PS (7,666 vota)

Tropojë

Fiton Rexhë Byberi PS (3538 vota)

Mallakastër

Fiton Qerim Ismailaj PS (5692 vota)

Librazhd

Fiton Kastriot Gurra PS (11383 vota)

Skrapar

Fiton Adriatik Mema PS (4505 vota)

Lushnje

Fiton Fatos Tushe PS (28086 vota)

Memaliaj

Fiton Gjolek Guci PS (4,206 vota)

Pustec

Fiton Pali Kolefski PS (1505 vota)/atsh

Në 24 bashki fitojnë kandidatët e PS, vijon numërimi në 37 të tjera Read More »